Lá mbaʼyóoʼ maniʼñúuʼ rajkhá ka̱yo̱ʼ carro ráʼ.

Lá mangáánʼ naku̱ma̱a̱ʼ xó má xa̱bu̱ nikhi̱i̱ bugi̱ ráʼ. Á mu xúʼko̱, ndiéjunʼ gámbáyáaʼ mu matraʼwíí á mu mi̱dxu̱ʼ jcháa xóó carro o nánguá rá.

Náa tikhuu xuajin nundu̱ʼu̱u̱n xabuanii dí magún náa médico mu muthún á mu ma̱ndoo xóó magún kuñu̱u̱n carro nákha xóó tséri̱ya̱a̱ʼ i̱mba̱ nuxi̱ʼ licencia ndrígu̱ún. A̱ngiu̱lú bi̱ kúwá náa xuajin rúʼko̱, nunimbu̱ún dí naʼthí náa xtángoo ma̱ngaa dí nuthi xa̱bu̱ ñajunʼ (Rom. 13:1). Mú tséʼniuu má náá mínaaʼ xtaa. Rígá tikhuu ikha dí mambáyáaʼ ma̱ta̱ya̱a̱ á mu ma̱ndoo xóó mi̱dxu̱ʼ jcháa carro.

ATAYÁÁ Á MU MA̱NDOO XÓÓ MI̱DXU̱ʼ JCHÁA CARRO

Xa̱bu̱ ñajunʼ bi̱ numbañún xabuanii náa Estados Unidos, nuthi dí májánʼ dí munimíjna̱ grajxe̱ dí na̱ʼkha̱ gi̱i̱:

• Lá naʼniuʼ gakhi̱i̱ mba̱yo̱o̱ señal dí tri̱ga̱ náa kamba̱a̱ o naʼniuʼ gakhi̱i̱ mayejxi̱ dí krína ráʼ.

• Lá naʼniuʼ gakhi̱i̱ martuaʼán edxu̱ʼ mu mayejxi̱ náa niwanʼ mu mba̱yo̱o̱ á mu na̱ʼkha̱ carro kidxuʼ o nijniunʼ ráʼ.

• Lá naʼniuʼ gakhi̱i̱ maba̱a̱n nacha̱ rajkúʼ mu makujmbíi freno ráʼ.

• Lá mañuu ejkhá ka̱yo̱ʼ carro ga̱jma̱a̱ rígi̱ naʼni dí xándoo manújngún eʼwíinʼ ráʼ.

• Lá mbaʼa nuthu má egíʼ ma̱ni̱ choque ráʼ.

• Lá mbá miʼtsú nitsijñún mbáa policía mu maʼthúnʼ dí tsu̱ma̱á gáʼgá ka̱yo̱ʼ carro ráʼ.

• Lá naguanúʼ nagú náa volante índo̱ na̱jkhá ka̱yo̱ʼ carro ráʼ.

• Lá xtáá ra̱ga̱nʼ mbá thana dí naʼni dí ní xájmúún gáʼgá ka̱yo̱ʼ carro ráʼ.

• Lá naxmiéjúúnʼ bi̱ ka̱ñu̱u̱n o bi̱ nambájxu gajmíʼ dí na̱jkhá ka̱yo̱ʼ carro ráʼ.

Á mu nitriʼña̱a̱ dí xúʼko̱ mbóo o a̱jma̱ grajxe̱ dí na̱ʼkha̱ gi̱i̱, mbáa mbaʼyóoʼ ma̱ta̱ya̱a̱ ndiéjunʼ gátani̱, xóo dí ni xídxúʼ jcháa wéñuuʼ carro, itháan má dí mbruʼun. Ga̱jma̱a̱ índo̱ gídxúʼ jcháa carro, atayáá á mu najmáán xóó nadxuʼ jcháa májánʼ. Ma̱ndoo matrajxi̱i̱ ndiéjunʼ endxa̱ʼwáminaʼ mbáa bi̱ xtayáá o bi̱ nambájxa̱a̱ʼ ga̱jma̱a̱ʼ o ma̱ndoo matanigajma̱a̱ xóo mi̱dxu̱ʼ jcháa itháan májánʼ. Mú á mu natayáá dí rígá mbaʼa dí tséʼnga̱a̱ʼ gátani̱, mbáa itháan májánʼ dí matatsiʼñáánʼ ra̱dxu̱ʼ jcháa carro.a

XÚ KÁʼNII GÁMBÁYÁAʼ DÍ NA̱ʼKHA̱ NÁA BIBLIA RÁ.

