Xóo gátangaán mambaxáaʼ mbu̱júu̱ʼ ga̱jma̱a̱ʼ Jeobá rá.

XÚGÍʼ tsiguʼ mbaʼin xa̱bu̱ natangi̱i̱n náa congregación. Gundxaʼwámíjná xú káʼni erígá “gagi mekhuíí” índo̱ natanga̱a̱ mámbáa mugu̱ bugi̱ (Luc. 15:7, 10). Á mu ikháán nindxa̱a̱ʼ mbáa bi̱ nitanga̱a̱, ma̱ndoo ma̱ta̱ya̱a̱ gajkhun dí Jesús, ángeles ga̱jma̱a̱ Jeobá nadxún wéñuʼ dí nitangaánʼ náa congregación. Índo̱ gídxúʼ rambájxaʼ mbu̱júu̱ ga̱jma̱a̱ Jeobá mbáa marigá tikhu dí maʼniaʼ gakhii. Ndiéjunʼ nindxu̱u̱ rá. Ga̱jma̱a̱ ndiéjunʼ gámbáyáaʼ rá.

TIKHUU DÍ NAʼNI GAKHI̱I̱

Nda̱wa̱á dí nitangiín náa congregación mbaʼin a̱ngiu̱lú, nakumu̱ún dí nda̱a̱ numún. Á mu xúʼko̱ kuma̱a̱ʼ mangáán mbáa nakruaʼa̱a̱ʼ xóo nikumu̱u̱ rey David. Nda̱wa̱á dí nini mba̱a̱ a̱jkiu̱ún kuyáá ga̱jma̱a̱ numuu aʼkhá dí niʼni, niʼthí: ‹Naxmiéjunʼ wéñuʼ ga̱jma̱a̱ xúgíʼ dí nikiéʼkhun› (Sal. 40:12; 65:3). Mbáa bi̱ natanga̱a̱ náa Jeobá mbáa maku̱mu̱u̱ má xúʼko̱ dí gíʼdoo aʼkhúun ga̱jma̱a̱ dí nati̱yu̱u̱ʼ mbayuuʼ tsiguʼ. Mbá xkri̱da, Isabelle,a bi̱ nigumaa expulsar itháan dí 20 tsiguʼ, niʼthí: “Niʼniuʼ mingíjyúuʼ maku̱mu̱ʼ dí Jeobá ma̱ndoo maʼni mba̱a̱ a̱jkiu̱u̱n kaʼyoʼ”. Á mu ikháán najmáa a̱jkia̱a̱nʼ, migamíi maʼni rí makáguabaaʼ rí xóo nambáxáaʼ ga̱jma̱a̱ʼ Jeobá mbu̱júu̱ʼ (Prov. 24:10). Ataniminaʼ rí xagíʼnaaʼ xúʼko̱.

Eʼwíinʼ naxmiéjúnʼ wéñuʼ índo̱ nundxaʼwamíjná xúgíʼ dí ndayóoʼ muni̱ mu matangi̱ín mambáxu̱u̱n mbu̱júu̱ʼ gajmiún Jeobá. Nda̱wa̱á dí nitanga̱a̱ Antoine niʼthí: “Nimbumuʼ xúgíʼ dí xóo ni̱ni̱ nákhá ginii xóo cristiano ni̱ndxu̱ʼ”. Ga̱jma̱a̱ numuu rúʼko̱ tikhuunʼ nánguá e̱ni̱ ñajuunʼ Dios ga̱jma̱a̱ xúgíʼ a̱jkiu̱ún.

