Referencias ndrígóo I̱yi̱i̱ʼ dí najmulú náa reunión Xóo kúwi̱i̱n ga̱jma̱a̱ xóo Etaraʼa Cristianos
4-10 NOVIEMBRE
GÍʼDOO NUMUU RÍ NA̱ʼKHA̱ NÁA BIBLIA | 1 JUAN 1-5
“Xáʼndulú kuʼyáá numbaaʼ ni má dí rígá náa numbaaʼ”
(1 Juan 2:15, 16) Xáʼndala kuya̱a̱ numbaaʼ ni má dí rígá náa numbaaʼ. Á mu mbáa nandoo kaʼyoo numbaaʼ, Anu̱lú xándoo kaʼyoo; 16 numuu rí xúgíʼ dí rígá náa numbaaʼ —rí nagua̱ʼa̱ xuyulúʼ, rí nagua̱ʼa̱ idulú ga̱jma̱a̱ ma̱ngaa rí nanigulúʼ muʼni mbaʼumíjna̱ ga̱jma̱a̱ rí kuaʼdáá— tséʼkha̱ náa Anu̱lú, na̱ʼkha̱ náa numbaaʼ.
w05-S 1/1 10 kutriga̱ 13
Guʼni xó má niʼni Jesús
13 Mbaʼin xa̱bu̱ nundxa̱ʼwa̱míjna̱ dí raʼkháa xúgíʼ dí rígá numbaaʼ nindxu̱u̱ ra̱májánʼ. Maski asndu xúʼko̱, náa numbaaʼ rígi̱ rígá rí mitsaanʼ ma̱ndoo maʼni nduwánʼlú mu xúʼni ñajuunʼ Jeobá. Ma̱ngaa nimbá dí naxnáruʼulú xáʼni rí mu̱ʼgua̱ kanuu náa Dios. Ikha jngó, a mu nandulú kuʼyáá dí rígá náa numbaaʼ maski ajndu májánʼ kujmaa mú migamíi nindxu̱u̱ (1 Timoteo 6:9, 10). Ma̱ngaa dí rígá náa numbaaʼ nindxu̱u̱ ra̱májánʼ ga̱jma̱a̱ maʼni gacháanʼ. Mbá xkri̱da, á mu nduʼyáá películas náa nuxmijná xa̱bu̱, náa nanigu̱u̱nʼ maguaʼdáá wéñuʼ, náa nubúnʼ xa̱bu̱, mbáa asndu mangáán manigulúʼ ga̱jma̱a̱ muniʼñámíjná maʼgá kaguáanʼ rí nagua̱ʼa̱ muʼni. Índo̱ nambáxulúʼ gajmiúlú xa̱bu̱ bi̱ i̱ndó naxmiéjúnʼ makuwá májánʼ wéñuʼ o maguaʼdáá mbá nuxi̱ʼ ñajúnʼ, mbáa rúʼko̱ gaʼni rí mangáanʼlu mundxaʼwámi̱jna̱ xóo ikhiin (Mateo 6:24; 1 Corintios 15:33).
(1 Juan 2:17) Ma̱ngaa, numbaaʼ na̱jkha̱ ranújngoo ga̱jma̱a̱ rí nagua̱ʼa̱ maʼni, mú bi̱ naʼni rí nandoo Dios maxtáa kámuu mbiʼi.
w13-S 15/8 27 kutriga̱ 18
Atatsaʼwáminaʼ xóo phú xa̱bu̱ gíʼmaa manindxa̱ʼ
18 Imbo̱o̱ rí ma̱ndoo mambáyulúʼ mu muʼni gaʼduunʼ “dí rígá náa numbaaʼ” ikhaa nindxu̱u̱ ajngáa dí niʼthí Juan: “Numbaaʼ na̱jkha̱ ranújngoo ga̱jma̱a̱ rí nagua̱ʼa̱ maʼni, mú bi̱ naʼni rí nandoo Dios maxtáa kámuu mbiʼi” (1 Juan 2:17). Numbaaʼ ndrígóo Gixa̱a̱ naʼni makujmaa rí nindxu̱u̱ gajkhun ga̱jma̱a̱ rí marigá kámuu, mú maʼgánú mbiʼi rí maguma gámbáa. Xúniʼñáánʼ rí maʼni nduwáanʼlú: Nimbá rí naxnáruʼulú numbaaʼ rígi̱ xánindxu̱u̱ kámuu.
Guʼyááʼ rí gíʼdoo numuu
(1 Juan 2:7, 8) A̱ngui̱nʼ, tseniraʼmáʼ mbá kiʼtáñajunʼ rí nuxi̱ʼ, nindxu̱u̱ mbá kiʼtáñajunʼ wayuu dí niguáʼdáá asndu nákha ginii. Kiʼtáñajunʼ wayuu rígi̱ nindxu̱u̱ ajngáa rí nidxawíín ikháanʼ. 8 Mbu̱júu̱ naniraʼmáʼ mbá kiʼtáñajunʼ nuxi̱ʼ, mbá rí gajkhun ga̱jma̱a̱ numuu ikhaa ma̱ngaa ga̱jma̱a̱ numala ikháanʼ, numuu rí mikrína na̱jkha̱ raguámbáa mú aguʼ rí gajkhun na̱jkha̱ rambiʼi itháan.
w13-S 15/9 10 kutriga̱ 14
Rí naʼthúlúʼ Jeobá nindxu̱u̱ jmbu
14 Náa Escrituras Griegas Cristianas rígá wéñuʼ rí naʼni marmáʼáan a̱jkiu̱lú dí gíʼmaa maʼndulú kuʼñúún eʼwíínʼ. Jesús niʼthí dí raga̱jma̱ kiʼtáñajunʼ nindxu̱u̱ rí “gíʼmaa maʼnda̱ʼ xtayáá xa̱bu̱ numbaaʼ ga̱jma̱ʼ xó má eyaʼ xtayaminaʼ ikháán” (Mat. 22:39). Santiago, giʼtio skojo̱o̱ Jesús, nixná mbiʼyuu “xtángoo rí phú itháan gíʼdoo numuu” (Sant. 2:8). Apóstol Juan niʼnirámáʼ: “A̱ngui̱nʼ, tseniraʼmáʼ mbá kiʼtáñajunʼ rí nuxi̱ʼ, nindxu̱u̱ mbá kiʼtáñajunʼ wayuu dí niguáʼdáá asndu nakha ginii. Mbu̱júu̱ naniraʼmáʼ mbá kiʼtáñajunʼ nuxi̱ʼ” (1 Juan 2:7, 8). Ndiéjunʼ nindoo gáʼthi ga̱jma̱a̱ ajngáa “kiʼtáñajunʼ wayuu” xá. Nindoo gáʼthi ga̱jma̱a̱ numuu rí maʼndaaʼ xtayáá xa̱bu̱ numbaaʼ ga̱jma̱ʼ. Ninindxu̱u̱ “wayuu” numuu rí Jesús nixná “asndu nákha ginii”, xóo muʼthá asndu nákha wajyúuʼ. Mú naʼni ma xúʼko̱ “nuxi̱ʼ” numuu rí naʼthí dí gíʼmaa muʼni gínámíjná ga̱jma̱a̱ numún eʼwíínʼ. Bi̱ ni̱ndxu̱lú xa̱bi̱i̱ Cristo, lá ragájkhun dí nuxnáa núma̱aʼ numuu rí naʼni marmáʼáan a̱jkiu̱lú dí gíʼdoo wéñuʼ numuu rí maʼndulú kuʼñúún a̱ngiu̱lú ga̱jma̱a̱ xúʼni xó má eni̱ xa̱bu̱ numbaaʼ rá.
