Jeobá nixnúxu̱ tsiaki̱i̱ índo̱ nirígá guerra ma̱ngaa índo̱ nirígá dí tsímáá

Paul: ¡Ra̱ʼkhá tháán gagi nikúwáanʼxu! Nákha noviembre tsiguʼ 1985 kuwáánʼ rajkuáxu xóo misioneros náa Liberia (África Occidental). Avión náa na̱jkuáxu̱ niwi̱ji̱ náa Senegal, ikhú niʼthí Anne, “ni tséʼni mbá hora muguáʼnu náa Liberia”. Mú ikhú nirígá mbá anuncio náa nithi, “xúgíinʼ xa̱bu̱ bi̱ nagún náa Liberia mbaʼyóoʼ maguájtáan, numuu dí xa̱bu̱ nandún muxiyáa xa̱bu̱ ñajunʼ bi̱ xtáa ikhí, xándoo muʼguánúxu ikhí”. Ikha jngóo ndiyóoʼ maguanúxu náa Senegal mbá gu̱wa̱ʼ mbiʼi gajmiúxu tikhuun misionero bi̱ kúwá ikhí. Náa noticia naʼthí dí tikhuun carro mba̱ʼu̱ nagún kudiin xa̱bu̱ bi̱ nikháñún ga̱jma̱a̱ dí nuradíin xa̱bu̱ bi̱ nagájnún náa kamba̱a̱.

Anne: Na̱nguá nindxu̱xu̱ xa̱bu̱ bi̱ naxtiékhún. Asndu má nákha chíʼgiúúnʼ nithu̱nʼ xóo “Náná bi̱ namíñúu wéñuuʼ”. Numuu dí asndu namíñúʼ makidún náa kamba̱a̱. Mú, maski ajndu nirígá gamíi náa Liberia, ni̱taxu dí mu̱ʼguáxu má.

Paul: Anne ga̱jma̱a̱ ikhúún nigajáanʼxu náa Inglaterra, káaʼ naʼni 8 kilómetro dí mitsínguánʼ xtáa mámbáa. Niguáʼdi̱i̱xu ninindxu̱xuʼ precursores nda̱wa̱á dí nigajnáaʼxu náa secundaria. Anu̱ʼ ga̱jma̱a̱ ru̱dúʼ xúʼko̱ má ru̱dúu̱ Anne, nixnúxu tsiaki̱i̱ ga̱jma̱a̱ nimbayúxu muni kájxi̱ ñajuunʼ Jeobá. Índo̱ nigúʼdoo 19 tsiguʼ nithu̱nʼ maʼgá Betel. Ga̱jma̱a̱ Anne ni̱ʼkha̱ ga̱jma̱á nindxu̱ʼ nda̱wa̱á dí nidamijnáxu nákha tsiguʼ 1982.

Anne: Niniguxu̱ʼ makuwáanʼxu náa Betel, mú itháan má ninduxu̱ʼ muñambáá náa ndayóoʼ miʼtáraʼa itháan. Dí niñajunʼxu mbóó náa Betel gajmiúxu bi̱ ninindxu̱ún misioneros, niʼni dí mangáanʼxu̱ maʼnduxu itháan manindxuxuʼ misioneros. Mbá ajtsú tsiguʼ, nitakáñíixu Jeobá mbájmbu ga̱jma̱a̱ numuu rígi̱ mámbá wakíʼ. Ikha jngóo ra̱ʼkhá tháán nidxuxu índo̱ nithuxu mu̱ʼguáxu náa clase número 79 ndrígóo Galaad nákha tsiguʼ 1985. Nda̱wa̱á nixuʼmáanʼxu mu̱ʼguáxu náa Liberia, náa África Occidental.