Guʼgíʼ mbá xkri̱da. Á mu mbá guʼwá niguma gámbáa numuu rí niʼni giñá mbiʼ, mbáa xa̱bu̱ bi̱ goʼwóo naxmiéjuunʼ wéñuʼ índo̱ nandxa̱ʼwáminaʼ dí ndayóoʼ mbayuuʼ mbiʼi ga̱jma̱a̱ tsiakii maʼni májáanʼ goʼwóo. Xúʼko̱ má kayuuʼ, á mu ga̱jma̱a̱ numuu aʼkhá niʼni gachúu rí nambáxáaʼ ga̱jma̱a̱ʼ Jeobá, mbáa makuma̱a̱ʼ dí ndayóoʼ matani̱ wéñuʼ tsiakii matani̱ májáanʼ rí nambáxáaʼ ga̱jma̱a̱ʼ, mú ma̱ndoo mixtambáyáaʼ.

Jeobá naʼthúlú: “Gaguwaʼ ga̱jma̱a̱ guʼnimbánii xkujndu” (Is. 1:18). Ikháán nitagíminaʼ má dí matanimbáníí xkujndu ga̱jma̱a̱ʼ Jeobá, ikha jngóo ikhaa nandoo kaʼyaaʼ. Ma̱ndoo matatsaʼwamínáʼ dí Jeobá ma̱ndoo majmuu xkri̱da ndrígáaʼ mu masngájmuu Gixa̱a̱ dí minduwaaʼ (Prov. 27:11).

Índo̱ nitangaánʼ náa Jeobá, ikháán nitaxuʼmaminaʼ má náa ikhaa, ikha jngóo ikhaa ma̱ngaa nakuʼmaminaʼ náa ikháán (Sant. 4:8). Májánʼ má nindxu̱u̱ dí eʼwíinʼ ndiyáá dí ikháán nitangaánʼ náa congregación, mú rí itháán gíʼdoo numuu matani̱, ikhaa nindxu̱u̱ ngajua rí xtaʼdáá náa Jeobá bi̱ nindxu̱u̱ ana̱a̱ʼ ga̱jma̱a̱ bi̱ natambájxaʼ ga̱jma̱a̱ʼ maʼga̱ ra̱ja̱a̱ itháan. Xóo gándoo matani̱ rá.

ATAGÍMINAʼ MATANI̱ RÍ KAʼNII MATANIMBÁNÍÍ

Atagíminaʼ matani̱ rí kaʼnii matanimbáníí. Mbáa gíʼ xóó rajkúu guʼwáaʼ, xóo muʼthá, dí natayáá má xúʼko̱ ga̱jma̱a̱ numuu Jeobá ma̱ngaa natayáá ndiéjunʼ ekudaminaʼ maʼni nda̱wa̱á. Mú ndayóoʼ matani̱ májáanʼ rí wájun náa guʼwá, xóo muʼthá, dí matríyaʼ májánʼ awan matani̱ ñajuunʼ Dios, dí magajnáa gárataráʼa, mi̱dxu̱ʼ reunión ga̱jma̱a̱ dí matríyaʼ mbiʼi maraxtaa gajmiáanʼ a̱ngiu̱lú. Guʼyáá tikhu dí ma̱ndoo mataʼgíʼ matani̱.

Xátatsiʼñánʼ raratamíjná ga̱jma̱a̱ʼ Jeobá. Ana̱a̱ʼ nakro̱ʼo̱o̱ dí mbáa naʼniaaʼ gakhi̱i̱ maratakháñíí á mu nakuma̱a̱ʼ má xúʼko̱ dí xtaʼdáá aʼkháanʼ ga̱jma̱a̱ numuu dí nitani̱ (Rom. 8:26). Maski ajndu xúʼko̱, aratájkáan má xúʼko̱ ga̱jma̱a̱ aratháán Jeobá dí nandaaʼ mambajxáaʼ ga̱jma̱a̱ʼ (Rom. 12:12). Andrej naʼthí dí narmáʼáan a̱jkiu̱u̱n: “Niku̱mu̱ʼ dí ra̱ʼkhá tháán gúʼdoʼ aʼkhúnʼ ga̱jma̱a̱ niti̱yu̱ʼ wéñuuʼ. Mú mámbá índo̱ naguámboʼ natajkáan naʼni̱i̱ a̱jkiu̱u̱n ga̱jma̱a̱ naʼni maxtáá tsímáá”. Á mu ikháán tsítayáá dí maratajkáan, atatsaʼwáminaʼ ajngáa dí niʼtájkáan rey David índo̱ nitanga̱a̱ a̱jkiu̱u̱n dí na̱ʼkha̱ raʼthí náa Salmos 51 ga̱jma̱a̱ 65.

