Referencia ndrígóo I̱yi̱i̱ʼ dí najmulú náa reunión xóo kúwi̱i̱n ga̱jma̱a̱ xóo Etaraʼa Cristianos
© 2023 Watch Tower Bible and Tract Society of Pennsylvania
4-10 SEPTIEMBRE
GÍʼDOO NUMUU RÍ NA̱ʼKHA̱ NÁA BIBLIA | ESTER 1, 2
“Atani̱ tsiakimínáʼ mani̱ndxa̱a̱ʼ xa̱bu̱ guabaaʼ xó má Ester”
Ma̱ndoo manindxu̱lúʼ xa̱bu̱ guabáanʼ índo̱ nuraʼníí xkujndu
11 Rí mbuʼyáá nguáthá eʼngulú muʼni masngájma xú káʼnii ni̱ndxu̱lú índo̱ xa̱bu̱ nuxnulu wéñuʼ gamajkhu. Rígi̱ rí nigíʼnuu Ester. Ikhaa ninindxu̱u̱ mbáa a̱ʼgu̱ bi̱ mitsiʼyáa wéñuʼ náa Persia. Mbá tsiguʼ ikhaa niñewa̱a̱n wéñuʼ ga̱jma̱a̱ nikhánaa thana rí maʼni mitsiʼyáa gajmíi̱n eʼwíínʼ wa̱ʼxa̱ʼ bi̱ nunimi̱jna̱ mu rey ma̱ndoo kaʼñún. Mú rey niraʼwíí Ester mu mani̱ndxu̱u̱ reyna. Ester nigruigú mbaʼa rí májánʼ, mú tandxaʼwáminaʼ índo̱ ga̱jma̱a̱ numuu ikhaa. Ninindxu̱u̱ má xúʼko̱ mbáa a̱ʼgu̱ gua̱ba̱ʼ, májánʼ xa̱bu̱ ga̱jma̱a̱ gamajkuii (Est. 2:9, 12, 15, 17).
ia 130 kutriga̱ 15
Nimbáyúu xuajñuu Dios
15 Gútangáanʼ mbuʼyáá relato ndrígóo Ester. Índo̱ niʼniuu toca manújngoo gáʼyoo rey, ma̱ndoo maraʼwíí asndu kaʼnii maʼ mu maʼni itháan tsíʼyáa. Ikhaa nindxu̱u̱ mbáa a̱ʼgu̱ gua̱ba̱ʼ ikha jngóo i̱ndó nijmuu dí nixnún Hegai (Est. 2:15). Mbáa ikhaa nindxa̱ʼwáminaʼ rí á mu nandoo dí rey maʼndoo kaʼyoo, raʼkháa i̱ndó ndayóoʼ dí maʼni tsiʼyáminaʼ, dí itháán gíʼdoo numuu nindxu̱u̱ dí magiʼdoo cualidades xóo dí mani̱ndxu̱u̱ mbáa a̱ʼgu̱ guabaaʼ, rí nda̱wi̱i̱n mbaʼin mani̱ndxu̱ún xúʼko̱ kaʼnii. Lá gajkhun rúʼko̱ ráʼ.
Ma̱ndoo manindxu̱lúʼ xa̱bu̱ guabáanʼ índo̱ nuraʼníí xkujndu
12 Á mu ni̱ndxu̱lú xa̱bu̱ guabáanʼ, xtíñúlú ga̱jma̱a̱ xóo muʼni masngájma rí nduʼyamajkhún eʼwíínʼ ga̱jma̱a̱ rí nduʼyamajkumijna mangáanʼ. Ragíʼmaa muʼni mbaʼumíjna̱ o muʼni rí xa̱bu̱ maguanún tsiánguá, nandulúʼ maguaʼdáá “mbá espíritu gua̱ba̱ʼ a̱jkiu̱u̱n” (atraxnuu 1 Pedro 3:3, 4; Jer. 9:23, 24). Á mu na̱nguá ni̱ndxu̱lú xa̱bu̱ guabáanʼ, rí xóo eʼthá ga̱jma̱a̱ rí xóo eʼni gasngájma nda̱wa̱á rí endxaʼwamíjna̱ ga̱jma̱a̱ numulúʼ. Mbá xkri̱da, lá nuʼni rí eʼwíínʼ mundxa̱ʼwa̱a̱ edxu̱ún rí itháan kuaʼdáá numulúʼ numuu ñajunʼ rí nuʼni, rí nduʼyáá o numún xa̱bu̱ bi̱ nuniʼnúnʼ ráʼ. O nuʼgíʼ nuʼni rí eʼwíínʼ mundxaʼwamíjna̱ rí niʼni mbóo rí gíʼdoo wéñuʼ numuu, maski ajndu eʼwíínʼ nimbayúlú ráʼ. Gundxaʼwamíjna̱ ga̱jma̱a̱ numuu Jesús. Ikhaa ma̱ndoo maʼni rí xa̱bu̱ maguanún tsiánguá ga̱jma̱a̱ xúgíʼ rí nijmañuu. Mú táʼni xúʼko̱ kaʼnii. Rí phú niʼni, niʼthí má xúʼko̱ rí na̱ʼkha̱ náa Ajngá rawunʼ Dios numuu rí ikhaa táʼndoo rí xa̱bu̱ muni mba̱a̱. Jesús nindoo má xúʼko̱ rí xa̱bu̱ muni mba̱a̱ Jeobá (Juan 8:28).
Guʼyáʼ rí gíʼdoo numuu
Natayáá má ráʼ.
Índo̱ ndiya̱a̱ mbá i̱yi̱i̱ʼ dí nigumaraʼmáʼ náa Persa náa naʼthí ga̱jma̱a̱ numuu mbáa xa̱bu̱ bi̱ mbiʼyuu Marduka (xtílóo Mardoqueo) bi̱ naguxnuu mbújkha̱a̱ náa xuajen Susa, índo̱ nijuiʼyáá ga̱jma̱a̱ numuu rígi̱, xa̱bu̱ bi̱ mbiʼyuu Arthur Ungnad, bi̱ naʼnigajmaa̱ dí xóo ni̱ʼkha̱ rarígá bi̱ xtáa náa xuajen rúʼko̱, niʼthí dí rígi̱ “nindxu̱u̱ i̱mba̱ náa naʼthí ga̱jma̱a̱ numuu Mardoqueo, dí raʼkháa i̱ndó náa Biblia”
Asndu má nákha mbiʼi rí Arthur Ungnad niʼthí rígi̱, ikhú nijuiʼtájuíi mbaʼa wéñuʼ i̱yi̱i̱ʼ náa ajngáa persa. Mbá rí ikhaa ninindxu̱u̱ xa̱jpha̱ ndrígóo Persépolis, rí nikujmaa náa niguma gámbáa náa kajthi mbújkha̱a̱ dí rígá náa mijngii niguma gámbáa xtájtsí ndrígóo xuajen. Náa xajpa rúʼko̱ nigumaraʼmáʼ nákha nixtáa raʼtáñajunʼ Jerjes I. Ajngáa dí kiʼniráʼmáʼ ikhí nindxu̱u̱ ajngáa elamita ma̱ngaa na̱ʼkha̱ mbaʼa mbiʼñún xa̱bu̱ bi̱ naʼthí náa libro ndrígóo Ester.
Mbaʼa xajpa persépolis naʼthí ga̱jma̱a̱ numuu Marduka, rí ikhaa nindxu̱u̱ bi̱ naʼnirámáʼ i̱yi̱i̱ʼ náa palacio ndrígóo Susa índo̱ nixtáa raʼtáñajunʼ Jerjes I. Mbá rí ikhaa naʼthí rí Marduka ninindxu̱u̱ bi̱ niʼtájui̱i̱ ajngáa. Ga̱jma̱a̱ numuu rígi̱ nambánii rí naʼthí náa Biblia ga̱jma̱a̱ numuu Mardoqueo: Rí ikhaa ninindxu̱u̱ mbáa xa̱bu̱ bi̱ nigiʼdoo numuu náa Rey Asuero (Jerjes I), ikhaa naʼthí a̱jma̱ ajngáa ga̱jma̱a̱ naguʼun nagiʼi náa xkrugoo palacio ndrígóo rey bi̱ xtáa náa Susa (Est. 2:19, 21; 3:3). Xkrugoo guʼwá rúʼko̱ na̱nguá gujkhuʼ náa nuñajunʼ xa̱bu̱ bi̱ guaʼdáá numún náa rey.
Xóo má eʼyáá dí rígá mbaʼa náa nasngájma rí naʼthí ga̱jma̱a̱ numuu Marduka ma̱ngaa Mardoqueo bi̱ naʼthí náa Biblia nikúwá ikhaa má tsiguʼ ga̱jma̱a̱ ikhí má xuajen ma̱ngaa rí niguaʼdáá ikháá má ñajunʼ, xúgíʼ rígi̱ naʼni mbuʼyáá rí Marduka ga̱jma̱a̱ Mardoqueo nindxu̱ún ikhaa má xa̱bu̱.
