Xámíñáaʼ xó má Sadoc

1, 2. Tsáá ninindxu̱u̱ Sadoc rá. (1 Crónicas 12:​22, 26-28.)

ATATSAʼWÁMINAʼ rí xtaa rarígá. Mbá 340,000 xa̱bekha ndiwiin mu mugíiʼ David mu mani̱ndxu̱u̱ xóo rey náa xúgíʼ Israel. Náa ajtsú mbiʼi xa̱bekha, nikúwíin mijngii náa kúbá ndrígóo Hebrón nunduʼwa nutamijná ga̱jma̱a̱ nuni̱ ajmúú ga̱jma̱a̱ gagi mu muni̱ mba̱a̱ Jeobá (1 Crón. 12:39). Ikhí xtaa mbáa dxámá bi̱ mbiʼyuu Sadoc, mbaʼin na̱nguá eyáá xóo mbáa bi̱ gíʼdoo numuu. Mú Jeobá ndiʼyoo ga̱jma̱a̱ nindoo rí ikháánʼ mbuʼyáá rí dxámá buʼko̱ xtáa ikhí (atraxnuu 1 Crónicas 12:​22, 26-28). Mú tsáá ninindxu̱u̱ Sadoc rá.

² Sadoc ninindxu̱u̱ ndxajkun bi̱ nañajunʼ mijngii ga̱jma̱a̱ ndxajkun Abiatar. Ma̱ngaa nindxu̱u̱ vidente, xóo muʼthá bi̱ Jeobá naxnúu ku̱ma̱ ga̱jma̱a̱ naniñuuʼ rí Sadoc makro̱ʼo̱o̱ rí nandoo maʼni Jeobá (2 Sam. 15:27). Xa̱bu̱ nagún gúyáá mu maxnúún consejos ma̱ngaa ninindxu̱u̱ mbáa xa̱bu̱ bi̱ tsémiñuu. Náa artículo rígi̱ mbuʼyáá xóo niʼni Sadoc mu xámíñuu.

3. a) Náá numuu rí ndayóoʼ rí xámiñúlú rá. b) Ndiéjunʼ gúʼyáá náa artículo rígi̱ rá.

³ Náa iwáá mbiʼi rígi̱, Gixa̱a̱ nagíʼ maʼni gámbáa fe rí kuaʼdáá náa Jeobá (1 Ped. 5:8). Gíʼmaa rí xámiñúlú nákhá xóo kuáʼti̱i̱n rí Jeobá maʼnigámbáa Gixa̱a̱ ga̱jma̱a̱ náa numbaaʼ xkawiʼ náa naʼtáñajunʼ (Sal. 31:24). Guʼyáá ajtsú enii, rí xóo ma̱ndoo mbuʼyaridáá rí támíñúu Sadoc.

ATAMBÁYÍÍ XA̱BU̱ ÑAJUNʼ NDRÍGÓO DIOS

4. Náa numuu ndayóoʼ rí xámíñulú mu mumbáyíí Xa̱bu̱ ñajunʼ ndrígóo Dios rá. (Atayáá ma̱ngaa xtiʼkhuu.)

⁴ Bi̱ nindxu̱lú xa̱bi̱i̱ Jeobá numbáyíí ga̱jma̱a̱ xúgíʼ a̱jkiu̱lú Xa̱bu̱ Ñajunʼ ndrígóo mú ndayóoʼ rí xámiñúlú (Mat. 6:33). Mbá xkri̱da, náa numbaaʼ xkawiʼ rí kuwáánʼlú ndayóoʼ rí xámiñúlú mu muʼnimbulú ikha ndrígóo Jeobá ma̱ngaa mu muʼtáraʼa ajngáa rí májánʼ ga̱jma̱a̱ numuu Reino (1 Tes. 2:2). Ma̱ngaa ndayóoʼ maguajún jmbu mu xúxuʼdámijná náa política (Juan 18:36). Ga̱jma̱a̱ mbaʼin testigos de Jeobá ndayóoʼ muraʼníí gamiéjunʼ ga̱jma̱a̱ numuu rí nda̱a̱ mbújkha̱a̱, rí naguma ngíníi o rí asndu nuxudiinʼ náa guʼwá e̱jua̱nʼ numuu rí tsíñún gúxudamijná náa política o rí magún náa guerra.

