Xtátsí ndrígóo Jericó

NDIÉJUNʼ rí xtáa raʼni dí majngudiri̱ga̱a̱ xtátsí ndrígóo Jericó rá. Ni̱ndxu̱u̱ asndu xóo mbá bomba mba̱a̱ rí nixpátrígú ikhí. Mú nákhi ikhú nda̱a̱ bomba; asndu má nda̱a̱ ajua̱nʼ rí na̱da̱ʼ bomba. ¡Ni̱ndxu̱u̱ imbo̱o̱ milagro ndrígóo Jeobá! Guʼyáá xú káʼnii nirígá.

Atadxun rí Jeobá eʼthúu̱n Josué: ‹Ikháánʼ gajmiáanʼ xa̱bia̱ʼ guʼgua̱ mbajndi xuajin. Guʼgua̱ mbajndi mbá miʼtsú rí mámbá mbiʼi, rígi̱ gúní mbá majun mbiʼi. Aʼgua̱ kuyalaʼ e̱jna̱ rí nimbánuu. Juwiin ndxajkun gíʼmaa rí magun ginuu arca ga̱jma̱a̱ mundií mbaʼa chi̱ji̱ʼ›.

‹Índo̱ rí gáʼni juwan mbiʼi aʼgua̱ mbajndi xuajin mbá juwan aʼphu̱. Ikhú gúní rí muwan mba̱yu̱u̱ʼ aʼwóo mbaʼa chi̱ji̱ʼ, ga̱jma̱a̱ xúgínʼ gundxaʼwa̱ gakhi̱i̱ wéñuʼ. ¡Ma̱ngaa xtátsí majngudiri̱ga̱a̱!›.

Josué gajmíi̱n xa̱bu̱ xuajin nuni̱ xóo má eʼthí Jeobá. Índo̱ rí kuwa ragun mbajndi xuajin, mbóó wíí kriga xúgínʼ. I̱ndó aʼwá ndrígóo mbaʼa chi̱ji̱ʼ ewan ga̱jma̱a̱ xú káʼnii engupriga índo̱ egún. Nimiñun xa̱bu̱ sia̱nʼ bi̱ kuwa náa Jericó. Lá nandoo natayáá ñuu maña̱ʼ rí wrajka náa ventana ráʼ. Tsáa ventana ndrígóo rúʼko̱ rá. Xúʼko̱, Rahab niʼni xóo má nitháán nájmi̱i̱n xa̱bu̱ bi̱ nuñama. Xúgínʼ bi̱ kaʼñúún kuwa ruyexi asndu awúu̱n.

Nda̱wa̱á kayuʼ, rí niʼni juwan mbiʼi, rí nigún juwan aʼphu̱ mbajndi xuajin, ikhú nundií mbaʼa chi̱ji̱ʼ, nundxa̱ʼwa̱ xa̱bu̱ bi̱ nuni̱ aguʼ, ga̱jma̱a̱ xtátsí najngudiri̱ga̱a̱. Josué eʼthí: ‹Guradíin xa̱bu̱ ma̱ngaa gutsikha xuajin ga̱jma̱a̱ xúgíʼ dí rígá ikhí, i̱ndó rí xútsikha plata, oro, cobre ga̱jma̱a̱ hierro, rígi̱ maʼga̱ náa rígá dí gíʼdoo wéñuʼ numuu náa tabernáculo›.

Josué eʼthúún nájmi̱i̱n xa̱bu̱ bi̱ nuñama: ‹Guríyaaʼ Rahab gajmíi̱n xúgínʼ bi̱ kuwa náa goʼwóo›. Xa̱bu̱ bugi̱ naguma káwíin, xóo má nithi xa̱bu̱ bi̱ nuñama.