11-17 SEPTIEMBRE
GÍʼDOO NUMUU RÍ NA̱ʼKHA̱ NÁA BIBLIA | ESTER 3-5
“Atambáñúún eʼwíinʼ mu muxnáá rí itháán májánʼ Dios”
it-2 313 kutriga̱ 7
Mardoqueo
Tsíyoo gásmbáti̱go̱o̱ náa inuu Hamán. Nda̱wa̱á Asuero nigíiʼ Hamán xa̱bu̱ agaguita mu mani̱ndxu̱u̱ timbáa xa̱bu̱ bi̱ nigiʼdoo numuu ga̱jma̱a̱ nikuʼma dí xúgíinʼ xa̱bu̱ bi̱ guájun náa xkrugua ndrígóo rey, musmbati̱gu̱u̱n mu mbuyamajkuíí ga̱jma̱a̱ numuu mba̱a̱ ñajunʼ dí nikhánáá. Mardoqueo táʼni rúʼko̱ numuu rí ikhaa nindxu̱u̱ judío. (Est 3:1-4.) Numuu rí judíos i̱ndó nduyamajkuíí Jeobá Dios ndrígún. Ikhaa ndiʼyoo dí raʼkháa i̱ndó masmbáti̱go̱o̱ náa inuu mbáa xa̱bu̱ numuu rí ndaʼyamajkuu xó má nini̱ israelitas nákha wajyúuʼ náa inún xa̱bu̱ ñajunʼ. (2Sa 14:4; 18:28; 1Re 1:16.) Mardoqueo tásmbáti̱go̱o̱ numuu rí Hamán nindxu̱u̱ amalequita, ga̱jma̱a̱ “Jeobá maxmíjná má xúʼko̱ gajmíi̱n xa̱bu̱ amalequitas náa xúgíinʼ bi̱ gáguwáʼ rakuwa nda̱wa̱á”. (Éx 17:16; atayáá HAMÁN.) Mardoqueo nisngájma rí i̱ndó ndaʼyamajkuu Jeobá.
it-2 313 kutriga̱ 9
Mardoqueo
Niʼni kríyaaʼ Israel. Índo̱ Mardoqueo niʼdxaun ga̱jma̱a̱ numuu xtángoo rí nigájnuu, nikumu̱u̱ kaʼyoo reina Ester mbiʼi rúʼko̱ dí ikhaa maʼni káwíin judíos ga̱jma̱a̱ numuu ñajunʼ dí nigiʼdoo. Niʼni rí Ester mandxaʼwáminaʼ ñajunʼ dí kajkuáa ñawúunʼ ma̱ngaa niʼthúu̱n dí ma̱ndo̱ʼo̱o̱ rey rí magruígúu ga̱jma̱a̱ mambáyúu. Maski ajndu ikhaa ma̱ndoo makhañúu, Ester niʼnimbánuu rí kajkuáa ñawúunʼ. (Est 4:7–5:2.)
ia 133 kutriga̱ 22, 23
Nimbáyúu xuajñuu Dios
22 Asndu nikijxi̱i̱ a̱jkiu̱u̱n reina índo̱ niʼdxawuun ajngáa rígi̱. Niraʼnuu mbá gaʼkhu mba̱a̱ náa masngájma á mu gíʼdoo fe, índo̱ niriʼñuu Mardoqueo niʼthúún dí namíñuu. Náá numuu nimíñuu xá. Xó má niʼthún prímiu̱u̱, xtángoo eʼthí rí á mu mbáa xa̱bu̱ mbáaʼ gátoʼó náa naʼtáñajunʼ rey gíʼmaa rí makhañúu. Índo̱ mbáa tséʼnimbo̱o̱ ikha rígi̱, i̱ndó rí maʼni kríyaaʼ nindxu̱u̱ dí rey makruiyaʼ ixi̱ dí naʼtáñajunʼ dí ki̱ʼni̱ ga̱jma̱a̱ oro. Lá ma̱ndoo magiʼthu̱u̱n Ester dí Asuero magáwíinʼ a̱jkiu̱u̱n kaʼyoo rá’. Numuu dí Asuero tágáwíinʼ a̱jkiu̱u̱n kaʼyoo Vasti numuu rí ikhaa tándoo gáʼgá gáʼyoo índo̱ niʼthún. Ga̱jma̱a̱ niʼni má 30 mbiʼi dí Asuero na̱nguá eʼthúún maʼga Ester, mbáa rígi̱ eyoo gáʼthúu̱n dí rey niniñu̱u̱nʼ rí naniguuʼ kaʼyoo (Est. 4:9-11).
23 Mardoqueo niriʼña̱a̱ ga̱jma̱a̱ ajngáa gakhi̱i̱ numuu rí nindoo dí prímiu̱u̱ maʼni itháán gujkhuʼ fe ndrígóo. Niʼthúu̱n dí Jeobá maʼni káwíin, tséʼniuu á mu Ester nambáñun o na̱nguá. Ga̱jma̱a̱ á mu ikhaa tsémbáñún asndu mbáa ikhaa xáʼni kríyaminaʼ índo̱ gúni gíníi itháán xkawiʼ judíos. Xígi̱ kaʼnii Mardoqueo nisngájma rí naku̱mu̱u̱ kaʼyoo Jeobá, mbáa Dios dí naʼnimbánuu xúgíʼ dí nakudaminaʼ maʼni ga̱jma̱a̱ rí xániñuuʼ dí maguma gámbáa xuajñuu (Jos. 23:14). Nda̱wa̱á niʼthúu̱n Ester: “Lá xóó tsétatsaʼwáminaʼ dí mbáa xtaa a̱ʼkhu̱ mu matani̱ kríñaanʼxu ráʼ.” (Est. 4:12-14). ¡Mardoqueo ra̱ʼkhá tháán nisngájma fe ga̱jma̱a̱ nikumu̱u̱ kaʼyoo Dios! Lá mangáanʼ nindxu̱lú xúʼko̱ kaʼnii rá’. (Prov. 3:5, 6.)
Guʼyáʼ rí gíʼdoo numuu
kr 160 kutriga̱ 14
Nduʼyáʼ rí muniñu̱lúʼ mbuʼyamajkuíí Jeobá
14 Ikháá kayuuʼ xóo bi̱ nikúwá nákha wajyúuʼ Ester ga̱jma̱a̱ Mardoqueo, xúgi̱ ma̱ngaa xuajñuu Jeobá ndayáʼ rí ma̱ndoo muniñu̱u̱nʼ muni ñajuunʼ xó má eyoo ikhaa (Est. 4:13-16). Xú káʼnii gándoo gátiembáá ikháán rá. Ma̱ndoo maratajkáan tsejtsi mbiʼi ga̱jma̱a̱ numún a̱ngiu̱lú bi̱ numíníiʼ numuu rí nuxudiinʼ náa guʼwá ejua̱a̱nʼ. Ma̱ndoo matambáñun á mu naratájkáan ga̱jma̱a̱ numún, rúʼko̱ gáxnún tsiakii índo̱ gúmíniiʼ ga̱jma̱a̱ muxkhúún (atraxnuu Santiago 5:16). Lá nariʼña̱a̱ Jeobá rí nuʼtájkáan ráʼ. Índo̱ naʼngulú náa inún xa̱bu̱ ñajunʼ nasngájma dí xúʼko̱ (Heb. 13:18, 19).
18-24 SEPTIEMBRE
GÍʼDOO NUMUU RÍ NA̱ʼKHA̱ NÁA BIBLIA | ESTER 6-8
“Gajmañulú muʼtámíjná xóo Ester”
ia 140 kutriga̱ 15, 16
Nigiʼdoo ku̱ma̱, támiñuu maski ajndu ikhaa ma̱ndoo makhañúu
15 Numuu rí Ester niʼngo̱o̱ a̱jkiu̱u̱n ga̱jma̱a̱ nigi̱ʼthu̱u̱n imbo̱o̱ mbiʼi mu maʼthúu̱n rey ndiéjunʼ dí nindoo, Hamán nigiʼdoo mbiʼi mu maʼniratoo xú káʼnii makhañún, maski asndu tákumu̱u̱ xúʼko̱ kaʼnii ikhaa. Ma̱ngaa, mbáa Jeobá niʼni dí rey xájmaa gígú (Prov. 21:1). Ikha jngóo náa Biblia naʼthúlú rí guguaʼthi̱i̱n kuʼyáálú Dios (atraxnuu Miqueas 7:7). Índo̱ nuniʼñáánʼ xkujndu ndrígulú náa ñawúunʼ Dios, mbáa mbuʼyáálú dí ikhaa itháan májánʼ naʼnimbánuu ki xóo dí ikháanʼ nikumulú muʼni.
