Pablo ga̱jma̱a̱ Timoteo

Timoteo ninindxu̱u̱ mbá ndxájulú dxámá bi̱ na̱ʼkha̱ náa congregación ndrígóo Listra. Anu̱u̱ ninindxu̱u̱ griego ga̱jma̱a̱ ru̱dúu̱ judía. Ru̱dúu̱ nigumbiʼyuu Eunice ga̱jma̱a̱ xíñuʼ, Loida. Ikhiin nisngáa rí gajkhun ga̱jma̱a̱ numuu Jeobá asndu nákha Timoteo ninindxu̱u̱ mbáa ada̱.

Índo̱ Pablo ni̱jkha̱ gáʼtaraʼa índo̱ maʼni a̱jma̱ nuthu náa Listra, ndiʼyoo rí Timoteo nandoo kaʼñún gajkhun a̱ngiu̱lú ga̱jma̱a̱ nandoo má xúʼko̱ rí mambáñun. Ikha jngó niʼthúu̱n Timoteo rí maʼga̱ ga̱jma̱a̱. Mbiʼi nda̱wa̱á Pablo niʼnirataa Timoteo mu mani̱ndxu̱u̱ mbáa bi̱ naʼsngáa májánʼ ga̱jma̱a̱ maʼtáraʼa ajngáa rí májánʼ ndrígóo Dios.

Xi̱ʼ kaʼwu nixnúu ikha Pablo ga̱jma̱a̱ Timoteo asndu náa má egún. Mbá mbruʼun Pablo nigiʼdoo mbá visión. Ndiʼyoo mbáa xa̱bu̱ rí niʼthúu̱n rí maʼga̱ náa xuajen Macedonia mu mambáñun. Ikha jngó Pablo, Timoteo, Silas ga̱jma̱a̱ Lucas nigún ikhí mu mutaraʼa ga̱jma̱a̱ mugíʼ i̱ʼwáʼ congregación.

Náa xuajen macedonia ndrígóo Tesalónica, mbaʼin xa̱bekha ga̱jma̱a̱ gu̱ʼu̱ ninindxu̱ún cristianos. Mú tikhun judíos nixígu̱u̱n kuyáá Pablo gajmíi̱n a̱ngui̱i̱n. Nigimbíin mbaʼin xa̱bu̱ ra̱míjínʼ ga̱jma̱a̱ nixmajtiin a̱ngiu̱lú náa Xa̱bu̱ Ñajunʼ bi̱ kuwa náa xuajen. Judíos nindxa̱ʼwa̱: “¡Xa̱bu̱ bugi̱ ni̱ndxu̱ún xa̱bu̱ sia̱nʼ náa Xa̱bu̱ Ñajunʼ!”. Pablo ga̱jma̱a̱ Timoteo migamíi makhañún, ikha jngó ndiyóoʼ magañún náa Berea índo̱ niʼni mbruʼun.

Xa̱bu̱ Berea nindúún mudxawíín ajngáa rí májánʼ ndrígóo Dios, mangiin mbaʼin griegos ga̱jma̱a̱ judíos ninimbu̱ún. Mú tikhun judíos bi̱ kuwa náa Tesalónica niguwáʼ mu muni xkujndu. Ikhú Pablo ni̱jkha̱a̱ náa Atenás. Timoteo ga̱jma̱a̱ Silas niguanún náa Berea mu muxnún tsiakii a̱ngiu̱lú. Nda̱wa̱á, Pablo nikunguanʼ Timoteo mbu̱júu̱ náa Tesalónica mu mambáñun a̱ngiu̱lú rí maʼngu̱u̱n muraʼníí rí najuixkhúún. Nda̱wa̱á, Pablo nikunguanʼ Timoteo mu maʼgá gáʼñun ga̱jma̱a̱ maxnún tsiakii a̱ngiu̱lú náa mbaʼa congregación.

Pablo niʼthúu̱n Timoteo: “Bi̱ nandún muni ñajunʼ Jeobá majuixkhún”. Timoteo nixkháá ga̱jma̱a̱ nixuda̱ʼ náa guʼwá e̱jua̱nʼ ga̱jma̱a̱ numuu fe ndrígóo. Mú ikhaa nixtáa gagi numuu rí xúʼko̱ ma̱ndoo masngájma rí nindxu̱u̱ jmbii náa Jeobá.

Pablo niʼthún filipenses: “Makuʼmáa Timoteo náa ikháanʼla. Ikhaa maʼsngála xú káʼnii gúʼgua̱ má xúʼko̱ náa kamba̱a̱ rí gajkhun ga̱jma̱a̱ xú káʼnii gutaráʼa”. Pablo nikumu̱u̱ kaʼyoo Timoteo. Mbóó nini ñajunʼ Dios mba̱yu̱ʼ tsiguʼ ga̱jma̱a̱ nimbáxu̱u̱n májánʼ.