Lá gajkhun nikháñuu Jesús ga̱jma̱a̱ numuʼ ráʼ.

NÁA Biblia nigumaraʼmáʼ tikhu ajngáa ndrígu̱ún xa̱bu̱ bi̱ niguáʼdáá “a̱jkiu̱u̱n xó má ikháanʼ” (Sant. 5:17). Mbá xkri̱da, apóstol Pablo niʼthí mbájmbu: “Índo̱ nandoʼ mani rí jmbu, dí ra̱májánʼ rígá náa ikhúúnʼ. [...] ¡Ra̱ʼkhá tháán migínuun xa̱bu̱ ni̱ndxu̱ʼ!”. (Rom. 7:21-24). Mbáa mangáán nakumulú xúʼko̱ kaʼnii. Índo̱ nuʼni tsiakimijna ga̱jma̱a̱ aʼkháʼ ndrígúlú, rí xó nikumu̱u̱ ikhaa nambáyulú makuwáanʼ májánʼ.

Pablo ma̱ngaa niʼthí rí nikumu̱u̱ ga̱jma̱a̱ numuu tsigijñaʼ ndrígóo Jesús. Náa Gálatas 2:20 niʼthí: “A̱ʼdióo Dios [...] bi̱ nindoo kaʼyoʼ ma̱ngaa nixnáximinaʼ ga̱jma̱a̱ numuʼ”. Ikhaa niʼnimbo̱o̱ xúgi̱ rígi̱. Lá nundxa̱ʼwa̱míjna̱ mangáán xóo ikhaa xáʼ. Mbáa nguáná naʼniulú mingíjyúuʼ.

Á mú kuwáanʼ ru̱ʼni̱ tsiakimijna ga̱jma̱a̱ numuu aʼkháʼ rí niʼni nákha wajyúuʼ, mbáa nguáná maʼniulú mingíjyúuʼ mbuʼyáá rí Jeobá nandoo kaʼyulú ga̱jma̱a̱ rí niʼni mba̱a̱ a̱jkiu̱u̱n kaʼyulú. Mbáa naʼniulú mingíjyúuʼ makru̱ʼu̱lú rí niʼtsiwáanʼ Cristo nindxu̱u̱ mbá rí nimínáanʼlu Dios náa mámbáa rí ikháanʼ. Lá Jesús nandoo rí ikháanʼ mbuʼyáá xúʼko̱ kaʼnii ráʼ. Á mú xúʼko̱, ndiéjunʼ gambáyulú mu xákumulú xúʼko̱ kaʼnii rá. Guriʼña̱a̱ a̱jma̱ graxe̱ rígi̱.

XÓO EʼYOO JESÚS RÍ NIXNÁXIMINAʼ

Jesús nandoo rí ikháanʼ mbuʼyáá náa rí nixnáximinaʼ nindxu̱u̱ xóo mbá rí ikhaa nimínáanʼlu náa mambáa rí ikháanʼlu. Náa numuu nduʼyáá rí xúʼko̱ nindxu̱u̱ rá. Gundxaʼwamíjna̱ ga̱jma̱a̱ numuu rí naʼthí náa Lucas 23:39-43. Mbáa xa̱biya̱ bi̱ frájkhaa náa nijniun Jesús niʼthí rí ikhaa gajkhun má nikudaminaʼ aʼkháʼ. Mbáa rí niʼni, ninindxu̱u̱ mbiiʼ wéñuʼ, numuu rí xúʼko̱ nakháñun xa̱bu̱ bi̱ ra̱míjíinʼ kayuuʼ. Xtáa gíná ga̱jma̱a̱ rí xú kaʼnii xtáa ramínuuʼ, ikhú naʼthúu̱n Jesús: “Garmáʼáan a̱jkia̱nʼ xta̱yo̱ʼ índo̱ gáta̱ʼa̱ʼ náa reino ndrígáʼ”.