NGAJUA DÍ GUAʼDÁÁ A̱NGIU̱LÚ NIXNÚXU TSIAKI̱I̱

Paul: Nitsimuxu náa timbá avión dí nikhánáá permiso magi̱ʼi̱ náa Liberia. Xúgíinʼ xa̱bu̱ ra̱ʼkhá tháán nimíñúún dí asndu káʼnii má carro dí nandxaʼwá, xúgíinʼ xa̱bu̱ nundxa̱ʼwa̱ ga̱jma̱a̱ nagáñún. Mu maʼni̱i̱ a̱jkiu̱xu̱, nuráxnuxu mbóó xúgíʼ mbruʼun dí na̱ʼkha̱ raʼthí náa Salmo. Maski ajndu xúʼko̱, niniguxu̱ʼ wéñuuʼ asignación ndrígúxu̱. Anne ninindxu̱u̱ misionera ga̱jma̱a̱ ikhúún niñajunʼ náa Betel mbóó ga̱jmu̱ʼ ndxájulú John Charuk.a Mbaʼa dí nijmañuʼ náa ikhaa numuu dí nixtáa mbayuuʼ náa Liberia ma̱ngaa dí nininuuʼ májánʼ xkujndu dí niraʼníí a̱ngiu̱lú bi̱ kúwá ikhí.

Anne: Niniguxu̱ʼ Liberia numuu dí a̱ngiu̱lú ra̱ʼkhá tháán nindúún kuyuxu ga̱jma̱a̱ niguájun jmbu. Mbá nacha̱ nimbájxuxu májánʼ ga̱jma̱a̱ ninindxu̱ún xóo familia ndrígúxu̱. Consejo dí nixnuxu nimbáyuxu wéñuuʼ ga̱jma̱a̱ ra̱ʼkhá tháán niniguxu̱ʼ náa nitaráʼaxu. Xa̱bu̱ nanigu̱u̱nʼ mudxawíín má xúʼko̱, nutamijná ga̱jma̱a̱ numuu Biblia asndu náá, ikha jngóo mbá nacha̱ nandoo nutamijná gajmiúxu ikhiin. Niguáʼdi̱i̱nxu mbaʼin bi̱ nisngúúnxu ga̱jma̱a̱ numuu Biblia dí asndu niʼniuxu̱ mingíjyúuʼ musngúúnxu mbá xúgíinʼ. Niniguxu̱ʼ wéñuuʼ dí nikúwáanʼxu ikhí.

JEOBÁ NIXNÚXU TSIAKI̱I̱ ÍNDO̱ NIMÍÑUXU

Paul: Mbá a̱jkhu̱ tsiguʼ nirígá dí tsímáá. Mú nákha tsiguʼ 1989 nirígá mbá guerra ikha jngóo mbá xúgíʼ nixtiʼkhu̱u̱. Nákha 2 ñajunʼ gu̱nʼ julio tsiguʼ 1990, xa̱bu̱ bi̱ tsénimbu̱ún kuñún xa̱bu̱ ñajunʼ nigi̱ʼdi̱i̱ nitañajunʼ náa mijngii mbaaʼ dí rígá Betel. Mbá ajtsú gu̱nʼ na̱nguá nindoo mutamijná gajmiúxu̱ nimbáa, ni má bi̱ kúwá náa guʼwúxu ni ma a̱ngiu̱lú bi̱ náa guʼwá dí naxná ikha. Na̱nguá nixtáa mbáa xa̱bu̱ bi̱ maʼtáñajunʼ, nirígá ewiʼ ga̱jma̱a̱ mbaʼa nuthu nutsijmiin gu̱ʼu̱. Xkujndu rígi̱ ndijyúuʼ mbá 14 tsiguʼ ga̱jma̱a̱ nimínuuʼ xúgíʼ xuajen.