5. Náa numuu ndiyóoʼ rí xámíñuu Sadoc mu mambáyúu David rá.

⁵ Sadoc raʼkháa i̱ndó nijkha náa Hebrón mu maʼni gagimina̱ʼ náa nigi̱ʼi̱i̱ David xóo rey ma̱ngaa nijkha kagu̱ ajua̱nʼ ndrígóo ga̱jma̱a̱ nixtáa xawii mu maxmína̱ʼ náa guerra (1Crón. 12:38). Nixtáa xawii mu maʼga̱ kidxuuʼ David mu mambáyúu náa magi̱ʼdu̱u̱ ga̱jma̱a̱ mambáyúu xuajin Israel náa xa̱bu̱ sia̱nʼ ndrígún, mbáa ikhaa na̱nguá ejmañuu wéñuuʼ, rí maxmína̱ʼ mú na̱nguá nimíñuu.

6. Xú káʼnii nimbáyúu Sadoc, xkri̱da ndrígóo David rí támíñúu rá. (Salmo 138:3.)

⁶ Ndiéjunʼ nimbáyúu Sadoc mu xámíñuu rá. Numuu rí nixtáa náa majñu̱únʼ xa̱bekha bi̱ mixkujinʼ ga̱jma̱a̱ bi̱ támiñuun, xkri̱da ndrígún ikhiin nimbáyúu. Mbáa dí ikhaa ninindxu̱u̱ David. Numuu dí ikhaa támiñuu índo̱ nixnún ikha xa̱bu̱ Israel náa nagún guxmijná. Ikha jngóo xúgíinʼ xa̱bu̱ Israel nindúún rí ikhaa mani̱ndxu̱u̱ rey (1 Crón. 11:​1, 2). David naku̱mu̱u̱ kaʼyoo Jeobá ga̱jma̱a̱ mambá índo̱ xa̱bu̱ sia̱nʼ ndrígóo nagún ruxkáá ikhaa na̱ndo̱ʼo̱o̱ Jeobá rí mambáyúu (Sal. 28:7; atraxnuu Salmo 138:3).a Sadoc ma̱ngaa ndiʼyaridoo xkri̱da ndrígún xa̱bekha bi̱ támiñuun bi̱ nikúwá nákhá ikhaa nixtáa, xóo Jehoiadá ga̱jma̱a̱ a̱ʼdióo Benaya, ma̱ngaa mbá 22 bi̱ kuya̱ edxu̱u̱ náa guʼwún anu̱ún bi̱ numbáyíí David (1 Crón. 11:​22-25; 12:​26-28). Xúgíinʼ ikhiin nindúún mumbáyíí David mu mani̱ndxu̱u̱ rey ga̱jma̱a̱ muñewa̱a̱n.

7. a) Tsíín xkridún embáyulú rí mbiʼi xúgi̱ mu xámiñúlú rá. b) Ndiéjunʼ ejmañulúʼ náa xkri̱da ndrígóo ndxájulú Nsilu bi̱ na̱ʼkha̱ náa video rá.

⁷ Rí muraxnuu xkri̱da ndrígún xa̱bi̱i̱ Jeobá bi̱ nimbayíí Reino ndrígóo naxnúlú tsiaki̱i̱ ga̱jma̱a̱ naʼni rí xámiñúlú. Jesucristo, rey ndrígóo Reino rígi̱ táʼndoo gákudaminaʼ náa política dí rígá náa numbaaʼ náa naʼtáñajunʼ Gixa̱a̱ (Mat. 4:​8-11; Juan 6:​14, 15). Nindo̱ʼo̱o̱ má xúʼko̱ Jeobá rí maxnúu tsiaki̱i̱. Ma̱ngaa rí mbiʼi xúgi̱ kuaʼdáá xkri̱da ndrígún jiámá bi̱ táʼndúún guxudamijná náa política o rí murajthuun ajua̱nʼ. Ma̱ndoo matraxnuu rí naʼthí ga̱jma̱a̱ numún náa jw.orgb.

