Mbá libro rí ma̱ndoo makruaʼaʼ

Biblia nindxu̱u̱ mbá libro wayuu wéñuʼ, gajkhun nindxu̱u̱ rúʼko̱. Nigi̱ʼdu̱u̱ nigumaraʼmáʼ náa Oriente Medio nákha 3,500 tsiguʼ. Nákha ikhú nirígá náa China la poderosa dinastía Shang, rí itháan wayuu rí nikujmaa nirígá. Ga̱jma̱a̱ mbá mil tsiguʼ nda̱wa̱á, budismo nigíʼdu̱u̱ náa India. (Atayáá náa kúgumaʼá “Rí na̱ʼkha̱ náa Biblia”.)

Mbá libro gíʼdoo numuu náa xa̱bu̱ á mu ra̱mingíjyúuʼ makruaʼaʼ ga̱jma̱a̱ á mu naxnáʼ xtágabu rí gíʼdoo numuu. Xúʼko̱ kaʼnii nindxu̱u̱ Biblia, nariʼña̱a̱ graxe̱ rí itháan gíʼdoo numuu náa xa̱bu̱.

Mbá xkri̱da, kuwa má xúʼko̱ xa̱bu̱ bi̱ nandún mbuyáá náa numuu rí kuwáanʼ. Ga̱jma̱a̱ rúʼko̱ naxtiʼña̱a̱ náa a̱jma̱ capítulo rí nagi̱ʼdu̱u̱ timbá libro ndrígóo Biblia: Génesis. Ikhí naʼthí rí “nákha ginii”, asndu nákha wajyúúʼ mbiʼi, ni̱jkha̱nú nirígá numbaaʼ, xúgíʼ dí rígá mekhuíí ga̱jma̱a̱ Ku̱ba̱ʼ (Génesis 1:1). Nda̱wa̱á naʼthí xú káʼnii Ku̱ba̱ʼ ni̱jkha̱ raguma májáánʼ, xú káʼnii ni̱jkha̱ rarígá vida ga̱jma̱a̱ xú káʼnii ni̱jkha̱nú nixtáa xa̱bu̱. Ma̱ngaa naʼthí náa numuu niguma xúgíʼ numbaaʼ.

LÁ MANDOO MAKRUAʼAʼ RÁʼ.

Biblia naxnúlú xtágabu rí nambáyulúʼ mu muʼnimbánii xkujndu rí nuraʼnílú mámbá mbiʼi. Xtágabu rígi̱ ra̱mingíjyúuʼ makruaʼaʼ ga̱jma̱a̱ a̱jma̱ numuu rí mbuʼyáá xúgi̱.

Ma̱ngaa nindxu̱u̱ kaʼwu, jmbu ga̱jma̱a̱ mitsaan. Tséjmuu ajngáa gakhii, mingíjyúuʼ o rí tsiniʼnuʼ xa̱bu̱, najmuu ajngáa ramiʼskho ga̱jma̱a̱ rí nuniʼnuʼ xa̱bu̱. Asndu náa ku̱ma̱ rí itháan gakhii najmaa ajngáa rí najmulú xúgíʼ mbiʼi.

Mbá xkri̱da, Jesús nijmuu rí xóo kuwa xa̱bu̱ mu maʼsngúún ikha rí markawo asndu náa a̱jkiu̱ún. Rígi̱ nakujmaa náa discurso rí nixná náa Kúbá, rí na̱ʼkha̱ náa capítulos 5 asndu 7 náa Evangelio ndrígóo Mateo. Mbáa naʼthí ga̱jma̱a̱ numuu Biblia niʼthí rí “nindxu̱u̱ mbá discurso phú májánʼ” rí “tséʼni majtíí náa edxu̱lúʼ i̱ndó ajngáa, rí naʼni, naxnúlú ikha ga̱jma̱a̱ naʼthí xú káʼnii gíʼmaa makuwáanʼ”. Maski ajndu ma̱ndoo matraxnuu capítulos rígi̱ káaʼ mbá 15 o 20 minutos, maguanáʼ tsiánguá índo̱ gáta̱ya̱a̱ nguáthá tsiakii gíʼdoo ajngáa ra̱mingíjyúuʼ rí niʼthí Jesús.