Anne: Xa̱bu̱ bi̱ naguwáʼ náa mixtiʼkhu xuajen nuxmijná ga̱jma̱a̱ nuradimijná. Soldado kuda mbaʼa ajua̱nʼ ga̱jma̱a̱ gamíi xóo kugíʼ xtíñún ma̱ngaa natu̱ʼu̱u̱n náa mámbá guʼwá nurawíi asndu ndiéjunʼ má eñún. Tikhuun dí ikhiin nuthi dí nuradíin xa̱bu̱ nindxu̱u̱ asndu xóo nuradíin xtílá. Bi̱ nakháñún nustigi̱i̱n mbóó jnduʼ náa kamba̱a̱, rígi̱ nirígá asndu náa mijngii Betel. Ma̱ngaa niradíin tikhuun Testigo bi̱ niguájun jmbu tikhuun dí ikhiin ninindxu̱ún a̱jmi̱i̱n misionero.

Soldado nixkhún ga̱jma̱a̱ nuradíin bi̱ naguwáʼ náa i̱mba̱ xuajen, ikha jngóo mbaʼin Testigo nirkaʼwiin a̱ngiu̱ún. Xúʼko̱ má nini tikhuun misionero ga̱jma̱a̱ betelita ma̱ngaa. Náa Betel niguáʼdíinxu mbaʼin Testigo bi̱ naguwáʼ i̱mba̱ níʼkhá, tikhuun ninuʼ náa piso dí kawáá, eʼwíinʼ nikúwá ga̱jma̱á nindxu̱xu̱ náa piso dí rijma̱a̱. Paul ga̱jma̱a̱ ikhúún nikúwáanʼxu gajmiúxu mbá familia bi̱ nindxu̱ún mbá juwiin.

Paul: Xúgíʼ mbiʼi soldado nunimi̱jna̱ matu̱ʼu̱u̱n mu mbuyáá á mu kuwáanʼxu̱ rurkaʼwiin xa̱bu̱. Nidrigi̱i̱nxu a̱jkhui̱i̱n bi̱ muyama, a̱jmi̱i̱n bi̱ muyejxirigu asndu náa ventana a̱jmi̱i̱n bi̱ magún gutamijná gajmiún soldado náa xkrugua. Á mu a̱ngiu̱lú kuda náa inuu ñawúúnʼ nandoo gáʼthí dí xúgíʼ má májánʼ. Mú, á mu kuda ñawúúnʼ náa kidxúúnʼ rúʼko̱ nandoo gáʼthí dí soldado nandún matu̱ʼu̱u̱n, ikha jngóo bi̱ kúwá ruyejxi náa ventana mbá nacha̱ nurkaʼwiin a̱ngiu̱lú.

Anne: Nirkaʼwuminaʼ ga̱jmu̱ʼ mbáa ndxájulú a̱ʼgu̱ náa baño ikhí kraʼa mbá mueble náa kaʼnii mbá chíʼgíiʼ matarkaʼwuminaʼ ga̱jma̱a̱ ndxájulú nito̱ʼo̱o̱ ikhí xó má niʼngo̱o̱. Soldado nigún ruxkoʼ nitsimún náa escalera ga̱jma̱a̱ ra̱ʼkhá tháán nikiʼníin nixuduʼjma xkrugua, ikha jngóo Paul niʼthún “guguaʼthi̱i̱n mbá xngaa, a̱ʼgiu̱ʼ kraʼaa náa baño”. Índo̱ nirúguáa náa nirkaʼwuminaʼ ndxájulú, niwáán nini ga̱jma̱a̱ ndijyúuʼ índo̱ nigruámáaʼ mbáníí trástiuʼ ikha jngóo nigíʼdu̱u̱ niguʼún, á mu nagajnúʼ xúʼko̱ kaʼnii soldado mbuyáá dí namíñúʼ, ikha jngóo nitakháñú mañúú Jeobá dí mambáyuʼ nda̱wa̱á nirmbáʼtoo xkrugua ga̱jma̱a̱ asndu támíñúʼ nirajxíin soldado. Mbáa dí ikhiin, nirmajngu̱u̱n ga̱jma̱a̱ nito̱ʼo̱o̱ náa gídáʼ mueble, ndiyáʼ náa xúgíʼ mú táʼngo̱o̱ gáxkamaa. Ni̱jkha̱ gajmíi̱n eʼwíinʼ soldado náa xúgíʼ cuarto ga̱jma̱a̱ náa tsu̱du̱u̱ guʼwá mú táʼngu̱u̱n guxkamaa nimbáa.

