Mbá nuxi̱ʼ Ku̱ba̱ʼ mitsaan

ATAYÁÁ ixi̱ mba̱ʼu̱, ixi̱ ri̱ʼi̱ mitsaan ga̱jma̱a̱ kúbá rí mitsidanʼ wéñuʼ. Lá ragájkhun rí mitsaan wéñuʼ rígi̱ ráʼ. Atayáá, aña̱ʼ bi̱ xtáa rakuiʼtsu náa ñawúunʼ dxámá. Ga̱jma̱a̱ atañún león ga̱jma̱a̱ wáyú bi̱ guájun náa raxa. Lá naniguaʼ maraxtaa náa mbá guʼwá o náa mbá Ku̱ba̱ʼ xóo rígi̱ ráʼ.

Dios nandoo rí ikháánʼ maraxtaa kámuu mbiʼi náa tsu̱du̱u̱ Ku̱ba̱ʼ mitsaan, náa ní xarigá gaʼkhu rí kuwa ruraʼní xa̱bu̱ rí mbiʼi xúgi̱. Ikhaa rígi̱ rí naʼthí Biblia marigá náa xa̱bu̱ bi̱ makuwa náa tsu̱du̱u̱ Ku̱ba̱ʼ mitsaan. ‹Dios maxtáa gajmíi̱n ikhiin. Ní xákhañun xa̱bu̱ ní rí xtambiyaʼ, ní ga̱ʼkhu̱. Numuu rí xúgíʼ dí nirígá nákha ginii niguámbáa.›

Jesús maʼni rígi̱ rí májánʼ wéñuʼ. Lá natayáá nguáná garigá rá. Xúʼko̱, nda̱wa̱á rí niʼni gámbáa xúgíʼ dí ra̱májánʼ náa tsu̱du̱u̱ Ku̱ba̱ʼ ga̱jma̱a̱ nda̱wa̱á rí niʼni gámbíin xúgínʼ xa̱bu̱ bi̱ ra̱míjínʼ. Garmáʼáan a̱jkia̱nʼ, índo̱ nixtáa Jesús náa tsu̱du̱u̱ Ku̱ba̱ʼ niʼni thanún xúgínʼ xa̱bu̱ bi̱ niʼniún nandii, ga̱jma̱a̱ asndu nikuxi̱i̱n tikhuun xa̱bu̱ bi̱ nikháñun. Xúʼko̱ ni̱jkha̱nú nisngajma rí maʼni náa xúgíʼ tsu̱du̱u̱ Ku̱ba̱ʼ xóo Rey náa Xa̱bu̱ Ñajunʼ ndrígóo Dios.

¡Gundxaʼwamijna dí ra̱ʼkhá tháán mitsaan gaʼni náa nuxi̱ʼ Ku̱ba̱ʼ mitsaan! Jesús, ga̱jma̱a̱ tikhun bi̱ gáraʼwíin, maʼtáñajunʼ gajmíi̱n mekhuíí. Xa̱bu̱ Ñajunʼ bugi̱ mañawu̱u̱n xúgínʼ bi̱ gakuwa náa tsu̱du̱u̱ Ku̱ba̱ʼ ga̱jma̱a̱ maʼni rí makuwa gagi xúgínʼ xa̱bu̱. Guʼyáá ndiéjunʼ gíʼmaa muʼni mu xúʼko̱ Dios maʼni rí makuwáanʼ kámuu mbiʼi náa tsu̱du̱u̱ Ku̱ba̱ʼ mitsaan.