Támiñuu ga̱jma̱a̱ niʼthí
16 Ester nánguá eyoo mbaʼyoo a mu ajmbio̱o̱ naʼngo̱o̱ xóó a̱jkiu̱u̱n, ikha jngóo maʼthúu̱n xúgíʼ náa a̱jma̱ mbiʼi dí muphiʼtsu. Mú, xú káʼni gáʼni rá. Rey niraxu̱u̱ mbu̱júu̱ Ester ndiéjunʼ rí nandoo ma̱ndo̱ʼo̱o̱ (Est. 7:2). Ni̱jkha̱nú má ‹mbiʼi rí maʼthí›.
ia 140 kutriga̱ 17
Nigiʼdoo ku̱ma̱, támiñuu maski ajndu ikhaa ma̱ndoo makhañúu
17 Mú, ndiéjunʼ eʼni Ester nákha xóó tsériʼñuu rey xá. Mbáa ikhaa naʼtákáñuu Dios náa a̱jkiu̱u̱n, ga̱jma̱a̱ ikhú ndayáa tsiakii ga̱jma̱a̱ naʼthúu̱n rey: “Tátá rey, á mu naʼni a̱jkia̱a̱nʼ xta̱yo̱ʼ ga̱jma̱a̱ á mu májánʼ tayáá dí maraxnu̱ʼ rí na̱nda̱ʼa̱a̱, natakháñaaʼ atani̱ kríñuunʼ ga̱jma̱a̱ atani̱ kríyaaʼ xuajñuʼ ma̱ngaa” (Est. 7:3). Naʼthúu̱n rey dí maʼnimbo̱o̱ dí garaʼwíí ikhaa. ¡Phú mixtiʼkhu kayuuʼ xóo niʼni Vasti, bi̱ niríya gamajkhu rey! (Est. 1:10-12.) Maski ajndu rey Asuero nikumu̱u̱ kaʼyoo Hamán, ikhaa táʼthi numuu. Rí ikhaa niʼni nindxu̱u̱ dí nindo̱ʼo̱o̱ rí mañewu̱u̱n numuu rí nandún gúxiyáa.
ia 141 kutriga̱ 18, 19
Nigiʼdoo ku̱ma̱, támiñuu maski ajndu ikhaa ma̱ndoo makhañúu
18 Mbáa asndu nigáwíinʼ a̱jkiu̱u̱n ga̱jma̱a̱ niʼniuu tsiánguá rey, rí niʼthún Ester. Tsáa lá eyoo gáxíyáa reina rá. Ikhaa naʼthí xóó: “Numuu dí xuajñu’ ga̱jma̱a̱ ikhúún nixtagujuáanʼxu mu muradiáanʼxu ga̱jma̱a̱ munigámbáanʼxu mbá kayuuʼ. Á mu nixtangujuánxu mu mani̱ndxu̱xuʼ ñumbáá ikhúún xáta má nimbá, mú rígi̱ ragíʼmaa maguma numuu rí maʼni gachúu mbiʼyuu rey” (Est. 7:4). Guʼyáá dí Ester naʼthúu̱n mbájmbu xkujndu dí naraʼnuu, mú naʼthí dí á mu nixtangujui̱i̱n mu mani̱ndxu̱ún ñumbáá, ikhaa maguanúu má wíí. Mú ikhaa naʼthúu̱n dí xtáá rarígá, numuu dí kúwíin mbaʼin bi̱ makhañún ga̱jma̱a̱ rígi̱ maʼni gachúu mbiʼyuu rey.
19 Ester nijmaa niʼnimbánuu xkujndu ga̱jma̱a̱ ku̱ma̱ ma̱ngaa ndiʼyoo xóo maʼthí mu rey maʼnimbo̱o̱ kaʼyoo. Xkri̱doo naʼsngúlú dí á mu na̱ʼkha̱nú mbó mbiʼi rí mbaʼyóoʼ muʼthán mbá xkujndu gakhi̱i̱ gajmiúlú mbáa bi̱ nandulú kuʼyáá o mbáa xa̱bu̱ ñajunʼ bi̱ gíʼdoo numuu, gíʼmaa maʼngo̱o̱ a̱jkiu̱lú, muguaʼdaa gamajkuu ga̱jma̱a̱ guʼthánlú rí gajkhun (Prov. 16:21, 23).
Guʼyáʼ rí gíʼdoo numuu
w06 1/3 11 kutriga̱ 1
Rí itháan nagájnuriyooʼ náa libro ndrígóo Ester
7:4. Xú káʼni ma̱ndoo “mamínuu’ rey” dí muradíin judíos rá. Ester niʼthí rí ma̱ndoo maʼni gachúu mbiʼyuu rey dí muradíin, índo̱ niʼthí dí itháan má májánʼ rí maxtangujui̱i̱n xóo ñumbáá ki xóo dí muradíin. Maʼngo̱o̱ itháan mbújkha̱a̱ á mu nixtangujui̱i̱n judíos xóo ñumbáá ki xóo 10,000 mbújkha̱a̱ plata dí Hamán dí nikudaminaʼ maxná. Rígi̱ nandoo gáthúu̱n ma̱ngaa dí a̱ʼgiu̱u̱ makhañúu.
25 SEPTIEMBRE ASNDU 1 OCTUBRE
GÍʼDOO NUMUU RÍ NA̱ʼKHA̱ NÁA BIBLIA | ESTER 9, 10
“Nijmuu ñajunʼ rí kajkuáa ñawúunʼ mu mambáñún eʼwíinʼ”
Ester naʼni káwíin xa̱bu̱ xuajñu
Mú nimbáa xándoo maʼnijngudi̱i̱ xtángoo rí niʼni Hamán, ni má rey. Ikha jngó rey niʼni rí Mardoqueo mayéʼga edxu̱u̱ náa príncipes ga̱jma̱a̱ niniñuʼ rí maʼni mbá nuxi̱ʼ xtángoo. Xtángoo naʼthí rí judíos ma̱ndoo mumbayumíjná índo̱ gáguwáʼ muradíin. Mbiʼi 13 ñajunʼ gu̱nʼ adar, xa̱bu̱ xuajen bi̱ ni̱ndxu̱ún judíos niʼngu̱u̱n nini gajmiún xa̱bu̱ sia̱nʼ ndrígu̱ún. Asndu nákha mbiʼi rúʼko̱, judíos nigi̱ʼdi̱i̱ nini ndxa̱a̱ xúgíʼ tsiguʼ numuu rí niʼngu̱u̱n.
it-2 765 kutriga̱ 1
Purim
Náa numuu niguma. Maski ajndu tikhuin xa̱bu̱ bi̱ nuthi dí naʼthí náa Biblia, nuthi rí ndxa̱a̱ Purim dí nuniri̱ya̱a̱ʼ judíos mbiʼi xúgi̱, tsesngájma gamajkhu náa mitsúʼkháan ga̱jma̱a̱ asndu nguáná ra̱ʼkhá tháán rígá dí raʼkhí, mú raʼkháa xúʼko̱ nindxu̱u̱ índo̱ niguma. Nákha wajyúuʼ Mardoqueo ga̱jma̱a̱ Ester nduyamajkuíí Jeobá, Dios bi̱ gajkuwiin, ndxa̱a̱ rúʼko̱ naguma mu maguma mba̱a̱ Ikhaa. Jeobá niʼni káwíin judíos numuu rí xkujndu nigi̱ʼdu̱u̱ numuu dí Mardoqueo i̱ndó ndiʼyamajkuu Jeobá. Mbáa Hamán nindxu̱u̱ mbáa amalequita, ga̱jma̱a̱ má Jeobá niʼthá tsríguíi, niʼthí dí maguma gámbáa Amaleq. Mardoqueo ndiʼyamajkuu rí niʼthí Dios ga̱jma̱a̱ na̱nguá nindoo gasmbáti̱go̱o̱ náa inuu Hamán. (Est 3:2, 5; Éx 17:14-16.) Ajngáa rí Mardoqueo niʼthúu̱n Ester nisngájma dí nikumu̱u̱ kaʼyoo mbáa bi̱ itháán gíʼdoo tsiakii dí maʼni káwíin judíos. (Est 4:14.) Ikháá má kayuuʼ, índo̱ Ester tákuiʼtsu nákha xóó tséjkha̱ gáʼyoo rey mu maguwáʼ guphiʼtsu, nisngájma rí Dios nindxu̱u̱ bi̱ na̱jkha̱ gándo̱ʼo̱o̱ mambáyúu. (Est 4:16.)
cl 101, 102 kutriga̱ 12, 13
Guʼtáñajunʼ xó má eʼni Dios
12 Jeobá nigruigi̱i̱n bi̱ kuya̱ edxu̱u̱ náa nagimbáanʼ mu muyégún edxu̱u̱ (Hebreos 13:17). A̱ngiu̱lú bugi̱ gíʼmaa majmúún májánʼ ñajunʼ dí nixnúún Dios mu muñewu̱u̱n mugiuún náa nagimbáanʼ ga̱jma̱a̱ mumbáñún mu makuwíin itháan mijngii náa Jeobá. Mú, lá rígi̱ eyoo gáʼthúu̱n dí ma̱ndoo muthún a̱ngiu̱lú mámbá rí gíʼmaa muni xáʼ. ¡Na̱nguá! Bi̱ kuya̱ edxu̱u̱ gíʼmaa mani̱ndxu̱ún xa̱bu̱ guabiinʼ ga̱jma̱a̱ gíʼmaa makru̱ʼu̱u̱n ndiéjunʼ dí gíʼthu̱u̱n Jeobá náa ikhiin (1 Pedro 5:2, 3). Náa Biblia eʼthí rí gíʼmaa “muxnu̱u̱ ikha mugiu̱u̱ Dios, ikhaa mínaaʼ niʼtsiwíin ga̱jma̱a̱ eʼdiuu A̱ʼdióo” (Hechos 20:28). Rígi̱ nindxu̱u̱ mbá rí gíʼdoo numuu, mu bi̱ kuya̱ edxu̱u̱ muñewu̱u̱n xúgíinʼ e̱jín múgiúu Jeobá.
