Mbá guʼwá náa mbuyamajkuíí Dios

Índo̱ rí Moisés nixtáa náa kúbá Sinaí, Jeobá niʼthúu̱n rí muni mbá guʼwá náa muni mba̱a̱. Guʼwá rígi̱ mani̱ndxu̱u̱ phú kiejunʼ, náa bi̱ israelitas ma̱ndoo muni mba̱a̱ Dios. Ma̱ngaa, ma̱ndoo magún ku̱ñu̱u̱n tabernáculo asndu náa má gágun.

Jeobá niʼthí: “Atandu̱ʼu̱u̱n xa̱bu̱ xuajin mu muxna rí naʼngu̱u̱n mu maguma guʼwá rígi̱”. Bi̱ israelitas nigún kuduun oro, plata, cobre, itsí rí mitsaan ga̱jma̱a̱ xábí. Ma̱ngaa nixna mugu̱, lino, xtún xujkhúʼ ga̱jma̱a̱ i̱ʼwáʼ. Phú májánʼ niʼni a̱jkiu̱ún, nixna mbaʼa wéñuʼ, ikha jngó ndiyóoʼ rí Moisés maʼthúún rígi̱: “Ikhí má, rígá má mbaʼa. Xáguwaʼ ku̱da̱la itháan”.

Mbaʼin xa̱bekha gajmiún gu̱ʼu̱ niruguambáá muni guʼwá rígi̱. Jeobá niʼni rí maguaʼdáá ku̱ma̱ mu ñajunʼ magajnúu májánʼ. Tikhun nuxmí. Iʼwíínʼ nuñajunʼ ga̱jma̱a̱ oro, nuxpiʼtha ga̱jma̱a̱ nutáá itsí, o nuni májáánʼ ixi̱.

Xa̱bu̱ xuajin nini guʼwá rígi̱ xó má Jeobá niʼthá ñajunʼ. Nini mbá xtíin mitsaan mu magrajká tapha mu maʼni a̱jma̱ níʼkhóo, mbá níʼkhóo ñajunʼ kaʼwu ga̱jma̱a̱ i̱mba̱ níʼkhóo nindxu̱u̱ itháan mikaʼwu. Náa itháan mikaʼwu nirígá e̱jna̱ rí nimbánuu rí nigumaa ga̱jma̱a̱ ixi̱ acacia ma̱ngaa oro. Náa kaʼwu nirígá mbá candelabro rí niguma ga̱jma̱a̱ oro, mbá mesa ga̱jma̱a̱ mbá altar náa natsikha incienso. Rexa̱a̱ nirígá mbá náa najnu̱ʼ iyaʼ rí ki̱ʼni̱ ga̱jma̱a̱ cobre, ga̱jma̱a̱ mbá altar mba̱a̱ náa muxna tsigijñaʼ. Índo̱ israelitas nduyáá e̱jna̱ rí nimbánuu, narmáʼáan a̱jkiu̱ún rí nithi munimbu̱ún kuyáá Jeobá. Lá natayáá káʼnii ñajunʼ mbá pacto ráʼ. Nindxu̱u̱ mbá ajngáa kiejunʼ rí magumambánuu.

Jeobá niraʼwíi Aarón gajmíi̱n e̱ji̱i̱n mani̱ndxu̱ún ndxajkun ga̱jma̱a̱ muñajunʼ náa tabernáculo. Ndiyóoʼ rí muñewu̱u̱n ga̱jma̱a̱ muxna tsigijñaʼ náa Jeobá. I̱ndó ndxajkun bi̱ kayá edxu̱u̱, bi̱ nindxu̱u̱ Aarón, ma̱ndoo mato̱ʼo̱o̱ náa itháan mikaʼwu. Nato̱ʼo̱o̱ mbá miʼtsú mbá tsiguʼ mu maxná mbá tsigijñaʼ numuu aʼkhá ndrígóo ikhaa, ga̱jma̱a̱ bi̱ kuwa náa goʼwóo ma̱ngaa numún xúgínʼ xa̱bu̱ xuajin Israel.

Xa̱bu̱ israelitas niguámbu̱u̱n nini guʼwá rígi̱ mbá tsiguʼ nda̱wa̱á rí nigájnun náa Egipto. Rí xúgi̱, guáʼdáá mbá guʼwá náa mbuyamajkuíí Jeobá.

Jeobá nitsi̱ji̱ mbá du̱u̱n náa tsu̱du̱u̱ tabernáculo xúʼko̱ nisngajma rí nidxún a̱jkiu̱ún ga̱jma̱a̱ ninigu̱u̱ʼ xóo nigumaʼ guʼwá. Á mu du̱u̱n naguanúu wíí tsu̱du̱u̱ tabernáculo, bi̱ israelitas naguanún náa má kúwi̱i̱n. Á mu du̱u̱n rígi̱ na̱jkha̱, nduyáá má rí ndayóoʼ magún i̱mba̱ níʼkhá. Nuxkui̱xi̱i̱ tabernáculo ga̱jma̱a̱ nagún kidxuuʼ du̱u̱n rígi̱.