Nagi̱’du̱u̱ naguma numbaa’ asndu índo̱ naxnúu Ruʼwambii’

Náa minaʼ ni̱ʼkha̱ mekhu ga̱jma̱a̱ Ku̱ba̱ʼ rá. Xú káʼnii nigumaa A̱jkha̱ʼ, Gu̱nʼ ga̱jma̱a̱ a̱ʼgua̱a̱n, xúʼko̱ má xúgíʼ dí rígá náa tsu̱du̱u̱ Ku̱ba̱ʼ rá. Náa Biblia nariʼña̱a̱ gajkhun índo̱ naʼthí rí mínaʼ má Dios niʼni xúgíʼ. Ikha jngó náa i̱yu̱lúʼ nagi̱ʼdu̱u̱ rí naʼthí náa Biblia dí nirígá nákha wajyúúʼ rí xú niguma xúgíʼ.

Najmañulúʼ rí nákha ginii Dios niʼnii mbaʼin xa̱bu̱, ninindxu̱ún espíritu xóo má ikhaa kayuʼ niʼnii. Ninindxu̱ún ángeles. Mú Ku̱ba̱ʼ niguma mu makuwíin xa̱bu̱ xóo má ikháanʼ. Ikha jngó Dios niʼni xa̱biya̱ ga̱jma̱a̱ a̱ʼgu̱ nigumbiʼñún Adán ga̱jma̱a̱ Eva, ma̱ngaa nixnúún makuwá náa awúu̱n ixi̱ ri̱ʼi̱ mitsaan. Mú ikhiin túnimbu̱ún rí niʼthí Dios ma̱ngoo nindáti̱guun rí kaʼñúún makuwá.

Rí mbá xúgíʼ, asndu nákha nigi̱ʼdu̱u̱ nigumaa Adán asndu índo̱ nirígá Ruʼwambiiʼ ninújngoo mbá 1,656 tsiguʼ. Rí ni̱jkha̱ ranújngoo nikuwa xa̱bu̱ xkawiinʼ. Mekhuíí nikúwi̱i̱n xa̱bu̱ espíritu bi̱ tsékujmiin, Satanás gajmíi̱n ángeles bi̱ mixkawiinʼ. Náa tsu̱du̱u̱ Ku̱ba̱ʼ, nixtáa Caín gajmíi̱n eʼwíínʼ xa̱bu̱ xkawiinʼ, xúʼko̱ má ma̱ngaa xa̱bu̱ bi̱ ra̱ʼkhá tháán guáʼdáá wéñuʼ tsiakii bi̱ mixtiʼkhu kúwi̱i̱n ki xóo eʼwíínʼ. Mú nikuwa mangiin xa̱bu̱ míjínʼ náa tsu̱du̱u̱ Ku̱ba̱ʼ... Abel, Enoc ga̱jma̱a̱ Noé. NÍʼKHÓO rígi̱, Tsinaʼ 1 muraxnuu ga̱jma̱a̱ numún xa̱bu̱ bugi̱ ga̱jma̱a̱ dí nirígá.