Rahab nirkaʼwiin bi̱ nuyama

Xa̱bu̱ israelitas bi̱ nuyama nigún náa xuajin Jericó ga̱jma̱a̱ niguanún náa goʼwóo mbáa a̱ʼgu̱ bi̱ mbiʼyuu Rahab. Índo̱ rey niʼdxaun rígi̱, nikuʼmiin soldados náa goʼwóo Rahab. Ikhaa nirkaʼwiin nájmi̱i̱n náa tsu̱du̱u̱ goʼwóo ga̱jma̱a̱ niʼthún soldados rí mbuñíinʼ i̱mba̱ níʼkhá. Ikha jngó Rahab niʼthún bi̱ nuyama: “Mambáyala numuu rí nda̱yo̱o̱ rí Jeobá xtáa ga̱jma̱á nindxa̱la ma̱ngaa rí muni gámbáa xuajin rígi̱. Mbá péñu, guthunʼla rí muni̱ kríñunʼ gajmíi̱nʼ bi̱ kuwa náa goʼwóoʼ”.

Bi̱ nuyama nitháán Rahab: “Á mu natrájkha mbá ñuu maña̱ʼ náa ventana ndrígóo guʼwáaʼ, nutha̱nʼxu rí xáguáʼnín nimbá dí ra̱májánʼ xa̱bu̱ bi̱ gajchún náa guʼwáaʼ. Xúʼko̱ a̱ngia̱nʼ makáwíin”.

Rahab nimbáñun bi̱ nuyama rí magajnáan náa Jericó, nigájni̱i̱n náa ventana ga̱jma̱a̱ mbá ñuu niguájtaa. Bi̱ nuyama nirkaʼumijná ajtsú mbiʼi náa kúbá nákha xóó tsétangi̱i̱n náa Josué. Nda̱wa̱á, bi̱ israelita nikidiin náa mañu Jordán ga̱jma̱a̱ nigi̱ʼdi̱i̱ niniratamijná dí mudrígúu ku̱ba̱ʼ rúʼko̱. Jericó ninindxu̱u̱ timbá xuajin rí muni gámbáa. Jeobá niʼthúún dí murtua̱ʼa̱n xuajin mbóo miʼtsú mbá mbiʼi. Rígi̱ nini mbá majun mbiʼi. Rí maʼni juwan mbiʼi, nirtua̱ʼa̱n xuajin mbá juwan nuthu. Nda̱wa̱á, ndxajkun nidi̱i̱ trompetas ndrígu̱ún ga̱jma̱a̱ soldados nindxa̱ʼwa̱ ga̱jma̱a̱ xúgíʼ tsiakii ndrígu̱ún. Ikhú xtátsí ndrígóo xuajen nijngudiri̱ga̱a̱. Maski ajndu goʼwóo Rahab rígá náa xtátsí, mú na̱nguá nijngudiri̱ga̱a̱. Rahab ga̱jma̱a̱ bi̱ kuwa náa goʼwóo nikáwíin numuu dí ikhaa nikumu̱u̱ kaʼyoo Jeobá.