(1 Juan 5:16, 17) Á mu mbáa na̱jkha̱nú ndaʼyoo ndxájuu na’ni mbá aʼkhá dí xáʼga̱ kayáa makhañúu, mando̱ʼo̱o̱, ga̱jma̱a̱ ikhaa maʼni rí maxtáa, xúʼko̱, bi̱ tseni aʼkhá dí maʼga kagu̱u̱n makhañún. Rígá mbá aʼkhá rí maʼga kagu̱u̱n makhañún. Ga̱jma̱a̱ numuu aʼkhá rúʼko̱ tséthúu̱n rí xúthi. 17 Xúgíʼ dí raʼkhí nindxu̱u̱ aʼkhá, mu rígá mbá aʼkhá rí xáʼga̱ kagu̱u̱n makhañún.
it-2-S 635 kutriga̱ 8
Maguma mba̱a̱ a̱jkiu̱u̱n
Májánʼ nindxu̱u̱ rí munda̱ʼa̱a̱ Dios rí maʼni mba̱a̱ a̱jkiu̱u̱n kaʼñún eʼwíínʼ ma̱ngaa xúgínʼ bi̱ kúwi̱i̱n náa congregación. Xúʼko̱ niʼni Moisés ga̱jma̱a̱ numún xa̱bu̱ xuajen Israel, nindo̱ʼo̱o̱ Jeobá rí maʼni mba̱a̱ a̱jkiu̱u̱n kaʼyoo aʼkhá ndrígu̱ún, ga̱jma̱a̱ Jeobá niʼdxaun. (Nú 14:19, 20.) Salomón ma̱ngaa niʼtájkháan índo̱ nixnáxi̱i̱ templo, nindo̱ʼo̱o̱ Jeobá rí maʼni mba̱a̱ a̱jkiu̱u̱n kaʼyoo Xuajñuu índo̱ gátanga̱a̱ a̱jkiu̱ún. (1Re 8:30, 33-40, 46-52.) Esdras niʼthí ga̱jma̱a̱ numún judíos niʼni rí makujmaa pa̱jnu̱ aʼkhá ndrígu̱ún. Índo̱ niʼtájkáan niʼthí dí gajkhun, rúʼko̱ niʼni rí xa̱bu̱ xuajen mbuyáá ndiéjunʼ gúni mu Jeobá maʼni mba̱a̱ a̱jkiu̱u̱n kaʼñún. (Esd 9:13–10:4, 10-19, 44.) Santiago niʼthúu̱n bi̱ na̱jkha̱ rakáguabaaʼ rí mandu̱ʼu̱u̱n bi̱ kuya̱ edxu̱u̱ mu mumbayíí ma̱ngaa rí mutajkáan ga̱jma̱a̱ numuu “á mu ikhaa nikudaminaʼ aʼkhá, maguma mba̱a̱ a̱jkiu̱ún kuyáá”. (Snt 5:14-16.) Mú, rígá ‹aʼkhá rí na̱jkha̱ kaguáanʼ makhañúlúʼ›, rí makiéʼkulú náa xi̱ʼ kaʼwu, mbá aʼkhá rí matani kiéjuanʼ xándoo maguma mba̱a̱ a̱jkiu̱u̱n. Ikháanʼ ragíʼmaa muʼtájkáan ga̱jma̱a̱ numún bi̱ nakiéʼkúun xúʼko̱ kaʼnii. (1Jn 5:16; Mt 12:31; Heb 10:26, 27; atayáá náa naʼthí ESPÍRITU; PECADO.)
Migixnuu Biblia
(1 Juan 1:1–2:6) Asndu nákha ginii ikhaa nixtáa, nda̱wa̱á ikhaa ni̱ʼkha̱, niʼdxawíín dí niʼthí, ndiʼyáá ga̱jma̱a̱ idulú, nindoo nixkajmaa ga̱jma̱a̱ ñawúnlú, niʼgíʼ májánʼ edxu̱lúʼ índo̱ ikhaa niʼsngáa dí ikhaa ma̱ndoo mambáyulúʼ mu makuwáanʼ, 2 (xúʼko̱, dí ndaʼya nikujmaa ga̱jma̱a̱ ikháanʼlu ndiʼyáá ga̱jma̱a̱ kuwáanʼ ruʼthá numuu ikhaa ga̱jma̱a̱ nuʼthá dí kámuu mbiʼi nixtáa ga̱jma̱a̱ Anu̱lú ma̱ngaa nikujmaa náa ikháanʼla), 3 dí ndiya̱a̱xu ga̱jma̱a̱ dí nidxáwinxu natala ma̱ngaa ikháanʼla, mu ikháanʼla ma̱ngaa makuwáanʼ ga̱jma̱a̱ nindxuxu. Ma̱ngaa dí kuwáanʼxu runi nindxu̱u̱ ga̱jma̱a̱ numuu Anu̱lú ga̱jma̱a̱ numuu Jesucristo bi̱ nindxu̱u̱ A̱ʼdióo. 4 Ikha jngó niniraʼmáʼxú rígi̱ mu gagi dí kuaʼdááxu mani̱ndxu̱u̱ káxi̱. 5 Rígi̱ nindxu̱u̱ ajngáa dí nidxáwinxu náa ikhaa ga̱jma̱a̱ dí kuwáanʼxu ruthalá: Dí Dios nindxu̱u̱ aguʼ ga̱jma̱a̱ nda̱a̱ nditháan dí mikrína náa ikhaa. 6 Á mu nuʼthálú: “Nambáxuxu gajmiúxu̱ ikhaa”, mú kuwáanʼ ruʼni dí raʼkhí dí nindxu̱u̱ xóo dí mikrína, kuwáanʼ ruʼni nduwaaʼlú ga̱jma̱a̱ na̱nguá eʼni embánii dí gajkhun. 7 Mú, á mu najngruigulú náa rígá aguʼ, xó má ikhaa xtáa náa aguʼ, á mu nambáxulúʼ gajmiúlú eʼwíínʼ, ga̱jma̱a̱ eʼdiuu Jesús bi̱ nindxu̱u̱ A̱ʼdióo rí naʼni kaʼwáanʼ náa xúgíʼ aʼkhá. 8 Á mu nuʼthá: “Na̱nguá kuaʼdááxu aʼkhá”, kuwáanʼ ruʼni nduwamijná má ikháanʼ ga̱jma̱a̱ rí gajkhun nda̱a̱ náa ikháanʼ. 9 Xí ikháanʼ nuʼthá aʼkháanʼlú, ikhaa nindxu̱u̱ jmbii mu maʼni mba̱a̱ a̱jkui̱i̱n kaʼyoo aʼkháanʼlú ga̱jma̱a̱ maʼni kaʼwáanʼlú náa xúgíʼ dí ra̱májánʼ. 10 Á mu nuʼthálú: “Na̱nguá exudamijnaxu aʼkhá”, kuwáanʼ ruʼni nduwaaʼlú, ga̱jma̱a̱ ajngáa ndrígóo nda̱a̱ náa ikháanʼlú.
2 E̱ji̱nʼ, naniraʼmáʼ rígi̱ náa ikháanʼlá mu xúxuʼdámíjná aʼkhá. Mú, á mu mbáa nikudaminaʼ aʼkhá, Anu̱lú nixnáa mbáa bi̱ ma̱ndoo mambáyulúʼ, ikhaa nindxu̱u̱ Jesucristo, mbáa bi̱ nindxu̱u̱ jmbii. 2 Ga̱jma̱a̱ ikhaa nixnáximinaʼ xóo tsigijñaʼ ga̱jma̱a̱ numuu aʼkhúlúʼ, mú ra̱ʼkhá i̱ndó ga̱jma̱a̱ numulúʼ ikháanʼ ma̱ngaa ga̱jma̱a̱ numún xúgínʼ bi̱ kuwa náa numbaaʼ. 3 Ga̱jma̱a̱ numuu rígi̱ nduʼyáá rí ni̱jkua̱nú niniʼniiʼlu, a mu nuʼnimbulúʼ má xúʼko̱ kiʼtañajunʼ ndrígóo. 4 Bi̱ naʼthí: “Ikhúúnʼ ni̱jkhánú niniʼniiʼ”, mú na̱nguá eʼni mbánuu kiʼtáñajunʼ ndrígóo, nindxu̱u̱ mbáa bi̱ naʼni nduwaʼ, ga̱jma̱a̱ nda̱a̱ dí gajkhun náa xa̱bu̱ buʼko̱. 5 Mú bi̱ naʼnimbánuu xúgíʼ ajngáa ndrígóo, xa̱bu̱ buʼko̱ gajkhun nandoo kaʼyoo Dios. Ga̱jma̱a̱ xúʼko̱ nandoo nduʼyáá dí nambáxulúʼ májánʼ gajmiúlú. 6 Bi̱ naʼthí dí nambáxu̱u̱ májánʼ ga̱jma̱a̱ ikhaa, xa̱bu̱ buʼko̱ gíʼmaa mbaʼyáridoo xó má niʼni ikhaa.
