Mbá guʼwá xtúgua náa rí muxna gamajku

LÁ NATAYÁÁ ndiéjunʼ ni̱ndxu̱u̱ guʼwá xtúgua rígi̱ ráʼ. Ni̱ndxu̱u̱ mbá guʼwá kiejunʼ mu mbiʼyamajkuíí Jeobá. Nagumbiʼyuu tabernáculo. Mbá tsiguʼ niguámbu̱u̱n ni̱ni̱ rígi̱ nda̱wa̱á rí xuajin nigájnun náa Egipto. Lá natayáá tsáa nindoo maguma guʼwá rígi̱ ráʼ.

Jeobá nindoo maguma. Índo̱ rí Moisés xtáa náa inuu kúbá rí mbiʼyuu Sinaí, Jeobá niʼthúu̱n xú maʼni. Niʼthúu̱n maʼni rí xóo xáʼni miʼskhaa muraxi̱i̱. Mu xúʼko̱ ma̱ndoo maʼga̱ kayóo i̱mba̱ níʼkhá, ga̱jma̱a̱ ikhí maʼni̱i̱la mbu̱júu̱. Ikha jngó, israelitas nagún ku̱ñu̱u̱n guʼwá xtúgua índo̱ rí najnguʼun rakuwa náa ku̱ba̱ʼ gíná.

Á mu natayáá cuarto chíʼgíʼ rí gídáʼ asndu itháan awúu̱n guʼwá xtúgua, ma̱ndoo ma̱ta̱ya̱a̱ mbóo e̱jna̱. Rígi̱ nagumbiʼyuu e̱jna̱ rí nimbánuu. Trámiinʼ a̱jmi̱i̱n ángeles o querubines bi̱ ki̱ʼni̱i̱n ga̱jma̱a̱ oro, náa mámbá rawunʼ e̱jna̱. Dios niʼnirámáʼ mbu̱júu̱ Gu̱wa̱ʼ Xtángoo náa a̱jma̱ itsí wajpa, numuu rí Moisés nixpígu rí Jeobá niʼni ginii. Ga̱jma̱a̱ itsí rígi̱ nigixi̱i̱ náa e̱jna̱ rí nimbánuu. Ma̱ngoo ikhí nigixi̱i̱ mbá rayaʼ náa kajkuáa maná. Lá narmáʼáan a̱jkia̱nʼ ndiéjunʼ ni̱ndxu̱u̱ maná ráʼ.

Jeobá ndiyáaʼ Aarón ndxájuu Moisés mu mani̱ndxu̱u̱ bi̱ gáya edxu̱u̱ náa ndxajkun. Ikhaa ni̱ndxu̱u̱ bi̱ naxnún ikha xuajin rí xú mbuyamajkuíí Jeobá. Mangiin e̱ji̱i̱n ni̱ndxu̱ún ndxajkun.

Rí xúgi̱ atayáá náa cuarto rí itháan mba̱a̱ náa guʼwá xtúgua. Cuarto rígi̱ naʼni a̱jma̱ rí xóo cuarto chajkhaʼ. Lá natayáá e̱jna̱ chíʼgíʼ náa natsimuu gúní ráʼ. Ikhaa rígi̱ ni̱ndxu̱u̱ náa rí ndxajkun nutsikaraʼmáʼ incienso, mbá rí ndataun májánʼ. Ma̱ngaa atayáá candelabro rí gíʼdoo juwan lámpara. Ga̱jma̱a̱ rí maʼni ajtsú ni̱ndxu̱u̱ mbá mesa, náa jngútámáʼ má xúʼko̱ 12 pan.

Náa rexo̱o̱ tabernáculo wíji̱ mbá daan mba̱a̱ náa rí kajnííʼ iyaʼ rí najmún ndxajkun. Ma̱ngaa ikhí wíji̱ mbá altar mba̱a̱ náa nuxnaxi̱i̱n xujkhúʼ. Gi̱i̱ ni̱ndxu̱u̱ náa nakarámiinʼ xujkhúʼ bi̱ nakháñun xóo tsigijñaʼ náa Jeobá. Guʼwá xtúgua rígi̱ wíji̱ náa tikuapo̱o̱ campamento, ga̱jma̱a̱ xa̱bu̱ israelitas kuwa mbajndi náa guʼwún rí ñajunʼ xtíin.