Mbáa dxámá bi̱ niʼgu

¡ATAYÁÁ! Ndiéjunʼ xtáa rarígá gi̱i̱ rá. Lá nigawúnʼ wéñuʼ dxámá bi̱ kriga̱a̱ mbayííʼ ráʼ. ¡Atayáá, mbáa xa̱biya̱ bi̱ nagájnuu náa guʼwá nindxu̱u̱ Pablo! Lá nandoo natayáá Timoteo aʼkhi̱ ma̱ngaa ráʼ. Lá nixpátriguíi náa ventana dxámá bugi̱ ráʼ.

Xúʼko̱, ikhaa rúʼko̱ dí nirígá. Pablo xtáa raxná mbá discurso náa discípulos bi̱ kuwa náa xuajin Troas. Ikhaa ndaʼyoo rí ní xáʼñúún mbayuuʼ mbiʼi mbu̱júu̱ numuu rí magajnúu maʼga̱ imba̱ néjtsuu ga̱jma̱a̱ barco. Ikha jngó niʼthí má xúʼko̱ asndu índo̱ niʼni tikunduʼun.

Dxámá bugi̱ nigumbiʼyuu Eutico, ikhaa nigi̱ʼi̱ náa ventana, ga̱jma̱a̱ ikhí má niguanúu niʼgu. ¡Ajtsú piso gíʼdoo guʼwá náa nixpatriguíi! Ikha jngó nandoo natañún xa̱bu̱ rí kuwa raxmiéjunʼ wéñuʼ. Índo̱ xa̱bekha nuxuxi̱i̱ dxámá, nduyáá rí nigíʼnuu. ¡Nikháñu!

Índo̱ Pablo ndaʼyoo rí dxámá nikháñu, nabóoʼ náa kri̱ga̱a̱ ga̱jma̱a̱ ndayaráʼa. Ikhú naʼthí: ‹Xaxmiéjuanla. ¡Ikhaa xtáa májánʼ!›. ¡Gajkhun má nindxu̱u̱! ¡Rígi̱ nindxu̱u̱ mbá milagro! ¡Pablo nikuxi̱i̱ dxámá! Ra̱ʼkhá tháán nikuwa gagi xúgínʼ xa̱bu̱.

Xúgínʼ natsimaan mbu̱júu̱ náa guʼwá ga̱jma̱a̱ nuphiʼtsu. Pablo naʼthí má xúʼko̱ asndu índo̱ najtsi. ¡Mú xúgi̱ Eutico nánguá niʼgu! Ikhú Pablo, Timoteo ga̱jma̱a̱ bi̱ nagún gajmiún natsimún náa barco. Lá natayáá náa egún xáʼ.

Itháan mambóo rí maʼni ajtsú nutu rí ni̱jkha̱ gáʼtaraʼa Pablo. Ajtsú tsiguʼ nixtáa náa xuajin Éfeso. Ikha jngó, gi̱i̱ ndijyúuʼ itháan ki xóo rí maʼni a̱jma̱ nutu náa ni̱jkha̱ gáʼtaraʼa.

Nda̱wa̱á rí nigájnuu náa xuajin Troas, barco nawi̱ji̱ nguáthá mbiʼi náa Mileto. Numuu rí xuajin Éfeso na̱nguá guanúu mitsinguánʼ, Pablo nandxaʼwún xa̱bu̱ wanuu bi̱ kuwa náa congregación dí rígá náa xuajin Éfeso mu maguwáʼ náa Mileto mu i̱ndó mbiʼi rúʼko̱ gaʼtamijna gajmíi̱n. Nda̱wa̱á, índo̱ barco na̱jkha̱, ¡a̱ngiu̱lú nakuwa gíná índo̱ nduyáá na̱jkha̱a̱ Pablo!

Nda̱wa̱á kayuʼ barco natanga̱a̱ náa Cesarea. Pablo naguanúu gi̱i̱ náa goʼwóo discípulo Felipe, ikhú xa̱bu̱ gaʼyee bi̱ mbiʼyuu Ágabo naʼthí rí índo̱ Pablo gaʼganú náa xuajin Jerusalén muxuda̱ʼ náa guʼwá e̱jua̱n. Ga̱jma̱a̱ xúʼko̱ má nirígá, xó má niʼthí Ágabo. Índo̱ niʼni má a̱jma̱ tsiguʼ rí xtáa náa guʼwá e̱jua̱nʼ dí rígá náa xuajin Cesarea, ikhú nuxuʼmaa Pablo náa Roma náa xtáa Xa̱bu̱ Ñajunʼ bi̱ mbiʼyuu César mu ikhaa maʼnimbánuu xkujndu ndrígóo. Guʼyáá ndiéjunʼ nirígá índo̱ nigájnuu ni̱jkha̱ náa Roma.