Kíxnuu 8

Tsíín lá bí sia̱nʼ gajmíín Dió

Bí phú sia̱nʼ ga̱jma̱a̱ Dió ikhaa máʼ Gixa̱a̱. Ikhaa ñajunʼ ánkli bí nikuxi̱minaʼ náa inuu Jeobá. Gixa̱a̱ nagiʼdu̱u̱ máʼ xúʼkhii̱n ga̱jma̱a̱ Dió mangoo naʼniún wéñuʼ ajngáá xa̱bu̱ numbaa. Gixa̱a̱ ra̱májánʼ kayuuʼ nindxu̱u̱. Mindu̱wa̱ʼ mangoo nagudíín eʼwíínʼ xa̱bu̱ (Juan 8:44).

Eʼwíínʼ ánkli nimbáxu̱u̱n gajmiún Gixa̱a̱ nixu̱xi̱mi̱jna̱ náa inuu Dió. Náa ajngáa raunʼ Dió nagumbiʼñún xa̱bu̱ wéñiʼ. Xó má Gixa̱a̱, xa̱bu̱ wéñiʼ jua̱ʼda̱ sia̱nʼ gajmiún xa̱bu̱ numbaa. Nanigu̱nʼ muniu̱n dí raʼkhí xa̱bu̱ (Mateo 9:32, 33; 12:22). Jeobá maʼnimbáti̱ga̱a̱ Gixa̱a̱ gajmíín xa̱bu̱ wéñiʼ kámuu mbiʼi. Imbá chiʼgi̱ʼ mbiʼi guanuu muniu̱n dí raʼkhí xa̱bu̱ numbaa (Ri huasjŋgajma Juan 12:12).

Ámu nandulúʼ mambaxulúʼ májánʼ gajmiulúʼ Dió, ragiʼmáanʼ muʼni rí enigu̱ʼ Gixa̱a̱. Gixa̱a̱ gajmíín xa̱bu̱ wéñiʼ ndrigio̱o̱ nawiñunʼ kuyaa Jeobá. Naguun kudamijná sia̱nʼ gajmiún Dió xúʼkhii̱n má mangoo nandun muʼni mangáanʼ. Ikha jngó, giʼmaa muraʼwi tsáa eyuluʼ muʼni gaʼdxii: Gixa̱a̱, Jeobá che̱ʼ. Ámu nandulúʼ makuwánʼ kámuu mbiʼi, giʼmáanʼ muraʼwi muʼni ñajunʼ Jeobá. Gixa̱a̱ na̱jma̱ñuu mbaʼa enii xú maʼni nduwiinʼ xa̱bu̱ mangoo najmuu mbaʼa tsaʼkha mú mandoo maʼni nduwiinʼ xa̱bu̱. Xúʼkhii̱n na̱jkha̱núu naʼni nduwiinʼ mbíʼín xa̱bu̱ (Ri huasjŋgajma Juan 12:9).