I̱mba̱ numuu dí ra̱mingíjyúuʼ makruaʼaʼ rí naʼthí náa Biblia, rí ikhí tséʼkha̱ raʼthí i̱ndó cuentos o rí minduwaʼ. Nirígá xóo eʼthí náa The World Book Encyclopedia: “Naʼthí rí nigiʼdu̱u̱n, niguaʼthi̱i̱n rí marigá nda̱wa̱á, nindáti̱gu̱u̱n ga̱jma̱a̱ rí niʼngu̱u̱n xa̱bu̱ gíníi ma̱ngaa xa̱bu̱ bi̱ niguáʼdáá numún”. Mbáa ikháanʼ kuwaanʼ xóo niguaʼnii ikhiin. Ma̱ngaa ra̱mingíjyúuʼ makru̱ʼu̱lú ga̱jma̱a̱ naʼsngúlúʼ mbaʼa ikha rí gíʼdoo numuu (Romanos 15:4).

RÍGÁ MBUYÁÁ XÚGÍNʼ

Mu makruaʼaʼ mbá libro, ndayóoʼ magumaraʼmáʼ náa ajngáa rí ikháánʼ najmañaʼ. Biblia ma̱ndoo mataxkamaa náa ajngáa rí ikháánʼ nakruaʼaʼ, tséʼniuu náa má xtaa ikháánʼ. Xú káʼnii erígá rígi̱ rá.

Nutajuíi. Náa ajngáa rí phú nigumaraʼmáʼ Biblia nindxu̱u̱ hebreo, arameo ga̱jma̱a̱ griego. Mú rígi̱ niʼni rí nguéjmi̱i̱n xa̱bu̱ ma̱ndoo muraxnuu. Naʼni mba̱yu̱ʼ tsiguʼ rí mbaʼin xa̱bu̱ bi̱ nutajuíi Biblia muñajunʼ gakhii wéñuʼ mu marigá náa i̱ʼwáʼ ajngáa. Ga̱jma̱a̱ ñajunʼ rí nuni xa̱bu̱ bugi̱, Biblia nitajuíi káxi̱ o tapha náa mbá 2,700 ajngáa. Rígi̱ nandoo gáʼthúu̱n rí itháan rí 90% xa̱bu̱ bi̱ kuwa náa xúgíʼ numbaaʼ nandoo nuraxnuu Biblia mbá tapha o káxi̱ náa ajngún.

Najuixnaraʼa. Náa phú nigumaraʼmáʼ Biblia tájyúu mba̱yu̱ʼ xóo papiro ga̱jma̱a̱ xtá. Mu xándáti̱ga̱ ajngáa ndrígóo ndiyóoʼ muniriyaaʼ ga̱jma̱a̱ ñawúunʼ mbaʼa nuthu. Rígi̱ minumuu wéñuʼ ga̱jma̱a̱ raʼkháa xúgínʼ xa̱bu̱ naʼngu̱u̱n nutsi. Mú índo̱ Gutenberg niʼni kumaa imprenta, naʼni itháan rí 550 tsiguʼ, Biblia nijuixnaraʼa nacha̱ wéñuʼ. Asndu mbiʼi xúgi̱ niguma imprimir Biblia itháan rí witsu mil millones.

Nda̱a̱ imbo̱o̱ libro rí nitajuíi náa mbaʼa wéñuʼ ajngáa ga̱jma̱a̱ nijuixnaraʼa wéñuʼ xóo Biblia. Nindxu̱u̱ mbá libro rí ma̱ndoo muguaʼdáá xúgínʼ xa̱bu̱ numbaaʼ. Maski ajndu maʼni mingíjyúuʼ makru̱ʼu̱lú, mú rígá rí ma̱ndoo mambáyulúʼ. Xú káʼnii nindxu̱u̱ rá. Náa gándoo mataxkamaa rá. Atayáá náa i̱mba̱ artículo.