11-17 NOVIEMBRE
GÍʼDOO NUMUU RÍ NA̱ʼKHA̱ NÁA BIBLIA | 2 JUAN 1–JUDAS
“Guʼnimíjna̱ má xúʼko̱ mu makuwáanʼ náa rí gajkhun”
(Judas 3) Bi̱ nandoʼ kayala, maski asndu na̱ni̱ xúgíʼ xó má eʼngo̱o̱ mu maniraʼmáʼ náa inala ga̱jma̱a̱ numuu rí makáwáanʼlú, ndiyóoʼ maniraʼmáʼ mu matha̱la rí gunimíjna̱ ga̱jma̱a̱ xúgíʼ tsiakii ndrígála mu muguaʼdáá fe rí mbá miʼtsú asndu kámuu nikhánún bi̱ ni̱ndxu̱ún mikaʼwiin.
w04-S 15/9 11, 12 kutriga̱ 8, 9
“Guguaʼdáá má xúʼko̱ tsiakii dí na̱ʼkha̱ náa Señor”
8 Nduʼyáá ma rí naʼni Gixa̱a̱, náa Escrituras naʼthí mbaʼa rí ikhaa naniguuʼ majmuu (2 Corintios 2:11). Gixa̱a̱ niʼni gínáa Job niʼni gámbóo xúgíʼ rí gíʼdoo, nigudíin bi̱ nindoo kaʼñún, táʼndún gúyáá bi̱ kúwi̱i̱n náa goʼwóo, niʼniuu nandii ga̱jma̱a̱ bi̱ nambáxu̱u̱ gajmíi̱n nithi rí nduwaʼ ga̱jma̱a̱ numuu, xúgíʼ rígi̱ niʼni rí maxtáa gíná ga̱jma̱a̱ nindxa̱ʼwáminaʼ rí Dios niniñuuʼ (Job 10:1, 2). Maski asndu Gixa̱a̱ tséʼni rí muraʼníí gamiéjunʼ dí mbiʼi xúgi̱, mú mbaʼin a̱ngiu̱lú naʼni rí mumíniiʼ, xúʼko̱ naʼngo̱o̱ naʼni rí ikhaa naniguuʼ.
9 Náa iwáá mbiʼi rígi̱ narígá mbaʼa wéñuʼ dí naʼni gachúu rí nambáxulúʼ gajmiúlú Jeobá. Kuwáanʼ náa mbá numbaaʼ náa xa̱bu̱ i̱ndó nandún maguaʼdáá ra̱ʼkhá dí mambaxúún gajmiún Dios. Náa peliculas, ajmúú o náa rí nurima̱ʼ xa̱bu̱ náa rí ikhiin nakumu̱ún dí narígá rí gagi raʼkháa tsingíná. Mbaʼin wéñuʼ xa̱bu̱ numbaaʼ “maʼndún muni rí nanigu̱nʼ ikhiin ki xóo rí nandoo Dios” (2 Timoteo 3:1-5). Rígi̱ maʼni gachúu rí xóo nambáxulúʼ gajmiúlú Dios, ikha jngó ndayóoʼ ‹muʼnimíjna̱ ga̱jma̱a̱ xúgíʼ tsiakii ndrígúlú mu muguaʼdáá fe› (Judas 3).
Guʼyááʼ rí gíʼdoo numuu
(Judas 4) Gíʼmaa matala rí xa̱bekha nitu̱ʼu̱u̱n tsumáá náa ikháanʼ rí asndu túya̱a̱, náa Escrituras niʼthí má rí makuwíin xa̱bekha bi̱ nuni rí xkawiʼ, bi̱ murtajxi̱i̱ rí Dios májánʼ wéñuʼ a̱jkiu̱u̱n mu ma̱ndoo muni aʼkhá ga̱jma̱a̱ xátiñu̱nʼ nditháan, ma̱ngaa musngajma rí ni̱ndxu̱ún minduwiinʼ náa mbawíí bi̱ Kaʼyulú ga̱jma̱a̱ Señor, Jesucristo.
(Judas 12) Xa̱bu̱ bugi̱ ni̱ndxu̱ún xóo itsí ngu̱ʼwa̱ rí tuaʼan náa awúu̱n iyaʼ náa ndxo̱o̱ ngajua índo̱ kuwáanʼla ruphiʼtsu, ni̱ndxu̱ún xóo báxtúu bi̱ nuñewumíjna̱ i̱ndó ikhiin bi̱ tsémíñúún, du̱u̱n mixooʼ rí giñánʼ na̱jkha̱ kayóo asndu náa má eyoo; xóo ixi̱ índo̱ naguámbá nagajta̱a̱ inúu rí nda̱a̱ xndúu, nikháñu a̱jma̱ nuthu, rí nigájnuu asndu a̱jmu̱u̱;
it-1-S 125 kutriga̱ 7
Ndxo̱o̱ ngajua
Náa Biblia nánguá eʼthí xú káʼnii nindxu̱u̱ ndxo̱o̱ ngajua, ni má tséʼthi nguáthá nuthu eniriyaaʼ. (Jud 12.) Jesucristo ni má apóstoles ndrígóo na̱nguá nithi rí magumariyaaʼ ndxa̱a̱ rígi̱, gajkhun má rí xándoo mbuʼyáá rí katsudáanʼ muʼni o rí xáʼganú mambáa. Najuiʼthá rí nindxu̱u̱ mbá ndxa̱a̱ rí nuniriyaaʼ cristianos bi̱ guáʼdáá, náa nuthún maguwáʼ a̱ngiu̱ún bi̱ gíníi (e̱jín dxuáʼa, gu̱ʼú xuáʼa̱, bi̱ guáʼdáá ga̱jma̱a̱ bi̱ na̱nguá) bi̱ guáʼdáá ikháá má fe xó má ikhiin. Xúʼko̱ naʼni rí mbá kambáxu̱u̱n muphiʼtsu mbóó jnduʼ.
it-2-S 861
Itsí
Náa imbo̱ʼ ajngáa griega, spi·lás, nandoo gáʼthi itsí ngu̱ʼwa̱ rí tuaʼan náa awúu̱n iyaʼ. Judas nijmuu xkri̱da rígi̱ náa xa̱bu̱ bi̱ nithu̱ʼu̱u̱n ngu̱ʼwa̱á náa congregación cristiana mu muni dí ra̱májánʼ. Xóo má itsí rí tuaʼan náa awúu̱n iyaʼ maʼni rí barco marmáʼáan, xa̱bu̱ buʼko̱ ni̱ndxu̱ún bi̱ migamíi muni rí majngrádiinʼ bi̱ kuwa náa congregación. Judas naʼthí ga̱jma̱a̱ numún ikhiin: “Xa̱bu̱ bugi̱ ni̱ndxu̱ún xóo itsí ngu̱ʼwa̱ rí tuaʼan náa awúu̱n iyaʼ náa ndxo̱o̱ ngajua índo̱ kuwáanʼla ruphiʼtsu”. (Jud 12.)
(Judas 14, 15) Xúʼko̱, Enoc bi̱ juwiin náa Adán, ma̱ngaa niʼtáriyaʼ ga̱jma̱a̱ numún índo̱ niʼthí: “¡Gu̱ya̱a̱! Jeobá ni̱ʼkha̱ gajmíi̱n mbaʼin me̱ndaʼkho santos, 15 mu ma̱ʼkha̱ kayóo castigo náa xúgínʼ, ga̱jma̱a̱ mu masngájma aʼkhún xúgínʼ bi̱ ra̱míjíinʼ ga̱jma̱a̱ numuu xúgíʼ dí xkawiʼ rí nini, ga̱jma̱a̱ xúgíʼ rí tséjmaa rí xa̱bu̱ aʼkhá bi̱ nini rí xkawiʼ nithi ga̱jma̱a̱ numuu ikhaa”.
wp17.1-S 12 kutriga̱ 1
Ndiʼyoo rí Dios ninigu̱u̱ʼ rí niʼni
Ndiéjunʼ niʼtáriyaʼ Enoc rá. Ikhaa niʼthí rígi̱: “¡Gu̱ya̱a̱! Jeobá ni̱ʼkha̱ gajmíi̱n mbaʼin me̱ndaʼkho santos, mu ma̱ʼkha̱ kayóo castigo náa xúgínʼ, ga̱jma̱a̱ mu masngájma aʼkhún xúgínʼ bi̱ ra̱míjíinʼ ga̱jma̱a̱ numuu xúgíʼ dí xkawiʼ rí nini, ga̱jma̱a̱ xúgíʼ rí tséjmaa rí xa̱bu̱ aʼkhá bi̱ nini rí xkawiʼ nithi ga̱jma̱a̱ numuu ikhaa” (Judas 14, 15). Mbáa rí phú ikhiin nindxa̱ʼwa̱míjna̱ rí niʼthí Enoc nákha ginii, nikumu̱ún rí Dios má niʼnimbánuu rí nijuiʼtáriyaʼ. Ikha jngó mbaʼin gaʼyee najmún ajngáa rígi̱. Ikhiin nduyáá gajkhun rí nijuiʼtáriyaʼ mambanúu ga̱jma̱a̱ nakumu̱ún rí xóo nimbánuu má (Isaías 46:10).
wp17.1-S 12 kutriga̱ 3
Ndiʼyoo rí Dios ninigu̱u̱ʼ rí niʼni
Índo̱ nundxaʼwámíjná náa fe rí nigiʼdoo Enoc naʼni rí muraximíjna̱ á mu nduʼyáá numbaaʼ xó má eʼyoo Dios. Ajngáa rí niʼtáráʼa Enoc nayambáá asndu rí mbiʼi xúgi̱, nambáyulúʼ wéñuʼ xó má nákha mbiʼi rí nixtáa. Ajngáa rí ikhaa niʼthí marigá nimbánuu índo̱ Jeobá ni̱ʼkha̱ kayóo Ruʼwa mbiʼ ga̱jma̱a̱ niʼnimbáti̱gi̱i̱n mbá xúgínʼ xa̱bu̱ bi̱ nikuwa nákha mbiʼi rí nixtáa Noé. Rígi̱ nasngájma rí marigá nda̱wa̱á mani̱ndxu̱u̱ itháan gakhi̱i̱ (Mateo 24:38, 39; 2 Pedro 2:4-6). Rí mbiʼi xúgi̱, Dios xtáa xawii gajmíi̱n mbaʼin santos mu maʼnimbáti̱gi̱i̱n mbá xúgínʼ xa̱bu̱ xkawiinʼ bi̱ kuwa náa numbaaʼ xkawiʼ rígi̱. Guʼgíʼ muʼnimbáníí ajngáa rí niʼthí Enoc ga̱jma̱a̱ gíʼmaa muʼthúún eʼwíínʼ xa̱bu̱. Mbáa bi̱ kuwa náa guʼwúlú ga̱jma̱a̱ bi̱ nambáxulúʼ gajmiúlú xumbayúlú o mbáa asndu makumulúʼ rí kuwáanʼ ndajkuáanʼ. Mú Jeobá na̱nguá niniñuuʼ Enoc ga̱jma̱a̱ xúʼko̱ má xániñún bi̱ kuwa jmbu náa ikhaa.
