Xú káʼnii mbiʼyuu Dios rá.

Mbáa índo̱ nandulú muniʼnííʼ mbáa ginii nuraxi̱i̱: “Xú káʼnii mbiʼyáá rá.” Á mu nandoo muʼni̱i̱ graxe̱ rúʼko̱ Dios, ndiéjunʼ gariʼñulú xá.

“Ikhúúnʼ ni̱ndxu̱ʼ Jeobá. Xúʼko̱ mbiʼyuʼ” (Isaías 42:8).

Lá nitadxuun mbá miʼtsu mbiʼyuu xáʼ. Mbáa na̱nguá, numuu rí mbaʼin bi̱ nutajuíi Biblia tájmun wéñuʼ, o tájmun mbá kayuʼ. Mbaʼa nuthu nuriʼkuíí xóo TÁTÁ. Mú, mbiʼyuu Dios nakujmaa itháan rí mbá juwan mil nuthu náa i̱yi̱i̱ʼ ndrígóo Biblia rí niguma nákha ginii. Náa a̱jkhu̱u̱n letras hebreas rí nigumaraʼmáʼ xóo YHWH o JHVH, ga̱jma̱a̱ nijmaa náa ajngáa me̱ʼpha̱a̱ xóo “Jeobá”.

Mbiʼyuu Dios nakuʼma náa ajngáa hebreo ga̱jma̱a̱ náa i̱ʼwáʼ Biblia rí nijuiʼtájuíi.

NDÍJKHA JNGÓ GÍʼDOO WÉÑUʼ NUMUU MBIʼYUU DIOS

Gíʼdoo numuu eʼyoo Dios. Nimbáa táxnúu mbiʼyuu Dios; ikhaa má niraʼwíí, Jeobá naʼthí: “Rígi̱ nindxu̱u̱ mbiʼyuuʼ asndu kámuu mbiʼi, ga̱jma̱a̱ xúgi̱ kaʼnii garmáʼáan a̱jkiu̱ún kuyoʼ e̱ji̱n bi̱ gaguwáʼ nda̱wa̱á” (Éxodo 3:15). Náa Biblia, nakujmaa mbiʼyuu Dios mbaʼa nuthu xóo título, bi̱ gíʼdoo xúgíʼ tsiakii, Anu̱lú, Tátá o Dios, ga̱jma̱a̱ nakujmaa itháan ki xóo mbiʼyuu Abrahán, Moisés, David o Jesús. Mú, Jeobá nandoo rí muniʼnuʼ mbiʼyuu. Náa Biblia naʼthí: “Mu xa̱bu̱ mbuyáá rí ikháán mbiʼyaaʼ Jeobá, i̱ndó ikháán ni̱ndxa̱ʼ bi̱ phú Mba̱a̱ náa xúgíʼ tsu̱du̱u̱ ku̱ba̱ʼ” (Salmo 83:18).

Gíʼdoo numuu eʼyoo Jesús. Rí najmaʼnuʼ náa tsajkhun padrenuestro, Jesús niʼsngúún xa̱bi̱i̱ rí xóo mutajkáan náa Dios ga̱jma̱a̱ ajngáa rígi̱: “Gaguma kaʼwi̱i̱ mbiʼyaaʼ” (Mateo 6:9). Ga̱jma̱a̱ Jesús niʼthá kháñuu Dios: ‹Anu̱ʼ, atani mba̱a̱ mbiʼyaaʼ› (Juan 12:28). Mú xó má Jesús, rí maʼni kaʼwi̱i̱ mbiʼyuu Dios, gíʼdoo itháan numuu náa vida ndrígóo. Ikha jngó nindoo niʼthún: ‹Ikhúúnʼ nisngájmun mbiʼyaaʼ, ga̱jma̱a̱ maʼni rí muninuwínʼ› (Juan 17:26).

Gíʼdoo numuu eyáá bi̱ nuniʼniiʼ Dios. Xa̱bi̱i̱ Dios bi̱ nikuwa nákha ginii nduyáá rí i̱ndó mbiʼyuu Dios mañewu̱u̱n ga̱jma̱a̱ maʼni káwíin. Mbáa dí ikhaa ndiʼyoo májánʼ: Rí “mbiʼyuu Jeobá nindxu̱u̱ xóo mbá torre gujkhuʼ, ikhí nagayutoʼo xa̱bu̱ jmbi ga̱jma̱a̱ numbayíí”. Ga̱jma̱a̱ imba̱a̱ niʼthí: “Xúgínʼ bi̱ nugríga̱a̱ mbiʼyuu Jeobá makáwíin” (Proverbios 18:10; Joel 2:32). Náa Biblia nasngájma rí mbiʼyuu Dios masngájmiin tsíin ni̱ndxu̱ún xa̱bi̱i̱. “Numuu rí xúgíʼ xuajin, majngruigu̱u̱n ga̱jma̱a̱ mbiʼyuu dios ndrígu̱ún; mú ikháanʼxu, majngruiguxuʼ ga̱jma̱a̱ mbiʼyuu Jeobá Dios ndrígúxu̱ asndu kámuu mbiʼi” (Miqueas 4:5; Hechos 15:14).