13 Guʼgíiʼ mbá xkri̱da, atatsaʼwáminaʼ dí mbáa bi̱ nambájxa̱a̱ʼ ga̱jma̱a̱ na̱nda̱ʼa̱a̱ dí matiewa̱a̱n mbá rí ikhaa nandoo kaʼyoo wéñuuʼ ga̱jma̱a̱ minumuu niʼtsi. Lá ragájkhun dí ikháán matiewa̱a̱n tsumáá rí nikhánáá ráʼ. Ikháá má kayuuʼ Dios nandu̱ʼu̱u̱n bi̱ nuyégún edxu̱u̱ rí muñewa̱a̱n mbá rí ikhaa nandoo kaʼñún wéñuuʼ: ‹Ejín múgú› o bi̱ a̱ngiu̱lú bi̱ kúwá náa nagimbáanʼ (Juan 21:16, 17). Jeobá ra̱ʼkhá tháán eyoo kaʼñún rí niʼtsiwíin ga̱jma̱a̱ minumuu wéñuuʼ: rí mitsaan eʼdiuu A̱ʼdióo Jesucristo. ¡Nda̱a̱ imbo̱o̱ rí itháán minumuu! Bi̱ kuya̱ edxu̱u̱ narmáʼáan a̱jkiu̱ún rígi̱ ikha jngóo nusngajma rí nindxu̱ún xa̱bu̱ guabiinʼ ga̱jma̱a̱ nuñewu̱u̱n mugiu̱u̱ Jeobá ga̱jma̱a̱ ngajua.
Guʼyáʼ rí gíʼdoo numuu
w06 1/3 11 kutriga̱ 4
Rí itháan nagájnuriyooʼ náa libro ndrígóo Ester
9:10, 15, 16. Maski ajndu judíos ma̱ndoo murawíi káñún dí niguanáa náa nigiʼdu̱u̱n. Ndíjkha túni rígi̱ xá. Numuu rí nindúún muñewu̱u̱n míjna raʼkháa dí muguaʼdáá itháan.
2-8 OCTUBRE
GÍʼDOO NUMUU RÍ NA̱ʼKHA̱ NÁA BIBLIA | JOB 1-3
“Atasngájma má xúʼko̱ dí gajkhun nandaaʼ xtayáá Jeobá”
Guʼyaridáá fe ga̱jma̱a̱ xóo niʼnimbo̱o̱ Noé, Daniel ga̱jma̱a̱ Job
16 Xkujndu rí niraʼnuu. Job niriʼkhuu wéñuʼ xóo nixtáa. Ikhaa “nijmaʼniiʼ numuu rí nigiʼdoo wéñuʼ náa xuajin mijngii rí náa nagájnuu A̱jkha̱ʼ” (Job 1:3). Nigiʼdoo wéñuʼ, nijmaʼniiʼ ga̱jma̱a̱ ra̱ʼkhá tháán ndiyamajkuíí (Job 29:7-16). Maski ajndu xúʼko̱, ikhaa na̱nguá nindxa̱ʼwáminaʼ rí gíʼdoo itháan numuu náa eʼwíínʼ o rí tséyóoʼ má Dios. Asndu Jeobá niʼthúu̱n “xa̱biu̱ʼ” ga̱jma̱a̱ niʼthí rí nindxu̱u̱ “mbáa xa̱bu̱ jmbi bi̱ nda̱a̱ aʼkhúun, bi̱ ndaʼyamajkhuu Dios ga̱jma̱a̱ tséʼni dí ra̱májánʼ” (Job 1:8).
17 Mú vida ndrígóo niriʼkhuu wéñuʼ mbá nacha̱. Niʼnimbáti̱ga̱ xúgíʼ ga̱jma̱a̱ nixtáa gíná wéñuʼ rí asndu nindoo makhañúu. Gajkhun má, ikháanʼ nduʼyáá rí Satanás bi̱ nigiʼdoo aʼkhúun, bi̱ niʼni tsu̱di̱i̱ índo̱ niʼthí rí ndaʼyamajkuu Jeobá ga̱jma̱a̱ numuu rí naxnúu rí gíʼdoo (atraxnuu Job 1:9, 10). Jeobá ndiʼyoo rí nigiʼdoo wéñuʼ numuu rígi̱. Niniñuʼ rí Job masngájma rí nindxu̱u̱ jmbii ga̱jma̱a̱ xúgíʼ rí niʼni ga̱jma̱a̱ rí niʼni ñajunʼ ga̱jma̱a̱ xúgíʼ a̱jkiu̱u̱n ga̱jma̱a̱ gajkhun.
Gaguaʼdáá mbá a̱jkiu̱lú káxi̱
10 Xú kaʼnii kuajtuminaaʼ náa mámbáa rí ikháanʼ graxe̱ rí niʼni Gixa̱a̱ ga̱jma̱a̱ numuu Job rá. Ikhaa niʼthí rí ikháanʼ tsíyulú kuʼyáá gajkhun Jeobá, rí á mu kuwaa ranújngulú náa mbá gaʼkhu muniʼñáʼ runi ñajunʼ mu muʼni kawúmíjná ga̱jma̱a̱ rí ikháanʼ raguáʼdáá mbá a̱jkiu̱lú káxi̱ náa ikhaa (Job 2:4, 5; Rev. 12:10). Xú kaʼnii eʼni makumulúʼ rígi̱ rá. Ra̱ʼkhá gajkhun rí naʼni magawunlú ráʼ. Mú gundxaʼwamíjna̱ rígi̱: Jeobá naku̱mu̱u̱ kaʼyulú wéñuʼ rí asndu naniñuuʼ rí Gixa̱a̱ magruiga̱ tsáʼkhá náa inulú, mu xúʼko̱ musngajmá rí kuaʼdáá mbá a̱jkiu̱lú káxi̱ náa ikhaa ga̱jma̱a̱ rí Gixa̱a̱ nindxu̱u̱ minduwaaʼ. Ma̱ngaa, Dios nakudaminaʼ rí mambáyulúʼ mu maʼngulú (Heb. 13:6). ¡Ra̱ʼkhá tháán májánʼ nindxu̱u̱ rí kuaʼdaa bi̱ Naʼtáñajunʼ náa xúgíʼ numbaaʼ mu mambáyulúʼ! Lá nandoo nduyáá ndíjkha rí gíʼdoo wéñuʼ numuu rí maguaʼdáá mbá a̱jkiu̱lú káxi̱ ráʼ. Numuu rí xúʼko̱ nuʼni maʼkhunʼ rí minduwaʼ nindxu̱u̱ rí niʼthí Gixa̱a̱ ga̱jma̱a̱ numbayíí mbiʼyuu ga̱jma̱a̱ xóo eʼtáñajunʼ Anu̱lú bi̱ xtáa mekhuíí. Mú, xú kaʼnii gándoo muʼni mu muguaʼdáá mbá a̱jkiu̱lú káxi̱ rá.
Guʼyáʼ rí gíʼdoo numuu
Gajmañulú náa iwáá ajngáa rí niʼthí Jesús
9 Rí niʼthí Jesús. Nákha Jesús xóo tsékháñuu, nindxaʼwá: “Dios ndrígóʼ, Dios ndrígóʼ, náá numuu nitatsíñúʼ rá.” (Mat. 27:46.) Náa Biblia tséʼthí náá numuu rí Jesús niʼthí ajngáa rígi̱. Guʼyáá dí eyoo gáʼthúu̱n ajngáa dí niʼthí, ikhaa xtáa raʼnimbánuu kiʼtáriyaʼ dí na̱ʼkha̱ náa Salmo 22:1. Ma̱ngaa, ajngáa dí niʼthí Jesús nisngájma kaʼwu dí Jeobá na̱nguá nigíʼ ‹mbóo gúláa náa mbájndi› A̱ʼdióo (Job 1:10). Jesús nikro̱ʼo̱o̱ rí anu̱u̱ niniñuuʼ náa ñawún xa̱bu̱ sia̱nʼ, mu xúʼko̱ mugíʼ tsáʼkhá náa inuu ga̱jma̱a̱ masngájma fe asndu índo̱ gákháñuu, numuu rí nimbáa xa̱bu̱ tagíʼnuu xóo ikhaa, ma̱ngaa ajngáa rí niʼthí, rúʼko̱ nasngájma dí na̱nguá gíʼdoo aʼkhúun ga̱jma̱a̱ dí rakáʼyoo makhañúun.