Magixnuu Biblia
(2 Juan 1-13) Ikhúúnʼ bi̱ kayá edxu̱u̱, a̱ʼgu̱ bi̱ Dios niraʼwíí ga̱jma̱a̱ e̱ji̱i̱n ikhaa, bi̱ nandoo ka̱ñu̱u̱n wéñuʼ, mú ra̱ʼkhá i̱ndó ikhúúnʼ, ma̱ngaa xúgínʼ bi̱ niguánu niniʼnuuʼ dí gajkhun, 2 ga̱jma̱a̱ numuu dí gajkhun dí rígá náa ikháanʼlu, ga̱jma̱a̱ dí marigá má xúʼko̱ kámuu mbiʼi. 3 Dios bi̱ nindxu̱u̱ Anu̱lú ga̱jma̱a̱ Jesucristo bi̱ nindxu̱u̱ A̱ʼdióo, ga̱jma̱a̱ numún ikhiin marigá dí ra̱ʼkhá tháán májánʼ a̱jkiu̱u̱n, dí nagáwíinʼ a̱jkiu̱u̱n ga̱jma̱a̱ tsímáá ndrígóo náa ikháanʼlu, ga̱jma̱a̱ numuu dí gajkhun ma̱ngaa ga̱jma̱a̱ numuu ngajua. 4 Nadxuʼ wéñuʼ ga̱jma̱a̱ numuu dí nixkamiin tikhuun ejña̱a̱nʼ najngrui̱gu̱u̱n náa dí gajkhun, xó má kiʼtáñajunʼ dí nindrígúlú náa Anu̱lú. 5 Ikha jngó rí xúgi̱ natha̱nʼ ikháán a̱ʼgú nikhi̱i̱, dí gíʼmaa maʼndulú kuʼyamijná. (Na̱nguá eniraʼmáʼ náa inaʼ mbóo kiʼtáñajunʼ nuxi̱ʼ, naniraʼmáʼ ikhaa má dí nijmañulú nákha ginii.) 6 Ga̱jma̱a̱ rígi̱ nandoo gáʼthúu̱n dí maʼndulú kuʼyamijná: Dí muʼnimbánii xúgíʼ xó má niʼtáñajunʼ. Rígi̱ nindxu̱u̱ dí niʼtáñajunʼ, xó má nidxawíínla nákha̱ ginii: Dí gíʼmaa majngruigulú xó má ikhaa. 7 Numuu dí mbaʼin bi̱ nuninduwaʼ kuwa náa numbaaʼ, xa̱bu̱ bi̱ nuthi dí Jesucristo̱ na̱nguá ni̱ʼkha̱ xóo xa̱bu̱ bi̱ gíʼdoo xuwiʼ. Bugi̱ nindxu̱u̱ bi̱ naʼni nduwaʼ ga̱jma̱a̱ nindxu̱u̱ bi̱ naʼthá numuu Cristo. 8 Guñeumíjna̱la, mu xúgíʼ dí ikháanʼxu nimbáyalaʼ majmañala xándáti̱ga̱a̱, mú nda̱wa̱á ikháanʼla ma̱ndoo maguma tsajkurámáanʼla káxi̱. 9 Bi̱ nanújngoo eʼni ga̱jma̱a̱ naniñuʼ raʼnimbánuu dí niʼsngáa Cristo na̱nguá gíʼdaa Dios. Bi̱ naʼnimbánuu kiʼsngáa rígi̱, ikhaa buʼko̱ bi̱ gíʼdaa Anu̱lú ma̱ngaa A̱ʼdióo. 10 Á mu na̱ʼkha̱ mbáa náa ikháanʼla ga̱jma̱a̱ na̱nguá kayá kiʼsngáa rígi̱, xúndríguíi náa guʼwálaʼ asndu má xúraxi̱i̱. 11 Numuu rí bi̱ naraxi̱i̱ xtáa rambáyúu náa dí raʼkhí eʼni. 12 Maski ajndu gúʼdoo mbaʼa dí mathala, mú tsíyóʼ matha náa i̱yi̱i̱ʼ ga̱jma̱a̱ yatsínʼ, nandoʼ maʼgá náa ikháanʼla mu matamíjná mijngii ga̱jma̱á nindxa̱laʼ, mu gagi dí guaʼdáála mani̱ndxu̱u̱ káxi̱. 13 Ndxájuaʼ, bi̱ Dios niraʼwíí, e̱ji̱i̱n ikhaa nuraxáanʼla.
18-24 NOVIEMBRE
GÍʼDOO NUMUU RÍ NA̱ʼKHA̱ NÁA BIBLIA | APOCALIPSIS 1-3
“Naniʼnú rí natani”
(Apocalipsis 1:20) Ga̱jma̱a̱ numuu ngu̱ʼwa̱ rí mitsúʼkháan bi̱ mbá juwiin a̱ʼgua̱a̱n bi̱ nitañún náa ñawun mújúunʼ, ga̱jma̱a̱ mbá juwan candelabros rí ki̱ʼni̱ ga̱jma̱a̱ oro: Bi̱ mbá juwiin a̱ʼgua̱a̱n nandoo gáʼthúu̱n ángeles bi̱ kuwa náa mbá juwan congregación ga̱jma̱a̱ mbá juwan candelabros nandoo gáʼthúu̱n juwan congregación.
w12-S 15/10 13 kutriga̱ 8
Xú káʼnii xa̱bu̱ ni̱ndxa̱ʼ ikháán rá.
8 Mu ma̱ndoo muʼni gaʼduunʼ xi̱ʼ rúʼko̱, garmáʼáan a̱jkiu̱lú rí náa Biblia naʼthí “náa ñawun mújúunʼ”, Jesús gíʼdiin “mbá juwiin a̱ʼgua̱a̱n”. Rígi̱ nandoo gáʼthúu̱n bi̱ kaxtaʼwíin ga̱jma̱a̱ mbá xúgínʼ bi̱ kuya̱ edxu̱u̱ náa congregación. Ikhaa ma̱ndoo maxnún ñajunʼ muni “a̱ʼgua̱a̱n” bi̱ gíʼdiin náa ñawun asndu náa má mbiʼi gáʼndoo ikhaa (Rev. 1:16, 20). Mu ma̱ndoo maʼnimbánuu ñajunʼ rí kaʼyoo mayéʼga Edxu̱u̱ náa congregación ikhaa najmiuu eʼwíínʼ a̱ngiu̱lú bi̱ mbu̱ya̱ edxu̱u̱. Náa Biblia naʼthí ‹rí iduu nindxu̱u̱ xóo riʼyu̱u̱ aguʼ›, xóo muʼthá rí xtáa rañewu̱u̱n; ikha jngó índo̱ ndaʼyoo rí ndayóo maxprígúu mbáa bi̱ kayá edxu̱u̱, ndaʼyoo nguáná gándoo maʼni ga̱jma̱a̱ xú káʼnii gáʼni (Rev. 1:14). Mú ikháanʼ gíʼmaa rí mbuʼyamajkún xa̱bu̱ bugi̱ bi̱ nixtaʼwíin ga̱jma̱a̱ xi̱ʼ kaʼwu, Pablo niʼnirámáʼ: “Gunimbala ku̱ñu̱u̱n bi̱ kuya̱ edxu̱u̱ náa ikháanʼla, guniñámíjná rí mutañajuanla, numuu rí ikhiin kuwa ruñawanla ikháanʼ xóo bi̱ muxnaxi̱i̱ cuenta; mu rí ikhiin muni ga̱jma̱a̱ gagi raʼkháa ga̱jma̱a̱ a̱jma̱ a̱jkiu̱ún, numuu dí rígi̱ nda̱a̱ rí gambáyalá ikháanʼ” (Heb. 13:17).