NININDXU̱ÚN ASNDU XÓO AGUʼ NÁA MIKRÍNA

Paul: Mbayuuʼ nánguá niguáʼdááxu̱ mbaʼa ganitsu. Mú, dí ninigajma̱a̱xu̱ miʼcha̱ náa Betel, ninindxu̱u̱ asndu xóo ganitsu dí naphúxu miʼcha̱. Xúgiáanʼ ndu̱ya̱a̱xu dí muráxnuxu ga̱jma̱a̱ dí muniga̱jma̱a̱xu Biblia maxnúxu tsiaki̱i̱ mu maʼnguxu mámbá mbiʼi.

Á mu niguámbá xúgíʼ ganitsu ga̱jma̱a̱ iyaʼ, mbaʼyóoʼ magajnúxu náa Betel ga̱jma̱a̱ mbáa bi̱ maguanún bi̱ nirkaʼwumijná muradíin. Mú, Jeobá nixnúxu má xúʼko̱ dí ndiyúxu asndu mbiʼi dí nditháan na̱nguá kaʼnii. Ga̱jma̱a̱ nimbáyuxu dí xámíñuxu wéñuuʼ.

Mámbá mbiʼi niʼni itháan migamíi dí xtáa rarígá náa xuajen, mú, gajkhun dí na̱ʼkha̱ náa Dios nixnúxu̱ wéñuuʼ tsiaki̱i̱. Mbaʼa nuthu a̱ngiu̱lú ndiyóoʼ magáñún mu muni̱ káwumijná. Mú, niguaʼdáá má xúʼko̱ mbá fe gujkhuʼ ga̱jma̱a̱ takaguábíinʼ maski ajndu niraʼníí mbaʼa gamiéjunʼ. Tikhuun nithi dí guerra rúʼko̱ niʼniratiin mu “muraʼníí gaʼkhu dí majphú mba̱a̱”. Mbaʼin a̱ngiu̱lú anciano ga̱jma̱a̱ tikhuun a̱ngiu̱lú jiámá tamíñún mumbañún eʼwíin. A̱ngiu̱lú xa̱bekha ga̱jma̱a̱ gu̱ʼu̱ bi̱ naguwáʼ i̱mba̱ níʼkhá kúwá mbóó jnduʼ, ga̱jma̱a̱ nduyáʼ xóo muni̱ mu mutaraʼa, ikhí ma̱ngaa najmún asndu ndiéjunʼ má dí exkamaa náa xaxi̱ mu muni̱ mbá guʼwá náa ma̱ndoo magimbíin. Náa mbiʼi mingíjyúuʼ rúʼko̱, dí magímbíin ga̱jma̱a̱ dí mutaraʼa nimbáñún a̱ngiu̱lú mu maʼngu̱u̱n. Índo̱ nixnaráʼaxu ganitsu, xtíin ga̱jma̱a̱ i̱ʼwáʼ dí nda̱ñúunʼ a̱ngiu̱lú, itháan má naxnúxu tsiaki̱i̱ índo̱ ndu̱ya̱a̱xu dí tikhuun a̱ngiu̱lú itháan má nunda̱ʼa̱ murráa dí mutaraʼa ga̱jma̱a̱ ki xóo xtíin. Mbaʼin xa̱bu̱ kúwá ngíná wéñuuʼ ga̱jma̱a̱ namíñúún jma̱a̱ numuu guerra, nindún nudxawíín ajngá dí májánʼ. Nduyáá dí bi̱ Testigo nindxu̱ún mixtiʼkuiin numuu dí nandún kuyamijná ma̱ngaa dí kúwá gagi maski ajndu narígá mbaʼa gamiéjunʼ. Ikhiin nindxu̱ún asndu xóo aguʼ náa mikrína (Mat. 5:​14-16). Ga̱jma̱a̱ numuu dí nikúwá gagi Testigos, ikha jngóo mbaʼin soldados bi̱ ra̱ʼkhá tháán nijmangu̱u̱n niguánu ninindxu̱ún a̱ngiu̱lú.