ATAMBÁÑÚÚN A̱NGIU̱LÚ

8. Nguáná ndayóoʼ rí xámíñún a̱ngiu̱lú bi̱ kuya̱ edxu̱u̱ mu mumbáñún a̱ngiu̱lú rá.

⁸ Xa̱bi̱i̱ Jeobá nanigu̱u̱nʼ mumbáyúmíjná (2 Cor. 8:4). Mu muni̱ rígi̱ ndayóoʼ rí xámíñún. Mbá xkri̱da, índo̱ narígá mbá guerra, bi̱ kuya̱ edxu̱u̱ nduyáá rí a̱ngiu̱lú ndayóoʼ rí mixnún tsiaki̱i̱ ga̱jma̱a̱ mixtambáñún o rí magún kudúún Biblia ga̱jma̱a̱ i̱yi̱i̱ʼ ma̱ngaa ganitsu o i̱ʼwáʼ rí nda̱ñúunʼ numuu rí nandún kuñún a̱ngiu̱lú. Ikha jngóo kúwá xawii mu mumbáñún maski ajndu nindxu̱u̱ gamíi (Juan 15:​12, 13). Xúʼko̱ nusngajma rí tsémiñún xó má Sadoc.

9. Xó má eʼthí náa 2 Samuel 15:​27-29, ndiéjunʼ nikuʼmaa David maʼni Sadoc rá. (Atayáá ma̱ngaa xtiʼkhuu.)

⁹ Guʼyáá xóo Sadoc támiñuu índo̱ nimbáñún a̱ngui̱i̱n náa mbiʼi mingíjyúuʼ. Absalón nindoo maxíyáa anu̱u̱ mu ikhaa eyoo mani̱ndxu̱u̱ rey (2 Sam. 15:​12, 13). Ikha jngóo David ndiyóoʼ magayúu náa xuajin Jerusalén. Niʼthún xa̱bi̱i̱: “¡Nacha̱ gugayúlú gii mbáa nimbáa dí ikháánʼlú xákríyáa gaʼni Absalón!” (2 Sam. 15:14). Índo̱ má nagún náa kamba̱a̱ David ndiʼyoo rí mbáa ndayóoʼ maguánú náa Jerusalén. Mu mbaʼyoo rí nagíʼ maʼni Absalón ga̱jma̱a̱ nda̱wa̱á maʼthúu̱n David, ikha jngóo nikuʼmaa Sadoc ga̱jma̱a̱ eʼwíinʼ ndxajkun mu matangi̱ín náa xuajin mu muñamaa (atraxnuu 2 Samuel 15:​27-29). Ñajunʼ rí nikhánún gamíi rí maʼni makhañún, ikha jngóo ndiyóoʼ muni̱ ga̱jma̱a̱ tsumáá. Absalón ninindxu̱u̱ mbáa xa̱bu̱ bi̱ najmangu̱u̱ʼ ga̱jma̱a̱ i̱ndó naxmiéjunʼ kaʼyaminaʼ ikhaa ma̱ngaa nikuximínáʼ náa anu̱u̱. Lá natatsaʼwáminaʼ ndiéjunʼ gáʼniún xa̱bu̱ buʼko̱ á mu ndiʼñún rí kúwá rañamaa mu muñewa̱a̱n David ráʼ.

10. Ndiéjunʼ nini bi̱ nambájxu̱u̱ gajmíi̱n David ga̱jma̱a̱ Sadoc mu muñewa̱a̱n rá.

¹⁰ David nindoʼoo Sadoc ga̱jma̱a̱ Husái, imba̱a̱ bi̱ nambájxu̱u̱ ga̱jma̱a̱ mu mambáyúu (2 Sam. 15:​32-37). Husái nini rí niʼthúu̱n David niʼni xóo nambáyúu Absalón ga̱jma̱a̱ niʼthúu̱n ndiéjunʼ gaʼni mu maxmíjná ga̱jma̱a̱ David. Rúʼko̱ niʼni rí David magiʼdoo mbiʼi mu maʼni ratamínáʼ, nda̱wa̱á Husái niʼthúu̱n Sadoc ga̱jma̱a̱ Abiatar rí marigá (2 Sam. 17:​8-16). Ikhú mbá najmiin nitháán David (2 Sam. 17:17). Núma̱aʼ má Jeobá Sadoc ga̱jma̱a̱ eʼwíinʼ ndxajkun nimbayíí David mu maʼni kríyamínáʼ (2 Sam. 17:​21, 22).