(Apocalipsis 2:1, 2) ”Ataniraʼmáʼ náa inu ángel bi̱ xtáa náa Éfeso: Rígi̱ rí naʼthí bi̱ gíʼdiin juwiin estrellas náa ñawun mújúunʼ, bi̱ na̱jkha̱ náa tapho̱o̱ rí mbá juwan candelabro rí ki̱ʼni̱ ga̱jma̱a̱ oro: 2 ‹Naniʼnúnʼ rí natani, ga̱jma̱a̱ ñajunʼ rí natani ma̱ngaa rí naʼngaʼ, ga̱jma̱a̱ rí tséʼngoo a̱jkia̱nʼ xtañún xa̱bu̱ ra̱míjíinʼ, ga̱jma̱a̱ nitagíʼ matayaa bi̱ nuthi rí ni̱ndxu̱ún apóstoles, mú na̱nguá ni̱ndxu̱ún, ga̱jma̱a̱ nitayáá rí minduwiinʼ.
w12-S 15/4 29 kutriga̱ 11
Jeobá xtáa ráʼsngúlú mu makáwáanʼ
11 Visión rí nakujmaa náa capítulos 2 ga̱jma̱a̱ 3 ndrígóo Revelación, Jesucristo bi̱ naguma mba̱a̱ nayejxu̱u̱ náa mbá juwan congregaciones dí rígá náa Asia Menor. Náa visión rígi̱ nandoo gáʼthi rí Jesús tsiyejxu̱u̱ náa i̱ndó rí ndañúnʼ ma̱ngaa ndaʼyoo xóo phú kuwa. Nguáná asndu niʼthí tsíin xa̱bíi nixnúún tsiakii ga̱jma̱a̱ xtágabu. Ndiéjunʼ gándoo gáʼsngúlú rígi̱ rá. Visión rígi̱ nimbánuu asndu nákha tsiguʼ 1914. Náa mbá juwan congregación nandoo gáʼthúu̱n cristianos bi̱ kaxtaʼwíin, ga̱jma̱a̱ xtágabu rí najuixnún nandoo gáʼthúu̱n rí xtágabu rígi̱ na̱jkha̱ náa xúgíʼ congregación ndrígóo Dios dí rígá náa xúgíʼ numbaaʼ. Ma̱ndoo muʼthá rí Jeobá najmiuu A̱ʼdióo mu mayéʼga edxu̱u̱ náa xuajñuu. Xú káʼnii gándoo gajmulú májánʼ rí naxnulu xá.
w01-S 15/1 20 kutriga̱ 20
Gúʼgua̱ xó má ejkha̱ xuajñuu Jeobá
20 Mú ma̱ndoo muʼgua ki̱dxu̱ʼ xuajñuu Jeobá, gíʼmaa mbuʼyáá ndiéjunʼ nindxu̱u̱ ñajunʼ rí naʼni ga̱jma̱a̱ rí ikhaa nigíiʼ Jesucristo xóo bi̱ “kayá edxu̱u̱ náa congregación” (Efesios 5:22, 23). Ga̱jma̱a̱ gíʼmaa mbuʼyáá rí gajkhun nindxu̱u̱ rí naʼthí náa Isaías 55:4: “¡Gu̱ya̱a̱! Nixna̱a̱ xóo testigo náa xúgínʼ xa̱bu̱, xóo caudillo ga̱jma̱a̱ comandante náa xúgínʼ xa̱bu̱”. Rígi̱ nakujmaa kaʼwu rí Jesús najmañuu mayéʼga edxu̱u̱ náa congregación. Ma̱ngaa naniniúnʼ májánʼ mugiu̱u̱ ga̱jma̱a̱ ñajunʼ rí nuni. Ikha jngó índo̱ niyejxu̱u̱ mbá juwan congregación dí rígá náa Asia Menor, niʼthí witsu nuthu: “Naniʼnú rí natani” (Revelación 2:2, 19; 3:1, 8, 15). Jesús nindxu̱u̱ xó má Anu̱u̱ Jeobá ndaʼyoo rí ndayúlú. Nákha xóó tséʼthi xú káʼnii muʼtájkáan, niʼthí: “Ana̱la Dios ndaʼyoo ndiéjunʼ rí ndayaláʼ asndu nákha xóó tsénda̱ʼa̱” (Mateo 6:8-13).
Guʼyááʼ rí gíʼdoo numuu
(Apocalipsis 1:7) ¡Gu̱ya̱a̱! Na̱ʼkha̱ ga̱jma̱a̱ du̱u̱n, xúgínʼ mbuyáá ga̱jma̱a̱ idún, ma̱ngaa bi̱ nidujmaa; xúgíʼ xuajen dí rígá náa ku̱ba̱ʼ ga̱jma̱a̱ tsingíná munigawumíjná ga̱jma̱a̱ numuu ikhaa. Xúʼko̱ gáʼni.
kr-S 226 kutriga̱ 10
Reino ndrígóo Dios maʼnimbáti̱gi̱i̱n xa̱bu̱ sia̱nʼ
10 Narkuájinʼ mugu̱ náa tsu̱jtuunʼ. Xa̱bu̱ bi̱ tsíñún gúyáá Reino ndrígóo Dios maʼniún mbuʼyáá itháan rí xú kaʼnii gáʼga̱nú mumíniiʼ. Jesús naʼthí: “Ga̱jma̱a̱ ikhú mbuyáá A̱ʼdióo xa̱biya̱ ma̱ʼkha̱ náa inu du̱u̱n ga̱jma̱a̱ xúgíʼ tsiakii ga̱jma̱a̱ gloria.” (Mar. 13:26). Rígi̱ nasngájma rí Jesús ma̱ʼkha̱ ga̱jma̱a̱ xúgíʼ tsiakii ndrígóo mu mandi̱ʼi̱i̱n cuenta xúgínʼ xa̱bu̱ numbaaʼ. Náa i̱ʼwáʼ rí niʼtáriyaʼ índo̱ gáʼni iwáá mbiʼi najuiʼthá itháan ga̱jma̱a̱ numuu juicio rígi̱. Rí nuxkamaa náa xkri̱da ndrígu̱ún mugu̱ ga̱jma̱a̱ tsu̱jtuunʼ (atraxnuu Mateo 25:31-33, 46). Xúgínʼ xa̱bu̱ bi̱ nimbayíí Reino ndrígóo Dios magumbiʼñún “mugu̱”. Ikhiin muxuxi̱i̱ edxu̱ún mbuyáá rí ‹inuu maguma káwíin› (Luc. 21:28). Mú bi̱ na̱nguá nindúún gúyáá Reino magumbiʼñún ‹tsu̱jtuunʼ›. Ikhiin “ga̱jma̱a̱ tsingíná munigawumíjná” índo̱ gúyáá rí ‹maguma gámbíin kámuu› (Mat. 24:30; Rev. 1:7).
(Apocalipsis 2:7) Bi̱ gíʼdoo cháʼun gaʼdxawun rí naʼthí espíritu náa congregación: Bi̱ gáʼngo̱o̱, maxnu̱u̱ mikhu xndúu ixi̱ rí gíʼdoo vida dí rígá náa paraíso ndrígóo Dios›.
w09-S 15/1 31 kutriga̱ 1
Rí itháan nagájnuriyoʼ náa libro ndrígóo Apocalipsis (níʼkhóo 1)
2:7. Ndiéjunʼ nindxu̱u̱ “paraíso ndrígóo Dios” rá. Ajngáa rígi̱ ni̱jkha̱ náa inún a̱ngiu̱lú bi̱ kaxtaʼwíin, paraíso rí najuiʼthá gi̱i̱ nandoo gáʼthúu̱n dí rígá mekhuíí, náa xtáa Jeobá. Ikhí nindxu̱u̱ náa phú rígá rí tsímáá. Bi̱ kaxtaʼwíin bi̱ gakuwa má xúʼko̱ jmbu ma̱ndoo mu̱phu̱ “xndúu ixi̱ rí gíʼdoo vida”, xó muʼthá rí xákhañun nditháan (1 Cor. 15:53).
