Nagi̱ʼdu̱u̱ nakuwa mingíjyúu wéñuʼ

ÍNDO̱ nánguá kuwa náa awúu̱n ixi̱ ri̱ʼi̱ náa Edén, Adán ga̱jma̱a̱ Eva niguáʼdáá wéñuʼ xkujndu. Ndiyóoʼ rí muñajunʼ gakhi̱i̱ mu muphiʼtsu. I̱ndó tsuwanʼ mba̱ʼu̱ ga̱jma̱a̱ tsuwanʼ lájkaʼ egaja̱a̱ mbajndi nánguá guájun ixi̱ rí naxná xndúu. Rígi̱ nirígá índo̱ rí Adán ga̱jma̱a̱ Eva túnimbu̱u̱n rí niʼthún Dios ma̱ngoo nánguá nimbáxu̱u̱n gajmiún Ikhaa.

Mú itháan gakhi̱i̱ niʼni índo̱ rí Adán ga̱jma̱a̱ Eva ni̱jkha̱ rakháñun. Garmáʼáan a̱jkia̱nʼ: Dios niʼthún rí makhañún á mu naʼphu̱ xndúu ixi̱. Mbiʼi ma rí ni̱ʼphu̱ nigi̱ʼdu̱u̱ ni̱jkha̱ rakháñun. ¡Ra̱ʼkhá tháán miskágunʼ ninindxu̱ún numuu rí túdxawiin rí niʼthí Dios!

Xúgínʼ e̱ji̱i̱n Adán ga̱jma̱a̱ Eva nikúwi̱i̱n nda̱wa̱á rí Dios nixkawíín anu̱ún náa awúu̱n ixi̱ ri̱ʼi̱ náa Edén. Rígi̱ nandoo gáʼthi rí mangiin e̱ji̱n buʼki̱ maʼni xiʼñáanʼ ga̱jma̱a̱ makhañún.

Á mu rí Adán ga̱jma̱a̱ Eva ninimbu̱ún rí niʼthí Jeobá, tsímáá gakúwi̱i̱n ikhiin gajmiún e̱jñún. Ma̱ndoo makuwá tsímáá kámuu mbiʼi náa tsu̱du̱u̱ Ku̱ba̱ʼ. Nimbáa xáʼkhi̱i̱ xáʼniuu nandii asndu xákhañuu.

Dios nandoo rí xa̱bu̱ makuwíin gagi kámuu mbiʼi, ma̱ngoo nakudaminaʼ rí xúʼko̱ kaʼnii gáʼga̱nú maʼni̱i̱ mbá mbiʼi. Ra̱ʼkha̱ índo̱ Ku̱ba̱ʼ gaʼni̱i̱ mitsaan asndu xa̱bu̱ ni xáguaʼdá nandii. Xúgínʼ xa̱bu̱ mambaxúún májánʼ xúʼko̱ má ma̱ngaa ga̱jma̱a̱ Dios.

Mú Dios nánguá embáxu̱u̱ májánʼ ga̱jma̱a̱ Eva. Ikha jngó, niʼñuu mingíjyúu magiʼdiin e̱ji̱i̱n. Nixnúu gaʼkhu. Xúʼko̱, numuu rí táʼnimbo̱o̱ rí niʼthí Jeobá nigiʼdoo wéñuʼ gaʼkhu, lá ragájkhun tayaa ráʼ.

Adán ga̱jma̱a̱ Eva niguáʼdiin mbaʼin e̱ji̱n. Índo̱ rí nixtáa timbáa aʼdiún, nixna mbiʼí Caín. Abel nixna mbiʼí imba̱a̱. Natayáá ndiéjunʼ niguaʼnii e̱ji̱n bugi̱ ráʼ.