Tsáa nindxu̱u̱ bi̱ nigíʼ religión ndrígu̱ún bi̱ nutaraʼa numuu Jeobá rá.

Historia ndrígu̱ún bi̱ nutaraʼa numuu Jeobá rí mbiʼi xúgi̱ nigi̱ʼdu̱u̱ asndu nákha siglo 19. Nákha tsiguʼ rúʼko̱, mbá nguéjmi̱i̱n bi̱ nunigajmaa Biblia náa Pittsburgh (Pensilvania, Estados Unidos) nigi̱ʼdi̱i̱ ninigajmaa kuduun Biblia. Rí ninigajmaa ndiyáá á mu nambánii rí nusngáa náa religión ga̱jma̱a̱ rí phú naʼsngáa náa Biblia. Nda̱wa̱á nithúún eʼwíínʼ rí nijmañún. Nini libros, niniraʼmáʼ náa periódicos ga̱jma̱a̱ nini revista rí xúgi̱ najmaʼnuʼ xóo Bi̱ Nayejngoo. Naʼtáraʼa numuu Reino ndrígóo Jeobá.

Mbáa rí ikhiin nigumbiʼyuu Charles Taze Russell. Maski asndu ikhaa niʼnirámáʼ timbá revista Bi̱ Nayejngoo ga̱jma̱a̱ niyéjkha̱ edxu̱u̱ náa najuiʼsngáa numuu Biblia nákha ikhú, mú rúʼko̱ tsíyoo gáʼthi rí ikhaa nigíʼ mbá nuxi̱ʼ religión. Rí phú nindoo Russell gajmíi̱n eʼwíínʼ bi̱ Nunigajmaa Biblia (xóo nigumbiʼñún), rí musngáa kiʼsngáa ndrígóo Jesús ga̱jma̱a̱ munimbánii ikha rí nixná timbá congregación nákha siglo timbá. Jesús ninindxu̱u̱ bi̱ Nigíʼ congregación cristiana, ikha jngó nakru̱ʼu̱xu rí ikhaa má nigíʼ congregación asndu mbiʼi xúgi̱ (Colosenses 1:18-20).