Migixnuu Biblia
(Apocalipsis 1:1-11) Mbá rí nisngájma Jesucristo, rí Dios nisngájmuu, mu masngájmún xa̱bi̱i̱ rí nánguá má mbayuuʼ marigá. Ga̱jma̱a̱ ikhaa nikuʼmaa ángel ndrígóo mu masngájmuu tsinaʼ rígi̱ Juan bi̱ nindxu̱u̱ yumbáá ndrígóo, 2 bi̱ nitaraʼa Ajngá rawunʼ Dios, ma̱ngaa rí niʼthí Jesús, gajkhun, ga̱jma̱a̱ xúgíʼ rí ndiʼyoo. 3 Gagi xtáa bi̱ naguxnuu gakhi̱i̱ ga̱jma̱a̱ bi̱ nudxawíín ajngáa rí nijuiʼtáriyaʼ ga̱jma̱a̱ bi̱ nunimbáníí rí nijuiʼnirámáʼ ikhí, numuu rí mbiʼi na̱jkha̱nú mijngii. 4 Juan naʼthúún bi̱ mbá juwiin congregación dí rígá náa Asia: Rí májánʼ wéñuʼ a̱jkiu̱u̱n ga̱jma̱a̱ rí tsímáá rí na̱ʼkha̱ náa “Ikhaa bi̱ nindxu̱u̱ ga̱jma̱a̱ bi̱ ninindxu̱u̱ ma̱ngaa bi̱ ma̱ʼkha̱”, ga̱jma̱a̱ mbá juwiin espíritu bi̱ kúwi̱i̱n náa inu xiliʼ, 5 ga̱jma̱a̱ Jesucristo “bi̱ niwi̱ji̱ Jmbu”, “Bi̱ nituxi̱i̱ ginii náa wajinʼ” ga̱jma̱a̱ “Bi̱ naʼtáñajúnʼ xa̱bu̱ ñajunʼ bi̱ kúwi̱i̱n náa ku̱ba̱ʼ”. Bi̱ nandoo kaʼyulú ga̱jma̱a̱ bi̱ naʼni káwáanʼlu náa aʼkhá ndrígúlú ga̱jma̱a̱ numuu eʼdiu 6 niʼni rí magi̱ʼi̱ mbá Reino, náa rí manindxu̱lúʼ ndxajkun náa Dios ndrígóo ikhaa ga̱jma̱a̱ Anu̱u̱, xúʼko̱, gamajkhu ga̱jma̱a̱ tsiakii gáʼga náa Ikhaa asndu kámuu. Xúʼko̱ gáʼni. 7 ¡Gu̱ya̱a̱! Na̱ʼkha̱ ga̱jma̱a̱ du̱u̱n, xúgínʼ mbuyáá ga̱jma̱a̱ idún, ma̱ngaa bi̱ nidujmaa; xúgíʼ xuajen dí rígá náa ku̱ba̱ʼ ga̱jma̱a̱ tsingíná munigawumíjná ga̱jma̱a̱ numuu ikhaa. Xúʼko̱ gáʼni. 8 “Ikhúúnʼ ni̱ndxu̱ʼ Alfa ga̱jma̱a̱ Omega” eʼthí Jeobá Dios, “Ikhaa bi̱ nindxu̱u̱ ga̱jma̱a̱ bi̱ ninindxu̱u̱ ma̱ngaa bi̱ ma̱ʼkha̱”. 9 Ikhúúnʼ Juan, ni̱ndxu̱ʼ ndxajuala, bi̱ nixtáa ga̱jma̱a̱ nindxala náa najuixkhala, náa Reino, ga̱jma̱a̱ náa rí naʼngulú gajmiúlú Jesús, ni̱ʼkhánú náa isla rí nagumbiʼyuu Patmos mu matha ga̱jma̱a̱ numuu Dios ma̱ngaa rí niʼni Jesús. 10 Ga̱jma̱a̱ xi̱ʼ ni̱jkhánú nixtáá náa mbiʼi ndrígóo Señor, ga̱jma̱a̱ nidxawuun náa kidxuʼ mbá aʼwá gakhi̱i̱ xóo mbá trompeta, 11 naʼthí: “Rí natayáá, ataniraʼmáʼ náa rollo, ga̱jma̱a̱ ataxuʼma náa mbá juwan congregación: Náa Éfeso, Esmirna, Pérgamo, Tiatira, Sardis, Filadelfia ga̱jma̱a̱ Laodicea”.
25 NOVIEMBRE ASNDU 1 DICIEMBRE
GÍʼDOO NUMUU RÍ NA̱ʼKHA̱ NÁA BIBLIA | APOCALIPSIS 4-6
“A̱jkhui̱i̱n bi̱ trámiinʼ náa wáyú nagáñun”
(Apocalipsis 6:2) Ga̱jma̱a̱ ndi̱yo̱o̱, ga̱jma̱a̱ ¡gu̱ya̱a̱!, mbáa wáyú miʼxáa; ga̱jma̱a̱ bi̱ karíguii kayá mbá xkamídá; ga̱jma̱a̱ nijuixnáá mbá corona, ga̱jma̱a̱ nigájnuu gaxmínaʼ mu maʼngo̱o̱.
wp17.3-S 4 kutriga̱ 3
Ndiéjunʼ eyoo gáʼthúu̱n bi̱ trámiinʼ náa wáyú rí naʼthí náa Apocalipsis rá.
Tsáa nindxu̱u̱ bi̱ karíguii wáyú rá. Mu ma̱ndoo makru̱ʼu̱lú rígi̱ muxkamaa náa libro ndrígóo Revelación. Náa i̱ʼwáʼ capítulos ndrígóo revelación naʼthí rí bi̱ kríguii wáyú nagumbiʼyuu ‹Ajngá rawunʼ Dios› (Revelación 19:11-13). ‹Ajngáa›, nindxu̱u̱ Jesucristo, numuu rí ikhaa nindxu̱u̱ bi̱ naʼtáriyaʼ ajngóo Dios (Juan 1:1, 14). Ma̱ngaa nagumbiʼyuu ‹Rey náa majñún’ reyes ga̱jma̱a̱ Tátá náa majñunʼ tátá› ga̱jma̱a̱ najuiʼthá rí ikhaa nindxu̱u̱ ‹Jmbii ga̱jma̱a̱ Gajkuwiin› (Revelación 19:11, 16). Ikhaa gíʼdoo mbá ñajunʼ rí mani̱ndxu̱u̱ rey bi̱ maxmínaʼ, ma̱ngaa na̱nguá nindxu̱u̱ ra̱májánʼ ga̱jma̱a̱ tseʼnimbamínaʼ ga̱jma̱a̱ numuu ñajunʼ rí gíʼdoo. Mú rígá iʼwáʼ graxe̱.
wp17.3-S 4 kutriga̱ 5
Ndiéjunʼ eyoo gáʼthúu̱n bi̱ trámiinʼ náa wáyú rí naʼthí náa Apocalipsis rá.
Rí xúgi̱, nguáná nigi̱ʼdi̱i̱ nigáñun a̱jkhu̱u̱n bi̱ trámiinʼ náa wáyú rá. Jesús, nindxu̱u̱ timbáa bi̱ nigruigú mbá corona (Revelación 6:2). Ga̱jma̱a̱ nguáná ni̱jkha̱nú ninindxu̱u̱ Rey náa mekhuíí xá. Na̱nguá má nikhánáá núkhu ñajunʼ rígi̱ índo̱ nitanga̱a̱ mekhuíí, numuu rí náa Biblia nasngájma rí ndiyóoʼ magiʼthu̱u̱n (Hebreos 10:12, 13). Jesús niʼthún xa̱bi̱i̱ xú káʼnii gúyáá rí niguámbá mbiʼi rí gíʼthu̱u̱n ga̱jma̱a̱ rí magíʼdu̱u̱ maʼtáñajunʼ mekhuíí. Niʼthí rí índo̱ gagíʼdu̱u̱ maʼtáñajunʼ maʼni itháan mingíjyúuʼ. Marigá guerra, ewiʼ ga̱jma̱a̱ nandii (Mateo 24:3, 7; Lucas 21:10, 11). Tájyúuʼ má índo̱ nirígá Timbá Guerra náa xúgíʼ Numbaaʼ nákha tsiguʼ 1914, ikhú ni̱jkha̱nú ninindxu̱u̱ Rey Jesús náa mekhuíí ga̱jma̱a̱ rí xa̱bu̱ numbaaʼ makuwa rí náa Biblia naxná mbiʼyuu “iwáá mbiʼi” (2 Timoteo 3:1-5).
(Apocalipsis 6:4-6) Ga̱jma̱a̱ nigájnuu imba̱a̱ wáyú maña̱a̱ʼ xóo aguʼ, ga̱jma̱a̱ bi̱ kríguii nikhánáá rí marígú tsímáá náa tsu̱du̱u̱ ku̱ba̱ʼ mu mudrigú edxu̱ún eʼwíínʼ, ga̱jma̱a̱ nijuixnáá mbá espada. 5 Ga̱jma̱a̱ índo̱ nimbáʼtoo ragajtsú sello, nidxawun bi̱ maʼni ajtsíin bi̱ nduya niʼthí: “¡Ayi̱!” “Ndi̱yo̱o̱ ga̱jma̱a̱ ¡gu̱ya̱a̱!, mbá wayuu skuniiʼ; ga̱jma̱a̱ bi̱ karíguii kayá náa ñawun mbá balanza. 6 Ga̱jma̱a̱ nidxawun mbá aʼwá asndu xóo náa tapu̱ún a̱jkhui̱i̱n bi̱ nduya rí naʼthí: Mbá litro ndrígóo trigo maʼni numuu mbá denario, ga̱jma̱a̱ a̱jtsúʼ litro ndrígóo cebada maʼni numuu mbá denario ga̱jma̱a̱ xatani gachi aceite ndrígóo oliva ni ma vino”.
wp17.3-S 5 kutriga̱ 2
Ndiéjunʼ eyoo gáʼthúu̱n bi̱ trámiinʼ náa wáyú rí naʼthí náa Apocalipsis rá.
