Xóo majmulú rí na̱ʼkha̱ náa xkri̱da xóo marataráʼa

Rí na̱ʼkha̱ náa xkri̱da xóo marataráʼa kiʼniratháá májánʼ wéñuʼ, mbaʼin publicadores nduyáá dí rígi̱ nayambáá wéñuʼ náa nagún gútaraʼa. Mú náa mámbá xuajen nindxu̱u̱ mixtiʼkhu. Ikha jngóo índo̱ nagún gútaraʼa, a̱ngiu̱lú ma̱ndoo muriʼkui̱i̱ xkri̱da rígi̱ o majmúún i̱mba̱ tema mu xúʼko̱ xa̱bu̱ manigu̱u̱nʼ mudxawíín. Mú xúgiáánʼ ndayóoʼ muʼnimbáníí mbá ikha rí najuixná índo̱ narígá mbá campaña kiejuunʼ. Ikháanʼ nandulú muʼnimbáníí rí niʼtáñajunʼ Jesús dí muʼtáraʼa ajngáa rí májánʼ ga̱jma̱a̱ numuu Reino (Mt 24:14).

Índo̱ mbá publicador naxná mbá asignación rí kaʼyoo náa reunión dí narígá ta̱pha̱ xmáná, gíʼmaa majmuu xkri̱da xóo muʼtáraʼa rí na̱ʼkha̱ náa I̱yi̱i̱ʼ dí najmulú náa reunión. Mú ma̱ndoo mariʼkhu̱u̱ graxe̱, texto, graxe̱ rí matatsiʼñáʼ o mariʼkhu̱u̱ ga̱jma̱a̱ mbá rí ma̱ndoo mambáyúu xa̱bu̱ á mu najuiʼthá rí ma̱ndoo maʼni, mu xúʼko̱ xa̱bu̱ manigu̱u̱nʼ mudxawíín. Rí naʼthí gi̱i̱ nariʼkuriya̱a̱ʼ dí ni̱ʼkha̱ náa I̱yi̱i̱ʼ dí najmulú náa reunión dí nigájnuu nákhá junio tsiguʼ 2020, ináa 8.