Josué nagi̱ʼi̱ xóo xa̱bu̱ ede̱

MOISÉS nandoo mato̱ʼo̱o̱ náa Canaán gajmíi̱n israelitas. Ikha jngó naʼthí: ‹Jeobá, atatsíñuʼ makidún náa mañu Jordán, mu mba̱yo̱o̱ ku̱ba̱ʼ májánʼ›. Mú Jeobá naʼthí: ‹¡Ikhí rá! ¡Ní xárata mbujuáaʼ xúʼko̱ kaʼnii!›. Lá natayáá náa numuu niʼthúu̱n xúʼko̱ kaʼnii Jeobá xáʼ.

Ga̱jma̱a̱ numuu dí nirígá índo̱ rí Moisés nixnúu itsí. Garmáʼáan a̱jkia̱nʼ: Ikhaa ga̱jma̱a̱ Aarón túnimba̱a̱ Jeobá. Na̱nguá nithun xa̱bu̱ xuajin rí Jeobá ni̱ndxu̱u̱ bi̱ xtáa raríyaʼ iyaʼ náa itsí. Ikha jngó Jeobá niʼthí rí xaniñúnʼ matu̱ʼu̱u̱n náa Canaán.

Nguátha igu̱nʼ nda̱wa̱á rí nikháñu Aarón, Jeobá eʼthúu̱n Moisés: ‹Ayuʼ jcháa Josué, ma̱ngoo atatsijii náa inuu ndxajkun Eleazar ga̱jma̱a̱ náa ginún xa̱bu̱ xuajin. Ikhí, náa ginún xúgínʼ, arathun rí Josué ni̱ndxu̱u̱ nuxi̱ʼ bi̱ kayá edxu̱u̱›. Moisés naʼni kakayuʼ xóo má Jeobá eʼthúu̱n, xóo má tayáá náa kiʼniriyaʼ.

Ikhú Jeobá eʼthúu̱n Josué: ‹Atani gakhi̱i̱ a̱jkia̱nʼ, xámiñaʼ. Maraxnu̱u̱n ikha israelitas ga̱jma̱a̱ mi̱dxu̱ʼ xtiin náa ku̱ba̱ʼ ndrígóo Canaán rí nikuʼdáminaʼ maxnu̱u̱n, ma̱ngaa ikhúúnʼ má gáxtáá gajma̱ʼ›.

Nda̱wa̱á Jeobá naʼthúu̱n Moisés rí matsimuu asndu náa kúbá Nebo náa ku̱ba̱ʼ ndrígóo Moab. Asndu ikhí Moisés nandoo nayexi asndu itháan ñuʼún rí náa mañu Jordán ga̱jma̱a̱ ndaʼyoo ku̱ba̱ʼ mitsaan ndrígóo Canaán. Jeobá eʼthí: ‹Ku̱ba̱ʼ rígi̱ ni̱ndxu̱u̱ rí nikuʼdáminaʼ maxnu̱u̱n e̱ji̱i̱n Abrahán, Isaac ga̱jma̱a̱ Jacob. Niniʼñúnʼ ma̱ta̱ya̱a̱, mú xániʼñánʼ mata̱ʼa̱ʼ ikhí›.

Ikhí, náa kúbá Nebo, Moisés nakháñuu. Ikhaa nigiʼdoo 120 tsiguʼ. Xóó migújkuíʼ ga̱jma̱a̱ nayexi májánʼ. Xa̱bu̱ xuajin ra̱ʼkhá tháán kuwa gíná ga̱jma̱a̱ xúgínʼ dí ikhiin numbiyajmaa wéñuʼ Moisés. Mú xúgi̱ kuwa gagi numuu rí Josué ni̱ndxu̱u̱ nuxi̱ʼ bi̱ kayá edxu̱u̱ náa ikhiin.