RÍ MAMBÁYULÚ MU XÁWIYULÚ KUʼÑÚÚN EʼWÍINʼ

2 | Xátanga̱án matañu̱u̱n xó má niña̱a̱nʼ

Náa Biblia naʼthí:

“Xútangáanʼ muniu̱u̱nla dí ra̱májánʼ bi̱ niniala dí ra̱májánʼ […]. Gunimíjna̱la asndu xó má eʼnga̱la makuwáanʼ tsímáá gajmiála xúgíinʼ. A̱ngui̱nʼ, á mu mbáa naʼniala dí ra̱májánʼ xútangáanʼ muni̱i̱ xó má niʼniala […]. Numuu rí kiʼnirámáʼ: ‹Ikhúúnʼ kaʼyoʼ rí ma̱ni̱ gíníin; ga̱jma̱a̱ ma̱ni̱ numi̱ín náa rí nini̱›, eʼthí Jeobá” (ROMANOS 12:17-19).

Ndiéjunʼ eyoo gáʼthúu̱n rá.

Gajkhun dí xúgiáanʼlú nakiʼnáánʼ índo̱ mbáa naʼñulú dí raʼkhí, mú Dios tsíyoo dí matanga̱ánʼ muʼñu̱u̱n xó má niñulú. Ikhaa naʼthúlú dí muguaʼthi̱i̱n asndu índo̱ ikhaa gáʼnimbánuu. Numuu rí ikhaa nakudaminaʼ dí itháán má maʼni májáanʼ xúgíʼ dí raʼkhí dí narígá (Salmo 37:7, 10).

Ataniminaʼ matani̱ rígi̱:

Índo̱ natanga̱ánʼlú nuʼñu̱u̱n xó má niñulú, i̱ndó nuʼnilú dí makiʼníin itháan. Ikha jngóo, á mu mbáa niʼnigawáanʼ o niʼñaanʼ mbá dí ra̱májánʼ, xátanga̱án matani̱i̱ xó má niʼñaanʼ. Gaʼngo̱o̱ a̱jkia̱a̱nʼ ga̱jma̱a̱ xákiʼnáánʼ mbá nacha̱, itháán májánʼ á mu tsétagíʼ edxa̱a̱ʼ náa rí niʼñaanʼ (Proverbios 19:11). Nguáná itháán májánʼ maratha̱ rí nigíʼnaaʼ. Mbá xkri̱da, á mu mbáa xa̱bu̱ naʼñaanʼ mbá dí ra̱májánʼ ma̱ndoo marathu̱u̱n policía o mi̱dxu̱ʼ gátaxurígáa náa xa̱bu̱ ñajunʼ.

Dí matanga̱ánʼlú muʼñu̱u̱n xó má niñulú i̱ndó naʼni dí mumíníinʼ itháan

Á mu natayáá dí na̱nguá kaʼnii majxoo ga̱jma̱a̱ májánʼ mbá xkujndu o nitani̱ má asndu xó má eʼngo̱o̱ mu matanimbaníí, mú maski ajndu xúʼko̱, tsémbánuu. Ikháán xátanga̱án matani̱i̱ xa̱bu̱ xó má niʼñaanʼ, á mu natani̱ maraʼdáá itháán xkujndu. Ikha jngóo itháán májánʼ dí xáwiya̱a̱ʼ xtayáá mu xárígá itháán xkujndu. Gakuma̱a̱ʼ xtayáá Dios dí ikhaa má gáʼnimbánuu. Náa Salmo 37:3-5 naʼthí: “Gakuma̱a̱ʼ xtayáá ikhaa ga̱jma̱a̱ ikhaa má gámbáyaaʼ”.

Xkri̱da ndrígu̱ún xa̱bu̱ bi̱ kúwíin rí mbiʼi xúgi̱: ADRIÁN

Niʼngo̱o̱ ninigaʼduunʼ dí xátanga̱a̱ maʼñún xó má nini̱i̱

Adrián, nákha ninindxu̱u̱ mbáa dxámá nimbájxu̱u̱ gajmíi̱n bi̱ ra̱ʼkhá tháán jmangu̱u̱nʼ ga̱jma̱a̱ ikhaa nandoo maʼni gínáa asndu tsáá má xa̱bíi bi̱ gáʼñuu dí raʼkhí. Adrián naʼthí: “Mbaʼa nuthu nixtáá mangúún náa nuxmijná xa̱bu̱ ga̱jma̱a̱ ajua̱nʼ, asndu mbá eʼdií krigun náa calle niñunʼ, numuu rí nakumu̱ún dí nixiñu̱u̱n má”.

