Timoteo nambáyuu Pablo

NDXÁMÁ bi̱ natayáá gi̱i̱ ga̱jma̱a̱ apóstol Pablo nindxu̱u̱ Timoteo. Timoteo xtáa náa Listra gajmíi̱n bi̱ kuwa náa goʼwóo. Ru̱dúu̱ mbiʼyuu Eunice ga̱jma̱a̱ xíñuuʼ mbiʼyuu Loida.

Rígi̱ maʼni ajtsú nutu rí Pablo na̱jkha̱ náa Listra. Naʼni má mbá tsiguʼ rí Pablo ga̱jma̱a̱ Bernabé niguwáʼ timbá nutu mu mutaraʼa gi̱i̱. Rí xúgi̱ Pablo nitanga̱a̱ ga̱jma̱a̱ Silas bi̱ nambáxu̱u̱ májánʼ ga̱jma̱a̱.

Lá natayáá ndiéjunʼ eʼthí Pablo náa Timoteo rá. Pablo naraxi̱: ‹Lá nandaʼ muʼgua̱ gajmiulú Silas rá. Ma̱ndoo matambáyuxu mu muʼgua̱ guʼtaruʼun xa̱bu̱ bi̱ kuwa mitsinguánʼ wéñuʼ›.

Timoteo nariʼña̱a̱: ‹Nandoʼ maʼgá›. Ikha jngó nda̱wa̱á Timoteo naniñúnʼ bi̱ kuwa náa goʼwóo mu maʼga̱ ga̱jma̱a̱ Pablo ma̱ngaa Silas. Mú nákha xóó tsijmañulú rí xú káʼnii nigájnuu ni̱jkha̱ Pablo, guʼyáá ndiéjunʼ nindxu̱u̱ rí xtáa ragíʼnuu Pablo. Ninújngoo má 17 tsiguʼ asndu nákha Jesús nisngájmaminaʼ náa kamba̱a̱ rí na̱jkha̱ náa xuajin Damasco.

¡Garmáʼáan a̱jkia̱nʼ rí Pablo ni̱ʼkha̱ náa xuajin Damasco mu maʼni gíníin xa̱bi̱i̱ Jesús, mú rí xúgi̱ ikhaa nindxu̱u̱ discípulo! Nda̱wa̱á, tikhuun xa̱bu̱ bi̱ guáʼdáá sia̱nʼ náa Pablo nduyáaʼ muxiyáa, mu discípulos numbayíí mu maʼnikriaminaʼ. Ikhiin nixriguíi ga̱jma̱a̱ mbá extu̱ʼ náa xtátsí ndrígóo xuajin ga̱jma̱a̱ xúʼko̱ nunikríyaʼ.

Nda̱wa̱á, Pablo nanújngoo náa xuajin Antioquía mu maʼtaraʼa. Náa xuajin rígi̱ rí nixna mbiʼñún timbá nutu discípulos ndrígóo Jesús xóo cristianos. Nda̱wa̱á Pablo ga̱jma̱a̱ Bernabé nixuʼmiin magun náa eʼwááʼ xuajin dí rígá mitsinguánʼ mu mutaraʼa. Náa mbá xuajin rí naguanu nindxu̱u̱ Listra, náa xtáa Timoteo.

Rí xúgi̱ naʼni itháan rí mbá tsiguʼ, Pablo natanga̱a̱ mbu̱júu̱ náa xuajin Listra, rígi̱ naʼni a̱jma̱ nutu rí na̱ʼkha̱ gi̱i̱. Índo̱ Timoteo nagájnuu ga̱jma̱a̱ Pablo ma̱ngaa Silas, lá natayáá náa egún xáʼ. Atayáá náa mapa, ga̱jma̱a̱ gajmañulú tikhuu xuajin náa nagún.

Ginii nagún náa xuajin rí naguanúu mijngii rí mbiʼyuu Iconio, nda̱wa̱á nagún náa raga̱jma̱ xuajin rí nagumbiʼyuu Antioquía. Nda̱wa̱á nagún náa xuajin Troas, ikhú nanújngun náa xuajin Filipos, Tesalónica ga̱jma̱a̱ Berea. Lá nandoo natayáá xuajin Atenas náa mapa ráʼ. Pablo naʼtaraʼa ikhí. Nda̱wa̱á, naʼtaraʼa mbá tsiguʼ tikhu náa xuajin Corinto. Nda̱wa̱á kayuʼ naguanún mbá nguáthá mbiʼi náa xuajin Éfeso. Ikhú natangi̱i̱n ga̱jma̱a̱ barco náa xuajin Cesarea, ga̱jma̱a̱ natsimún náa xuajin Antioquía, náa naguanúu Pablo.

Xúʼko̱ eʼni rí Timoteo na̱jkha̱ mbaʼa wéñuʼ kilómetros mu mambáyuu Pablo maʼtáraʼa ajngáa rí májánʼ ga̱jma̱a̱ naʼni rí marigá mbaʼa wéñuʼ congregación. Índo̱ ikháánʼ gíkhi̱i̱n, lá manindxa̱ʼ mbáa xa̱bu̱ bi̱ naʼni rí jmbu xóo má Timoteo ráʼ.