NIKHÁNUXU TSIAKI̱I̱ ÍNDO̱ NDIYÓOʼ MUNIʼÑÚÚNXU A̱NGIU̱LÚ

Paul: Mbaʼa nuthu ndiyóoʼ muniʼñááʼxu Liberia: Ajtsú nuthu niniʼñááʼxu mbá xngaa ga̱jma̱a̱ a̱jma̱ nuthu niniʼñááʼxu mbá tsiguʼ kañiiʼ. Mbáa misionera niʼthí xú káʼnii nikumuxu índo̱ niʼthí: “Náa Galaad nisnguxu dí gíʼmaa muñajunʼ ga̱jma̱a̱ xúgíʼ a̱jkiu̱xu̱ asndu náa má guxuʼnguáanʼxu, ga̱jma̱a̱ xúʼko̱ má nini̱xu. Ikha jngóo ra̱ʼkhá tháán nigáwi̱i̱nʼ a̱jkiu̱xu̱ dí muniʼñúúnʼ a̱ngiu̱xu̱”. Mú, ra̱ʼkhá tháán nidxuu a̱jkiu̱xu̱ dí nindoo nimbáñún a̱ngiu̱lú bi̱ kúwá náa Liberia asndu náa xuajen mba̱ʼu̱ dí rígá mijngii.

Anne: Nákha mayo tsiguʼ 1996, a̱jkuáanʼ dí ikháanʼxu̱ nigajnúxu ga̱jma̱a̱ carro ndrígóo Betel náa kajti i̱yi̱i̱ʼ dí gíʼdoo numuu. Ndiyóoʼ muʼguáxu̱ kuda mbá 16 kilómetro náa ma̱ndoo mixtewa̱a̱n májánʼ náa i̱mba̱ níʼkhóo xuajen. Mú, mbiʼi rúʼko̱ nirmidá náa mbaaʼ rúʼko̱. Soldado bi̱ ra̱ʼkhá tháán najmangu̱u̱nʼ nirmidá náa inuu giñán, nitsijuáanʼxu ga̱jma̱a̱ nirawáanʼxu mbá najtsáanʼxu náa carro, mú kaʼníí kaʼwa̱a̱n awúún Paul nigún kuya̱a̱. Niguanúxu ikhí dí asndu na̱nguá ndi̱ya̱a̱xu dí muni̱. Mú, mbá nacha̱, ndi̱ya̱a̱xu Paul kri̱ga̱ raʼkha̱a̱ náa kúwá mbaʼin xa̱bu̱ natsuwooʼ eʼdi inuu. Nikumu̱xu̱ dí nixnáá ga̱jma̱a̱ ajua̱nʼ, mú ndiya̱a̱xu dí á mu xúʼko̱ xándoo maʼga̱ kruígo̱o̱ xóó. Nda̱wa̱á niʼthí dí mbáa soldado nixnúu índo̱ nixkriya̱a̱ʼ náa carro, ikha jngóo dí tagawúunʼ má wéñuuʼ.

Mijngii ikhí, ndi̱ya̱a̱xu̱ wíji̱ mbá carro ndrígu̱ún soldado náa kajchún i̱ndó xa̱bu̱ bi̱ nimíñúún ga̱jma̱a̱ kúwá xawii magún, nitsimuxu tsu̱díí xó má nindoo numuu dí nánguá gáʼchú awúún. Chofer ra̱ʼkhá tháán nacha̱ nigíʼdu̱u̱ ni̱jkha̱ kayóo dí nigíʼ majngutíguáanʼxu. Nitha̱a̱nxu dí mawi̱ji̱, mú, ra̱ʼkhá tháán nimíñuu dí na̱nguá niʼdxawunxu, mú niʼngo̱o̱ má nirájtu̱ṉxu xáʼ. Índo̱ nijkuánuxu ga̱jma̱a̱ niwi̱ji̱ carro, ra̱ʼkhá tháán niʼni neʼnguxu ga̱jma̱a̱ asndu naguáʼáanʼxu ga̱jma̱a̱ numuu tsiaki̱i̱ dí nini̱xu.

