Kíxnuu 13

Xú gandoo mataxkamaa kamba̱a̱ gajkhun

Lá nanigu̱ʼ Dió xúgíʼ kamba̱a̱, o mbó rí enigu̱ʼ jche̱ʼ. (1)

Ndíjkha rígá mbaʼa kamba̱a̱ rí nuti rí ñajúnʼ kristiano. (2)

Xú gandoo ikháánʼ gatatsiʼnúnʼ bí ñajúnʼ kristiano gajkhun. (3-7)

1. Jesús nigiʼ mbóó kamba̱a̱ kristiano gajkhun. Ikha jngó, rí mbiʼi xúgi̱, giʼdo makuwíín nguejmi̱i̱n xa̱bi̱i̱ gajkhun ndrigóó Jeobá Dió (Juan 4:23, 24; Efesios 4:4, 5). Biblia naʼsngáá rí nguati̱i̱n bí najngruigu̱u̱n náa kamba̱a̱ cha̱ja̱nʼ rí najkha kagu̱u̱n makuwá kámuu mbiʼi (Mateo 7:13, 14).

2. Biblia niʼti rí índo̱ gakañun xúgínʼ apóstoles mato̱ʼo̱o̱ mañú mañú náa nawi̱i̱n bí kristiano iʼwáá kiʼsngáá dí ragajkhun jamí rí tseʼsngáá náa Biblia. Makuwíín xa̱bu̱ bí muxmajtiin bí nunimbu̱u̱n ajngáa raunʼ Dió jamí muniu̱n dí muni wajimijna rí ná xagun ki̱dxu̱ʼ kristo (Mateo 7:15, 21-23; Hechos 20:29, 30). Ikha jngó nduʼyáá dí rígá mbaʼa enii kamba̱a̱ rí nuti dí nindxu̱u̱n kristiano. Xú káʼnii gandoo guniʼnúnʼ bí kristiano gajkhun rá.

3. Rí phú nagajnuriyoʼ rí eni kristiano gajkhun rí nandún kuyamijná ka̱nikhiin (Juan 13:34, 35). Nangua kiʼsgúún rí munimba̱mijna̱ náa eʼwíínʼ xa̱bu̱ ga̱jma̱a̱ rí xú xa̱bu̱ nindxúun. Nangua má esngúún rí maguiñunʼ kuñún eʼwíínʼ bí kúwi̱i̱n imba niʼka xuajin (Hechos 10:34, 35). Ikha jngó nangua eguun ná eríga̱ agu̱ʼ xkujndu. Bí kristiano gajkhun nduyamijná ndu xóo ka̱nikhiin (1 Juan 4:20, 21).

4. Imbo̱o̱ tsinaʼ rí nakujmaa náa kamba̱a̱ gajkhun rí nduyamajkuíí wéñuʼ Biblia. Nduyáá xó Ajngáa raunʼ Dió mangoo nunimbu̱u̱n rí eʼthi (Juan 17:17; 2 Timoteo 3:16, 17). Ikhíínʼ eyaa, rí Ajngáa raunʼ Dió itáan giʼdo numuu nangua xúʼkhii̱n ku̱ma̱ o kustumbre ndrigu̱u̱n xa̱bu̱ numbaa (Mateo 15:1-3, 7-9). Nugi̱ʼ nakúwi̱i̱n xó má eʼthi ikhí. Ikhíínʼ nangua etaraʼa mbá nutu imbóó rí eni (Tito 1:15, 16).

5. Bí naguun ná kamba̱a̱ gajkhun giʼdo mangoo rí mbuyamajkuí nambiʼyuu ndrigóó Dió (Mateo 6:9). Jesús nixná ma̱jma̱ʼnuʼ nambiʼyuu ndrigóó Dió, Jeobá, bí kristiano gajkhun giʼmín muni má xúʼkhii̱n mangin (Juan 17:6, 26; Romanos 10:13, 14). Tsíín lá bí nutaraʼa nambiʼyuu Dió ná xuajñanʼ rá.

6. Bí kristiano gajkhun giʼdo rí mutaraʼa Reino ndrigóó Dió. Xúʼko niʼni Jesús. Ikhaa niʼthi má xúʼko ga̱jma̱a̱ numuu Reino (Lucas 8:1). Mangoo, niʼtháñejúnʼ xa̱bi̱i̱ ndrigio̱o̱ mutaraʼa ajngáá rígi̱ náa xúgíʼ tsu̱du̱u̱ ku̱ba̱ʼ (Mateo 24:14; 28:19, 20). Bí kristiano gajkhun nunimbu̱u̱n rí indió Reino ndrigóó Dió ma̱ʼkha̱ khayoo rí tsímáá jamí ná xarígá xkujndu náa tsu̱du̱u̱ ku̱ba̱ʼ (Salmo 146:3-5).

7. Xa̱bi̱i̱ ndrigio̱o̱ Jesús nangua embáxu̱u̱n gajmiún numbaa xkawiʼ (Juan 17:16). Nangua e̱nda̱wa̱mi̱jna̱ gajmiún xa̱bu̱ bí nandún mudañajunʼ jamí xkujndu ndrigu̱u̱n xa̱bu̱ numbaa. Nunigaʼduun rí ejma̱a̱ náa tsu̱du̱u̱ numbaa, rí eni ikhíínʼ ga̱jma̱a̱ rí e̱ndxa̱ʼwa̱mi̱jna̱ (Santiago 1:27; 4:4). Natatsiʼnunʼ ikháánʼ xa̱bu̱ xuajñanʼ bí nusnga̱jma̱ tsinaʼ rígi̱ rí naguun ná kamba̱a̱ gajkhun raʼ.

[Xtiʼkhu rí na̱ʼkha̱ náa ináa 27]

Bí kristiano gajkhun nandún kuyamijná, nduyamajkuíí Biblia jamí nutaraʼa Reino ndrigóó Dió