Kíxnuu 10

Xúgíʼ rí naguiyuʼ kaʼyoo Dió

Xú káʼnii giʼmáánʼ mataya̱a̱ xúgíʼ rí Dió naʼti dí ra̱májánʼ. (1)

Náa lá biʼyaa rí tsejmaa rí xóo mataba̱a̱ʼ ga̱jma̱a̱ʼ mbáá ra̱májánʼ nindxu̱u̱ rá. (2)

Xú káʼnii giʼmín mbuyaa xtujtaa bí kristiano. (3) Mangoo gitsíin rí matadaa mbújkha̱a̱. (3) Rígaa tsikuwaʼ. (3)

Rí nuni xuíí xá. (4)

Jma̱a̱ bí naguun náa xa̱bu̱ xawan. (5)

Ga̱jma̱a̱ bí najngi̱i̱n rá. (6)

Xú káʼnii gandoo mbáá maʼnikriaminaʼ ga̱jma̱a̱ xúgíʼ dí ra̱májánʼ rá. (7)

1. Xa̱bi̱i̱ Dió nanduun kuyaa rí májánʼ, mú mangoo guaʼda rí majmañún maguiñunʼ kuyaa dí ra̱májánʼ (Romanos 12:9). Rígi̱ eyoo gaʼti rí muʼni gaʼduun tikhuu rí naguiyuʼ kaʼyoo Dió. Náa lá biʼyaa tikhuu rúʼko rá.

2. Fornikasio̱n: Bí kúwi̱i̱n mbó ajndu nangua enigu̱nʼ, bí ninigúnʼ nabo̱o̱ʼ ga̱jma̱a̱ imba̱a̱, bí nabo̱o̱ʼ ga̱jma̱a̱ xujkú, bí nabo̱o̱ʼ ga̱jma̱a̱ ndxajuu, mangoo xa̱biya̱ bí nabo̱o̱ʼ jma̱a̱ xa̱biya̱ ga̱jma̱a̱, nindxu̱u̱ aʼkhá mitsaʼkhuun náa inuu Dió (Levítico 18:6; Romanos 1:26, 27; 1 Corintios 6:9, 10). Ámu mbáá xa̱bu̱ ga̱jma̱a̱ mbáá aʼgu̱ kúwi̱i̱n mbó ajndu nangua nikrujngúún náa inuu i̱yi̱i̱ʼ, giʼmaa muniñamijna̱a̱, ámu nangua, giʼmín munigu̱nʼ májánʼ (Hebreos 13:4).

3. Xtujtaa, gitsíin rí matadaa mbújkha̱a̱: Jeobá Dió nangua xú maʼnindu̱wa̱ʼ (Tito 1:2). Ikha jngó xa̱bu̱ bí nanduun muni rí nanigu̱ʼ ikhaa ragiʼmín munindu̱wa̱ʼ (Proverbios 6:16-19; Colosenses 3:9, 10). Xúgíʼ gitsíin rí nudaa mbújkha̱a̱ naʼni rí maʼnduun maguaʼda itáan. Ikha jngó kristiano nangua etsíin náa nudaa mbújkha̱a̱ ajndu má tséxna mbújkha̱a̱ náa nagañuun wayu (Efesios 5:3-5). Nangua enikuʼwáʼ ndí má tsétsí rí nduyaa rí kijniku̱ʼwáʼ ajndu má tsiyeguun rí ra̱ʼkháa ndrigu̱u̱n (Éxodo 20:15; Efesios 4:28).

4. Bí nakiʼnáá wéñuʼ ajndu naʼni xuíí: Xa̱bu̱ bí nakiʼnáá wéñuʼ ajndu najkakayáa maʼni xuíí (Génesis 4:5-8). Bí nuni xuíí nangua xú mambaxún májánʼ gajmiún Dió (Salmo 11:5; Proverbios 22:24, 25). Índo̱ mbáá naʼniulu dí raʼkhí, ra̱májánʼ matangáanʼ muʼni̱i̱ xóo rí niʼniuluʼ. (Proverbios 24:29; Romanos 12:17-21.)

5. Bí naʼni xawan: Tikhun xa̱bu̱ nuthun espíritu mambañuun mú maʼni̱i̱ ga̱jma̱a̱ nandii rí guaʼda. Tikhun nuniu̱u̱n, bí sŋaʼ gajmiún mú rí maʼniún nandii o ajndu muradíín. Ki̱dxu̱ʼ xúgíʼ rígi̱ xtaa Gixa̱a̱. Ikha jngó kristiano ragiʼmín muni nditáan kayuʼ rígi̱ (Deuteronomio 18:9-13). Rí maraxtaa mijngii náa Jeobá mambayaaʼ mu xajngriguin (Proverbios 18:10).

6. Bí najngi̱i̱n: Rí migi̱i̱n mbá chiʼgi̱ʼ bino, serbésa̱ xúʼkhii̱n má iʼwaaʼ iyaaʼ najnga̱a̱ ra̱ʼkháa má ra̱májánʼ (Salmo 104:15; 1 Timoteo 5:23). Mú Dió tsíyoo majnga̱a̱n ajndu má migi̱i̱n wéñuʼ (1 Corintios 5:11-13; 1 Timoteo 3:8). Rí migi̱i̱n wéñuʼ maʼni rí maʼniaʼ nandii mangoo ajndu maraʼdaa xkujndu náa guʼwáʼ. Ajndu mangaa ramiʼskho maʼga kañaan matani iʼwaaʼ dí raʼkhí (Efesios 5:18).

7. Xa̱bu̱ bí nuni xúgíʼ rí Dió naʼthi dí ra̱májánʼ «xataʼjanli rí ná naʼtañajunʼ Dió» (Gálatas 5:19-21). Ámu gajkhun rí nandaaʼ xtayáa Dió mangoo nandaaʼ matani gaʼdxii, mandoo matanikriaminaʼ ga̱jma̱a̱ xúgíʼ ríʼkhín (1 Juan 5:3). Gajmañaʼ maguiyaaʼ xtayáa rí Dió naʼti dí ra̱májánʼ (Romanos 12:9). Gambaxa̱ʼ gajmiaʼ xa̱bu̱ bí nuni rí májánʼ rí nandoo Dió (Proverbios 13:20). Angiulúʼ kristiano bí najmañún maʼnduun mumbayulúʼ (Santiago 5:14). Dió mambayaaʼ ámu natagríga̱a̱ (1 Pedro 5:7).

[Xtiʼkhu rí na̱ʼkha̱ náa ináa 20 ga̱jma̱a̱ 21]

Dió naguiyuʼ kaʼyoo bí najngi̱i̱n, tsikuwaʼ, gitsíin rí nudaa mbújkha̱a̱ mangoo bí nuni xuíí