Consejo rí mambáyaaʼ mu maraxtaa tsímáá gajmiáanʼ eʼwíinʼ

Atani mba̱a̱ a̱jkia̱a̱nʼ

“Gaʼngo̱o̱ a̱jkia̱la ga̱jma̱a̱ guni mba̱a̱ a̱jkia̱la kuyamíjna̱ má xúʼko̱, maski ajndu mbáa gíʼdoo mbá numuu rí maxiéʼka ga̱jma̱a̱ numuu i̱mba̱a̱” (COLOSENSES 3:13).

Nguáná nuni gawúnlú eʼwíinʼ o ikháanʼlu nuʼni gawúunʼ ikhiin, nuʼni rígi̱ numuu rí xúgiáanʼ nanga̱wánlú. Ikha jngóo xúgiáanʼ ndayúlú dí muni mba̱a̱ a̱jkiu̱ún kuyulú o ikháanʼ muʼni̱i̱ mba̱a̱ a̱jkiu̱lú kuʼñúún. Índo̱ nuʼni mba̱a̱ a̱jkiu̱lú kuʼñúún, nánguá eʼyáá ga̱jma̱a̱ sia̱nʼ xa̱bu̱ buʼko̱ bi̱ niʼni gawúnlú. Tsegutangán muʼniu̱u̱n dí raʼkhí ma̱ngaa tseʼtháánlu xa̱bu̱ náa dí nijngawa̱a̱n (Romanos 12:17). Á mu dí niʼniulúʼ nindxu̱u̱ mba̱a̱ dí asndu rakáʼnii muʼni̱i̱ mba̱a̱ a̱jkiu̱lú kuʼyáá xá. Á mu xúʼko̱, májánʼ gáʼni dí mutamijná gajmiúlú mbawíí ikhaa, mu guʼni ga̱jma̱a̱ gamajkhu. Rí phú nandulú dí marigáa tsímáá, raʼkháa dí mugiʼdulú má xúʼko̱ gajmiúlú (Romanos 12:18).

Ganindxa̱a̱ʼ xa̱bu̱ guabaaʼ ga̱jma̱a̱ gamajkhuii

“Gundxa̱ʼwa̱míjna̱ rí eʼwíinʼ guáʼdáá itháan numún ki xóo ikháanʼ” (FILIPENSES 2:3).

Xa̱bu̱ manigu̱u̱nʼ makuwá ga̱jma̱á ni̱ndxu̱lú á mu ni̱ndxu̱lú xa̱bu̱ guabaaʼ ga̱jma̱a̱ gamajkhuii. Numuu rí ikhiin nduyáá rí ni̱ndxu̱lú xa̱bu̱ májáanʼ ma̱ngaa rí xuʼnigawúún kiejuunʼ. Á mu nakumulú rí ikháanʼ phú kuaʼdáá numulú ki xóo eʼwíinʼ o rí phú nuʼthá ikháanʼ gambánuu, i̱ndó dí marigá nindxu̱u̱ xkujndu. Xa̱bu̱ xáʼndúún gúyulú ma̱ngaa nimbáa xáʼndoo mambájxu̱u̱ ga̱jma̱á ni̱ndxu̱lú.

Xátraʼwíin xa̱bu̱

“Dios tséraʼwíin xa̱bu̱, ikhaa nagruiguíin xúgíinʼ bi̱ namíñúún kuyáá, bi̱ nuni̱ rí májánʼ, tséʼniuu má náá xuajin eguwáʼ” (HECHOS 10:34, 35).

Bi̱ niʼniáanʼlu raʼkháa káaʼ nguáthi̱i̱n xa̱bu̱ eyoo kaʼñún ki xóo eʼwíin bi̱ naguwáʼ náa imbo̱o̱ xuajen, bi̱ nuthi imbo̱o̱ ajngáa, ñajunʼ rí guaʼdáá o color ndrígu̱ún. “Niʼnii mbáwíi xa̱bu̱ rí maruiʼti̱i̱n mbá xúgínʼ xa̱bu̱” (Hechos 17:26). Rígi̱ nandoo gaʼthí rí xúgiáanʼ ni̱ndxu̱lú mbóó eʼdi. Índo̱ nuʼniu̱lú xóo má kaʼyoo xúgíinʼ xa̱bu̱ ga̱jma̱a̱ májáanʼ a̱jkiu̱lú, nakúwi̱i̱n gagi ga̱jma̱a̱ mangáánʼ nakuwáánʼ gagi ma̱ngaa bi̱ niʼniáanlu naxtáa gagi.

Xakiʼnán nacha̱

Gagáwiinʼ a̱jkia̱la (COLOSENSES 3:12).

Índo̱ nagáwiinʼ a̱jkiu̱lú ma̱ngaa tsekiʼnáán mbá nacha̱, eʼwíinʼ asndu maʼdxúún makuwíin ga̱jma̱á ni̱ndxu̱lú ma̱ngaa muthulú asndu ndiéjúúnʼ má o asndu ma̱ndoo muxpri̱gu̱lú numuu rí nduyáá dí xakiʼnán. Á mu mbáa nakiʼnáa kaʼyulú, ikháanʼ guriʼñáán ga̱jma̱a̱ májánʼ, rúʼko̱ gaʼniuu dí xa̱bu̱ buʼko̱ nánguá makiʼnáa. Proverbios 15:1 naʼthí: “Índo̱ naxtiʼña̱a̱ májánʼ naʼni rí xákiʼníin, mú ajngáa rí naʼni gawúunʼ naʼni majmangunʼ”.

Araxná rí xtaʼdáá ga̱jma̱a̱ araxnáa̱ núma̱aʼ

“Rígá itháan gagi dí maraxna̱ ki xóo dí makánaa’” (HECHOS 20:35).

Mbaʼin xa̱bu̱ i̱ndó nindxaʼwamíjna̱ ga̱jma̱a̱ numún ikhiin ma̱ngaa rí maguaʼdáá itháán. Á mu ni̱ndxu̱lú xa̱bu̱ májáanʼ makuwáánʼ gagi (Lucas 6:38). Bi̱ májánʼ a̱jkiu̱ún nakúwá itháán gagi numuu rí nandún kuñún itháán xa̱bu̱ ki xóo i̱ʼwáʼ ga̱jma̱a̱ rúʼko̱ naʼni dí muxna̱a̱ núma̱aʼ, nusngajmá rúʼko̱ índo̱ nuxnún eʼwíinʼ rí kuaʼdáá (Colosenses 3:15). Atrajximínaʼ: Tsáá enigúʼ maxtáá gajmuʼ rá. Bi̱ najmidúu, bi̱ tsexnáa núma̱aʼ o mbáa xa̱bu̱ bi̱ májánʼ a̱jkiu̱u̱n ga̱jma̱a̱ naxnáa núma̱aʼ dxe̱ʼ. Rí phú nandulú, rí ganindxu̱lú xóo má enigulúʼ rí mani̱ndxu̱ún eʼwíinʼ (Mateo 7:12).