Bi̱ kríguii wáyú maña̱a̱ʼ nandoo gáʼthúu̱n guerra. Ikhaa naʼni rí xárígá rí tsímáá náa xúgíʼ tsu̱du̱u̱ Ku̱ba̱ʼ, raʼkháa náa nguáthá xuajin. Asndu nákha tsiguʼ 1914, nigi̱ʼdu̱u̱ nirígá guerra náa xúgíʼ numbaaʼ rí nimbá miʼtsú tárígá nákha ginii. Nda̱wa̱á nirígá Raga̱jma̱ Guerra náa xúgíʼ Numbaaʼ, náa niguma gámbáa itháan ki xó dí nirígá nákha ginii. Ni̱jkha̱nú nikujmaa rí itháan mbaʼin xa̱bu̱ nikháñun ga̱jma̱a̱ numuu guerra náa naguáʼdáá xkujndu xa̱bu̱, rí nigíʼdu̱u̱ asndu nákha 1914, nikháñun itháan rí 100 millón xa̱bu̱. Ga̱jma̱a̱ mbaʼin wéñuʼ nigawúnʼ bi̱ nánguá nindoo gáʼni̱i̱ a̱jkiu̱ún.
wp17.3-S 5 kutriga̱ 4, 5
Ndiéjunʼ eyoo gáʼthúu̱n bi̱ trámiinʼ náa wáyú rí naʼthí náa Apocalipsis rá.
“Ndi̱yo̱o̱ ga̱jma̱a̱ ¡gu̱ya̱a̱!, mbá wayuu skuniiʼ; ga̱jma̱a̱ bi̱ kríguii kayá náa ñawúnʼ mbá balanza. Ga̱jma̱a̱ nidxawun mbá aʼwá asndu xóo náa tapu̱ún a̱jkhui̱i̱n bi̱ nduya, rí naʼthí: Mbá litro ndrígóo trigo maʼni numuu mbá denario, ga̱jma̱a̱ ajtsú litro ndrígóo cebada maʼni numuu mbá denario ga̱jma̱a̱ xátani gachíí aceite ndrígóo oliva ni má vino” (Revelación 6:5, 6).
Bi̱ kríguii wáyú skuniiʼ nandoo gáʼthúu̱n ewiʼ. Ga̱jma̱a̱ numuu ewiʼ rí naʼthí gi̱i̱ nindxu̱u̱ gakhi̱i̱ wéñuʼ rí xó mbá ‹litro ndrígóo trigo› (0,7 kilos o 1,54 libras) trigo minumuu mbá denario, rí xóo nuda mbá mbiʼi nákha timbá siglo (Mateo 20:2). Xúʼko̱ má minumuu ‹ajtsú litro ndrígóo cebada› (2,1 kilos o 4,63 libras), cereal na̱nguá mba̱a̱ wéñuʼ ki xóo trigo. ¡Xáʼngo̱o̱ rúʼko̱ mu̱phu̱ náa kuwa mbaʼin mbáa guʼwíin! Ma̱ngaa nuthún xa̱bu̱ rí ndayóoʼ muni aceite ndrígóo oliva ga̱jma̱a̱ vino, ganitsu rí xóo naguʼwún naʼphu̱ nákha ikhú.
(Apocalipsis 6:8) Ndi̱yo̱o̱ ga̱jma̱a̱ ¡gu̱ya̱a̱!, Mbáa wáyú miʼxájtiiʼ, ga̱jma̱a̱ bi̱ kríguii mbiʼyuuʼ Muerte. Ga̱jma̱a̱ Iñá wa̱jinʼ na̱ʼkha̱ raxkoo mijngii. Ga̱jma̱a̱ nijuixnúún mutañajunʼ náa mbá cuarta parte ndrígóo ku̱ba̱ʼ, mu muradíin ga̱jma̱a̱ mbá espada ga̱jma̱a̱ maʼni rí marigá ewiʼ ma̱ngaa mbá plaga rí mbiiʼ wéñuʼ ga̱jma̱a̱ xujkhúʼ xkawiinʼ bi̱ kuwa náa tsu̱du̱u̱ ku̱ba̱ʼ.
wp17.3-S 5 kutriga̱ 8-10
Ndiéjunʼ eyoo gáʼthúu̱n bi̱ trámiinʼ náa wáyú rí naʼthí náa Apocalipsis rá.
Bi̱ maʼni a̱jkhui̱i̱n nandoo gáʼthúu̱n nandii. Nda̱wa̱á rí tsiguʼ 1914, nigi̱ʼdu̱u̱ nandii rí nagumbiʼyuu gripe española nigudíin mbaʼin wéñuʼ xa̱bu̱. Ni̱jkha̱nú nikujmaa rí nandii rígi̱ ni̱jkha̱roʼoo náa itháan rí 500 millón xa̱bu̱, nákha ikhú mbáa náa dí ajtsíin xa̱bu̱.
Gripe española nindxu̱u̱ rí nigi̱ʼdu̱u̱ ga̱jma̱a̱. Bi̱ najmañún nuthi rí nákha siglo veinte, mbaʼin xa̱bu̱ nikháñun ga̱jma̱a̱ xndú ra̱mbu̱jya̱ʼ. Xúʼko̱ má rí mbiʼi xúgi̱ mbaʼin xa̱bu̱ nakháñun ga̱jma̱a̱ numuu sida, tuberculosis ga̱jma̱a̱ malaria numuu rí ndáa thanuu.
Narígá má xúʼko̱: Tséʼniuu á mu nindxu̱u̱ guerra, ewiʼ rí nakháñun xa̱bu̱. Náa nubíinʼ xa̱bu̱ bi̱ nikháñun na̱jkha̱ raʼni itháan mba̱a̱ numuu rí nánguá eʼngu̱u̱n ga̱jma̱a̱ numuu nandii.
Guʼyááʼ rí gíʼdoo numuu
(Apocalipsis 4:4) Náa mbájndi xílí rígá i̱mbá 24 xílí rí naʼtáñajúnʼ, náa mbá 24 xílí rígi̱ ndi̱yo̱o̱ rí trígi̱i̱n mbá 24 xa̱bu̱ guanuu kagúwúnʼ mbá xtíin miʼxá ga̱jma̱a̱ náa edxu̱ún grígu corona dí oro.
(Apocalipsis 4:6) Náa inu xílí rígá mbá lamáa rí nindxu̱u̱ xóo vidrio, xóo mbá cristal. Náa awúún ga̱jma̱a̱ náa mbájndi kúwi̱i̱n mbá a̱jkhui̱i̱n bi̱ nduya, ikhiin guáʼdáá mbaʼa idún náa inún ga̱jma̱a̱ náa tsu̱du̱ún.
re-S 76 kutriga̱ 8
Trono ndrígóo Jeobá rí itháan mitsaanʼ dí rígá mekhuíí
8 Juan ndaʼyoo má rí nixtaʼwíin ndxajkun bi̱ muñambáá náa tabernáculo dí rígá nákha wajyúuʼ. Ikha jngó niʼniuu tsiánguá índo̱ ndiʼyoo: “Náa mbanjdí xílí rígá i̱mbá 24 xílí rí naʼtáñajunʼ, náa mbá 24 xílí rígi̱ ndi̱yo̱o̱ rí trígi̱i̱n mbá 24 xa̱bu̱ guanuu kagúwúnʼ mbá xtíin miʼxá ga̱jma̱a̱ náa edxu̱ún grígu corona dí oro”. (Revelación 4:4.) Xúʼko̱, na̱nguá kuwa ndxajkun, kuwa mbá 24 xa̱bu̱ guanuu, náa tronos ga̱jma̱a̱ rígu̱ náa edxu̱ún coronas xóo reyes. Tsíin lá ni̱ndxu̱ún xa̱bu̱ guanuu buʼko̱ rá. Ikhiin ni̱ndxu̱ún bi̱ kaxtaʼwíin bi̱ kuwa náa congregación cristiana, bi̱ nigúunʼ má mekhuíí ga̱jma̱a̱ nindrigú ñajunʼ rí Jeobá niʼthí maxnún. Xú káʼnii eʼyáá rá.