Índo̱ Adrián nigiʼdoo 16 tsiguuʼ, nigíʼdu̱u̱ niʼnigajma̱a̱ Biblia. Ikhaa naʼthí: “Índo̱ xtáá ranigajma̱a̱ Biblia ni̱jkhánú ndi̱yo̱o̱ rí ndayóoʼ mariʼkumina̱a̱ʼ xóo nindxu̱ʼ”. Adrián ndiyóoʼ maniñuuʼ rí nawiyu̱u̱ʼ kaʼñún eʼwíinʼ ga̱jma̱a̱ dí ni xájmangu̱u̱ʼ. Mbá dí itháán nimbáyúu ikhaa nindxu̱u̱ dí na̱ʼkha̱ raʼthí náa Romanos 12:17-19, náa naʼthí ga̱jma̱a̱ numuu dí xátanga̱ánʼ muʼñu̱u̱ xó má niñulú. Ikhaa naʼthí: “Nimbáyuʼ mba̱yo̱o̱ dí Jeobá nindxu̱u̱ bi̱ kaʼyoo maʼnimbánuu xkujndu náa phú mbiʼi rí kaʼyoo. Nda̱wa̱á niniʼñúuʼ rani̱ndxu̱ʼ mbáa xa̱bu̱ bi̱ najmangu̱u̱ʼ wéñuuʼ”.

Mbá mbruʼun nixpamidi̱i̱, bi̱ nini̱ rígi̱ ninindxu̱ún bi̱ sia̱nʼ gajmíi̱n nákha ikhaa nixtáa náa bi̱ nambájxu̱u̱ gajmíi̱n. Bi̱ nayéjkha̱ edxu̱u̱ náa bi̱ sia̱nʼ gajmíi̱n niʼthí: “¡Ataxúʼma re mangáán!”. Adrián niʼthí dí ra̱ʼkhá tháán ni̱ʼkha̱ a̱jkiu̱u̱n dí maxpámidi̱i̱ xa̱bu̱ buʼko̱. Dí niʼni xá. Niʼtákáñuu Jeobá ga̱jma̱a̱ niʼngo̱o̱ niʼnikriyaminaʼ.

Adrián naʼthí xóó: “I̱mba̱ néjtsu̱u̱ ndi̱yo̱o̱ mbu̱júu̱ʼ xa̱bu̱ buʼko̱, mú dí xúgi̱ mbáwíí ejkha̱. Ra̱ʼkhá tháán nikásngañuʼ ga̱jma̱a̱ nindoʼ matangu̱ún mañu̱u̱ xó má niʼñuʼ. Ikhú mbu̱júu̱ʼ nigíʼdu̱u̱ nitakáñuu Jeobá ga̱jma̱a̱ nindo̱ʼo̱o̱ dí maxnúʼ tsiakii mu xáni̱ mbá dí ra̱májánʼ. Asndu tsiánguá niʼñuʼ índo̱ ni̱ʼkha̱ kanuu ga̱jma̱a̱ niʼthúnʼ: ‹Atani̱ mba̱a̱ a̱jkia̱a̱nʼ ga̱jma̱a̱ numuu dí niña̱a̱nʼ wakhíʼ. Mangúún nandoʼ mani̱ndxu̱ʼ xóo ikháán ga̱jma̱a̱ nandoʼ manigajma̱a̱ Biblia›. ¡Májánʼ wéñuuʼ ninindxu̱u̱ dí nitakáñuu Jeobá mambáyuʼ mu xáni̱ nimbá dí ra̱májánʼ! Ga̱jma̱a̱ numuu rí ni̱ni̱, nimbáyúu magíʼdu̱u̱ maʼnigajma̱a̱ Biblia”.