Dxámá Jesús xtáa náa templo

ATAYÁÁ dxámá bi̱ naʼtamijná gajmíi̱n xa̱bu̱ buanii. Ikhiin ñajúnʼ xa̱bu̱ bi̱ nusngáa náa templo ndrígóo Dios náa Jerusalén. Ga̱jma̱a̱ dxámá ñajunʼ Jesús. Ra̱ʼkhá tháán nigaja̱a̱ wéñuʼ. Rí xúgi̱ gíʼdoo 12 tsiguʼ.

Xa̱bu̱ bi̱ nutawíí rí naʼthí xtángoo niguanún tsiánguá índo̱ ndiyáá rí Jesús najmañuu wéñuʼ ga̱jma̱a̱ numuu Dios ga̱jma̱a̱ rí kiʼniraʼmáʼ náa Biblia. Mú, náa numuu rí na̱nguá kúwi̱i̱n José ga̱jma̱a̱ María gi̱i̱ mangiin rá. Náa kuwa ikhiin rá. Guʼyáá

Mámbá tsiguʼ José na̱jkha̱ kagu̱u̱n bi̱ kuwa náa goʼwóo náa Jerusalén mu muniriyaa ndxa̱a̱ kiejunʼ rí nagumbiʼyuu Pascua. Rí magajnáʼ náa Nazaret, mitsinguánʼ guanuu rí mi̱dxu̱ʼ asndu náa Jerusalén. Nimbáa na̱nguá gíʼdoo carro, asndu má nda̱a̱ tren nákha ikhú. Mbaʼin xa̱bu̱ nagún ga̱jma̱a̱ rajkhún, ga̱jma̱a̱ ikhiin ndajñúnʼ xóo mbáa ajtsú mbiʼi rí maguanu asndu náa Jerusalén.

Mú xúgi̱ niʼni mbaʼin náa goʼwóo José. Ikha jngó Jesús gíʼdiin jiáma ga̱jma̱a̱ a̱ngui̱i̱n gu̱ʼu̱ bi̱ mañawu̱u̱n. Tsiguʼ rígi̱ José ga̱jma̱a̱ María natangi̱i̱n náa Nazaret gajmíi̱n i̱ji̱i̱n. Ikhiin nakumuún rí Jesús xtáa gajmíi̱n eʼwíínʼ xa̱bu̱ bi̱ kuwa ragún. Mú índo̱ niguájun ragún wakhííʼ, na̱nguá exkamaa Jesús. ¡Nduyáaʼ náa xa̱bu̱ tsí mijngii kuñún ga̱jma̱a̱ bi̱ nambáxuun gajmiún, mú nda̱wa̱á! Ikha jngó natangi̱i̱n náa xuajin Jerusalén mu mbuyáaʼ ikhí.

Nda̱wa̱á kayuʼ nuxkamaa gi̱i̱. Xtáa raʼdxun rí ethi xa̱bu̱ bi̱ nutawíí xtángoo ga̱jma̱a̱ naʼniún graxe̱. Ga̱jma̱a̱ xúgínʼ xa̱bu̱ naguanún tsiánguá numuu rí ndaʼyoo wéñuʼ. Mú María naʼthí: ‹A̱ʼdióoʼ, náa numuu rí nitaniuxu rígi̱ rá. Ana̱ʼ ga̱jma̱a̱ ikhúúnʼ nixmiéjunxu wéñuʼ ikha jngó kúwáanʼxu ruʼñánʼ›.

Jesús nariʼña̱a̱. ‹Ndíjkha rí kuwáanʼ ruʼñúnʼ rá. Lá tséya̱a̱ rí gíʼmaa maxtáá náa goʼwóo anu̱ʼ ráʼ.›

Xúʼko̱, Jesús naniguʼ maxtáa náa ma̱ndoo majmañuu ga̱jma̱a̱ numuu Dios. Lá ragájkhun rí xúʼko̱ má gíʼmaa muʼni mangáanʼ ráʼ. Ñuʼún náa Nazaret, Jesús ni̱jkha̱ náa nagimbúun mámbá xmáná mu mbaʼyamajkuu Jeobá. Numuu rí ikhaa nigíiʼ má xúʼko̱ edxu̱u̱ maʼdxun, nijmañu mbaʼa rí na̱ʼkha̱ raʼthí náa Biblia. Guʼyaridáá má xúʼko̱ xkri̱da ndrígóo Jesús.