Paul: Nda̱a̱ nimbá dí kudáxu, i̱ndó xtíñúxu dí niʼni tsaga ga̱jma̱a̱ nithu dí kuʼgíʼxu. I̱ndó ndiyamíjnaxu, niʼniuxu̱ tsiánguá dí kaʼníí kuwáanʼxu̱ xóó. Mijngii ikhí wíji̱ mbá helicóptero dí nixnáá ga̱jma̱a̱ mbaʼa xndú ajua̱nʼ, mú maʼga náa sierra Leona i̱mba̱ mbiʼi, ikha jngóo ninúʼxu mijngii ikhí mbruʼun rúʼko̱ mu mu̱ʼguáxu ga̱jma̱a̱ ikhaa. Índo̱ nijkuánuxu náa Sierra Leona nadxuxu dí nikáwáanʼxu mu nixmiéjunxu wéñuuʼ ga̱jma̱a̱ numún a̱ngiu̱lú bi̱ niguanún náa Liberia.

NIKHÁNUXU TSIAKI̱I̱ MU MURAʼNÍÍ I̱ʼWÁʼ XKUJNDU

Anne: Nijkuánuxu náa Betel ndrígóo Freetown, dí rígá náa Sierra Leona, ikhí a̱ngiu̱lú niñewu̱nxu májánʼ wéñuuʼ. Mú, mámbá mbiʼi niʼni marmáʼán a̱jkiu̱nʼ má xúʼko̱ xóó nixtáá ga̱jma̱a̱ xóo nimínúuʼ náa Liberia, dí naʼni mamiñúʼ má xúʼko̱ ga̱jma̱a̱ dí mbruʼun asndu naguʼwún ga̱jma̱a̱ naruñúún nagújxu̱u̱nʼ, dí asndu nánguá ejmúún gáyá jxu̱ʼ májánʼ. Mú, Paul ndayaruʼúún ga̱jma̱a̱ naʼtájkáan ga̱jma̱á nindxu̱ʼ, ma̱ngaa nuni̱xu̱ ajmúú ndrígóo Reino asndu índo̱ naʼni̱i̱ a̱jkiu̱nʼ. Niku̱mu̱ʼ dí na̱jkha̱ raʼni skágiu̱u̱nʼ ga̱jma̱a̱ dí ní xándoo manindxu̱ʼ má xúʼko̱ misionera.

Mu nditháan xámbumuxu dí nirígá xmáná rúʼko̱, numuu dí nindrígúxu a̱jma̱ revista. Mbá dí ikhaa nindxu̱u̱ ¡Despertad! Dí kaʼyoo 8 ñajunʼ gu̱nʼ junio tsiguʼ 1996. Náa na̱ʼkha̱ mbá artículo dí kayá edxu̱u̱ “Qué hacer ante los ataques de pánico”, ikhú nikro̱ʼo̱ʼ ndiéjunʼ xtáa ragíʼnuʼ. I̱mba̱ revista ninindxu̱u̱ La Atalaya dí kaʼyoo 15 ñajunʼ gu̱nʼ mayo tsiguʼ 1996, náa kayá mbá artículo dí kayá edxu̱u̱ “¿De dónde proviene su fuerza?”. Ikhí nigájnuu xtiʼkhuu ndrígóo mbáa wijphí bi̱ nithu mbóoʼ xpíjpiúu ga̱jma̱a̱ ni̱ʼkha̱ raʼthí dí xó má wijphí ma̱ndoo xóó maʼga̱ ga̱jma̱a̱ makuiʼtsu maski ajndu nithu mbóoʼ xpíjpiúu, dí ikháanʼlu ma̱ngaa ma̱ndoo xóó mumbáñún má xúʼko̱ eʼwíinʼ maski ajndu ikháanʼ ra̱ʼkhá tháán nimíníiʼlu. Ganitsu rígi̱ dí na̱ʼkha̱ náa Jeobá ni̱ʼkha̱nú mbiʼi dí kaʼyoo ga̱jma̱a̱ nixnúʼ tsiaki̱i̱ dí ndiyóoʼ (Mat. 24:45). I̱mba̱ dí nimbáyuʼ ma̱ngaa nindxu̱u̱ dí mbaʼyáʼ mba̱yo̱o̱ itháan ga̱jma̱a̱ numuu rígi̱ ga̱jma̱a̱ dí magújxi̱i̱ i̱ʼwáʼ artículo dí naʼthí ga̱jma̱a̱ numuu ikhaa náa mbá carpeta. Nda̱wa̱á nánguá nimíñúʼ wéñuuʼ ga̱jma̱a̱ numuu dí nigíʼnuʼ.