Mbáa ni xándoo mi̱dxu̱ʼ jcháa carro xó má nákha ginii, ikha jngóo mbaʼyóoʼ matatsiʼñáánʼ. Gajkhun má dí mbáa rígi̱ maʼniaaʼ gakhi̱i̱. Mú guʼyáá a̱jma̱ ikha dí mambáyáaʼ matatsaʼwamínáʼ májánʼ ga̱jma̱a̱ matraʼwíí májánʼ dí matani̱.

Atayáá dí nánguá eʼnga̱a̱ʼ matani̱ (Prov. 11:2). Índo̱ naganiáálú, nánguá ekruigulú májánʼ, nánguá eʼdxawíín, nánguá mixkujñáánʼ ga̱jma̱a̱ nánguá eʼngulú gúʼni xúgíʼ mbá nacha̱. Mbaʼin xa̱bu̱ nuniñaaʼ rutsíin índo̱ naganii mu xúʼko̱ xákambiñu̱u̱nʼ. Ga̱jma̱a̱ xúʼko̱ má dí mi̱dxu̱ʼ jcháa carro ma̱ngaa, mbáa mi̱dxu̱ʼnú ma̱ta̱ya̱a̱ dí nánguá eʼnga̱a̱ʼ gídxúʼ jcháa xó má nákha ginii ga̱jma̱a̱ mbaʼyóoʼ matatsiʼñáánʼ ra̱dxu̱ʼ jcháa mu xúʼko̱ xákámbiyaaʼ (Prov. 22:3). Ga̱jma̱a̱ á mu xtáa mbáa bi̱ naʼtháanʼ dí naxmiéjuunʼ kaʼyaaʼ, itháan májánʼ dí mani̱ndxa̱a̱ʼ xa̱bu̱ wabaaʼ ga̱jma̱a̱ matadxawíín dí gáʼtháanʼ (atani̱ mbríguii ga̱jma̱a̱ 2 Samuel 21:​15-17).

Xátaxuʼdáminaʼ mbá aʼkhá (Deut. 22:8). Á mu tsetiewa̱a̱n xóo edxu̱ʼ jcháa carro, gamíi matani̱ kámbiñu̱u̱nʼ eʼwíinʼ. Mbáa xa̱bu̱ bi̱ na̱jkha̱ kayóo má xúʼko̱ carro maski ajndu nánguá ejmaa gáʼgá kayóo májánʼ, gamíi maxíyamínaʼ o maxíyáa i̱mba̱a̱ xa̱bu̱, á mu xúʼko̱ gáʼni makudaminaʼ aʼkhá numuu dí naxídíí eʼdi.

Á mu ikháán natraʼwíí dí ni xádxúʼ jcháa carro, xáku̱ma̱a̱ʼ dí nánguá xtaʼdáá numaaʼ o dí eʼwíinʼ xúyamajkuaaʼ. Jeobá nandoo kaʼyaaʼ numuu dí natani̱ i̱ndó dí naʼnga̱a̱ʼ, nindxa̱a̱ʼ xa̱bu̱ wabaaʼ, naxmiéjuanʼ xtañún eʼwíinʼ. Ga̱jma̱a̱ ikhaa nakudaminaʼ mambáyáaʼ ma̱ngaa maʼni̱i̱ a̱jkia̱a̱nʼ (Is. 46:4). Jeobá nditháan xániñati̱ga̱a̱nʼ. Ma̱ndoo maratakáñíí mu maxnáa ku̱ma̱ ga̱jma̱a̱ ikha náa Ajngá rawuunʼ dí mambáyáaʼ matraʼwíí májánʼ dí matani̱.