Naguáʼthi̱i̱n náa Jerusalén

XA̱BU̱ bugi̱ ñajúnʼ xa̱bi̱i̱ Jesús. Nunimbu̱ún rí niʼthún Jesús ga̱jma̱a̱ niguanún náa xuajin Jerusalén. Nákha kuwa mbá xúgínʼ ruguaʼthi̱i̱n, nirígá mbá rí niwan náa xúgíʼ guʼwá. Nindxu̱u̱ xóo mbá giñáʼ rí nanújngoo mbá nacha̱ wéñuʼ. Rí xúgi̱ nagi̱ʼdu̱u̱ nakujmaa aguʼ náa edxu̱u̱ mámbáa dí ikhiin. Lá nandoo natayáá aguʼ náa edxu̱u̱ mámbáa discípulo ráʼ. Ndiéjunʼ eyoo gáʼthi rúʼko̱ rá.

¡Nindxu̱u̱ mbá milagro! Jesús xtáa mbu̱júu̱ ga̱jma̱a̱ Anu̱u̱ mekhuíí, ga̱jma̱a̱ xtáa raʼni rí xa̱bi̱i̱ muguaʼdáá espíritu santo ndrígóo Dios. Lá natayáá ndiéjunʼ eʼni espíritu dí muni xáʼ. Xúgínʼ nugi̱ʼdi̱i̱ nuthi mixtiʼkhu ajngáa.

Mbaʼin xa̱bu̱ bi̱ kuwa náa Jerusalén nudxawíín rígi̱ rí nindxu̱u̱ xóo mbá giñáʼ rí gakhii, ikha jngó naguwaʼ gúyáá ndiéjunʼ nirígá. Tikhun xa̱bu̱ naguwaʼ náa eʼwááʼ xuajin mu muniriyaa ndxa̱a̱ rí nagumbiʼyuu Pentecostés. ¡Xa̱bu̱ bi̱ niguwáʼ na̱nguá guaʼthi̱i̱n mbuyáá rígi̱! Nudxawíín rí discípulos nuthi ga̱jma̱a̱ ajngún xúgíʼ rí májánʼ dí niʼni Dios.

Xa̱bu̱ bi̱ naguwaʼ náa eʼwááʼ xuajin nuthi: ‹Xúgínʼ xa̱bu̱ bugi̱ naguwaʼ náa xuajin Galilea. Xú káʼnii nindoo nijmañún nithi mixtiʼkhu ajngáa dí rígá náa xuajin rí naguwaʼlu rá.›

Rí xúgi̱ Pedro nawi̱ji̱ mu maʼthúún. Nakuxi aʼwóo ga̱jma̱a̱ naʼthúún xa̱bu̱ rí xú káʼnii nixiyáa Jesús, ga̱jma̱a̱ rí Jeobá nikuxi̱i̱. Pedro naʼthí: ‹Rí xúgi̱ Jesús xtáa mekhuíí náa ñawun mújúnʼ Dios. Ga̱jma̱a̱ ikhaa niʼni rí muguaʼdáá espíritu santo rí niʼthí maxnún xa̱bi̱i̱. Ikha jngó nirígá milagro rígi̱›.

Índo̱ Pedro naʼthí rígi̱, ikhú mbaʼin wéñuʼ xa̱bu̱ nagáwinʼ a̱jkiún rí nini̱i̱ Jesús. Ikhiin nuraxi: ‹Ndiéjunʼ gíʼmaa munixu rá.› Pedro naʼthúún: ‹Gíʼmaa rí muriʼkhu̱u̱ rí xú makuwáanʼ ga̱jma̱a̱ majnguala iyááʼ›. Ikhú má mbiʼi rúʼko̱ mbá 3,000 xa̱bu̱ nijngún iyaʼ ga̱jma̱a̱ nanindxu̱ún xa̱bi̱i̱ Jesús.