Jesús “nijmañuu ndiéjuunʼ eyoo gáʼthúu̱n rí matanimba̱a̱ʼ”

Jesús niʼni má xúʼko̱ dí naniguuʼ Jeobá (Juan 8:29). Mú, náá numuu dí náa Biblia naʼthí dí “nijmañuu ndiéjuunʼ eyoo gáʼthúu̱n rí matanimba̱a̱ʼ ga̱jma̱a̱ numuu xúgíʼ náa rí nimínuuʼ” xá. (Heb. 5:8.)

Índo̱ Jesús nixtáa náa tsu̱du̱u̱ Ku̱ba̱ʼ niraʼnuu mbaʼa gamiéjunʼ dí nda̱a̱ náa mekhuíí. Mbá xkri̱da, maski ajndu anu̱u̱ ga̱jma̱a̱ ru̱dúu̱ nindúún kuyáá Jeobá mú ninindxu̱ún xa̱bu̱ aʼkhá ga̱jma̱a̱ ikhaa ndiyóoʼ maʼnimbo̱o̱ kaʼñún (Luc. 2:51). Niʼngo̱o̱ índo̱ ndxajkun bi̱ kuya̱ edxu̱u̱ ga̱jma̱a̱ xa̱bu̱ ñajunʼ nini̱ ngínáa (Mat. 26:59; Mar. 15:15). Ma̱ngaa ra̱ʼkhá tháán nimínúuʼ índo̱ nixiyáa, náa Biblia naʼthí dí “niʼniguabaminaʼ ga̱jma̱a̱ niʼnimbo̱o̱ asndu índo̱ nikháñúu” (Filip. 2:8).

Xúgíʼ rígi̱ nimbáyúu Jesús mu majmañuu ndiéjuunʼ eyoo gáʼthúu̱n rí matanimba̱a̱ʼ, rígi̱ tájmañuu náa mekhuíí numuu dí ikhí táraʼnuu xkujndu xóo rígi̱. Xúʼko̱ ni̱jkha̱nú ninindxu̱u̱ Rey ga̱jma̱a̱ Ndxajkun bi̱ phú kayá edxu̱u̱, bi̱ nakro̱ʼo̱o̱ kaʼyulú (Heb. 4:15; 5:9). Jeobá ndiʼyoo dí ni̱jkha̱nú nigiʼdoo itháan numuu, numuu dí nijmañuu ndiéjuunʼ eyoo gáʼthúu̱n rí matanimba̱a̱ʼ ga̱jma̱a̱ numuu rí nimínuuʼ. Mangáanʼlu ma̱ndoo muguaʼdáá itháán numulú náa Jeobá ga̱jma̱a̱ ma̱ndoo muʼni itháan ñajuunʼ á mu nuʼnimbulú má xúʼko̱ kuʼyáá maski ajndu nuraʼníí gamiéjunʼ dí gakhi̱i̱ (Sant. 1:4).