Dí naʼsngúlú bi̱ Niʼniáanʼ naʼni̱i̱ a̱jkiu̱lú

Dios maʼnigámbíin xa̱bu̱ xkawiinʼ

“Índo̱ xa̱bu̱ xkawiinʼ kúwá rakríʼíin xóo iná, ga̱jma̱a̱ xúgínʼ bi̱ kúwá runi dí ra̱májánʼ ni̱ndxu̱ún asndu xóo ri̱ʼi̱ rí na̱jmi̱di̱, mu maguma gámbíin kámuu mbiʼi” (SALMO 92:7).

Xó má ndiʼyáá náa artículo dí ninújngoo, dí náa numbaaʼ mambá mbiʼi naʼni itháán gakhii. Mú ikháanʼ ragíʼmaa maʼniulú tsiánguá rígi̱, numuu rí náa Biblia má niʼtáriyaʼ dí na̱ʼkha̱ náa 2 Timoteo 3:1-5 rí xa̱bu̱ mani̱ndxu̱ún xkawi̱i̱nʼ wéñuʼ náa “iwáá mbiʼi” rígi̱. Ndiéjunʼ gámbáa rá. Ikhiin ni̱ndxu̱ún xa̱bu̱ bi̱ tséyamajkuíí Dios. Dios maʼni gámbíin bi̱ tsíñún gúniña̱a̱ʼ dí kúwá runi. Ikhú, i̱ndó makuwi̱i̱n xa̱bu̱ bi̱ nandún munimbu̱u̱n kuyáá Dios. Xóo má naʼthí náa Salmo 37:29: “Xa̱bu̱ bi̱ nuni rí májánʼ mundrigúu ku̱ba̱ʼ ga̱jma̱a̱ makuwá kámuu mbiʼi ikhí”.

Dios maʼni gámbáa Gixa̱a̱

“Dios bi̱ naxná rí tsímáá inu má makujmbiriga̱a̱ Gixa̱a̱” (ROMANOS 16:20).

Índo̱ Gixa̱a̱ gajmíi̱nʼ xa̱bu̱ wéñiʼ ma̱ngaa xa̱bu̱ bi̱ nuni dí xkawiʼ mambíin, ikhú marigá rí tsímáá náa tsu̱du̱u̱ ku̱ba̱ʼ. Bi̱ Niʼniáanlu nakudaminaʼ rí “nimbáa ni xáʼni míñulú” (Miqueas 4:4).

Dios maʼni gámbáa nandii ga̱jma̱a̱ rí nakháñulú

“Guʼwá xtíin ndrígóo Dios rígá náa xa̱bu̱ numbaaʼ [...]. Makudi̱i̱ xúgíʼ iyaʼ idún, ni xákháñún itháan, ni xárígá itháan tsingíná ni má xtambiyaʼ ni má ga̱ʼkhu̱” (APOCALIPSIS 21:3, 4).

Dios maʼni májáanʼ xúgíʼ dí niʼni Gixa̱a̱, Adán, Eva ga̱jma̱a̱ rí ni̱ʼni̱ ikháanlú. Ikha jngóo nánguá marigá tsingíná, nandii ga̱jma̱a̱ rí asndu “ni xákháñún itháan”. Xa̱bu̱ bi̱ nandún kuyáá Dios ma̱ngaa bi̱ nunimbu̱ún kuyáá, makuwá kámuu mbiʼi. Náá mina̱a̱ʼ gákuwá xá.

Bi̱ Niʼniáanlú maʼni̱i̱ mbá ku̱ba̱ʼ mitsaanʼ

“Náa ku̱ba̱ʼ mixooʼ ga̱jma̱a̱ náa mbaaʼ rí nijndooʼ marigá rí gagi, ga̱jma̱a̱ náa xkua̱ rí nijndooʼ marigá rí tsímáá ga̱jma̱a̱ majmi̱di̱ wéñuʼ ri̱ʼi̱ azafrán” (ISAÍAS 35:1).

Índo̱ Dios gáʼni gámbóo dí raʼkhí, ikhú ku̱ba̱ʼ maʼni̱i̱ mitsaanʼ. Marigá náa midxuʼ xóo náa parque, náa rígá wéñuʼ ri̱ʼi̱ ga̱jma̱a̱ náa ku̱ba̱ʼ majmaa wéñuʼ ganitsu (Salmo 72:16). Lamáa, laguna ga̱jma̱a̱ mañu maʼni̱i̱ kaʼwu ma̱ngaa makuwi̱i̱n wéñuʼ bi̱ nduya. Nánguá maguma gachíí ku̱ba̱ʼ, ga̱jma̱a̱ asndu nánguá majmulú ajngáa rúʼko̱. Xa̱bu̱ muni guʼwá ga̱jma̱a̱ ikhiin má gakúwi̱i̱n. Nimbáa xáʼni gínáa, xáʼni ewiʼ o xóo dí maxtáa náa calle (Isaías 65:21, 22).

Dios maʼnigabiín bi̱ nikháñún

“Magabiín xa̱bu̱” (HECHOS 24:15).

Lá nandaaʼ matañu̱u̱n mbu̱júu̱ familia ndrígáaʼ ma̱ngaa mígiaa bi̱ nikháñún ráʼ. Índo̱ gáʼni ku̱ba̱ʼ mitsaanʼ, Dios bi̱ gíʼdoo Xúgíʼ tsiakii makujxi̱ín, xa̱bu̱ xóo muʼthá makuwá mbu̱júu̱. ¡Ra̱ʼkhá tháán gáraxtaa gagi índo̱ gataxkamiín ga̱jma̱a̱ muniʼnííʼ mbu̱júu̱! Náa Biblia naʼthí rí nákha wajyúuʼ Dios nikujxi̱ín tikhuun e̱ji̱n ma̱ngaa xabuanii ga̱jma̱a̱ nikúwá mbu̱júu̱ gajmiún familia ndrígu̱ún. Ga̱jma̱a̱ Jesucristo nikujxi̱ín tikhuun, náa inún mbaʼin xa̱bu̱ (Lucas 8:49-56; Juan 11:11-14, 38-44).