NDIÉJUNʼ ESNGÁJMA MBIʼYUU XÁ.

Najmaʼnuʼ rí mbiʼyuu Dios nindxu̱u̱ mbóó. Mbaʼin xa̱bu̱ bi̱ najmañún nuthi rí mbiʼyuu Jeobá nandoo gáʼthúu̱n “Ikhaa Naʼni dí Marigá”. Rí xóo Jeobá niʼthúu̱n Moisés nambáyulúʼ makru̱ʼu̱lú xú káʼnii eyoo gáʼthúu̱n mbiʼyuu. Dios niʼthí: “Ikhúúnʼ maʼgánú mani̱ndxu̱ʼ xóo má eyoʼ ikhúúnʼ” (Éxodo 3:14). Ikha jngó, mbiʼyuu naʼsngúlú rí ikhaa nindxu̱u̱ bi̱ niʼni xúgíʼ, bi̱ naʼni rí maʼga̱nú marigá xúgíʼ. Ma̱ngaa, naʼsngúlú rí ikhaa ma̱ndoo maʼni o ma̱ndoo maʼni rí xúgíʼ rí niʼni maʼga̱nú maʼni asndu ndiéjunʼ má, mu mambanúu rí naʼthí. Maski ajndu título ndrígóo naʼthí xú káʼnii xa̱bu̱ nindxu̱u̱, xóo Xa̱bu̱ Ñajunʼ o gíʼdoo tsiakii, rí asndu i̱ndó mbiʼyuu Jeobá, naʼthí xúgíʼ xóo nindxu̱u̱ ga̱jma̱a̱ rí maʼga̱nú maʼni.

Nasngájmulúʼ rí Dios naxmiéjunʼ kaʼyulú. Rí xóo nandoo gáʼthúu̱n mbiʼyuu Dios nasngájma rí nandoo kaʼyoo xúgíʼ rí niʼnii, asndu ma̱ngaa. Mú índo̱ Dios naʼthúlúʼ xú káʼnii mbiʼyuu nasngájma rí nandoo muniʼnííʼ. Ikhaa niʼthúluʼ ginii xú káʼnii mbiʼyuu, asndu nákha xóó tséraximíjna̱lú xóo phú mbiʼyuu. Gajkhun rí Dios na̱nguá eyoo rí mundxa̱ʼwa̱míjna̱lú rí xtáa mitsínguánʼ náa ikháanʼlu, rí gíʼmaa mbuʼyáá rí gajkhun xtáa náa rí ma̱ndoo muxuʼmamíjná (Salmo 73:28).

Índo̱ najmulú mbiʼyuu, nusngájma rí nandulú kuʼyáá. Atatsaʼwáminaʼ rí ikháán nandaʼ mambaxáʼ ga̱jma̱ʼ mbáa ga̱jma̱a̱ naratháán rí maʼtháanʼ ga̱jma̱a̱ mbiʼyaaʼ. Xú káʼnii gátatsaʼwamínáʼ á mu tsíyoo gájmuu mbiʼyaaʼ xáʼ. Mbáa matagíʼdi̱i̱ matatsaʼwamínáʼ rí tsíyoo mambaxáʼ ga̱jma̱ʼ. Ikhaa má kayuʼ rígá ga̱jma̱a̱ numuu Jeobá. Ikhaa niʼthúluʼ xú káʼnii mbiʼyuu ga̱jma̱a̱ nandoo rí majmulúʼ. Índo̱ nuʼni nusngájma rí nandulú mu̱ʼgua̱ kanuu náa ikhaa. Náa Biblia naʼthí rí Dios ndaʼyoo tsíin endxaʼwamíjna̱ ga̱jma̱a̱ numuu mbiʼyuu (Malaquías 3:16).

Rí matayáá xú kaʼnii mbiʼyuu Dios gíʼdoo wéñuʼ numuu rí matagíʼdi̱i̱ matatsinii. Mú rákha̱ i̱ndó mbiʼyuu gíʼmaa mbuʼya. Gíʼmaa muniʼniiʼ xú kaʼnii xa̱bu̱ nindxu̱u̱.