Kíxnuu 4

Tsáa lá nindxu̱u̱ Gixa̱a̱.

Ná lá ni̱ʼkha̱, Gixa̱a̱. (1, 2)

Xú káʼnii eʼninduwíín xa̱bu̱. (3-7)

Ñájunʼ giʼmáánʼ mañajún jti̱i̱n Gixa̱a̱. (7)

1. Ajngáa «gixa̱a̱» nandoo gaʼthi mbáá bí naʼti ndu̱wa̱ʼ dí ra̱májánʼ wéñuʼ ga̱jma̱a̱ numuu imba̱a̱ xa̱bu̱. «Gixa̱a̱» nandoo gaʼthi bí giʼdo sia̱nʼ bí nakuximinaʼ. Xúʼkhii̱n ethan bí phú giʼdo sia̱nʼ ga̱jma̱a̱ Dió. Nákha gini nindxu̱u̱ mbáá ánkli kaʼwi xtáa ga̱jma̱a̱ Dió mekuíí, mú nda̱wa̱á nijñeko wéñuʼ mangoo nindoo magruigú gamajku rí kaʼyo Dió magruigú (Mateo 4:8-10).

2. Ánkli bugi̱, Gixa̱a̱, niʼthámijna ga̱jma̱a̱ Eva nijmiu mbáá abu̱nʼ jma̱a̱, xtujto, niʼni rí xaʼnimbo̱o̱ rí eʼthi Dió. Xúʼkhii̱n Gixa̱a̱ nindoo ma̱wi̱ji̱ náa naʼtáñajunʼ Dió bí phú mba̱a̱. Ndu xóo xaʼtañajunʼ májánʼ Dió, mangoo xaxnún rí májánʼ xa̱bi̱i̱. Mangoo nindoo gaʼti rí nimbáá xa̱bu̱ ma̱wi̱ji̱ jmbu náa kambo̱o̱ Dió. Índo̱ niʼni xúʼkhii̱n nirtaximináʼ xóo mbáá xa̱bu̱ bí giʼdo sia̱nʼ ga̱jma̱a̱ Dió. Ikha jngó nigumbiʼyuu Gixa̱a̱ (Génesis 3:1-5; Job 1:8-11; Rí huasjŋgajma Juan 12:9).

3. Gixa̱a̱ nagi̱ʼ naʼninduwíín xa̱bu̱ mú rí munimba̱a̱ ikhaa (2 Corintios 11:3, 14). Mbó rí najmuu nindxu̱u̱ kamba̱a̱ ragajkhun. Ámu mbó kamba̱a̱ naʼsngáá rí ndu̱wa̱ʼ ga̱jma̱a̱ numuu Dió, rí phú xtáa raʼni rí nandoo Gixa̱a̱ (Juan 8:44). Xa̱bu̱ bí kúwi̱i̱n náa kamba̱a̱ dí ragajkhun ekumún rí nduyamajkuíí Dió bí gajkuwín, mú bí phú nuni ñajunʼ ikhaa má Gixa̱a̱, ikhaa ñajunʼ Dió ná numbaa rígi̱ (2 Corintios 4:4).

4. Imbo̱o̱ rí najmuu Gixa̱a̱ mú magiʼdiin xa̱bu̱ majñunʼ ikhaa ma nindxu̱u̱ xawan. Tikhun xa̱bu̱ nutakañun espíritu mú muñewu̱u̱n, muniu̱n dí ra̱májánʼ eʼwíínʼ, mbuyaa dí gugiʼnín nda̱wa̱á o muni milagru. Gixa̱a̱ nindxu̱u̱ sieki̱i̱ dí ra̱májánʼ wéñuʼ rí xtáa ki̱dxu̱ʼ xúgíʼ rígi̱. Ámu nandulúʼ muʼni dí nanigu̱ʼ Dió ragiʼmáanʼ muʼgua nditáan gajmiulúʼ xawan (Deuteronomio 18:10-12; Hechos 19:18, 19).

5. Gixa̱a̱ naʼninduwíín xa̱bu̱ ga̱jma̱a̱ rí nunimba̱mijna̱ wéñuʼ ga̱jma̱a̱ rí xó xa̱bu̱ nindxu̱u̱n mangoo nduyamajkún Xa̱bu̱ Ñajunʼ. Tikhun xa̱bu̱ ekumún rí xuajñún o xó xa̱bu̱ nindxu̱u̱n itáan guaʼda numúun ra̱ʼkháa xó eʼwíínʼ. Mú ragajkhun rúʼko (Hechos 10:34, 35). Eʼwíínʼ guaʼti̱i̱n rí Xa̱bu̱ Ñajunʼ gunimbánii xúgíʼ xkujndu rí eríga̱ ná numbaa. Rí nuni xúgi̱, nunigaʼdunʼ Reino ndrigóó Dió, mbáwii Reino maʼnimbánu xkujndu ndrigulúʼ (1 Corintios 15:24).

6. Imbo̱o̱ rí ejmuu Gixa̱a̱ maʼninduwíín xa̱bu̱ rí naxkaxi̱i̱n maʼndún muni wéñunʼ dí ra̱májánʼ xó aʼkhá. Jeobá naʼtulúʼ rí xuʼni dí ra̱májánʼ wéñuʼ numuu rí ndaʼyoo rí maʼnigacháan (Gálatas 6:7, 8). Ajndu makuwíín tikhun xa̱bu̱ bí maʼndún rí matani xóo eni ikhíínʼ. Mú gakumaʼ rí bí phú nandoo matani xúgíʼ rúʼko ikhaa má Gixa̱a̱ (1 Corintios 6:9, 10; 15:33).

7. Gixa̱a̱ najmuu rí muxkhaʼ murikhaʼ mú matatsiʼñáanʼ Jeobá. Ajndu tikhun angianʼ makiʼníin wéñuʼ numuu rí ikháánʼ nathatsiga̱jma̱a̱ Biblia. Mbáá ajndu makuwíín eʼwíínʼ bí munduʼwajmáán. Mú tsáa la niʼni rí maraxtaa. Gixa̱a̱ nandoo maʼnimiñáanʼ mú matatsiʼñáanʼ rajmañaʼ numuu Jeobá. Xatatsiʼñáaʼ rí ikhaa maʼngo̱o̱ (Mateo 10:34-39; 1 Pedro 5:8, 9). Ámu ikháánʼ naʼngaʼ nañajún jti̱i̱n Gixa̱a̱, mandoo matani gaʼdxii Jeobá mangoo matasnga̱jmá rí nanigua̱ʼ maʼtáñajunʼ ikhaa (Proverbios 27:11).

[Xtiʼkhu rí na̱ʼkha̱ náa ináa 9]

Kamba̱a̱ ragajkhun, xawan mangoo rí nunimba̱ʼu̱mijna̱ ga̱jma̱a̱ numúun xojñún, ikha ríʼkhín naʼninduwíín xa̱bu̱

[Xtiʼkhu rí na̱ʼkha̱ náa ináa 9]

Ámu najmañaʼ má xúʼkhii̱n ga̱jma̱a̱ numuu Jeobá maʼngaʼ mañajún jti̱i̱n Gixa̱a̱