Jeobá naraʼwíí Josué

Moisés nixná ikha náa xuajin Israel mba̱yu̱ʼ tsiguʼ, xúgi̱ rí inu má makhañúu. Jeobá niʼthúu̱n: “Raʼkháa ikháánʼ manindxa̱ʼ bi̱ maʼga̱ kagui̱i̱n xa̱bu̱ israelitas náa Ku̱ba̱ʼ rí ikhúúnʼ nitha maxnu̱u̱n. Mú maniʼñúʼ ma̱ta̱ya̱a̱ ku̱ba̱ʼ rígi̱”. Ikhú, Moisés nindo̱ʼo̱o̱ Jeobá rí mbayáaʼ imba̱a̱ xa̱bu̱ mbayá edxu̱u̱ ga̱jma̱a̱ mañewu̱u̱n xuajin. Jeobá niriʼña: “Aratháán Josué rí ikhaa nindxu̱u̱ bi̱ kaxtaʼwíi”.

Moisés niʼthúún xuajin rí inu má makhañúu ga̱jma̱a̱ rí Jeobá niraʼwíí Josué maʼgá kagui̱i̱n náa Ku̱ba̱ʼ rí ikhaa niʼthí maxnún. Ikhú Moisés niʼthúu̱n Josué: “Xámiñaʼ. Jeobá gambayaaʼ”. Nguáthá mbiʼi nda̱wa̱á, Moisés nitsimuu náa kúbá mitsídánʼ dí nigumbiʼyuu Nebo. Ikhí, Jeobá nisngájmuu ku̱ba̱ʼ dí niʼthí maxnún Abrahán, Isaac ga̱jma̱a̱ Jacob. Moisés nigiʼdoo 120 tsiguuʼ índo̱ nikháñu.

Jeobá niʼthúu̱n Josué: “Akidáán mañu Jordán mu mata̱ʼa̱ʼ náa ku̱ba̱ʼ Canáan. Ikhúúnʼ mambáyaʼ, xó má nimbáyúu Moisés. Xámbumaʼ, matraxnuu xtángoo ndrígóʼ xúgíʼ mbiʼi. Xámiñaʼ, atani gakhi̱i̱ a̱jkia̱nʼ. Ayuʼ ga̱jma̱a̱ atani xúgíʼ rí nitha̱nʼ matani”.

Josué nikuʼmiin a̱jmi̱i̱n xa̱bu̱ bi̱ muyama náa xuajin Jericó. Náa imbo̱ʼ historia majmañulúʼ itháan rí nirígá ikhí. Índo̱ xa̱bu̱ bi̱ nuyama nitangi̱ín náa Jericó, niʼthí rí mbiʼi rúʼko̱ phú májánʼ matu̱ʼu̱u̱n muni gámbáa xuajin Canaán. Imbo̱ʼ mbiʼi, Josué niʼthúu̱n xuajin rí muraxi̱i̱ guʼwún. Ginii nikuʼmiin ndxajkun magún ku̱ñu̱u̱n e̱jna̱ rí nimbánuu. Mañu nindxu̱u̱ mba̱a̱ wéñuʼ, mú índo̱ rajkúún ndxajkun nuxuma̱ʼ náa iya, ikhú iya nijndooʼ, ga̱jma̱a̱ ndxajkun nigíʼdi̱i̱ ninújngún náa mañu rí nijndooʼ. Índo̱ niguáʼnu náa tapha iyaʼ, ikhí niguanún ga̱jma̱a̱ niguaʼti̱i̱n asndu índo̱ xúgínʼ xa̱bu̱ israelitas niguáʼnu i̱mba̱ ridoo. Índo̱ ndiyáá milagro rígi̱, lá naku̱ma̱ʼ rí nirmáʼáan a̱jkiu̱ún rí Jeobá niʼni náa lamáa Maña̱ʼ xáʼ.

Nda̱wa̱á rí ninújngoo mba̱yu̱ʼ tsiguʼ, bi̱ israelitas niguáʼnu náa Ku̱ba̱ʼ rí nijuiʼthá makhánun. Xúgi̱ rí ma̱ndoo muni̱ guʼwún rí májánʼ. Ma̱ndoo mudu asndu ndiéjunʼ má eñún. Náa ku̱ba̱ʼ rúʼko̱ nirígá yáʼduu ga̱jma̱a̱ yááʼ.