Náa Najuiʼsngáa xú Mi̱ʼtháraʼa Májánʼ tsiguʼ 2015 mambáyulúʼ muʼsngáa itháan májánʼ

¹ David niʼnirámáʼ: “Gaʼga̱nú mani̱ndxu̱u̱ májánʼ ajngáa dí nagájnuu náa rawunʼ ga̱jma̱a̱ rí nandxa̱ʼwa̱mínáʼ náa inaʼ ikháánʼ Jeobá, náa nambáyuminaʼ ga̱jma̱a̱ bi̱ naʼni kríñunʼ” (Sal. 19:14). Ikháanʼ mangáanʼ nandulúʼ rí manigu̱ʼ Jeobá ajngáa rí nuʼthá ga̱jma̱a̱ nduʼyáá rí gíʼdoo wéñuʼ numuu muʼthá dí gajkhun índo̱ na̱jkua̱ gúʼtaraʼa ga̱jma̱a̱ náa guʼwá nagimbáanʼ. Jeobá najmuu xó má náa Najuiʼsngáa xú Mi̱ʼtháraʼa Májánʼ mu maʼni ratha̱nʼ índo̱ mu̱ʼgua̱ gúʼtaraʼa. Rígi̱ naguma mámbá xmáná náa itháan rí mbá 111,000 guʼwá náa nagimbáanʼ dí rígá náa xúgíʼ numbaaʼ ga̱jma̱a̱ nambáñun xúgínʼ xa̱bu̱ mu maguánu musngáa itháan májánʼ ga̱jma̱a̱ muni rí xa̱bu̱ mugíʼ muni rí kuwa rajmañún, mbuyáá xú káʼnii gíʼmaa muthi ga̱jma̱a̱ xámiñun índo̱ gúthi (Hech. 19:8; Col. 4:6).

² Awan dí nagájnuu náa najuiʼsngáa tsiguʼ 2015 mbuʼyáá rí na̱ʼkha̱ raʼthí náa folleto Gajmañaʼ rí naʼthí Ajngá rawunʼ Dios, Ajngáa rí májánʼ na̱ʼkha̱ náa Dios, Mandoo mambaxulúʼ májánʼ gajmiulúʼ Dió ma̱ngaa Atadxawíín Diúu̱ ga̱jma̱a̱ araxtaa kámuu mbiʼi. Imbo̱o̱ dí nixtiʼkhu̱u̱ nindxu̱u̱ rí ni xájyúuʼ mixná kiʼsngáa dí nagájnuriyoʼ itháan dí na̱ʼkha̱ raʼthí náa Biblia ga̱jma̱a̱ ñajunʼ rí najuixnáá maʼni mbáa número 1. Rí nixtiʼkhu̱u̱ rígi̱ ga̱jma̱a̱ i̱ʼwáʼ xú maguma náa najuiʼsngáa maʼthúlú náa i̱ʼwáʼ kutriga̱.

³ Kiʼsngáa dí nagájnuriyoʼ itháan náa Biblia. A̱ngiu̱lú bi̱ muxna níʼkhóo rígi̱ maguaʼdáá a̱jma̱ minutos mu muthi mbóo punto dí nagájnuriyoʼ itháan náa Biblia xmáná rúʼko̱. Mu muthi mbá rí mambáyúu congregación ndayóoʼ muniratamijná májánʼ wéñuʼ mu xánujngún tiempo rí nikhánún. Nda̱wa̱á, bi̱ kuwa ikhí muthi xó má eni, nakhánun mbá majun minutos mu muthi mbá 30 segundos o menos tikhuu puntos dí niraxnuu náa Biblia xmáná rúʼko̱. Ndajyúuʼ mu matanirataminaʼ májánʼ ga̱jma̱a̱ ndayóoʼ muni mbá tsiakii mu muthi 30 segundos mbá rí ninigu̱nʼ ga̱jma̱a̱ rí mambáñún bi̱ kuwa ikhí. Májánʼ rí maguma xúgi̱, numuu rí mbaʼin a̱ngiu̱lú ma̱ndoo muthi rí niriyaʼ índo̱ ninigajmaa.