9-15 OCTUBRE
GÍʼDOO NUMUU RÍ NA̱ʼKHA̱ NÁA BIBLIA | JOB 4, 5
“Tsumáá gátani̱ ga̱jma̱a̱ noticia rí minduwaʼ”
it-1 795
Elifaz
2. Mbáa bi̱ ajtsíin bi̱ nambájxu̱u̱ ga̱jma̱a̱ Job. (Job 2:11.) Nindxu̱u̱ temanita, mbáa ikhaa na̱ʼkha̱ náa timbáa a̱ʼdióo Esaú, rígi̱ eyoo gáʼthúu̱n rí ni̱ʼkha̱ náa e̱ji̱i̱n Abrahán ikha jngóo kaʼyoo Job. Ikhaa gajmíi̱n a̱ngui̱i̱n nuthi dí ra̱ʼkhá tháán ejmañún. (Jer 49:7.) Elifaz itháán najmaʼniiʼ náa ajtsíin bi̱ nigún gúxna tsiakii xóo bi̱ itháán gíʼdoo numuu, mbáa asndu ikhaa ninindxu̱u̱ bi̱ itháán nikhi̱i̱. Ikhaa ginii nagi̱ʼdu̱u̱ raʼthí náa ajtsíin dí ikhiin ga̱jma̱a̱ ra̱ʼkhá tháán mbayuuʼ ndijyúuʼ niʼthún Job.
w05 15/9 26 kutriga̱ 2
Guʼni tsiakimijna mu xúndxaʼwamíjna dí raʼkhí
Elifaz naʼthí dí nigíʼnuu nákha wapháá ga̱jma̱a̱ mbáa espíritu: “Mbá espíritu ninújngoo náa inuʼ; asndu nixúwu̱u̱n xtóʼ. Ikhú espíritu niwi̱ji̱, mú na̱nguá niniʼníiʼ xóo kaʼnii; ndi̱yo̱o̱ i̱ndó ndájkhoo; nda̱wa̱á rí nda̱a̱ dí niwáán, nidxawun mbáa aʼwá” (Job 4:15, 16). Xú káʼnii nindxu̱u̱ espíritu bugi̱ bi̱ niʼni dí Elifaz mandxaʼwáminaʼ xígi̱ kaʼnii rá. Ajngáa gujkhuʼ dí nijmuu nda̱wa̱á nasngájma dí espíritu bi̱ ndiʼyoo nindxu̱u̱ mbáa xa̱bu̱ wéñiʼ, raʼkháa mbáa ángel ndrígióo Dios (Job 4:17, 18). Numuu rí Jeobá nikiʼnáa kaʼyoo Elifaz gajmíi̱n a̱ngui̱i̱n numuu rí nithi dí minduwaʼ (Job 42:7.) Elifaz niʼni rí nindoo xa̱bu̱ wéñiʼ ga̱jma̱a̱ dí niʼthí nisngájma rí nandxa̱ʼwáminaʼ dí ra̱májánʼ.
w10 15/2 19 kutriga̱ 5, 6
Xájngutíguáánʼ náa minduwaʼ ndrígóo Gixa̱a̱
Satanás nijmiu Elifaz (mbáa bi̱ ajtsíin bi̱ nambájxu̱u̱ gajmíi̱n Job bi̱ nigún gúyá) mu maʼthí dí xa̱bu̱ ra̱ʼkhá tháán guabiinʼ mu maʼngu̱u̱n muraʼníí náa mbá tsáʼkhá. Xúʼko̱ Elifaz niʼthí rí “xuñúnʼ nindxu̱u̱ ku̱ba̱ʼ, yujndaʼ nigumiin ga̱jma̱a̱, ma̱ndoo mataxujmbíi̱n itháán nacha̱ ki xóo ruxi. Nagixmbi̱i̱n mbá kayuuʼ rí miʼcha̱ asndu náa wakhííʼ; asndu nimbáa tséʼyoo índo̱ nandáti̱gi̱i̱n mbá kayuuʼ” (Job 4:19, 20).
Gajkhun má dí náa Kiʼniraʼmáʼ naʼni mbríguáanʼ ga̱jma̱a̱ mbá “vaso ku̱ba̱ʼ” (2 Cor. 4:7). Xígi̱ kaʼnii nindxu̱lú numuu rí Adán niʼni dí muguaʼdáá aʼkhá (Rom. 5:12). Ikha jngóo á mu naguanúlúʼ i̱ndó ikháanʼ, xájmáán guʼni gajmiúlú Gixa̱a̱. Xámbumulú dí Jeobá mambáyulúʼ bi̱ nindxu̱lú cristianos, tséʼniuu á mu nindxu̱lú xa̱bu̱ aʼkhá, ikhaa ndaʼyoo rí kuáʼdáá numulú (Isa. 43:4). Ma̱ngaa á mu nunda̱ʼa̱a̱ ikhaa maxnúlú espíritu santo ndrígóo (Luc. 11:13). Ga̱jma̱a̱ núma̱aʼ má “tsiakii rí itháan mba̱a̱” nambáyulú mu maʼngulú dí nagrui̱ga̱ Gixa̱a̱ náa inulú (2 Cor. 4:7; Fili. 4:13). Ikha jngóo á mu ‹nuguajújti̱i̱nlu, nu̱ʼni̱ gújkhúʼ má xúʼko̱ fe ndrígulú›, Dios maʼni rí muguajúnlu jmbu ga̱jma̱a̱ maʼni migújkiáánʼlu (1 Ped. 5:8-10). ¡Nda̱a̱ numuu mu mamiñulúʼ kuʼyáá Gixa̱a̱!
Xú káʼni ma̱ndoo matiewumínáʼ náa nuthi dí ragájkhun
● Atayáá májánʼ náa e̱ʼkha̱ ga̱jma̱a̱ dí eʼthí
Rí e̱ʼkha̱ raʼthí náa Biblia: “Gu̱ya̱a̱ á mu xúgíʼ nindxu̱u̱ gajkhun” (1 Tesalonicenses 5:21).
Xátatsimba̱a̱ nacha̱ mbá rí nuthi xa̱bu̱ ga̱jma̱a̱ xátaxuʼnguánʼ náa inún eʼwíinʼ á mu xóo tsítayáá rí gajkhun nindxu̱u̱, tséʼniuu á mu mbaʼin nuthi o na̱ʼkha̱ mbaʼa nuthu náa noticia. Xú káʼnii gáta̱ya̱a̱ á mu gajkhun rá.
Atayáá á mu ma̱ndoo maku̱ma̱a̱ʼ xtayáá náa e̱ʼkha̱ rígi̱, tsáa nindxu̱u̱ bi̱ naʼthí. Nguáná xa̱bu̱ bi̱ nuyégún edxu̱u̱ náa nuxna noticia nuriʼkhu̱u̱ rígi̱ mu ma̱ndoo magajnúu xó má eñún ikhiin, mu makánún itháan mbújkha̱a̱ o nuni̱ rígi̱ numuu política. Ikha jngóo atanimbríguii rí natayáá ga̱jma̱a̱ náa i̱ʼwáʼ rí nagájnuu. Asndu bi̱ nambájxulu gajmiúlú ma̱ndoo muxuʼma náa nuthi dí ragájkhun náa correo electrónico o náa redes sociales ndrígulú. Ikha jngóo xátatsimbaaʼ rí nutha̱nʼ á mu tsítayáá náa nigi̱ʼdu̱u̱ nithi.
Atayáá á mu di na̱ʼkha̱ raʼthí nindxu̱u̱ rí nigájnuu iwáá kayuuʼ ga̱jma̱a̱ á mu nindxu̱u̱ gajkhun. Atayáá xí ma̱ndoo ma̱ta̱ya̱a̱ náa mbiʼi ga̱jma̱a̱ náa nigájnuu dí na̱ʼkha̱ raʼthí. Araʼdáá itháán tsumáá á mu mbá tema mba̱a̱ ga̱jma̱a̱ mingíjyúuʼ nusngajmaa xóo mbá chíʼgíiʼ ga̱jma̱a̱ dí na̱ʼkha̱ raʼthí naʼni dí matambi̱ya̱ʼ o makiʼnáá.
Guʼyáʼ rí gíʼdoo numuu
w03 15/5 22 kutriga̱ 5, 6
Gugayúlú má xúʼko̱ mu maʼngulú makuwáanʼ
Ra̱ʼkhá tháán mitsaan nindxu̱u̱ rí makuwáanʼ náa xuajñuu Jeobá numuu dí nambáyulú mu makuwáanʼ májánʼ (1 Pedro 2:17). Mangáanʼ ma̱ndoo mumbáñún a̱ngiu̱lú mu makuwíin májánʼ.