Atanigajmaa Biblia xúgíʼ mbiʼi. Rígi̱ gámbáyáaʼ rí maʼndaaʼ xtayáá Jeobá ga̱jma̱a̱ dí makuma̱a̱ʼ xtayáá (Sal. 19:7-11). Felipe niʼthí: “Rí niʼni makawábúnʼ ga̱jma̱a̱ rí makiéʼkhunʼ náa inuu Jeobá nindxu̱u̱ dí na̱nguá niríyaʼ awan manigajmaa̱ májánʼ ga̱jma̱a̱ rí magúxnuu Biblia. Numuu rí nánguá nindoʼ ma̱ni̱ dí raʼkhí mbu̱júu̱ʼ ikha jngó niraʼwii manigajmaa májánʼ mu mañeumínáʼ”. Ikháán ma̱ngaa ma̱ndoo matani̱ xúʼko̱. Á mu tsítayáá ndiéjunʼ gátanigajmaa, ma̱ndoo maratha̱a̱n mbáa bi̱ najmañuu bi̱ nambáxu̱u̱ májánʼ ga̱jma̱a̱ Dios.

Gambaxáaʼ mbu̱júu̱ʼ gajmiáanʼ a̱ngiu̱lú. Tikhuun bi̱ nitangiín naxmiéjúnʼ dí eʼwíinʼ xúñún májánʼ. Larissa naʼthí: “Ra̱ʼkhá tháán niti̱yu̱ʼ. Niku̱mu̱ʼ dí asndu xóo ninindúwi̱i̱n a̱ngiu̱lú bi̱ kúwá náa congregación. Mbayu̱u̱ʼ niku̱mu̱ʼ xúʼko̱ kaʼnii”. Ma̱ndoo ma̱ta̱ya̱a̱ gajkhun dí bi̱ kuya̱ edxu̱u̱ ga̱jma̱a̱ eʼwíinʼ a̱ngiu̱lú bi̱ naguájun gújkhúʼ nandún mumbayáaʼ mambaxáaʼ mbu̱júu̱ʼ ga̱jma̱a̱ʼ Jeobá (atayáá kúgumaʼá náa naʼthí “Rí ma̱ndoo muni̱ bi̱ kuya̱ edxu̱u̱”). Nadxún wéñuuʼ dí nitangaánʼ ga̱jma̱a̱ nandún dí ikháán maraxtaa gagi (Prov. 17:17).

Ndiéjunʼ gándoo matani̱ mu makuma̱a̱ʼ dí xtaa itháan mijngii náa congregación rá. Ayuʼ xúgíʼ reunión ga̱jma̱a̱ arataráʼa má xúʼko̱ gajmiáanʼ a̱ngiu̱lú. Ndiéjunʼ gámbáyáaʼ matani̱ xúʼko̱ rá. Félix niʼthí: “Bi̱ kúwá náa congregación kúwá ruguáʼthunʼ. Niku̱mu̱ʼ dí nindúún kuyoʼ wéñuuʼ, xúgíinʼ nimbayúʼ mba̱yo̱o̱ dí kúwá ga̱jma̱a̱ ni̱ndxu̱ʼ mbu̱júu̱ʼ náa congregación, dí Jeobá niʼni mba̱a̱ a̱jkiu̱u̱n kaʼyoʼ ga̱jma̱a̱ dí ma̱ndoo maniminaʼ má xúʼko̱” (atayáá kúgumaʼá náa naʼthí “Rí ikháán ma̱ndoo matani̱”).