11. Xú káʼnii gándoo guʼyaridáá rí támíñúu Sadoc índo̱ gumbáñún a̱ngiu̱lú rá.

¹¹ Ndiéjunʼ guʼni mu xámíñulú xó má Sadoc índo̱ gúndu̱ʼu̱lú rí mumbáñuun a̱ngiu̱lú índo̱ narígá gamíi rá. 1) Guʼnimbulúʼ rí gúthulú. Índo̱ narígá rí gamíi, gíʼmaa muʼnimbulú mu makuwáanʼ mbá jnduʼ. Ikha jngóo guʼni rí gúthulú náa sucursal (Heb. 13:17). Bi̱ kuya̱ edxu̱u̱ gíʼmaa mbuyáá má xúʼko̱ ndiéjunʼ gúni ga̱jma̱a̱ mbuyáá ikha rí nakánún mu muniratamijná índo̱ gárígá mbá gamiéjunʼ (1 Cor. 14:​33, 40). 2) Xámíñulú, mú guʼni ga̱jma̱a̱ tsumáá (Prov. 22:3). Gundxaʼwámíjná wapháá ndiéjunʼ gúʼni ga̱jma̱a̱ guñewunmijná májánʼ. 3) Ga̱ku̱mu̱lú kuʼyáá Jeobá. Jeobá nandoo rí ikháán gajmiáanʼ a̱ngia̱a̱nʼ xáguaʼníí mbá dí ra̱májánʼ, ikhaa ma̱ndoo mambáyáaʼ mu matambáñun a̱ngiu̱lú mu xagíʼnalá mbá dí ra̱májánʼ.

12, 13. Ndiéjunʼ eʼsngáa xkri̱da ndrígóo Víktor ga̱jma̱a̱ Vitali rá. (Atayáá xtiʼkhu ma̱ngaa.)

¹² Guʼyáá xkri̱doo Víktor ga̱jma̱a̱ Vitali, a̱jmi̱i̱n bi̱ kuya̱ edxu̱u̱ bi̱ kaʼñún magún kudúún ganitsu ga̱jma̱a̱ iyaʼ náa a̱ngiu̱lú Ucrania. Víktor naʼthí: “Najkuaxu̱ guʼyáʼ ganitsu náa xúgíʼ, ikhí nudxawíín xú káʼnii xa̱bu̱ bi̱ nurmidáá ajua̱nʼ, mbáa ndxájulú nixná ganitsu rí gíʼdoo. Núma̱aʼ má ga̱jma̱a̱ numuu rígi̱ mbiʼin a̱ngiu̱lú bi̱ nindxu̱ún publicador niguaʼdáá rí ma̱ndoo makáwíin ga̱jma̱a̱ nákha mbiʼi rúʼko̱. Narmáʼáan a̱jkiu̱nʼ dí índo̱ kuwáánʼ rundríyááʼ náa carro naʼni mbá 20 metros nixpátrigu mbá bomba mú támidáá. Kañiiʼ mbiʼi nitakáñuu Jeobá rí maxnúʼ tsiaki̱i̱ mu xámíñuu, mu mambáñun má xúʼko̱ a̱ngiu̱lú”.

¹³ Vitali eʼthí: “Ndiyóoʼ rí xámíñuxu. Timbá aʼphu̱ rí ni̱jkhá ndijyúuʼ mbá 12 horas, náa xúgíʼ kamba̱a̱ʼ ni̱jkhá ratakháñuu Jeobá”. Vitali támiñuu mú ma̱ngaa niʼni ga̱jma̱a̱ tsumáá, ikhaa naʼthí xóó: “Na̱nguá niniʼñúuʼ rando̱ʼo̱o̱ rí maxnúʼ ku̱ma̱ ga̱jma̱a̱ mba̱yo̱o̱ asndu náa maʼngo̱o̱ ma̱ni̱. I̱ndó nijkuaxu̱ náa kamba̱a̱ʼ náa xa̱bu̱ ñajunʼ nuniñaʼ muʼgua. Fe ndrígóʼ niʼni itháán gujkhuʼ índo̱ ndi̱yo̱o̱ rí a̱ngiu̱lú nuñajunʼ mbá kambájxu̱u̱n. Nirajxi̱ rí tri̱ga̱ náa kamba̱a̱ʼ ma̱ngaa nundríyáá ganitsu ga̱jma̱a̱ xtíin náa carro. Víktor ga̱jma̱a̱ ikhúún nixnuxu̱ ganitsu ma̱ngaa náa ma̱ndoo mbu̱ya̱a̱ jxu̱u̱ʼ”.