NIKHÁNUXU TSIAKI̱I̱ MU MUNI̱XU IMBO̱ʼ ÑAJUNʼ

Paul: Mámbá índo̱ najkuáaxu náa Liberia ra̱ʼkhá tháán nadxuxu, nindxu̱u̱ asndu xóo najkuáaxu náa guʼwúxu. Índo̱ ni̱jkha̱ raguámbáa tsiguʼ 2004, niʼni má 20 tsiguʼ dí kuwáanʼxu̱ rayambáá ikhí. Guerra niguámbá má, ikha jngóo nirígá awan dí magumaa Betel. Mú, mbá nacha̱ nixuʼnguáanʼxu muʼguáxu i̱mba̱ níʼkhá.

Ra̱ʼkhá tháán niʼniuxu gakhi̱i̱ numuu dí nimbájxuxu wéñuuʼ gajmiúxu a̱ngiu̱lú, nikumuxu dí xáʼnguxuʼ guniʼñúúnʼ. Mú ndi̱ya̱a̱xu̱ xú káʼnii Jeobá niʼni tsajkurámáaʼxu índo̱ niniʼñunxu familia ndrígúxu̱ mu mu̱ʼguáxu Galaad mu munixu itháan ñajuunʼ ikhaa. Ikha jngóo nidríguxu mu̱ʼguáxu i̱mba̱ níʼkhá mu makuwáanʼxu náa xuajen Ghana.

Anne: Nimbiyaʼxu wéñuuʼ índo̱ niniʼñááʼxu Liberia. Mú niʼniuxu tsiánguá dí niʼthí ndxájulú nikhi̱i̱ ga̱jma̱a̱ najmañuu bi̱ mbiʼyuu Frank, niʼthúxu: “Gíʼmaa mambumala kuyuxuʼ”, mú nda̱wa̱á niʼthí: “Ndu̱ya̱a̱xu má dí xámbumala kuyuxuʼ, mú ñajunʼ dí nakhánála na̱ʼkha̱ náa Jeobá, ikha jngóo gíʼmaa maʼndalá kuñu̱u̱n a̱ngiu̱lú bi̱ kúwá náa Ghana ga̱jma̱a̱ xúgíʼ a̱jkia̱la”. Ajngáa rígi̱ nixnúxu̱ wéñuuʼ tsiaki̱i̱ mu mu̱ʼguáxu náa mbá xuajen dí na̱nguá embájxuxu gajmiúxu nimbáa ni má na̱nguá eniʼniúxu.