XÁKANÁJKHAAʼ

Índo̱ ikháán xtaa rataniminaʼ mambájxáa mbu̱júu̱ ga̱jma̱a̱ Jeobá, Gixa̱a̱ magruiga̱ má xúʼko̱ tsáʼkhá dí nindxu̱u̱ xóo “giñá mbiʼ” náa inaaʼ mu maʼni makáguabáanʼ (Luc. 4:13). Á mu nandaaʼ maraxtaa xawii, ndayóoʼ dí xúgi̱ matani májáanʼ guʼwáaʼ, xóo muʼthá rí xóo nambáxa̱ʼ ga̱jma̱a̱ Jeobá.

Índo̱ Jeobá niʼthí ga̱jma̱a̱ numún mugiu̱u̱, ikhaa nikudaminaʼ maʼni rígi̱: “Mbaʼñíinʼ, bi̱ nini̱ wajímijná maʼkháaʼ kagui̱i̱n mbu̱júu̱ʼ, bi̱ nigawúúnʼ manitanún ga̱jma̱a̱ bi̱ nikáguabiinʼ mambáñun” (Ezeq. 34:16). Jeobá nimbáñún mbaʼiin wéñuuʼ xa̱bi̱i̱ mu mambáxu̱u̱n mbu̱júu̱ʼ gajmiún ikhaa ga̱jma̱a̱ ikhaa nandoo mambáyáaʼ dí mambaxáaʼ itháan májánʼ ga̱jma̱a̱ʼ ikhaa mámbá mbiʼi.

Rí ma̱ndoo muni̱ bi̱ kuya̱ edxu̱u̱

Bi̱ kuya̱ edxu̱u̱ mbaʼa rí ma̱ndoo muni̱ mu mumbañún publicadores bi̱ nitangiín mambáxún májánʼ mbu̱júu̱ʼ gajmiún Jeobá. Guʼyáá tikhu rí ma̱ndoo muni̱.

Muxnún tsiakii. Apóstol Pablo ndiʼyoo dí mbáa bi̱ nikudaminaʼ aʼkhá “xáxtáa gínáa wéñuuʼ rí maku̱mu̱u̱ rí asndu nánguá eʼngo̱o̱ itháan” (2 Cor. 2:7). Mbáa nati̱yu̱u̱ʼ ga̱jma̱a̱ najmúu wéñuuʼ. Ikha jngóo, Pablo nixnúún ikha rígi̱ cristianos: “Gíʼmaa muni̱ mba̱a̱ a̱jkia̱la kuya̱a̱ ga̱jma̱a̱ gu̱ni̱i̱ a̱jkiu̱u̱n”. Bi̱ nitangiín ndañúun miʼthúún dí Jeobá ga̱jma̱a̱ a̱ngiu̱lú nandún kuñún wéñuuʼ. Á mu nángi eʼni ethúún dí májánʼ eni̱ ga̱jma̱a̱ numbañún, rúʼko̱ gambáñún mu xákawábiinʼ.

Gutajkáan gajmiála ikhiin. “Índo̱ xa̱bu̱ jmbii naʼtájkáan gíʼdoo wéñuʼ tsiakii” (Sant. 5:16). Larissa, bi̱ niʼthá ga̱jma̱a̱ numuu ginii, naʼthí: “Ni̱thu̱u̱n a̱ngiu̱lú bi̱ kuya̱ edxu̱u̱ tikhu dí na̱nguá ekro̱ʼo̱ʼ ga̱jma̱a̱ dí naʼni mamiñúʼ. Ikhiin nitajkháan ga̱jma̱á numuʼ. Ikhú ni̱jkhánú ndi̱yo̱o̱ dí na̱nguá ekiʼníin kuyoʼ, ikhiin nindúún mumbayúʼ dí mambaxúʼ mbu̱júu̱ʼ gajmuʼ Jeobá”. Mbáa ndxájulú bi̱ mbiʼyuu Theo naʼthí: “Rí nitajkháan a̱ngiu̱lú bi̱ kuya̱ edxu̱u̱ nimbáyúʼ mba̱yo̱o̱ dí Jeobá gajkhun nandoo kaʼyoʼ ga̱jma̱a̱ dí ikhaa raʼkháa i̱ndó ndaʼyoo dí raʼkhí e̱ni̱ ma̱ngaa ndaʼyoo dí májánʼ e̱ni̱”.

