Nakáwíin náa mbá chímba̱a̱ ku̱ba̱ʼ

¡ATAYÁÁ, barco rí narmáʼáan náa iyaʼ! ¡Na̱jkha̱ rajmigu! Lá natañún xa̱bu̱ bi̱ nakixi̱i̱n náa awúun iyaʼ ráʼ. Tikhun kuwa raguaʼnu náa rawunʼ iyaʼ. Lá xtáa Pablo ikhí ráʼ. Guʼyáá ndiéjunʼ xtáa ragíʼnuu.

Garmáʼáan a̱jkia̱nʼ, rí Pablo nixtáa a̱jma̱ tsiguʼ náa guʼwá e̱jua̱nʼ dí rígá náa xuajin Cesarea. Ikhú Pablo gajmíi̱n eʼwíínʼ xa̱bu̱ bi̱ kuwa náa guʼwá e̱jua̱nʼ nagún kudiin náa barco rí na̱jkha̱ náa xuajin Roma. Índo̱ kuwa mijngii náa gíwanʼ chímba̱a̱ ku̱ba̱ʼ ndrígóo Creta, nixnúu gakhi̱i̱ wéñuʼ ruʼwa ga̱jma̱a̱ giñánʼ. Xa̱bekha nánguá xú magún kuñu̱u̱n barco. Ga̱jma̱a̱ rí mbiʼi nánguá xú mbuyáá A̱jkha̱ʼ ga̱jma̱a̱ rí mbruʼun nánguá xú mbuñún a̱ʼgua̱a̱n. Nda̱wa̱á kayuʼ, índo̱ ninújngoo mba̱yu̱ʼ mbiʼi, xa̱bu̱ bi̱ nagún náa barco nánguá nikumu̱ún rí makáwíin.

Ikhú Pablo natuxu̱u̱ naʼthí: ‹Nimbáa dí ikháanʼ xákháñu; i̱ndó barco rí mambáa. Numuu rí mbruʼun ni̱ʼkha̱ náa ikhúúnʼ mbáa ángel ndrígóo Dios ga̱jma̱a̱ niʼthúnʼ: “¡Xámiñaʼ, Pablo! Gíʼmaa rí midxu̱ʼnú náa inuu Xa̱bu̱ Ñajunʼ César bi̱ xtáa náa xuajin Roma. Ga̱jma̱a̱ Dios maʼni káwíin xúgínʼ bi̱ nagún ga̱jma̱á ni̱ndxa̱ʼ”.›

¡Índo̱ niʼni tikunduʼun rí mbiʼi 14 asndu nákha nigi̱ʼdu̱u̱ nixnúu ruʼwa ga̱jma̱a̱ giñáʼ, xa̱bu̱ bi̱ nagún kuñu̱u̱n barco ndiyáá rí nánguá mijnu̱ʼ iyaʼ! Rí mbruʼun nimiñun rí barco maxpatuma náa itsí, ikhú nixumaʼ ajua̱nʼ rí mbiʼyuu ancla náa awúun iyaʼ. Imba̱ néjtsuu miʼcha̱ nduyáá rawunʼ lamáa. Ikhú nigún kuñu̱u̱n barco asndu ikhí.

Índo̱ naguanu mijngii náa rawunʼ lamáa, ikhú naʼdu barco náa jui̱ʼi̱. Ikhú iyaʼ naxpatuma gakhi̱i̱ wéñuʼ náa barco, ga̱jma̱a̱ nagíʼdu̱u̱ naguámbáa barco. Xa̱bu̱ bi̱ kayá edxu̱u̱ náa soldado, naʼthí: ‹Xúgínʼ bi̱ najmañún magun náa inuu iyaʼ, aʼgua̱ asndu náa rawunʼ lamáa; tikuanʼ ganguxáanʼ nda̱wa̱á, gajmala xuíʼtóo barco mu muʼgua̱ náa inuu iyaʼ›. Ikhaa rúʼko̱ rí nuni, ga̱jma̱a̱ mbá 276 xa̱bu̱ bi̱ nikuwa náa barco naguanu májánʼ náa rawunʼ lamáa, xó má niʼthí ángel marigá.

Náa gíwanʼ chímba̱a̱ ku̱ba̱ʼ rí mbiʼyuu Malta. Xa̱bu̱ bi̱ kuwa ikhí ra̱ʼkhá tháán májánʼ a̱jkiu̱u̱n, ga̱jma̱a̱ numbañún xa̱bu̱ bi̱ niguwáʼ ga̱jma̱a̱ barco. Índo̱ naʼni̱i̱ májánʼ mbiʼi, Pablo nuxuʼmaa maʼga̱ náa imbo̱o̱ barco mu magun kuya̱a̱ náa xuajin Roma.