Kíxnuu 14

Xú káʼnii eni ñajúnʼ bí nutaraʼa numuu Jeobá

Mbiʼi rí kuwánʼ, nguánaa nigiʼdu̱u̱ rajmaʼnún bí nutaraʼa numuu Jeobá rá. (1)

Xú eni bí nutaraʼa numuu Jeobá índo̱ nagimbu̱u̱n rá. (2)

Ná la e̱ya̱ mbújkha̱a̱ rí najmuun xá. (3)

Tsáa kaya edxu̱u̱ mámbá náa nawi̱i̱n xá. (4)

Káʼnii lá imbo̱o̱ náa nawi̱i̱n mbíʼín guaʼda mámbá tsiguʼ. (5)

Káʼnii lá ñajunʼ eguma ná phú gi̱ʼ a̱jkiu̱u̱n guʼún ndriguun bí nutaraʼa numuu Jeobá mangoo guʼwá chajkhaʼ ofisina rá. (6)

1. Mbiʼi rí kuwánʼ nigiʼdu̱u̱ rajmaʼnúnʼ bí nutaraʼa numuu Jeobá rígi̱ nijkha tsiguʼ 1870. Nákha gini nimbiʼñún bí nuni ga̱jma̱a̱ Biblia, mu tsiguʼ 1931 nidambiʼñún bí nutaraʼa numuu Jeobá (Isaías 43:10). Ndu nákha nigiʼdu̱u̱, chimbaʼín bugi nijkha raʼni mbíʼín wéñuʼ, rí xúgi̱ nindxu̱u̱n mbíʼín wéñuʼ bí nutaraʼa numuu Jeobá náa a̱jma̱ sientu mbaskiñuʼ gu̱wa̱ʼ xojin mba̱ʼu̱.

2. Mbíʼín bí nutaraʼa numuu Jeobá nawi̱i̱n ajtsú nutu rí mbá xmana. Nutháánʼ mi̱dxu̱ʼ ajndu náa má mbiʼi̱i̱ rí nawi̱i̱n (Hebreos 10:24, 25). Rí nusngáá ikhí nagajnuriyaʼ náa Biblia. Náa nagimbu̱u̱n nugiʼdi̱i̱ jamí índo̱ naguamba nugríga̱a̱ Dió, náa nawi̱i̱n «nuni jmúú náa Jeobá» ajndu xúgíʼ ámiún (Efesios 5:18, 19). Mandoo mataʼa xúʼkhíin tsiruma mangoo tse̱nda̱ʼa̱ mbújkha̱a̱ awu̱u̱n (Mateo 10:8).

3. Guʼwá náa nagimbu̱u̱n ikhí naguun mbíʼín bí nutaraʼa numuu Jeobá. Guʼwá rígi̱ nangua kijmarataa wéñuʼ, bí nutaraʼa numuu Jeobá niñajunʼ xúʼkhíin mú maguma guʼwá rígi̱. Xatañu̱u̱n xándú ndi krúsiiʼ ikhí. Mbújkha̱a̱ dí nuxná rí nagajnuu ndu náa a̱jkiu̱u̱n ikhaa ríʼkhín ejmuun. Bí nandún muruguambaa muxna chiʼgi̱ʼ mbújkha̱a̱ mandoo murajkuáá náa e̱jna̱ rí niguma gajunʼ majkuáá (2 Corintios 9:7).

4. Mámbá náa nawi̱i̱n kúwi̱i̱n bí kuya edxu̱u̱, bí naguun ginuun nusngáá (1 Timoteo 3:1-7; 5:17). Kúwi̱i̱n eʼwíínʼ xa̱bu̱ bí numbañúún bí kuya edxu̱u̱ (1 Timoteo 3:8-10, 12, 13). Nda̱wa̱a̱ nimbáá xa̱bu̱ bí itáan mba̱a̱ ná nagimbíín (2 Corintios 1:24). Xa̱bu̱ bugi nangua guaʼda nambiʼñún kagajunʼ (Mateo 23:8-10). Tsegi̱ʼ mbó xtíin rí mixtiʼkhu. Mangoo tsendrigú mbújkha̱a̱ ga̱jma̱a̱ ñajunʼ rí eni. Bí kuya edxu̱u̱ ajndu nadxuun índo̱ numbañúún bí náa nawi̱i̱n mu muni má xúʼkhíin ñajunʼ Jeobá. Numbañúún bí ndañunʼ mangoo nuxná ikha índo̱ guaʼda xkujndu (Santiago 5:14-16; 1 Pedro 5:2, 3).

5. Mangoo bí nutaraʼa numuu Jeobá naguun mámbá tsiguʼ náa nawi̱i̱n mbíʼín. Ikhú mbiʼi nawi̱i̱n mbíʼín bí nutaraʼa numuu Jeobá mu mudxawín ku̱ma̱ gajunʼ rí naʼsngáá Biblia. Mbóó rí nakujmaa má xúʼko ikhí náa nawi̱i̱n mbíʼín, rí najngún iyááʼ bí nuxunʼ discípulos (Mateo 3:13-17; 28:19, 20).

6. Xuajin Nueva York náa phú gi̱ʼ a̱jkiu̱u̱n guʼún bí nutaraʼa numuu Jeobá. Ikhí kúwi̱i̱n mbá nguati̱i̱n bí Kudadun ikhíínʼ kuyaa edxu̱u̱ bí najmañún májánʼ bí nuxnun i̱kha̱ bí nutaraʼa numuu Jeobá xúgíʼ numbaa. Mangoo, mbajndi numbaa rígá itháan rí mbá sientu guʼwá chajkhaʼ ofisina. Bí nuñajunʼ ikhí nuñajunʼ xúʼkhíin nuruwambaa nuni i̱yi̱i̱ʼ rí nagajnu náa Biblia jamí nuxuʼma maʼga. Ikhí má egajnu awaan rí xu miʼtaraʼa. Ndíjkha tsitriaʼ awaan mi̱dxu̱ʼ náa rígá guʼwá rúʼko náa mijngii xtáa rá.