Iwáá ganitsuwañu ndrígóo Jesús

Judíos niniriyaʼ ndxa̱a̱ Pascua xúgíʼ tsiguʼ mbiʼi 14 ñajunʼ gu̱nʼ nisán. Xúʼko̱ nirmáʼáan a̱jkiu̱ún rí Jeobá niʼni káwíin náa nikúwi̱i̱n xóo ñumbáá náa Egipto ga̱jma̱a̱ ni̱jkha̱ kagu̱u̱n náa Ku̱ba̱ʼ rí nijuiʼthá makhánun. Tsiguʼ 33, Jesús gajmíi̱n apóstoles niniriyaʼ ndxa̱a̱ Pascua náa mbá guʼwá dí rígá náa xuajen Jerusalén dí rígu rijma̱a̱. Índo̱ niguámbu̱u̱n nini rígi̱, Jesús niʼthí: “Mbáa rí ikháanʼ maxnáxu̱u̱n”. Apóstoles niʼniún tsiánguá ga̱jma̱a̱ niraxi̱i̱: “Tsáa nindxu̱u̱ rá.” Jesús niriʼñuu: “Nindxu̱u̱ xa̱bu̱ bi̱ na̱xnu̱u̱ mbá xíʼtóo pan rígi̱”. Ikhú nixnúu mbá xíʼtóo pan Judas Iscariote. Núkhu, Judas nitu̱xu̱u̱ ga̱jma̱a̱ nigájnuu ni̱jkha̱a̱.

Nda̱wa̱á Jesús niʼtájkáan, nikuíʼta pan ga̱jma̱a̱ nixnúún apóstoles bi̱ xóó niguanún gajmíi̱n. Niʼthún: “Aphu pan rígi̱. Nandoo gáʼthúu̱n xuyuʼ rí ikhúúnʼ gaxnaxí ga̱jma̱á numala”. Nda̱wa̱á niʼni mbá tsajkhun ga̱jma̱a̱ numuu vino, nixnúún apóstoles ga̱jma̱a̱ niʼthún: “Guwa̱a̱n vino rígi̱. Nandoo gáʼthúu̱n eʼdiuʼ rí maxnaxí mu maguma jngudi̱i̱ aʼkhála. Nathala gajkhun rí ikháanʼla mani̱ndxa̱la reyes ga̱jma̱á ni̱ndxu̱ʼ náa mekhuíí. Guni lá rígi̱ xúgíʼ tsiguʼ mu marmáʼáan a̱jkia̱la kuyoʼ”. Xa̱bi̱i̱ Jesús xóó nagimbíi̱n xúgíʼ tsiguʼ mbiʼi rúʼko̱ índo̱ narámáʼ a̱jkha̱ʼ. Reunión nagumbiʼyuu Ganitsuwañu ndrígóo Señor.

Nda̱wa̱á rí ni̱ʼphu̱ wañún, apóstoles nigiʼdu̱u̱n mu mbuyáá tsáa gíʼdoo itháan numuu. Mú Jesús niʼthún: “Bi̱ itháan gagiʼdoo numuu náa ikháanʼla gíʼdoo mani̱ndxu̱u̱ xóo mbáa ada̱ bi̱ itháan chíʼgíʼ o mbáa bi̱ na̱nguá gíʼdoo wéñuʼ numuu”.

Jesús ma̱ngaa niʼthún: “Ikháanʼ nindxa̱la bi̱ nambáxuʼ gajmíi̱nʼ. Ikha jngó natala xúgíʼ rí Anu̱ʼ nandoo matala. Inu má maʼgáaʼ mekhuíí, náa xtáa Anu̱ʼ. Mú ikháanʼla maguanala gi̱i̱, ga̱jma̱a̱ xa̱bu̱ mbuyáá rí ikháanʼla nindxa̱la xa̱bi̱ʼ numuu rí nandala kuyamíjna̱. Gíʼmaa maʼndala kuyamíjna̱ kaníkháanʼ xóo ikhúúnʼ eyoʼ kayala”.

Nda̱wa̱á, Jesús nindo̱ʼo̱o̱ Jeobá rí mañewu̱u̱n xúgínʼ xa̱bi̱i̱ ga̱jma̱a̱ mambáñun mu muñajunʼ mbóó jnduʼ ga̱jma̱a̱ tsímáá. Ma̱ngaa niʼtájkáan rí maguma kaʼwi̱i̱ mbiʼyuu Jeobá. Nda̱wa̱á, Jesús gajmíi̱n apóstoles nini ajmúú náa Jeobá ga̱jma̱a̱ nigájnun. Rí xúgi̱ ndayóoʼ mbá chíʼgíʼ rí murtuwiin Jesús.