Gambáxala gajmiála ikhiin. Bi̱ nitangiín ndayóoʼ rí muguaʼdiin bi̱ nambáxu̱u̱n gajmiún bi̱ kúwá náa congregación. Mbáa ndxájulú bi̱ kayá edxu̱u̱ bi̱ mbiʼyuu Justin naʼthí: “Ndayóoʼ muríyaʼ mbiʼi mu muʼthúún muʼtáraʼa gajmiúlú ga̱jma̱a̱ rí mu̱ʼgua̱ guʼñún. Gíʼdoo wéñuʼ numuu rí mambáxulu gajmiúlú ikhiin”. Henry, i̱mba̱a̱ bi̱ kayá edxu̱u̱ naʼthí: “Á mu a̱ngiu̱lú bi̱ kúwá náa congregación gúyá dí bi̱ kuya̱ edxu̱u̱ nambáxu̱u̱n gajmiún bi̱ nitangiín, ikhiin mangiin munimi̱jna̱ muni xúʼko̱”.

Gumbañúún rí munigajmaa ndajkuíín. Mbáa ndxájulú bi̱ najmañuu ma̱ndoo mambáyúu mbáa bi̱ nitanga̱a̱ mu maʼnigajmaa májánʼ xúgíʼ mbiʼi. Mbáa ndxájulú bi̱ kayá edxu̱u̱ bi̱ mbiʼyuu Darko naʼthí: “Nanigu̱ʼ masngajmúún mbá dí gíʼdoo numuu dí naxkamaa náa nanigajmaa Biblia ga̱jma̱a̱ rí ikhiin mangiin mbuyáá xóo enigu̱ʼ índo̱ nanigajmaa”. I̱mba̱a̱ bi̱ kayá edxu̱u̱ bi̱ mbiʼyuu Clayton, naʼthí: “Na̱thu̱u̱n mbuyaʼ historia ndrígu̱ún xa̱bu̱ bi̱ na̱ʼkha̱ raʼthí náa Biblia bi̱ niraʼníí xkujndu xó má ikhiin”.

Magún ruñún mu muxnún tsiakii. Bi̱ nitangiín ndiyáá má rí bi̱ kuya̱ edxu̱u̱ ninimbáníí ñajunʼ ndrígu̱ún xóo juez. Mú rí xúgi̱ ndayóoʼ mbuñún bi̱ kuya̱ edxu̱u̱ xóo báxtúu (Jer. 23:4). A̱ngui̱nʼ bi̱ kuya̱ edxu̱u̱, gakuwaanʼ xawii mudxawíín ga̱jma̱a̱ muthu̱u̱n rí májánʼ eni̱ bi̱ nitangiín. Gutamíjná má xúʼko̱ gajmiála. Mbáa ndxájulú bi̱ kayá edxu̱u̱ bi̱ mbiʼyuu Marcus índo̱ na̱jkha̱ gáʼñúnʼ a̱ngiu̱lú mu maxnúún tsiakii naʼthí ndiéjunʼ eʼni: “Nuraxnuxu ga̱jma̱a̱ nutaxu dí na̱ʼkha̱ raʼthí náa Biblia, nuthu̱u̱nxu dí májánʼ eni̱ ma̱ngaa nuthu̱u̱nxu dí Jeobá ga̱jma̱a̱ ikháanʼxu ra̱ʼkhá tháán edxu̱xuʼ ga̱jma̱a̱ numuu tsiakii mba̱a̱ dí nini̱ mu matangi̱ín. Ma̱ngaa mámbá índo̱ naguámbuxu, nuthu̱u̱nxu mbiʼi rí mu̱ʼguáxu mbu̱júu̱ʼ”.

a Náa artículo rígi̱ nixtiʼkhu̱u̱ mbiʼñún.