Nandoo kaʼñúún wéñuʼ e̱ji̱n

ATAYÁÁ Jesús gi̱i̱, kayáraʼaa dxámá lájuíin. Nandoo natayáá rí ikhaa naxmiéjunʼ kaʼñúún e̱ji̱n. Xa̱bu̱ bi̱ trigi̱i̱n ruyáá ñajúnʼ apóstoles ndrígóo. Lá natayáá ndiéjunʼ eʼthún Jesús ráʼ.

Jesús gajmíi̱n apóstoles ndrígóo ndiʼkhún nitangi̱i̱n náa nigún mitsinguánʼ wéñuʼ. Apóstoles nigiʼdu̱u̱n índo̱ kuwa raguwáanʼ náa kamba̱a̱. Ikha jngó, nda̱wa̱á rí niguáʼnu Jesús niraxu̱u̱n: ‹Náa numuu rí kuwáanʼ rugiʼdala náa kamba̱a̱ rá.› Jesús ndaʼyoo má náa numuu giʼdu̱u̱n. Mú naraxu̱u̱n apóstoles mu mbaʼyoo á mu nutháán náa numuu.

Apóstoles nanguá eriʼña, numuu rí náa kamba̱a̱ nigiʼdu̱u̱n mu mbuyáá tsáa dí ikhiin itháan gíʼdoo numuu. Tikhun nandún rí maguaʼdáá wéñuʼ numún ki xóo eʼwíínʼ. Xú káʼnii gaʼthúun Jesús dí ragíʼmaa maʼndún maguaʼdáá wéñuʼ numún rá.

Ikhaa nandxaʼóo dxámá lájuíin, ga̱jma̱a̱ natsijii náa inún xúgínʼ ikhiin. Ikhú naʼthúún discípulos ndrígóo: ‹Nandoʼ makruaʼla májánʼ rígi̱: Xándoo mataʼala náa reino ndrígóo Dios á mu tsiriʼkumijná ga̱jma̱a̱ á mu tsejkuanú manindxalaʼ xóo dxámá bugi̱›. Xa̱bu̱ bi̱ itháan gíʼdoo numuu náa reino bi̱ naʼni xóo ada̱ bugi̱. Lá natayáá náa numuu niʼthí rígi̱ xá.

E̱ji̱n bi̱ lájuíin na̱nguá exmiéjunʼ rí majmaʼnuʼ itháan asndu má rí maguaʼdáa wéñuʼ numuu náa eʼwíínʼ. Ikha jngó apóstoles gíʼmaa rí majmañún muni xóo eni e̱ji̱n ga̱jma̱a̱ xúgiʼdu̱u̱n rí majmaʼnunʼ itháan o muguaʼdáá wéñuʼ numún.

Nákha eʼwááʼ mbiʼi, ma̱ngaa, Jesús nisngajma dí ra̱ʼkhá tháán nixmiéjunʼ kaʼñúún e̱ji̱n. Mbá nguátha igu̱nʼ nda̱wa̱á tikhun xa̱bu̱ niguwáʼ kudiin e̱jñún mu mbuyáá Jesús. Apóstoles nini rí munitsingunʼ e̱ji̱n. Mú Jesús niʼthún: ‹Guniʼñun rí e̱ji̱n maguwáʼ náa ikhúúnʼ, ga̱jma̱a̱ xúrikhun, numuu rí reino ndrígóo Dios kaʼñúún xa̱bu̱ bi̱ xóo bugi̱›. Ikhú ndayáriʼin e̱ji̱n, ga̱jma̱a̱ naʼni tsajkurámiinʼ. Lá ra̱ʼkhá májánʼ wéñuʼ nindxu̱u̱ rí Jesús nandoo kaʼñúún wéñuʼ e̱ji̱n ráʼ.