⁴ Ñajunʼ rí najuixnáá maʼni mbáa número 1. Awan rí nigájnuu mu magixnuu Biblia niʼni̱i̱ ajtsú minutos o menos ga̱jma̱a̱ xágiʼdoo mbaʼa versículo dí magixnuu. Bi̱ najuiʼthún muraxnuu gíʼmaa dí muraxnuu gakhii mbaʼa nuthu ga̱jma̱a̱ mbuyáá májánʼ xú muthi mámbá ajngáa ga̱jma̱a̱ dí mawán kaʼwu rí muraxnuu mu xúʼko̱ makru̱ʼu̱u̱n eʼwíínʼ. Xúgínʼ bi̱ nutaraʼa numuu Jeobá gíʼmaa muni mbá tsiakii dí muraxnuu májánʼ, numuu rí magixnuu gíʼdoo wéñuʼ numuu dí mbuyamajkuíí Jeobá. Nadxulú wéñuʼ rí e̱ji̱n bi̱ kuwa náa guʼwá nagimbáanʼ najmañún nuraxnuu májánʼ. Xa̱bu̱ bi̱ guáʼdiin e̱jñún ndayóoʼ miʼthúún ajngáa dí maʼnii a̱jkiu̱ún numuu dí numbañún e̱jñún muraxnuu májánʼ.

⁵ Ñajunʼ rí najuixnáá maʼni mbáa número 2. Rígi̱ maxná witsu minutos mbáa ndxájulú a̱ʼgo̱. Ndxájulú a̱ʼgo̱ gíʼmaa maxná discurso xó má kayá edxu̱u̱ i̱yi̱i̱ʼ rí nikhánúu. Índo̱ kaʼyoo maxná ga̱jma̱a̱ folleto Gajmañaʼ rí naʼthí Ajngá rawunʼ Dios, gíʼmaa maʼthí xó má náa ejkha̱ gáʼtaraʼa ga̱jma̱a̱ maxná xó má eriʼña xa̱bu̱ náa territorio ndrígóo congregación. Índo̱ asignación nagájnuu náa i̱mba̱ i̱yi̱i̱ʼ, gíʼmaa mbayáaʼ rí maʼthí náa má nijuiʼtháán ma̱ngaa mbaʼyáaʼ eʼwáʼ texto rí majmuu. Ma̱ndoo majmuu imbo̱o̱ texto ndrígóo Biblia rí nambánii ga̱jma̱a̱ rí kayá edxu̱u̱. Superintendente bi̱ kayá edxu̱u̱ náa najuiʼsngáa mbayáaʼ mbáa bi̱ mambáyúu ndxájulú a̱ʼgo̱.

⁶ Ñajunʼ rí najuixnáá maʼni mbáa número 3. Rígi̱ maxná witsu minutos mbáa ndxájulú xa̱biya̱ o mbáa ndxájulú a̱ʼgo̱. Á mu mbáa ndxájulú a̱ʼgo̱ gáxná, gíʼmaa maxná xó má e̱ʼkha̱ raʼthí náa ñajunʼ rí najuixnáá maʼni mbáa número 2. Índo̱ gáxná mbáa ndxájulú xa̱biya̱, gíʼmaa maxná xóo mbá discurso á mu nagájnuu náa i̱ʼwáʼ i̱yi̱i̱ʼ, ga̱jma̱a̱ gíʼmaa mandxaʼwáminaʼ xú káʼnii gúni a̱ngiu̱lú bi̱ kuwa náa congregación. Bi̱ manújngoo gíʼmaa mbayááʼ rí maʼthí náa má nijuiʼtháán ma̱ngaa mbayááʼ eʼwáʼ texto rí majmuu.

⁷ Imbo̱o̱ nuxi̱ʼ xóo mixná discurso número 3.Índo̱ mbáa ndxájulú xa̱biya̱ kaʼyoo maxná ga̱jma̱a̱ folleto Gajmañaʼ rí naʼthí Ajngá rawunʼ Dios, gíʼmaa maxná xóo índo̱ nunigajmaa mbá guʼwíin o índo̱ na̱jkha̱ gáʼtaraʼa. Bi̱ mambáyúu ndxájulú gíʼmaa maʼni mbáa bi̱ xtáa náa goʼwóo o mbáa ndxájulú xa̱biya̱ bi̱ náa guʼwá nagimbáanʼ. Mú nguáná, superintedente bi̱ kayá edxu̱u̱ náa najuiʼsngáa maʼthúu̱n tsáa ganújngoo ga̱jma̱a̱ ndxájulú ma̱ngaa xú phú gáʼni. Náa presentación, ma̱ndoo majmuu imbo̱o̱ texto ndrígóo Biblia rí nambánii ga̱jma̱a̱ rí kayá edxu̱u̱. Nguáná, ñajunʼ rígi̱ mixná maʼni mbáa bi̱ nayéjkha̱ edxu̱u̱, ma̱ndoo mbayáaʼ ikhaa tsáa gámbáyúu ga̱jma̱a̱ xú gáʼni. Mambáyúu wéñuʼ congregación dí mbaʼyoo xú káʼnii ejmañún musngáa bi̱ kuya̱ edxu̱u̱ índo̱ nanújngun gajmiún mbáa bi̱ xtáa náa guʼwún o imba̱a̱ ndxájulú.