ARIEJÚN JMBU

14. Xú káʼnii kuwáánʼlú índo̱ mbáa bi̱ kuʼyáá naniñuuʼ Jeobá rá.

¹⁴ Mbá tsáʼkhá rí naʼni makuwáanʼ ngíná wéñuuʼ nindxu̱u̱ índo̱ mbáa bi̱ kuʼyáá o bi̱ nambájxulú gajmiúlú naniñuuʼ Jeobá (Sal. 78:40; Prov. 24:10). Ga̱jma̱a̱ á mu ra̱ʼkhá tháán eyulú kuʼyáá xa̱bu̱ buʼko̱ itháán má naʼni makuwáanʼ ngíná. Á mu ikháán nitagíʼnii rígi̱, xkri̱da ndrígóo Sadoc rí niwi̱ji̱ jmbu mambáyáaʼ wéñuuʼ.

15. Náá numuu ndiyóoʼ rí xámíñuu Sadoc mu mawi̱ji̱ jmbu náa Jeobá rá. (1 Rey. 1:​5-8.)

¹⁵ Índo̱ David kaʼníí xtáa raʼtáñajunʼ, nikhi̱i̱ má ga̱jma̱a̱ inuu makhañúu, a̱ʼdióo bi̱ mbiʼyuu Adonías nindoo mani̱ndxu̱u̱ rey, maski ajndu Jeobá nindoo rí Salomón mani̱ndxu̱u̱ rey (1 Crón. 22:​9, 10). Sadoc niwi̱ji̱ jmbu náa Jeobá mú Abiatar bi̱ nambájxu̱u̱ ga̱jma̱a̱ nindoo mambáyúu Adonías (atraxnuu 1 Reyes 1:​5-8). Xúʼko̱ niʼni rí Abiatar xáwi̱ji̱ jmbu náa David ni má náa Jeobá. Atatsaʼwáminaʼ xóo nikumu̱u̱ Sadoc, ikhaa nixtáa ngíná ga̱jma̱a̱ nigáwíinʼ a̱jkiu̱u̱n numuu rí itháán dí 40 tsiguʼ niñajunʼ mbóó ga̱jma̱a̱ Abiatar xóo ndxajkun (2 Sam. 8:17). Mbóó nigún kuñún mbá najmiin “arca ndrígóo Dios bi̱ gajkhun” (2 Sam. 15:29). Nimbayíí David mu mani̱ndxu̱u̱ rey ma̱ngaa mbá kambájxu̱u̱n nini̱ mbaʼa enii mu muni̱ ñajunʼ Jeobá (2 Sam. 19:​11-14).

16. Ndiéjunʼ nimbáyúu Sadoc mu mawi̱ji̱ jmbu náa Jeobá rá.

¹⁶ Maski ajndu Abiatar táwi̱ji̱ jmbu náa Jeobá índo̱ tambáyúu David, mú Sadoc niwi̱ji̱ jmbu náa Jeobá. Índo̱ nitháán David rí nandoo maʼni Adonías, ikhaa nijkha gáʼyoo Sadoc, Natán ga̱jma̱a̱ Benaya mu mugíiʼ Salomón mu mani̱ndxu̱u̱ rey (1 Rey. 1:​32-34). Sadoc ma̱ngaa nimbáyúu xkri̱da ndrígún eʼwíinʼ xa̱bi̱i̱ Jeobá xóo Natán, ga̱jma̱a̱ eʼwíinʼ bi̱ niguájun jmbu náa Dios ga̱jma̱a̱ nimbayíí rey David (1 Rey. 1:​38, 39). Índo̱ Salomón ninindxu̱u̱ rey niʼni rí ‹ndxajkun Sadoc maʼni ñajunʼ dí niʼni Abiatar› (1 Rey. 2:35).

