‹Gákuwáánʼlú mbá kambájxulú má xúʼko̱, xó má espíritu niruwáanʼlú›

Pablo niʼthí dí kuwáanʼlú tsímáá ga̱jma̱a̱ numuu espíritu, xóo muʼthá ga̱jma̱a̱ numuu tsiaki̱i̱ ndrígóo Dios. Mú Pablo ma̱ngaa niʼthí dí gíʼmaa makuwáanʼlu mbá kambájxulú má xúʼko̱, ikha jngóo mámbáa cristiano gíʼmaa maʼni tsiakimínáʼ mú maxtáa mbáa kambájxu̱u̱ gajmíi̱n eʼwíinʼ xó má espíritu niruwáanʼlú.

Guʼgíʼ mbá xkri̱da, atatsaʼwáminaʼ dí mbáa xa̱bu̱ nimíniiʼ mbá xtíin, tsáá kaʼyoʼ mañewu̱u̱n rá. Na̱nguá xó matani̱ tsu̱di̱i̱ xa̱bu̱ bi̱ nixnáa xtíin rúʼko̱ á mu dí nithu numuu dí tátiewa̱a̱n.

Ikhaa má kayuuʼ, dí makuwáanʼlu mbá kambájxulú nindxu̱u̱ mbá dí nimínáanʼlu Dios, mú mambáa dí ikháanʼ kaʼyoo mañewu̱u̱n, ikha jngóo á mu tsémbájxulú májánʼ gajmiúlú mbáa ndxájulú. Guraximíjna̱: “Lá na̱ni̱ tsiakimínáʼ mu marigá dí tsímáá ga̱jma̱a̱ makuwáanʼ mbá kambájxulú náa congregación ráʼ.”

“GUNIMÍJNA DÍ MAKUWÁANʼLA MBÁ KAMBÁJXALA MÁ XÚʼKO̱”

Xó ma ndiʼyáá, Pablo niʼthí dí nguáná mbaʼyóoʼ mu̱ʼni̱ tsiakimíjna̱ mu makuwáanʼ mbá kambájxulú, xó má espíritu niruwáanʼ. Itháán má índo̱ mbáa bi̱ xtáa náa congregación naʼni gawúnlú, nandulúʼ makuwáanʼ má xúʼko̱ mbá nduʼ. Mú, lá mbaʼyóoʼ tsiaki̱i̱ muʼgua gúʼyáá bi̱ niʼni gawúnlú mú mutamijná gájmulúʼ ráʼ. Na̱nguá. Májánʼ gáʼni dí muraximíjna̱lú: “Á mu na̱jkhá gátamíjná gajmuʼ, lá maʼni dí majxooʼ xkujndu o maʼni itháan mba̱a̱ dxe̱ʼ”. Nguáná itháan ma májánʼ dí mambumulú dí nirígá o mu̱ʼni̱ mba̱a̱ a̱jkiu̱lú kuʼyáá bi̱ niʼni gawúnlú (Prov. 19:11; Mar. 11:25).

Pablo niʼthí: “Gusngajmá dí nandala kuyamíjna̱” (Efes. 4:2). Náa mbóoʼ libro naʼthí dí mbáa rígi̱ nandoo gáʼthúu̱n dí “maʼndaaʼ xtañún eʼwíinʼ xó má kaʼniún” (Comentario para exégesis y traducción. Carta a los Efesios, Mariano Ávila Arteaga). Rígi̱ nandoo gáʼthúu̱n dí gíʼmaa maʼndulú kuʼñúún a̱ngiu̱lú maski ajndu nindxu̱ún xa̱bu̱ aʼkhá xó má ikháanʼ. Gajkhun má dí xúgiáanʼ nuʼnimíjna muriʼkumijná xóo nindxu̱lú (Efes. 4:​23, 24) Mú nimbáa tséʼngo̱o̱ gáʼga̱nú mani̱ndxu̱u̱ xa̱bu̱ jmbii (Rom. 3:23). Á mu nakru̱ʼu̱lú rígi̱, xáʼniulú gakhi̱i̱ maʼngo̱o̱ a̱jkiu̱lú kuʼñúún eʼwíinʼ ga̱jma̱a̱ mu̱ʼni̱ mba̱a̱ a̱jkiu̱lú kuʼñúún. Rígi̱ gáʼni dí makuwáánʼlú mbá kambájxulú má xúʼko̱, xó má espíritu niruwáanʼlu.

Mambá índo̱ nu̱ʼni̱ mbáníí mbá xkujndu, maski ajndu i̱ndó náa a̱jkiu̱lú, ma̱ndoo makuwáanʼ ma xúʼko̱ tsímáá. Náa ajngáa griego dí najuiʼtájuíi xóo “kuwáanʼla tsímáá” dí naʼthí náa Efesios 4:3. Ma̱ngaa nandoo gáʼthí ga̱jma̱a̱ numuu, níjtú dí kajua̱a̱ ga̱jma̱a̱ itsu̱, xúʼko̱ má tsímáá ga̱jma̱a̱ rí nandulúʼ kuʼñúún a̱ngiu̱lú nambáyulú mu makuwáanʼ mbóó nduʼ gajmiúlú ikhiin maski ajndu nguáná tsénigulú dí nuni̱.

Ikha jngóo índo̱ mbáa ndxájulú gaʼniulúʼ dí raʼkhí, índo̱ gáʼni makiʼnáanʼ o maʼni dí makásngañulú. Gúʼni tsiakimíjna̱ makru̱ʼu̱lú kuʼyáá, raʼkháa i̱ndó mbuʼyáaʼ dí raʼkhí rí naʼni (Col. 3:12). Numuu dí xúgiáanʼ nindxu̱lú xa̱bu̱ aʼkhá, mbáa nijkhánú mbá mbiʼi dí mangáanʼ niʼni gawíínʼ mbáa ndxájulú. Á mú narmáʼáan a̱jkiu̱lú rígi̱, mambáyulú mu mu̱ʼni̱ dí makuwáanʼ mbá kambájxulú má xúʼko̱ xó má espíritu niruwáanʼlú.