Ndiéjunʼ niriʼña̱a̱ Jesús rá. Gundxaʼwamíjna̱ xóo nirígá mbiʼi rúʼko̱, Ikhaa ga̱jma̱a̱ tsiakii nirtangaa edxu̱u̱ mu ma̱ndoo mayexu̱u̱ xa̱bu̱ bi̱ ra̱májánʼ bugi̱. Maski ajndu na̱jkha̱ rakháñuu, mú ikhaa naríyaʼ xúgíʼ tsiakii ndrígóo mu manduʼwá, mu maʼni rí maʼni̱i̱ a̱jkiu̱u̱n xa̱bu̱ ga̱jma̱a̱ niʼthúu̱n: “Xúgi̱ natha̱nʼ gajkhun: Maraxtaa ga̱jma̱á ni̱ndxu̱ʼ náa ku̱ba̱ʼ mitsaanʼ”. Jesús ma̱ndoo maʼthí, A̱ʼdióo xa̱biya̱ ni̱ʼkha̱ mu “maxná vida ndrígóo mu maʼtsiwíin mbaʼin xa̱bu̱” (Mat. 20:28). Mú táʼni xúʼko̱ kaʼnii, nimbáyúu xa̱bu̱ bugi̱ mbaʼyoo rí ikhaa naxnáximinaʼ nindxu̱u̱ mu ma̱ndoo makríyaaʼ ikhaa. Niʼthúu̱n “Maraxtaa ga̱jma̱á ni̱ndxu̱ʼ” ma̱ngaa niʼni mbaʼyoo rí ga̱jma̱a̱ numuu rúʼko̱, ikhaa ma̱ndoo maxtáa náa ku̱ba̱ʼ mitsaan.

Xa̱bu̱ ra̱májánʼ buʼko̱ tágiʼdoo mbiʼi mu maʼni ñajuunʼ Dios. Mú, Jesús niʼni mbaʼyoo rí ga̱jma̱a̱ numuu rí makhañúu ikhaa, xa̱bu̱ bugi̱ ma̱ndoo magruigú rí májánʼ. Ikha jngó, á mu Jesús nindoo rí xa̱bu̱ bugi̱ makro̱ʼo̱o̱ rígi̱, xúʼko̱ má nandoo rí xa̱bu̱ bi̱ nijngúun má iyááʼ bi̱ naʼni ñajuunʼ Dios makro̱ʼo̱o̱ rígi̱. Ikha jngó, ndiéjunʼ gándoo gambáyulú mbuʼyáá rí nixnáximinaʼ Cristo gajkhun rí nambáyulúʼ náa mámbáa rí ikháanʼ maski ajndu nixuʼdámíjná aʼkhá nákha ginii rá.

RÍ NIMBÁYUU PABLO

Pablo ndiʼyoo májánʼ rí Jesús nikháñuu ga̱jma̱a̱ numuu ikhaa numuu rí nixnúu ñajunʼ rí maʼtáraʼa. Niʼthí: “Naxna̱a̱ núma̱aʼ Cristo Jesús Señor ndrígúlú, rí nixnúʼ tsiakii, numuu rí ndiʼyoo rí ni̱ndxu̱ʼ jmbii ga̱jma̱a̱ nixnúʼ mbá ñajunʼ mani. Maski ajndu nákha ginii nitha wéñuʼ eʼwíínʼ ga̱jma̱a̱ nixkúún ga̱jma̱a̱ ninindxu̱ʼ mbáa xa̱bu̱ bi̱ na̱nguá nigiʼdoo gamajkhu” (1 Tim. 1:12-14). Rí Jesús nixnúu ñajunʼ rúʼko̱, niʼni mbaʼyoo rí niʼni mba̱a̱ a̱jkiu̱u̱n kaʼyoo, rí nandoo kaʼyoo ga̱jma̱a̱ ndiʼyoo rí ikhaa maʼngo̱o̱ maʼnimbánuu ñajunʼ rúʼko̱. Xúʼko̱ má mangáán, Jesús nixnulú ñajunʼ rí muʼtáraʼa ajngáa ndrígóo Reino (Mat. 28:19, 20). Lá mangáán nakumulú xó má Pablo rá.

Guʼyáá rí nigíʼnuu Albert, bi̱ ni̱jkha̱ rexa̱a̱ mbá treinta y cuatro tsiguʼ mu nda̱wa̱á nitanga̱a̱. Ikhaa naʼthí: “Aʼkhá rí nikuʼdáminaʼ na̱ʼkha̱a̱ má xúʼko̱ náa edxu̱ʼ. Mú índo̱ na̱jkhá gátaráʼa, naku̱mu̱ʼ xóo Jesús nixnuʼ mbá ñajunʼ rí ndayóoʼ mataraʼa, xó má Pablo. Rígi̱ naʼni rí maxtáá gagi ga̱jma̱a̱ rí mandxa̱ʼwa̱mína̱ʼ náa rí májánʼ xúgi̱ ga̱jma̱a̱ rí makhánúʼ nda̱wa̱á” (Sal. 51:3).