re-S 80 kutriga̱ 19
Trono ndrígóo Jeobá rí itháan mitsaanʼ dí rígá mekhuíí
19 Ndiéjunʼ eyoo gáʼthúu̱n bi̱ nduya bugi̱ rá. Náa visión rí ndiʼyoo gaʼyee Ezequiel, nambáyulúʼ mu mbuʼyáá xú káʼnii extiʼña̱a̱. Ezequiel ndiʼyoo Jeobá rí na̱jkha̱ kayóo nacha̱ carriu̱u̱ dí rígá mekhuíí, bi̱ na̱jkha̱ gajmíi̱n ikhiin ni̱ndxu̱ún bi̱ nduya bi̱ niʼthí Juan. (Ezequiel 1:5-11, 22-28.) Nda̱wa̱á Ezequiel ndiʼyoo mbu̱júu̱ rí náa carro rígi̱ nagún bi̱ nduya. Mú rí xúgi̱ nixna mbiʼñún querubines. (Ezequiel 10:9-15.) A̱jkhu̱u̱n bi̱ nduya, bi̱ ndiʼñún Juan nandoo gáʼthúu̱n querubines ndrígio̱o̱ Dios... bi̱ guaʼdáá mbá ñajunʼ mba̱a̱ bi̱ kuwa náa Organización dí rígá mekhuíí. Juan na̱nguá má niʼniuu tsiánguá índo̱ ndiʼñún querubines kuájun mijngii náa Jeobá numuu rí ikhaa ndiʼyoo dí tabernáculo dí nirígá nákha wajyúuʼ nitrámiiʼ a̱jmi̱i̱n querubines bi̱ ki̱ʼniin ga̱jma̱a̱ oro náa e̱jna̱ rí nimbánuu, rí nandoo gáʼthúu̱n trono ndrígóo Jeobá. Ga̱jma̱a̱ numún querubines niʼni rí mawán aʼwóo Jeobá náa xúgínʼ xa̱bu̱ xuajen. (Éxodo 25:22; Salmo 80:1.)
(Apocalipsis 5:5) Mú mbáa bi̱ xa̱bu̱ nikhi̱i̱ niʼthúnʼ: “Atatsíñáʼ ratambiyaʼ. ¡Gu̱ya̱a̱! León bi̱ xtáa náa tribu ndrígóo Judá, bi̱ ni̱ʼkha̱ náa David, niʼngo̱o̱ nidaʼ mu mambáʼtoo rollo ga̱jma̱a̱ mbá juwan sellos”.
cf-S 36 kutriga̱ 5, 6
“¡Gu̱ya̱a̱! León bi̱ xtáa náa tribu ndrígóo Judá”
5 Nuthi rí león tsémiñuu. Lá nitayáá mbá miʼtsú mijngii mbáa león bi̱ mba̱a̱ wéñuʼ rá. Mbáa xúʼko̱, nitayáá mbá miʼtsú náa kuwa mbaʼin wéñuʼ xujkhú mú na̱nguá nitaxuʼmaminaʼ. Mbáa asndu xúgi̱ xóó narmáʼáan a̱jkia̱nʼ rí nimíñaaʼ wéñuʼ. Índo̱ natayáá mijngii xujkhú bugi̱ ga̱jma̱a̱ natayáá rí ndaʼya namíñaaʼ wéñuʼ mú ikhaa tsémiñuu nditháan. Náa Biblia naʼthí rí león ‹nindxu̱u̱ bi̱ gíʼdoo tsiakii náa xúgínʼ xujkhú, ga̱jma̱a̱ tsémiñuu kaʼyoo nimbáa› (Proverbios 30:30). Xúʼko̱ nindxu̱u̱ Cristo tsémiñuu nditháan.
6 Guʼyáá ajtsú enii xú káʼnii Jesús esngájma rí gíʼdoo tsiakii xóo mbáa león: Nasngájma índo̱ nambáyúu rí gajkhun, índo̱ naʼni marigá rí jmbu ga̱jma̱a̱ índo̱ naʼngo̱o̱ naraʼnuu mbaʼa xkujndu. Ga̱jma̱a̱ mbuʼyáá á mu mangáanʼ ma̱ndoo mbuʼyaridáá xkri̱da ndrígóo o na̱nguá.
Migixnuu Biblia
(Apocalipsis 4:1-11) Nda̱wa̱á dí rígi̱, ikhúúnʼ ndi̱yo̱o̱ ga̱jma̱a̱ ¡gu̱ya̱a̱! Mbá xkrugua rí kambaʼtoo náa mekhuíí, nidxawuun mbá aʼwá rí naʼthúnʼ, rígi̱ nindxu̱u̱ xóo mbá trompeta rí naʼthí: “Ayi̱ gi̱i̱ ga̱jma̱a̱ masngajmáanʼ dí phú gajkhun marigá”. 2 Nda̱wa̱á dí rígi̱ ni̱jkhánú nixtáa náa tsiakii ndrígóo xi̱ʼ, ga̱jma̱a̱ ¡gu̱ya̱a̱! Mbá xílí rí phú naʼtáñajunʼ gíʼ náa kaʼyoo mekhuíí ga̱jma̱a̱ mbáa gíʼ náa xílí rígi̱. 3 Bi̱ gíʼ náa xílí nakujmaa xóo itsí jaspe ga̱jma̱a̱ xóo itsí sardio, náa xúgíʼ mbájndi xílí rí naʼtáñajunʼ rígá mbá takuayaʼ rí nakujmaa xóo mbá esmeralda. 4 Náa mbájndi xílí rígá i̱mbá 24 xílí rí naʼtáñajunʼ, náa mbá 24 xílí rígi̱ ndi̱yo̱o̱ rí trígi̱i̱n mbá 24 xa̱bu̱ guanuu kagúwúnʼ mbá xtíin miʼxá ga̱jma̱a̱ náa edxu̱ún grígu corona dí oro. 5 Náa xílí rí phú naʼtáñajunʼ naxpíbiʼ, nawáán aʼwá ga̱jma̱a̱ nundxa̱ʼwa̱ a̱jkhu̱u̱n; ga̱jma̱a̱ rígá mbá 7 aguʼ rí nakha náa inuu xílí rí phú naʼtáñajunʼ, ga̱jma̱a̱ rígi̱ nandoo gáʼthúu̱n mbá 7 xi̱ʼ ndrígóo Dios. 6 Náa inuu xílí rígá mbá lamáa rí nindxu̱u̱ xóo vidrio, xóo mbá cristal. Náa awúu̱n ga̱jma̱a̱ náa mbájndi kúwi̱i̱n mbá a̱jkhui̱i̱n bi̱ nduya, ikhiin guáʼdáá mbaʼa idún náa inún ga̱jma̱a̱ náa tsu̱du̱ún. 7 Timbáa bi̱ ndaʼya nindxu̱u̱ xóo león, bi̱ maʼni a̱jmi̱i̱n nindxu̱u̱ xóo mbá aʼdá toro, ga̱jma̱a̱ bi̱ maʼni ajtsíin gíʼdoo inuu xóo mbá xa̱biya̱, ga̱jma̱a̱ bi̱ maʼni a̱jkhui̱i̱n nindxu̱u̱ xóo mbáa bi̱yú bi̱ na̱jkha̱ rijma̱a̱. 8 Mbá a̱jkhui̱i̱n bi̱ nduya, mámbáa gíʼdoo mbá majun xniunʼ; náa tsu̱du̱u̱ ga̱jma̱a̱ agoo xniunʼ tima idún, ga̱jma̱a̱ mbiʼí mbruʼun, nuthi: “Kaʼwii, kaʼwii, kaʼwii nindxu̱u̱ Jeobá Dios, bi̱ gíʼdoo Xúgíʼ tsiakii, bi̱ ninindxu̱u̱, bi̱ nindxu̱u̱ ga̱jma̱a̱ bi̱ ma̱ʼkha̱”. 9 Xúgíʼ mbiʼi rí nuxna gloria, gamajkhu ga̱jma̱a̱ núma̱aʼ bi̱ gíʼ náa xílí rí phú naʼtáñajunʼ, bi̱ xtáa asndu kámuu mbiʼi, 10 bi̱ mbá 24 xa̱bu̱ guanuu nusmbátigu̱u̱n náa inuu bi̱ gíʼ náa xílí rí phú naʼtáñajunʼ ga̱jma̱a̱ nduyamajkuíí ikhaa bi̱ xtáa asndu kámuu mbiʼi, ga̱jma̱a̱ nundrigú corona dí oro ga̱jma̱a̱ nudaʼ náa inuu xílí rí phú naʼtáñajunʼ, ga̱jma̱a̱ nuthi: 11 “Jeobá, mínaʼ ikháán, kaʼyaʼ rí matrigú gloria, gamajkhu ga̱jma̱a̱ tsiakii, numuu rí ikháán nitani̱ xúgíʼ dí rígá, ga̱jma̱a̱ numuu rí ikháán nindaaʼ matani, nindoo niguma xúgíʼ”.