Dios nagi̱ʼdu̱u̱ naʼni xúgíʼ

XÚGÍʼ rí májánʼ ni̱ʼkha̱ náa Dios. Ikhaa niʼnii A̱jkha̱ʼ mu ma̱ndoo maxnulúʼ aguʼ rí mbiʼi, Gu̱nʼ ga̱jma̱a̱ a̱ʼgua̱a̱n mu maxnulúʼ aguʼ rí mbruʼun. Ga̱jma̱a̱ Ku̱ba̱ʼ mu makuwáanʼ ikhí.

Mú Dios taʼni ginii A̱jkha̱ʼ, Gu̱nʼ, a̱ʼgua̱a̱n ga̱jma̱a̱ Ku̱ba̱ʼ. Lá natayáá ndiéjunʼ niʼni ginii xáʼ. Niʼnii xa̱bu̱ xóo má ikhaa. Xa̱bu̱ bugi̱ na̱nguá xóo mbuʼñún, xóo má Dios rí na̱nguá kaʼnii mbuʼyáá. Náa Biblia naxná mbiʼñún ángeles xa̱bu̱ bugi̱. Dios niʼnii ángeles mu makuwá mekhuíí gajmíi̱n ikhaa.

Timbáa ángel bi̱ Dios niʼnii ninindxu̱u̱ phú kiejunʼ. Ikhaa ninindxu̱u̱ timbáa A̱ʼdióo Dios, ma̱ngaa niñajunʼ ga̱jma̱a̱ Anu̱u̱. Nigugoo Dios maʼni xúgíʼ eʼwááʼ dí rígá. Nigugoo niʼni A̱jkha̱ʼ, Gu̱nʼ, a̱ʼgua̱a̱n ga̱jma̱a̱ Ku̱ba̱ʼ ndrígulúʼ.

Xú káʼnii ninindxu̱u̱ Ku̱ba̱ʼ ikhú rá. Nákha ginii nimbáa na̱nguá xú káʼnii maxtáa náa Ku̱ba̱ʼ. I̱ndó iyaʼ kriga xúgíʼ. Mú Dios nindoo rí náa Ku̱ba̱ʼ makuwíin xa̱bu̱. Ikha jngó, nigi̱ʼdu̱u̱ niʼni mújúnʼ mu makuwáanʼ ikháanʼ. Ndiéjunʼ niʼni xá.

Ginii ndiyóoʼ rí mambiʼi náa Ku̱ba̱ʼ. Ikha jngó Dios niʼni rí agiuʼ A̱jkha̱ʼ mambiʼi náa tsu̱du̱u̱ Ku̱ba̱ʼ. Niʼni rígi̱ mu ma̱ndoo marigá mbruʼun ga̱jma̱a̱ mbiʼi. Nda̱wa̱á niʼni rí iyaʼ maguanúu náa agoo Ku̱ba̱ʼ.

Ginii nda̱a̱ kayuʼ náa tsu̱du̱u̱ ku̱ba̱ʼ. Ikha kayuʼ xóo má kujmaa náa kiʼniriyaʼ rígi̱. Nda̱a̱ ri̱ʼi̱, ixi̱, xúʼko̱ má nda̱wi̱i̱n xujkhúʼ. Nda̱wi̱i̱n e̱gi̱ʼ náa iyaʼ. Ra̱ʼkhá tháán nigiʼdoo ñajunʼ Dios mu xujkhúʼ ga̱jma̱a̱ xa̱bu̱ ma̱ndoo makuwíin májánʼ náa tsu̱du̱u̱ Ku̱ba̱ʼ.