Allan ninindxu̱u̱ mbá xa̱bu̱ ra̱májánʼ ga̱jma̱a̱ niʼni mbaʼa dí ra̱májánʼ nákha xóó tséninuunʼ rí gajkhun. Ikhaa naʼthí: “Kaʼníí xóó nandxa̱ʼwa̱mínáʼ náa dí ra̱májánʼ rí nini. Ga̱jma̱a̱ rúʼko̱ naʼni maxtáá gíná. Mú naxnáá núma̱aʼ Jeobá numuu rí niniñuuʼ mbáa xa̱bu̱ aʼkhá xóo ikhúún maʼthúún ajngáa rí májánʼ eʼwíínʼ xa̱bu̱. Rí xóo nuriʼña xa̱bu̱ ga̱jma̱a̱ ajngáa rí na̱jkhá ka̱yo̱ʼ naʼni mba̱yo̱o̱ rí Jeobá nindxu̱u̱ májáanʼ wéñuʼ. Naku̱mu̱ʼ rí ikhaa najmiuu ikhúún mu mambáñún xa̱bu̱ bi̱ ni̱ndxu̱ún xóo má ikhúún nákha ginii”.

Rí muʼtáraʼa má xúʼko̱ nambáyulú rí majmulúʼ tsiakii ndrígúlú muʼni rí májánʼ ga̱jma̱a̱ rí mundxa̱ʼwa̱míjna̱ náa rí májánʼ. Ma̱ngaa naʼni mbuʼyáá rí Jesús niʼni mba̱a̱ a̱jkiu̱u̱n kaʼyulú, nandoo kaʼyulú ga̱jma̱a̱ naku̱mu̱u̱ kaʼyulú.

JEOBÁ ITHÁAN MBA̱A̱ KI XÓO A̱JKIU̱LÚ

Mbáa a̱jkiu̱lú maʼni gínáanʼ má xúʼko̱ ga̱jma̱a̱ numuu aʼkhá rí niʼni nákha ginii asndu índo̱ gámbáa numbaaʼ xkawiʼ ndrígóo Gixa̱a̱ rígi̱. Mú ndiéjunʼ gambáyulú muʼni gajmiúlú ku̱ma̱ rígi̱ rá.

Jean nagawúunʼ má xúʼko̱ numuu rí táʼni xóo gíʼmaa nákha ninindxu̱u̱ mbáa dxámá. Mú ikha naʼthí: “Naniguʼ wéñuʼ mba̱yo̱o̱ rí ‹Dios itháan mba̱a̱ ki xóo a̱jkiu̱lú›” (1 Juan 3:19, 20). Ikháanʼ mangáanʼ naʼni̱i̱ a̱jkiu̱lú índo̱ nduʼyáá rí Jeobá ga̱jma̱a̱ Jesús nakru̱ʼu̱u̱n rí ikháanʼ ni̱ndxu̱lú xa̱bu̱ aʼkhá. Garmáʼáan a̱jkiu̱lú rí ngajua nixkaxi̱i̱ Jeobá rí makunguanʼ Jesús mu makhañúu, mu xúʼko̱ ma̱ndoo majngudi̱i̱ aʼkhá ndrígúlú (1 Tim. 1:15).

Mbuʼyáá gajkhun rí nikháñuu Jesús nindxu̱u̱ mbáa rí ikhaa nimínaaʼ náa mámbáa rí ikháanʼ á mu nuʼni rígi̱: Rí mundxa̱ʼwa̱míjna̱ xú kaʼnii Jesús niʼni gajmíi̱n xa̱bu̱ aʼkhá ga̱jma̱a̱ rí muʼnimíjna̱ muʼnimbánii ñajunʼ rí muʼtáraʼa rí ikhaa nixnulú. Á mu nuʼni xúʼko̱ ma̱ndoo muʼthá xó má niʼthí Pablo: Jesús “nindoo kaʼyoʼ ma̱ngaa nixnáximinaʼ ga̱jma̱a̱ numuʼ”.