Garmáʼáan a̱jkiu̱lú eʼni Job xú káʼnii nimbáñun eʼwíinʼ. Asndu mígiúu Elifaz maski ajndu niʼthí dí raʼkhí ga̱jma̱a̱ numuu ma̱ngaa niʼthí: “Bi̱ naxpátri̱ga̱a̱, ikháán nataxújxi̱i̱ ga̱jma̱a̱ ajngáaʼ, ma̱ngaa naraxnún tsiakii bi̱ nagomi̱i̱ʼ ragómiu̱ún” (Job 4:4). Nindxu̱lú xígi̱ kaʼnii ikháanʼ ráʼ. Mámbáa dí ikháan ma̱ndoo mumbáñún a̱ngiu̱lú mu muni má xúʼko̱ rí naniguuʼ Dios. Índo̱ gákuwáanʼ gajmiúlú guʼni xó má eʼthí ajngáa rígi̱: “Gu̱xnu̱u̱nʼla tsiakii bi̱ nakháguabaaʼ ñawúúnʼ ga̱jma̱a̱ bi̱ naʼba̱a̱n ragómiu̱ún” (Isaías 35:3). Guʼgímijná rí muxnáá tsiakii mbáa o a̱jmi̱i̱n a̱ngiu̱lú náa mámbá reunión (Hebreos 10:24, 25.) Gajmulú ajngáa rí mambáñun, guʼniu̱u̱lú felicitar ga̱jma̱a̱ guxnúlú núma̱aʼ numuu xúgíʼ dí nuni̱ tsiakimijna mu muni rí naniguuʼ Jeobá. Xúʼko̱ gúmbáñúnlú mu maʼngu̱u̱n magáñún náa rí maʼni makuwá.
16-22 OCTUBRE
GÍʼDOO NUMUU RÍ NA̱ʼKHA̱ NÁA BIBLIA | JOB 6, 7
“Á mu nánguá eʼnga̱a̱ʼ itháan rá.”
w06 15/3 14 kutriga̱ 10
Rí itháan nagájnuriyooʼ náa libro ndrígóo Job
7:1; 14:14. Ndiéjunʼ eyoo gáʼthúu̱n ajngáa ‹mbá ñajunʼ gakhi̱i̱› rá. Job ra̱ʼkhá tháán nijmúu, rí ndiʼyoo dí maxtáa nindxu̱u̱ xóo rí xtáa rañejunʼ gakhi̱i̱ ga̱jma̱a̱ eʼni néʼngo̱o̱ (Job 10:17). Numuu rí xa̱bu̱ índo̱ nakháñún asndu índo̱ magabi̱i̱ʼ gíʼma maxtáa mbayuʼ náa Seol, ikha jngóo Job nimbríguii ga̱jma̱a̱ mbá ñajunʼ rí gíʼmaa maʼni.
Jeobá naʼni káwíin bi̱ nikáguabiinʼ
NGUÁNÁ marigá má mbiʼi rí makáguabáanʼ ga̱jma̱a̱ numuu rí nundxa̱ʼwa̱míjna̱ rí ‹na̱nguá kuwáánʼ mbayuuʼ ga̱jma̱a̱ rí naguáʼdáá wéñuʼ xkujndu› (Job 14:1). Mbaʼin xa̱bi̱i̱ Jeobá bi̱ nikúwá nákha wájyúuʼ mangiin nikumu̱ún xúʼko̱. Tikhun asndu nindúún makhañún (1 Rey. 19:2-4; Job 3:1-3, 11; 7:15, 16). Mú Jeobá, nixnúún tsiakii ga̱jma̱a̱ niʼni̱i̱ a̱jkiu̱ún. Ma̱ngaa niʼni rí magumaraʼmáʼ náa Biblia dí ikhiin niguaʼníí, mu xúʼko̱ ma̱ndoo maʼsngulúʼ ga̱jma̱a̱ rí maʼni̱i̱ a̱jkiu̱lú (Rom. 15:4).
Jeobá nandoo kaʼyulú
Aratájkáan tsétsí mbiʼi (1 Tes. 5:17). Índo̱ mbáa nandaaʼ mambajxáaʼ ga̱jma̱a̱ʼ naratháán nángii eʼníí ga̱jma̱a̱ xú káʼnii ku̱ma̱a̱ʼ, xúʼko̱ má kayuuʼ gíʼmaa mani̱ndxu̱u̱ rí nambájxulu gajmiúlú Jeobá ma̱ngaa índo̱ nuʼtháán xú káʼnii eku̱mu̱lúʼ rí nundxa̱ʼwáá edxu̱lú ga̱jma̱a̱ rí naʼni maxmiéjunlú, xúʼko̱ nusngajmáá rí nakumulú kuʼyáá ikhaa ga̱jma̱a̱ dí nandoo kaʼyulú (Sal. 94:17-19; 1 Juan 5:14, 15). Ndxájulú a̱ʼgu̱ bi̱ mbiʼyuu Yua, bi̱ niʼthá náa kutriga̱ 2 naʼthí: “Índo̱ natajkháan raʼkháa i̱ndó na̱thu̱u̱n Jeobá ga̱jma̱a̱ numuu ñajunʼ rí ni̱ni̱ mbiʼi rúʼko̱, na̱thu̱u̱n xúgíʼ xú káʼnii e̱ku̱mu̱ʼ ga̱jma̱a̱ xúʼko̱ ni̱jkhánú ndi̱yo̱o̱ Jeobá raʼkháa xóo mbáa bi̱ kayá edxu̱u̱ náa nañejunʼ, ni̱jkhánú ndi̱yo̱o̱ xóo mbáa xa̱bu̱ nikhi̱i̱ bi̱ gajkhun nandoo kaʼñúún e̱ji̱i̱n” (atayáá kúgumaʼá “Lá nitraxnuu ráʼ”).
Araxtaa gajmiáanʼ a̱ngiu̱lú. Numuu rí ikhiin ni̱ndxu̱ún mbá regalo kiejunʼ rí Jeobá nixnúlú (Sant. 1:17). Anu̱lú bi̱ xtáa mekhuíí gajkhun dí naxmiéjuunʼ kaʼyulú mámbáa dí ikháanʼlu ga̱jma̱a̱ nixniúlú bi̱ ma̱ndoo makuwáánʼ gajmiulúʼ, ikhiin ni̱ndxu̱ún a̱ngiu̱lú bi̱ ma̱ndoo musngajma rí nandún kuyulú (Prov. 17:17). Náa carta rí niʼnirámáʼ Pablo dí nikuʼma náa Colosas niʼthí ga̱jma̱a̱ numún cristianos bi̱ nimbayíí numuu rí ndiʼyoo rí ikhiin ‹nini̱ rí maʼni̱i̱ a̱jkiu̱u̱n› (Col. 4:10, 11). Rí asndu Jesús ndiyóoʼ rí mixtámbáyíí ga̱jma̱a̱ nixníin núma̱aʼ bi̱ nambájxu̱u̱ gajmíi̱n xó má ángeles ga̱jma̱a̱ xa̱bu̱ numbaaʼ (Lucas 22:28, 43).
Guʼyáʼ rí gíʼdoo numuu
Gudxawún, ga̱kru̱ʼu̱lú ga̱jma̱a̱ gagáwi̱i̱n a̱jkiu̱lú kuʼñúún a̱ngiu̱lú
10 Ma̱ndoo mbuʼyaridáá Jeobá índo̱ gúʼni míjna̱ makru̱ʼu̱lú kuʼñúún eʼwíinʼ. Guniʼniúnʼ itháan májánʼ a̱ngiu̱lú. Guʼtámíjná gajmiúlú índo̱ najkualú reunión, gagajnúlú guʼtáraʼa gajmiúlú ma̱ngaa guʼthúún rí magún gupitsu náa guʼulúʼ á mu nandoo. Mbáa á mu nuʼni rígi̱, ma̱ndoo muʼguánú mbuʼyáá rí ndxájulú bi̱ nakujmaa rí tséxmiéjuunʼ kaʼñún eʼwíínʼ raʼkháa xúʼko̱ phú nindxu̱u̱, mbáa ikhaa natiyu̱u̱ maʼtámijná gajmíi̱n eʼwíinʼ, ga̱jma̱a̱ rí ndxájulú bi̱ gíʼdoo wéñuʼ mbújkha̱a̱ nambáñun eʼwíinʼ o bi̱ naguánu wa̱kha̱ʼ náa reunión nindxu̱u̱ numuu rí bi̱ kúwá náa guʼwún tséniñu̱u̱nʼ magún (Job 6:29). Gajkhun má rí xáʼyóoʼ muxuʼdámíjná náa dí ‹rakáʼyulú› (1 Tim. 5:13). Mú, gíʼdoo wéñuʼ numuu mbuʼyáá xóo kúwá mú xúʼko̱ mu̱ʼgua̱nú mbuʼyáá náá numuu rí xúʼko̱ kaʼniún.