⁸ Xtágabu. Superintendente bi̱ kayá edxu̱u̱ náa najuiʼsngáa majmuu a̱jma̱ minutos mu maʼthí mbá rí májánʼ dí niʼni bi̱ ninújngoo ga̱jma̱a̱ maxnúu mbá xtágabu rí mambáyúu rí na̱ʼkha̱ náa libro Benefíciese. Índo̱ superintendente bi̱ kayá edxu̱u̱ náa najuiʼsngáa maʼthí rí manújngoo imba̱a̱, xáʼthi náa xtáa rañajunʼ. Mú, nda̱wa̱á rí niguámbóo, maʼthúu̱n rí májánʼ niʼni ga̱jma̱a̱ maʼthí náa xtáa rañajunʼ. Ma̱ngaa, maʼthí náa numuu rí májánʼ niʼni o maʼthúu̱n ga̱jma̱a̱ gamajkhu ndíjkha rí ndayóoʼ mañajunʼ itháan náa má xtáa rañajunʼ.

⁹ Bi̱ nanújngun gúxna discurso ma̱ndoo muxkamaa mbá lista dí xú káʼnii muñajunʼ dí na̱ʼkha̱ náa ináa 79 asndu 81 ndrígóo libro Benefíciese. Nda̱wa̱á rí niguámbá reunión, índo̱ niguámbóo nixná discurso bi̱ kaʼyoo, superintendente bi̱ kayá edxu̱u̱ náa najuiʼsngáa maʼnirámáʼ mbá nota náa libro ndrígóo bi̱ ninújngoo ga̱jma̱a̱ maraxu̱u̱ i̱ndó ikhaa á mu niʼni ejercicio rí kaʼyoo náa xtáa rañajunʼ. Ma̱ndoo maʼthúu̱n ikhaa má mbiʼi rúʼko̱ o imbo̱o̱ mbiʼi dí májánʼ niʼni ga̱jma̱a̱ maxnúu xtágabu rí mambáyúu. Gíʼdoo wéñuʼ numuu rí xúgínʼ bi̱ nanújngún gúxna discurso mugíʼ muni rí gáʼthún superintendente bi̱ kayá edxu̱u̱ náa najuiʼsngáa numuu rí ikhaa rúʼko̱ gámbañun muni itháan májánʼ ñajunʼ Jeobá (1 Tim. 4:15).

¹⁰ Á mu bi̱ naxná discurso nanújngoo tiempo rí nikhánúu, superintendente bi̱ kayá edxu̱u̱ náa najuiʼsngáa o bi̱ nambáyúu gíʼmaa maʼniuu seña, ma̱ndoo majmuu mbá timbre o ma̱ndoo maxnúu ga̱jma̱a̱ lápiz náa mawán, mu masngájmu rí niguámbá tiempo. Bi̱ naxná discurso gíʼmaa rí mambóo dí xóó xtáa raʼthí mu magajtaa náa plataforma (atayáá libro Benefíciese, ináa 282, kutriga̱ 4).

¹¹ Xúgínʼ bi̱ nuni dí naxtandu̱ʼu̱u̱n najuiʼthún rí manújngún náa Najuiʼsngáa xú Mi̱ʼtháraʼa Májánʼ (atayáá libro Benefíciese, ináa 282, kutriga̱ 6). Dí najmañún náa najuiʼsngáa naʼni dí xuajñu Jeobá muthi ga̱jma̱a̱ musngáa ajngáa rí májánʼ ndrígóo Reino, rígi̱ naʼni rí xámiñun, rí muthi ga̱jma̱a̱ gamajkhu ma̱ngaa rí maʼndún kuñún xa̱bu̱. Jeobá xtáa gagi wéñuʼ índo̱ najmulú rí ejmañuluʼ mu muxná gamajkhu ikhaa (Sal. 148:12, 13; Is. 50:4).