RÍ MAMBÁYULÚ MU XÁWIYULÚ KUʼÑÚÚN EʼWÍINʼ

4 | Dios ma̱ndoo mambáyáaʼ

Náa Biblia naʼthí:

“Rí naxná espíritu santo nindxu̱u̱ ngajua, gagi, tsímáá, rí maʼngo̱o̱ a̱jkiu̱lú, mu̱ʼni̱ rí májánʼ, manindxu̱lú xa̱bu̱ májáanʼ a̱jkiu̱u̱n, fe, xákiʼnán, matiewa̱a̱n rí matani̱” (GÁLATAS 5:22, 23).

Ndiéjunʼ eyoo gáʼthúu̱n rá.

Ma̱ndoo matani̱ gámbáa dí nawiya̱a̱ʼ xtañún eʼwíinʼ ga̱jma̱a̱ tsiakii ndrígóo Dios. Espíritu santo ma̱ndoo mambáyulú maguaʼdáá cualidad dí xáʼngo̱o̱ gúguaʼdáá i̱ndó ga̱jma̱a̱ tsiakii ndrígúlú ikháánʼ. Ikha jngóo, gúʼyáaʼ Dios mu mambáyulú muʼnigámbáa dí nawiyulú kuʼñúún eʼwíinʼ. Á mu nduyáaʼ Dios makumulú xó má apóstol Pablo, bi̱ niʼthí: “Gúʼdoo tsiakii mu ma̱ni̱ xúgíʼ núma̱a̱ má bi̱ naxnúʼ tsiakii” (Filipenses 4:13). Ga̱jma̱a̱ xúʼko̱ ma̱ndoo muʼthá ajngáa rígi̱ mangáánʼ: ‹Jeobá nindxu̱u̱ bi̱ nambáyuʼ› (Salmo 121:2).

Ataniminaʼ matani̱ rígi̱:

“Nákha ginii ninindxu̱ʼ mbáa xa̱bu̱ bi̱ najmangu̱u̱ʼ. […] Mú Jeobá nimbáyuʼ mariʼkumina̱a̱ʼ mu mani̱ndxu̱ʼ mbáa xa̱bu̱ wabaaʼ” (WALDO).

Atanda̱ʼa̱a̱ ga̱jma̱a̱ xúgíʼ a̱jkia̱a̱nʼ Jeobá rí maxnáaʼ espíritu santo ndrígóo ga̱jma̱a̱ dí mambáyáaʼ maraʼdáá cualidad dí májánʼ (Lucas 11:13). Xóo dí maʼndaaʼ xtañún eʼwíinʼ, tsímáá, rí maʼngo̱o̱ a̱jkia̱a̱nʼ ga̱jma̱a̱ dí matiewa̱a̱n rí matani̱, rígi̱ rí phú ndayóoʼ mu ma̱ndoo matani̱ gámbáa dí nawiya̱a̱ʼ xtañún eʼwíinʼ. Atayáʼ náa Biblia dí naʼthí ga̱jma̱a̱ numuu rígi̱ ma̱ngaa atagíʼ matasnga̱jmá. Gíʼdoo wéñuʼ numuu dí mambajxáaʼ gajmiáanʼ xa̱bu̱ bi̱ nugíʼ nusngajma cualidad rígi̱ náa vida ndrígu̱ún, numuu dí rígi̱ mambáyáaʼ mu matasnga̱jmá ngajua ga̱jma̱a̱ matani̱ rí májánʼ (Hebreos 10:24).

Xkri̱da ndrígu̱ún xa̱bu̱ bi̱ kúwíin rí mbiʼi xúgi̱: WALDO

Niʼngo̱o̱ niniñu̱u̱nʼ dí nawiyu̱u̱ʼ kaʼñún eʼwíinʼ ga̱jma̱a̱ dí najmangu̱u̱ʼ

Dí xóo ndija̱a̱ Waldo ninindxu̱u̱ mingíjyúuʼ, rúʼko̱ niʼni dí mawiyu̱u̱ʼ kaʼñún eʼwíinʼ, ikhaa niʼthí: “Ikhúún nagi̱ʼdu̱ʼ gajmíʼ má xúʼko̱ xa̱bu̱ bi̱ nagujua̱ droga náa calle. Mbá mbiʼi, bi̱ sia̱nʼ gajmíʼ niraja̱a̱ mbáa xa̱bu̱ bi̱ tsémiñuu gudíi̱n eʼwíinʼ mu maxíñu̱u̱n. Nixkruʼún chílú mú niʼngo̱ʼ má ninikríyaminaʼ”.

Índo̱ a̱ʼgiu̱u̱ niʼnigajma̱a̱ Biblia gajmíi̱n Testigos de Jeobá, Waldo nditháan tánigu̱u̱ʼ. Ikhaa niʼthí: “Niwiyu̱ʼ ka̱ñu̱u̱n ga̱jma̱a̱ nindxaʼwajmíi̱n ga̱jma̱a̱ ajngáa tsaga, mú índo̱ niriʼñunʼ niʼñuʼ tsiánguá, numuu dí nuriʼña̱a̱ má xúʼko̱ ga̱jma̱a̱ ajngáa wabaʼ”.

Nda̱wa̱á Waldo ma̱ngaa nigíʼdu̱u̱ niʼnigajma̱a̱ Biblia. Ikhaa niʼthí: “Niʼñunʼ mingíjyúuʼ maʼgíʼ ma̱ni̱ dí najmañuʼ. Niku̱mu̱ʼ rí nditháan xáʼngo̱o̱ gáriʼkhu̱u̱ xóo xa̱bu̱ nindxu̱ʼ”. Mú dí nijmañuu náa Biblia nimbáyúu mariʼkhu̱u̱ xóo nindxu̱u̱.

Ikhaa niʼthí: “Mbá miʼtsú, Alejandro bi̱ naʼsngóʼ ga̱jma̱a̱ numuu Biblia niʼthúnʼ dí magúxnuu Gálatas 5:22, 23 […]. Ikhú niʼthúnʼ, mu ma̱ndoo matriʼkumina̱a̱ʼ xóo xa̱bu̱ nindxa̱a̱ʼ ndayóoʼ dí maku̱ma̱a̱ʼ xtayáá espíritu santo, raʼkháa tsiakii ndrígáaʼ. Rúʼko̱ nimbáyuʼ mba̱yo̱o̱ dí á mu Dios nambáyuʼ ma̱ndoo maniʼñúunʼ rí nakiʼnún ga̱jma̱a̱ dí najmangu̱ʼ”.

Waldo niʼngo̱o̱ niniñuuʼ dí nawiyu̱u̱ʼ kaʼñún eʼwíinʼ numuu rí niniñaminaʼ dí Dios mambáyúu. Ikhaa niʼthí: “Bi̱ kañu̱u̱n ga̱jma̱a̱ bi̱ nimbájxu̱ʼ gajmíi̱nʼ tséʼkha̱ munimbu̱ún dí niriʼkumina̱a̱ʼ”. Niʼthí xóó: “Nákha ginii ninindxu̱ʼ mbáa xa̱bu̱ bi̱ najmangu̱u̱ʼ. […] Mú Jeobá nimbáyuʼ mariʼkumina̱a̱ʼ mu mani̱ndxu̱ʼ mbáa xa̱bu̱ wabaaʼ”.