23-29 OCTUBRE
GÍʼDOO NUMUU RÍ NA̱ʼKHA̱ NÁA BIBLIA | JOB 8-10
“Ngajua rí tsétumuu dí gíʼdoo Jeobá nañewu̱nlú náa nduwaʼ rí naʼni Gixa̱a̱”
Lá ma̱ndoo manigu̱u̱ʼ rí nuʼni Dios ráʼ.
Job niraʼnuu mbaʼa dí niʼni maxtáa gíná, nindxa̱ʼwáminaʼ dí raʼkhí, rí nda̱a̱ má numuu maʼnimbo̱o̱ kaʼyoo Dios numuu dí ikhaa tsixmiéjunʼ dí Job naraʼwíí maʼni (Job 9:20-22). Job ma̱ngaa nikumu̱u̱ dí nindxu̱u̱ mbáa xa̱bu̱ májáanʼ. Rí asndu bi̱ nudxawíín dí naʼthí, niʼni mundxaʼwamíjna̱ dí Job naku̱mu̱u̱ rí itháán májáanʼ ikhaa ki xóo Dios (Job 32:1, 2; 35:1, 2).
Ndiéjunʼ nindxu̱u̱ ngajua ndrígóo Jeobá rí tsétumuu náa ikháanʼ rá.
14 Ngajua dí gíʼdoo Dios rí nditháan tsétumuu nañewu̱nlú náa dí nambájxu gajmiúlú. Náa mbá dí niʼtájkháan David, ikhaa niʼthúu̱n Jeobá: “Náa ikháán ma̱ndoo mambáyuminaʼ; ga̱jma̱a̱ matie̱wu̱n’ náa gamiéjunʼ, ikha jngóo nadxuʼ rí natani kríñunʼ”. Ga̱jma̱a̱ niʼthí xóó: “Mu bi̱ naku̱mu̱u̱ kaʼyoo Jeobá marigá ma xúʼko̱ ngajua rí nditháan tsétumuu náa ikhaa” (Sal. 32:7, 10). Nákhá wájyúuʼ, xtájtsí rí kúguamúʼuun ga̱jma̱a̱ xuajin nañewu̱u̱n xa̱bu̱ bi̱ kúwíin ikhí, mu xúʼko̱ xátu̱ʼu̱u̱n xa̱bu̱ sia̱nʼ. Ikhaa má kayuuʼ ngajua dí gíʼdoo Jeobá rí nditháan tsétumuu, nindxu̱u̱ xóo mbá xtájtsí dí nañewu̱u̱n dí xóo nambájxu̱lú gajmiúlú Dios. Ma̱ngaa ngajua rúʼko̱, naʼni rí muʼgua kanuu mijngii náa ikhaa (Jer. 31:3).
Guʼyáʼ rí gíʼdoo numuu
w10 15/10 6, 7 kutriga̱ 19, 20
“Tsáá ni̱jkha̱nú nininuuʼ rí xóo endxa̱ʼóo edxu̱u̱ Jeobá rá.”
19 Ndiéjunʼ nijmañulúʼ ga̱jma̱a̱ numuu “xóo endxa̱ʼóo edxu̱u̱ Jeobá” rá. Dí ndayóoʼ muraxnuu Biblia mu makru̱ʼu̱lú xóo endxa̱ʼwáminaʼ Jeobá. Raʼkhí gúʼni, á mu nakumulú dí Jeobá nakiéʼkúun xóo ikháanʼ ga̱jma̱a̱ naʼni xóo nuʼnilú ikháanʼ. Job niʼthí: “Numuu rí ikhaa na̱nguá nindxu̱u̱ xa̱bu̱ xóo ikhúún mu ma̱ndoo mariʼñuu, mu maʼgá gajmii náa inuu xa̱bu̱ ñajunʼ” (Job 9:32). Índo̱ nagíʼdu̱u̱ nakru̱ʼu̱lú xóo endxa̱ʼwáminaʼ Dios, nakumulú xóo nikumu̱u̱ Job índo̱ niʼthí: “¡Gu̱ya̱a̱! Rígi̱ nindxu̱u̱ rawunʼ kambo̱o̱, ¡ga̱jma̱a̱ chíʼgíi̱ʼ nindxu̱u̱ rí nuʼdxawíín ga̱jma̱a̱ numuu ikhaa! Ikha jngó, tsáa lá gáʼngo̱o̱ makro̱ʼo̱o̱ ga̱jma̱a̱ numuu tsiakii rí gíʼdoo bi̱gu̱ rá.” (Job 26:14.)
20 Rí gúʼni á mu índo̱ nuraxnuu nuxkamaa mbá dí naʼñulú miʼskhaa makru̱ʼu̱lú, itháán á mu kaʼyoo xóo endxa̱ʼwáminaʼ Jeobá rá. Gíʼmaa mbuʼyáʼ itháan ga̱jma̱a̱ numuu. Á mu nda̱wa̱á rí ndiʼyáá xóó tsikru̱ʼu̱lú, guʼyáá xóó mbá náa ma̱ndoo musngajmá rí kuáʼdáá fe. Garmáʼáan a̱jkiu̱lú dí náa Biblia rígá textos dí naʼni rí musngajmá dí nakumulú kuʼyáá Jeobá ga̱jma̱a̱ cualidades dí gíʼdoo. Na̱nguá má eʼngo̱o̱ makru̱ʼu̱lú xúgíʼ rí ikhaa raʼni (Ecl. 11:5). Á mu nuʼni xígi̱ kaʼnii ma̱ndoo mundxaʼwamíjna̱lú xóo rí niʼthí apóstol Pablo: “¡Rí naʼni tsajkurámáanʼlu, rí najmañuu ga̱jma̱a̱ ku̱ma̱ ndrígóo Dios nindxu̱u̱ mba̱a̱ wéñuuʼ! ¡Rí naraʼwíí maʼni nimbáa tséʼngo̱o̱ gákro̱ʼo̱o̱ ga̱jma̱a̱ kambo̱o̱ nimbáa xáʼngo̱o̱ gáʼya! Numuu rí “tsáá ni̱jkha̱nú nininuuʼ rí xóo endxa̱ʼóo edxu̱u̱ Jeobá rá. O tsáá nindxu̱u̱ bi̱ naxnúu consejo ikhaa xá.” O “lá xtáa mbáa bi̱ rígá dí nixnúu Dios ginii mu Dios marigá mbá rí mata̱nga̱a̱ maxnáa ráʼ.” Numuu dí xúgíʼ dí rígá na̱ʼkha̱ náa ikhaa, ikhaa niʼniwíi numuu rí ikhaa nindoo. Náa ikhaa gáʼga gamajkhu asndu kámuu mbiʼi. Xúʼko̱ gáʼni” (Rom. 11:33-36).
30 OCTUBRE ASNDU 5 NOVIEMBRE
GÍʼDOO NUMUU RÍ NA̱ʼKHA̱ NÁA BIBLIA | JOB 11, 12
“Mbá ajtsú eni̱ rí muʼni mu majmañulú”
Lá natatsiʼniiʼ ikháánʼ Jeobá xó má Noé, Daniel ga̱jma̱a̱ Job ráʼ.
16 Xú káʼnii ni̱jkha̱nú nininiʼ Jeobá xá. Job tánindxu̱u̱ mbáa israelita, mú mirájñuʼ kaʼyoo Abrahán, Isaac ga̱jma̱a̱ Jacob. Xa̱bu̱ bugi̱ Jeobá niʼni rí mbuyáá ga̱jma̱a̱ numuu ga̱jma̱a̱ rí nakudaminaʼ maʼni nda̱wa̱á ga̱jma̱a̱ numún xa̱bu̱ numbaaʼ. Tséʼyáá xú káʼnii Job nijmañuu mbaʼa ga̱jma̱a̱ numuu rí gajkhun (Job 23:12). Ikhaa niʼthúu̱n Jeobá: “Nadxun nuthi ga̱jma̱a̱ numaʼ” (Job 42:5). Ga̱jma̱a̱ Dios má niʼthí rí gajkhun nindxu̱u̱ rí niʼthí ga̱jma̱a̱ numuu Job (Job 42:7, 8).
17 Job ma̱ngaa ndiʼyoo xú káʼnii nindxu̱u̱ Dios ga̱jma̱a̱ xúgíʼ rí niʼni (Job 12:7-9, 13). Nda̱wa̱á, xóo Elihú ma̱ngaa Jeobá nijmuu xkri̱da náa xúgíʼ rí niʼni mu marmáʼáan a̱jkiu̱u̱n Job rí ni̱ndxu̱lú majkiáanʼ wéñuʼ ki xóo náa inuu Dios (Job 37:14; 38:1-4). Ajngáa ndrígóo Jeobá nixkaxi̱i̱ wéñuʼ Job rí ikhaa niʼthí ga̱jma̱a̱ ajngáa guabaaʼ: “Ni̱jkhánú ndi̱yo̱o̱ rí xúgíʼ ma̱ndoo matani, ga̱jma̱a̱ nda̱a̱ nimbá rí natatsaʼwáminaʼ rí xáʼngaʼ matani”. Ga̱jma̱a̱ xóó niʼthí: “Nagáwiinʼ a̱jkiu̱nʼ rí nitha” (Job 42:2, 6).
