Ndíjkha dí xa̱bu̱ nánguá eyamajkhún eʼwíinʼ rá.

NDÍJKHA DÍ GÍʼDOO NUMUU RÍ MBUʼYAMAJKÚN EʼWÍINʼ

Índo̱ nduʼyamajkhún eʼwíinʼ naʼni rí xárígá itháán xkujndu.

Náa mbá proverbio rí na̱ʼkha̱ náa Biblia naʼthí: “Índo̱ naxtiʼña̱a̱ májánʼ naʼni rí xákiʼníin, mú ajngáa rí naʼni gawúunʼ naʼni majmangunʼ” (Proverbios 15:1). Índo̱ tséʼthún ga̱jma̱a̱ ajngáa gamajkuu eʼwíinʼ o tséʼyamajkhún, naʼni dí marigá itháán xkujndu ga̱jma̱a̱ rígi̱ naʼni dí xákuwáanʼ májánʼ.
Jesús niʼthí: “Dí gíwánʼ náa a̱jkiu̱u̱n xa̱bu̱, rúʼko̱ má eʼthí” (Mateo 12:34). Índo̱ tséʼthún ga̱jma̱a̱ gamajkhu eʼwíinʼ mbáa nindxu̱u̱ ga̱jma̱a̱ numuu dí rígá mbá dí tsénigulú náa ikhiin. O mbáa kuwáanʼ rusngajmá xóo phú kumulúʼ ga̱jma̱a̱ numún xa̱bu̱ bi̱ nindxu̱ún mixtiʼkuiin, bi̱ mbá nuthu xóo niga̱ji̱i̱n o bi̱ i̱mba̱ ni̱ʼkhá xuajñún. Mú ikháanʼ gíʼmaa muriʼkui̱i̱ xóo eʼni ga̱jma̱a̱ xóo endxaʼwamíjna̱.

Náa mbá encuesta dí niguma xíjkhoo, itháán rí 32,000 xa̱bu̱ nixtajxu̱u̱n náa mbá 28 xuajin mba̱ʼu̱, bi̱ mbáa 65% bi̱ nixtajxu̱u̱n nithi dí mbiʼi xúgi̱ mbaʼin nánguá eyamajkún eʼwíinʼ ga̱jma̱a̱ dí nákhá niʼníí na̱nguá erígá wéñuuʼ xígi̱.

RÍ MA̱NDOO MATANI̱ IKHÁÁN

Tséʼniuu má tsáá xtaa rarátaminaʼ ga̱jma̱a̱ʼ, ganindxa̱a̱ʼ gamajkuiin asndu náa xa̱bu̱ bi̱ na̱nguá endxaʼwamínáʼ xó ma ikháán. Atayáʼ rí nambríguíin xóo etatsaʼwáminaʼ gajmiáanʼ eʼwíinʼ, rígi̱ gámbáyáaʼ mu xárata dí raʼkhí ga̱jma̱a̱ numún.

“Xútha rí guáʼdáá aʼkhúún a̱ngia̱la, mu Dios xáʼthí rí kuaʼdáá aʼkhála mangáanʼ” (Mateo 7:1).

Ataniu̱u̱n eʼwíinʼ xúgíʼ rí nandaaʼ muniaʼ ikháán. Á mu ikháán nataniu̱u̱n rí májánʼ eʼwíinʼ ga̱jma̱a̱ natayamajkún, mbá xúʼko̱ má gúniáanʼ mangiin.

“Ma̱ngaa guniu̱u̱la eʼwíinʼ xúgíʼ rí nandala muniala ikháanʼ” (Lucas 6:31).

Araxtaa xawii matani mba̱a̱ a̱jkia̱a̱nʼ. Á mu mbáa naʼniaaʼ dí raʼkhí o naʼni gawáanʼ, xakiʼnán.

“Xa̱bu̱ bi̱ nakro̱ʼo̱o̱ tsíkiʼnáa nacha̱, ga̱jma̱a̱ ra̱ʼkhá tháán májánʼ nindxu̱u̱ rí manújngorámuʼ mbá dí raʼkhí nini̱i̱” (Proverbios 19:11).

Náa mbá Salón del Reino ndrígu̱ún testigos de Jeobá, mbaʼin xa̱bu̱ bi̱ mixtiʼkhu tsigúúnʼ, mixtiʼkhu náa eguwáʼ, nurajximíjna̱ ga̱jma̱a̱ gamajkhu ma̱ngaa nutamijná nákhá xóó tségi̱ʼdu̱u̱ reunión.

DÍ NUNI̱ TESTIGOS DE JEOBÁ

Bi̱ ni̱ndxu̱xu̱ʼ testigos de Jeobá tséʼniuu má asndu náá kúwáanʼxu o náa nuñajunʼ, nduʼyamajkhún xúgíinʼ xa̱bu̱ ga̱jma̱a̱ numbañún eʼwíinʼ mu xúʼko̱ ma gúni̱ mangiin.

Nusngúúnxu xúgíinʼ enii xa̱bu̱ ga̱jma̱a̱ numuu Biblia ga̱jma̱a̱ tsírumiin, xúʼko̱ má tsétsudaaʼ nimbáa mandxaʼwáminaʼ xó má endxaʼwamíjna̱xu ikháanʼ, ni má tsetsudiin munimbu̱ún rí ikháanʼ nunimbuxu. Dí phú nuʼni nindxu̱u̱ rí nuʼnimbáníí consejo dí na̱ʼkha̱ náa Biblia rí muʼthá dí najmañulú ‹ga̱jma̱a̱ gamajkhu, ma̱ngaa xákiʼnáanʼlu› (1 Pedro 3:15; 2 Timoteo 2:24).

Tséraʼwíin xa̱bu̱. Náa reunión dí naguáʼdáá nundríguíi asndu tsáá xa̱bíi̱ bi̱ nandoo majmañuu dí naʼsngáa náa Biblia, tséʼniuu ma nixtáa nákhá ginii. Nunimi̱jna̱ makru̱ʼu̱xu̱ kuñúún ga̱jma̱a̱ “nduʼyamajkhún xó má kaʼyoo mbá xúgíinʼ” (1 Pedro 2:17, Nueva Versión Internacional).

Nduʼyamajkuíí xa̱bu̱ ñajunʼ bi̱ xtáa náa xuajin rí kúwáanʼ (Romanos 13:1). Nunimbuxuʼ xtángoo ga̱jma̱a̱ nuʼni numáá mbújkha̱a̱ náa inún xa̱bu̱ ñajunʼ. Ga̱jma̱a̱ maski asndu ikháanʼxu̱ tséxuʼdamijná náa política, mú nduʼyamajkuíí rí mámbáa xa̱bu̱ kaʼyoo maraʼwíí tsáá xa̱bu̱ ñajunʼ gámbáyúu.