Paul: Mú tájyúuʼ má ninduxuʼ kuñu̱u̱n a̱ngiu̱lú bi̱ kúwá náa Ghana. Kúwá mbaʼin wéñuuʼ Testigo náa xuajen rúʼko̱. Ra̱ʼkhá tháán mbaʼa dí nijmañuxuʼ náa ikhiin numuu dí naguájun jmbu ga̱jma̱a̱ dí naguaʼdáá mbá fe gújkhúʼ. Mú, nda̱wa̱á dí nikúwáanʼxu mbá 13 tsiguʼ náa Ghana, nithuxu mu̱ʼguáxu náa Kenia, náa Betel dí rígá náa África Oriental. Maski má ndiʼñíinʼxu wéñuuʼ a̱ngiu̱lú bi̱ kúwá náa Ghana ga̱jma̱a̱ náa Liberia, tájyúuʼ má nimbájxuxu gajmiúxu a̱ngiu̱lú bi̱ kúwá náa Kenia. Asndu rí mbiʼi xúgi̱ kúwáanʼxu gi̱i̱ náa mbaaʼ dí ndayóoʼ wéñuuʼ mixtiembáá.

DÍ NIJMAÑUXU NÁA MIXTIʼKHU ENII NÁA NIKÚWÁANʼXU

Anne: Náa xúgíʼ mbiʼi dí nixtáá, mbaʼa dí mingíjyúuʼ niraʼnuu ga̱jma̱a̱ dí ra̱ʼkhá tháán niʼnimíñuʼ. Índo̱ nakuwáánʼ náa mbá xuajen dí rígá gamíi ga̱jma̱a̱ índo̱ nuraʼníí xkujndu, gamíi maʼni dí maʼniulú nandii ga̱jma̱a̱ maxmiéjunlú. Ikhí tséguaʼthi̱i̱n dí Jeobá maʼni mbá milagro mu mañewu̱nlú. Rí mbiʼi xúgi̱, índo̱ nadxawuun najmídá ajua̱nʼ, nagíʼdu̱u̱ na̱ʼkhu̱ awúnʼ ga̱jma̱a̱ nakháñuu ñawúnʼ. Mú nijmañuʼ mambáyuminaʼ náa tsiaki̱i̱ ndrígóo Jeobá ga̱jma̱a̱ náa a̱ngiu̱lú xa̱bekha ga̱jma̱a̱ gu̱ʼu̱. Ma̱ngaa nijkuánuxu ndi̱ya̱a̱ dí á mu nunigajma̱a̱xu Biblia, na̱jkuáxu má xúʼko̱ reunión ga̱jma̱a̱ dí nutaráʼaxu, Jeobá nambáyúxu makuwáanʼxu má xúʼko̱ náa asignación ndrígúxu̱.

Paul: Nguáná tikhuun nurajxuxu: “Nanigualaʼ náa kuwáanʼ ruyambáá rá.” Ma̱ndoo maʼni mitsaanʼ, mú mbá nacha̱ ma̱ndoo maxtiʼkhu̱u̱ ga̱jma̱a̱ maʼni migamíi. Mú, dí itháan niniguxu nindxu̱ún a̱ngiu̱lú numuu dí nindxu̱ún asndu xóo familia ndrígúxu̱. Gajkhun má dí mixtiʼkhu xuajen náa eguwaʼlu ga̱jma̱a̱ xóo nigajáánʼ mu ikháá má nindxu̱u̱ xóo endxaʼwamíjna̱ ga̱jma̱a̱ numuu Jeobá. Niku̱mu̱xu dí ikháanʼxu̱ ni̱jkuáxu mu muxnu̱u̱n tsiaki̱i̱, mú ikhiin nixnuxu tsiaki̱i̱ ikháanʼxu̱.

Mámbá índo̱ na̱jkuáxu̱ náa i̱mba̱ níʼkhá xuajen, ndu̱ya̱a̱xu̱ dí a̱ngiu̱lú kúwá mbóo jnduʼ dí nindxu̱u̱ asndu xóo mbá milagro dí Jeobá naʼni. Índo̱ kuwáanʼ náa congregación, kuáʼdiin familia ndrígúlú asndu náá ga̱jma̱a̱ rígá náa ma̱ndoo maguanúlúʼ. Ndu̱ya̱a̱xu gajkhun dí á mu numbáʼyumíjnálu má xúʼko̱ náa Jeobá, ikhaa maxnúlú tsiaki̱i̱ dí gáʼyulúʼ (Filip. 4:13).