Xóo eʼthúlú bi̱ Niʼniáanʼ rí naʼthí maʼni rá.

Asndu nákha nigi̱ʼdu̱u̱ nikúwá xa̱bu̱ numbaaʼ, bi̱ Niʼniáanʼ nijmiuu gaʼyee ga̱jma̱a̱ ángeles mu maʼtímíjná gajmíi̱n. Ma̱ngaa niʼni rí magumaraʼmáʼ ajngóo ga̱jma̱a̱ rí nikudaminaʼ. Dios nakudaminaʼ rí nda̱wa̱á makuwáanʼ gagi, mú mbáa nguáná muraximíjna̱lú: “Náá minaaʼ rígá dí nikudaminaʼ xá.”

Ajngóo Dios rígá náa Biblia (2 Timoteo 3:16). Xú káʼnii nijmiuu Dios gaʼyee mu muniraʼmáʼ ajngóo rá. Ikhaa nigíwanʼ ku̱ma̱ ndrígóo náa xa̱bu̱ bugi̱ mu ikhiin muniraʼmáʼ (2 Pedro 1:21). Guʼgíʼ mbá xkri̱da: Á mu mbáa xa̱bu̱ bi̱ gíʼdoo mbá ñajunʼ najmiuu secretariu̱u̱ mu maʼnirámáʼ mbá i̱yi̱i̱ʼ, tsékumulú rí nindxu̱u̱ ajngóo secretariu̱u̱. Ikháá má kayuuʼ maski ajndu Dios nijmiuu xa̱bekha mu muniraʼmáʼ ajngóo, mú ajngóo ikhaa kiʼniraʼmáʼ náa Biblia.

AJNGÓO DIOS MA̱NDOO MBUYÁÁ XÚGÍNʼ

Dios nandoo rí xúgínʼ xa̱bu̱ muraxnuu ga̱jma̱a̱ mikru̱ʼu̱u̱n Ajngóo, numuu rí gíʼdoo wéñuʼ numuu. Rí mbiʼi xúgi̱ xa̱bu̱ náa “xúgíʼ xuajin mba̱ʼu̱, xuajin majkhaʼ ga̱jma̱a̱ náa xúgíʼ ajngáa” ma̱ndoo mudxawíín “ajngáa májánʼ” rí ndajyúuʼ kámuu ndrígóo Dios (Apocalipsis 14:6). Ga̱jma̱a̱ tsiakii ndrígóo Dios Ajngóo nijuiʼtájuíi kañiʼ o mbá ta̱pha̱ itháan rí ajtsú míí ajngáa itháan ki xóo i̱ʼwáʼ libro.