17. Xú káʼnii gándoo gátayaridáá Sadoc á mu mbáa bi̱ nandaaʼ xtayáá gániñuuʼ Jeobá rá.

¹⁷ Xú káʼnii gándoo gatayaridáá ikháán Sadoc rá. Á mu mbáa bi̱ nandaaʼ xtayáá naniñuuʼ Jeobá, atasngájmáá kaʼwu rí ikháán nandaaʼ mariejún jmbu náa Jeobá (Jos. 24:15). Jeobá maxnáaʼ tsiaki̱i̱ ga̱jma̱a̱ maʼni rí xámíñáaʼ matani rí májánʼ, aratakháñii ga̱jma̱a̱ araxtaa mijngii náa xa̱bi̱i̱ bi̱ naguájun jmbu. Jeobá nangajo̱o̱ rí ikháán nariejún jmbu ga̱jma̱a̱ maʼni numa̱a̱ʼ numuu rúʼko̱ (2 Sam. 22:26).

18. Ndiéjunʼ eʼsngáa xkri̱doo Marco ga̱jma̱a̱ Sidse rá.

¹⁸ Guʼyáá ga̱jma̱a̱ numuu Marco ga̱jma̱a̱ a̱ʼgiu̱u̱ bi̱ mbiʼyuu Sidse. A̱jmi̱i̱n e̱ji̱i̱n gu̱ʼu̱ niniñaaʼ runi̱ ñajunʼ Jeobá índo̱ niguanii, Marco naʼthí: “Índo̱ nagumiin ejña̱a̱nʼ nandaaʼ xtañún ga̱jma̱a̱ xúgíʼ a̱jkia̱a̱nʼ”. Rí matani asndu ndiéjunʼ mu matie̱wu̱u̱n. Ikha jngóo índo̱ nuniña̱a̱nʼ runi̱ ñajuunʼ Jeobá naʼni dí raʼkhá tháá maraxtaa ngíná, ikhaa naʼthí xóó: “Mú Jeobá nixtáa má xúʼko̱ rambáyuxuʼ ikhaa naʼni rí mumbáyumijnáxu ga̱jma̱a̱ muxnamináxu tsiaki̱i̱ índo̱ ikhúún naxtá ngíná ga̱jma̱a̱ numuu rí nirígá, a̱ʼgiu̱ʼ naʼni̱i̱ a̱jkiu̱nʼ ga̱jma̱a̱ naxnúʼ tsiaki̱i̱ maʼni rí májánʼ ga̱jma̱a̱ índo̱ ikhaa naxtáá ngíná ikhúún nambáyúu”. Sidse naʼthí: “Niʼnguxu niraʼníí gamiéjunʼ rígi̱, núma̱aʼ má ga̱jma̱a̱ numuu rí Jeobá nimbáyuxu. Nixtáá ngíná numuu rí niku̱mu̱ʼ rí ga̱jma̱a̱ aʼkhúnʼ e̱ji̱nʼ niniñaaʼ runi̱ ñajunʼ Jeobá, ikha jngóo ni̱thu̱u̱n Jeobá xóo ku̱mu̱ʼ, nda̱wa̱á mbáa ndxájulú bi̱ mbayuuʼ má tsiguʼ má nánguá eyoo, ni̱ʼkha̱ kanuuʼ náa ikhúún nixkrámáʼ náa xpajpoʼ ga̱jma̱a̱ niʼthúnʼ: Sidse ‹Garmáʼáan a̱jkia̱a̱nʼ raʼkháa aʼkháanʼ ikháán›. Jeobá nambáyúʼ ga̱jma̱a̱ tsiaki̱i̱ ndrígóo mu ma̱ni̱ má xúʼko̱ ñajuunʼ ga̱jma̱a̱ gagi”.

19. Ndiéjunʼ gátraʼwíí matani rá.

¹⁹ Jeobá nandoo rí xúgiáanʼ bi̱ nindxu̱lú xa̱bi̱i̱ xámiñúlú xó má Sadoc (2 Tim. 1:7). Mú, ikhaa nandoo rí makumulú kuʼyáá ikhaa, raʼkháa rí makumulú kuʼyamijná i̱ndó ikháanʼ. Ikha jngóo índo̱ ikháán gátraʼníí mbá gamiéjunʼ náa mbaʼyóoʼ rí xámíñáaʼ atanda̱ʼa̱a̱ Jeobá rí mambáyáaʼ. Ma̱ndoo ma̱ta̱ya̱a̱ rí ikhaa mambáyáaʼ mu xámíñáaʼ xó má nimbáyúu Sadoc (1 Ped. 5:10).