Á mu gajmiúlú Jeobá nditháan xákuwáanʼ ndajkuáanʼ
10 Gambáxulúʼ gajmiúlú a̱ngiu̱lú bi̱ naguájun jmbu. Gambáxu gajmiúlú a̱ngiu̱lú bi̱ nuniñanʼ májánʼ xkri̱da, maski ajndu raʼkháa ikháá tsiguúnʼ xóo ikháanʼlu o mixtiʼkhu náa eguwáʼ. Náa Biblia naʼni marmáʼáan a̱jkiu̱lú dí ‹xa̱bu̱ wanii guaʼdáá ku̱ma̱› (Job 12:12). Ma̱ngaa bi̱ wanii má ma̱ndoo majmañún wéñuʼ náa bi̱ jiámá o wa̱ʼxa̱ʼ bi̱ naguájun jmbu. David itháan chíʼgíʼ ki xóo Jonatán, mú niguánu nimbáxu̱u̱n májánʼ wéñuʼ (1 Sam. 18:1). Nájmi̱i̱n nixnamijná tsiakii muni ñajuunʼ Jeobá náa majñuuʼ xkujndu gakhi̱i̱ (1 Sam. 23:16-18). Irina, mbáa ndxájulú bi̱ xúgi̱ i̱ndó ikhaa nindxu̱u̱ xa̱bi̱i̱ Jeobá náa goʼwóo, naʼthí: “A̱ngiu̱lú bi̱ nuʼnigajmaa gajmiúlú ma̱ndoo mani̱ndxu̱ún xóo anu̱lú o a̱ngiu̱lú xígi̱. Jeobá ma̱ndoo majmiún ikhiin mu mani̱ndxu̱ún xóo bi̱ kúwá náa guʼwúlú bi̱ ndaʼyulúʼ”.
11 Mbáa tikhun naʼniún mingíjyúuʼ mbuñíinʼ eʼwíinʼ bi̱ mambáxu̱u̱n gajmiún, itháan má á mu natiñu̱u̱n gúthi. Ratna, mbáa ndxájulú a̱ʼgu̱ bi̱ nini gínáa índo̱ nijmañuu dí gajkhun, ikhaa naʼthí: “Ni̱jkhánú ndi̱yo̱o̱ dí ndiyóoʼ mumbayúʼ a̱ngiu̱lú bi̱ nagún náa nagimbáanʼ”. Mbáa naʼniulú mingíjyúuʼ muʼthán mbáa xú káʼnii kumulúʼ, mú rúʼko̱ gíʼdoo numuu muʼni ginii mu mambáxulu májánʼ gajmiúlú mbáa. Bi̱ nambáxulúʼ gajmiúlú nandún muxnulúʼ tsiakii ga̱jma̱a̱ mumbayulúʼ, mú ikháanʼ ndaʼyoo muʼthúún xóo kuwáánʼ mú xúʼko̱ mbuyáá xóo gándoo mumbayulúʼ.
12 Rí muʼtáraʼa gajmiúlú mbaʼin a̱ngiu̱lú nindxu̱u̱ mbá náa itháan májánʼ rí ma̱ndoo mambáxulu gajmiúlú eʼwíinʼ. Carol bi̱ niʼthá ga̱jma̱a̱ numuu náa kutriga̱ 5, naʼthí: “Nindoo nimbáxu̱ʼ gajmíi̱n mbaʼin a̱ngiu̱lú gu̱ʼu̱ índo̱ nigájnun gátaraʼa gajmíi̱nʼ ga̱jma̱a̱ bi̱ niniʼniún náa mixtiʼkhu ñajunʼ dí nini náa xuajñuu Dios. Jeobá nijmiuu bi̱ nimbáxuʼ gajmíi̱nʼ náa xúgíʼ tsiguʼ rígi̱ mu mumbayú”. Xó má eʼyáá, gíʼdoo numuu rí muʼnimijna mambáxulu gajmiúlú a̱ngiu̱lú bi̱ naguajún jmbu. Jeobá najmiún ikhiin mumbayulúʼ índo̱ nuraʼníí xkujndu, xóo índo̱ nakumulú rí kuwáánʼ ndajkuáánʼ (Prov. 17:17).
it-2 883
Ku̱ma̱
Ku̱ma̱ rí na̱ʼkha̱ náa Dios. Bi̱ itháán najmañuu nindxu̱u̱ Jeobá Dios; mbáwíí “ikhaa ejmañuu”, xóo muʼthá mbáwíí ikhaa ejmañuu náa rígi̱. (Ro 16:27; Apoc 7:12.) Dí maraʼdáá ku̱ma̱ nandoo gáʼthúu̱n rí ma̱ta̱ya̱a̱ xúgíʼ, numuu rí Jeobá nindxu̱u̱ bi̱ niʼniwíi dí rígá ga̱jma̱a̱ “xtaa asndu nákha wajyúúʼ ga̱jma̱a̱ ikháánʼ má gáraxtaa asndu kámuu mbiʼi” (Sl 90:1, 2), ndaʼyoo xúgíʼ ga̱jma̱a̱ numuu dí rígá mekhuíí, xú káʼnii niguma, nguáthá mba̱yu̱u̱ʼ rígá. Xúgíʼ enii xóo nañajunʼ ku̱ba̱ʼ ga̱jma̱a̱ rí nambáyúu rí nduyáʼ xa̱bu̱ o rí nunimíjna̱ muni̱, na̱ʼkha̱ náa Dios, á mu na̱nguá rígá rúʼko̱, xájmiin gúni ga̱jma̱a̱ nda̱a̱ náa mbuyáá. (Job 38:34-38; Sl 104:24; Pr 3:19; Jer 10:12, 13.) Xtángoo ndrígóo nindxu̱u̱ itháán májánʼ, rí mambáyáaʼ ga̱jma̱a̱ naʼni rí xa̱bu̱ makuwá májánʼ. (Dt 32:4-6; atayáá JEOBÁ [mbáa Dios bi̱ gíʼdoo xtángoo rí mambáyáaʼ].) Nda̱a̱ nimbá rí maʼniu̱u̱ mingíjyúuʼ. (Isa 40:13, 14.) Maski ajndu nguáná naniñuuʼ marigá tikhu rí nanújngorámuʼ tikhu xtángoo ndrígóo mu nánguá má mba̱yu̱u̱ʼ mambáa, numuu rí kua̱ʼthi̱i̱n nda̱wa̱á gajkhun dí Ikhaa maʼnimbánuu; xúgíʼ rí naʼthí maʼni “magumambánúu gajkhun”. (Isa 55:8-11; 46:9-11.)
Guʼyáʼ rí gíʼdoo numuu
w08 1/8 11 kutriga̱ 5
Xóo maratamíjná gajmiáanʼ jiámá ga̱jma̱a̱ wa̱ʼxa̱ʼ
▪ “Nda̱yo̱o̱ ndiéjunʼ rí phú nindúún gúthi xáʼ.” Job 12:11 naʼthúlú rígi̱: “Lá raʼkháa iñúuʼ chaʼwunlú naʼdxawuun ajngáa xó má eʼni ra̱junlú ga̱jma̱a̱ ganitsu ráʼ.” Phú gajkhun rí xúgi̱ ndayóoʼ itháán rí ‹matadxawíín rí gaʼthí› a̱ʼdiáaʼ. Nguáná jiámá ga̱jma̱a̱ wa̱ʼxa̱ʼ nuthi rí xóo ikhiin naku̱mu̱ún. Mbá xkri̱da mbáa a̱ʼdiáaʼ maʼtháanʼ: “¡Nataniuʼ má xúʼko̱ xóo etani̱i̱ mbáa ada̱!”, o “¡Nditháan tsetadxawúnʼ!”. Xátaniminaʼ ma̱ta̱ya̱a̱ ndiéjunʼ phú nindoo gáʼtháanʼ rí nataniuʼ má xúʼko̱ ga̱jma̱a̱ nditháan, numuu rí a̱ʼdiáaʼ na̱nguá nindoo gaʼthí ga̱jma̱a̱ numuu dí ikháán naku̱ma̱a̱ʼ. Mbá xkri̱da, “¡Nataniuʼ má xúʼko̱ xóo etani̱i̱ mbáa ada̱!” mbáa ikhaa nindoo gáʼtháanʼ rí “Tsekuma̱a̱ʼ xtayoʼ”, ga̱jma̱a̱ “¡Nditháan tsetadxawúnʼ!” nandoo gáʼthúu̱n “Nandoʼ rí ma̱ta̱ya̱a̱ xú káʼnii ku̱mu̱ʼ”. Ataniminaʼ ma̱ta̱ya̱a̱ ndiéjunʼ rí phú nindoo gáʼtháanʼ a̱ʼdiáaʼ.