Náa numuu rí gíʼmaa makuwa organizado xuajñu Dios mu muni ñajunʼ rá.

1. Xú káʼnii niʼni Dios rí xuajen Israel makuwá organizado nákha wajyúúʼ rá.

Dios niʼni organizar náa e̱ji̱n Abrahán ga̱jma̱a̱ niʼni mbá xuajen ma̱ngaa nixnúún xtángoo ndrígóo. Ikhaa nixná mbiʼyuu xuajen rúʼko̱ “Israel” ga̱jma̱a̱ ikhaa niʼni rí muñewa̱a̱n ajngóo ga̱jma̱a̱ rí xóo eyamajkuíí Dios (Salmo 147:19, 20). Ikha jngó xa̱bu̱ bi̱ kuwa xúgíʼ numbaaʼ nindoo nimbáñun rí niʼni xuajen Israel. Atraxnuu Génesis 22:18.

Dios niraʼwíín xa̱bu̱ israelitas mu manindxu̱ún xa̱bi̱i̱ ikhaa. Dí nirígá nákha wajyúúʼ nasngájma rí xa̱bu̱ ma̱ndoo makuwa májánʼ á mu nunimbu̱ún xtángoo ndrígóo Dios (Deuteronomio 4:6). Ikha jngó, rí xú káʼnii nini israelitas, iʼwíínʼ ma̱ndoo maguanu muniʼnuʼ ga̱jma̱a̱ numuu Dios bi̱ gajkhun. Atraxnuu Isaías 43:10, 12.

2. Náa numuu rí cristianos kuwa organizado rá.

Nda̱wa̱á xuajen Israel nindátigo̱o̱ rí Dios mambáñún ga̱jma̱a̱ ikhú Jeobá niriʼkuriyaʼ xuajen rúʼko̱ ga̱jma̱a̱ nigíiʼ congregación cristiana (Mateo 21:43; 23:37, 38). Bi̱ israelitas nánguá kuwa runi ñajunʼ Jeobá, bi̱ kuwa runi ñajunʼ rígi̱ nindxu̱ún cristianos gajkhun ikhiin nagumbiʼñún xóo bi̱ nutaraʼa numuu Jeobá. Atraxnuu Hechos 15:14, 17.

Jesús nikuʼmiin xa̱bi̱i̱ mu mutaraʼa náa xúgi̱ tsu̱du̱u̱ numbaaʼ ga̱jma̱a̱ xúʼko̱ mbuñíinʼ xa̱bu̱ bi̱ manindxu̱ún discípulos (Mateo 10:7, 11; 24:14; 28:19, 20). Nimbá miʼtsú na̱nguá niguma ñajunʼ rígi̱ xóo xtáa raguma xúgi̱, rí na̱jkha̱ ma̱mbá dí ra̱májánʼ rí xtáa rarígá náa numbaaʼ. Mbá rí na̱nguá nirígá nákha ginii, Jeobá nagímbíin mbaʼin wéñuʼ xa̱bu̱ náa xúgíʼ xuajen náa mbuyamajkuíí Jeobá (Rí huasjŋgajma Juan 7:9, 10). Cristianos gajkhun kúwi̱i̱n organizado mu muxna tsiakii ga̱jma̱a̱ mumbayumi̱jna̱ ka̱nikhiin. Náa xúgíʼ numbaaʼ náa rígá xuajin dí nagimbíin, mbríguu ejmañún rí eʼkha̱ raʼthí náa Biblia. Atraxnuu Hebreos 10:24, 25.

3. Rí mbiʼi xúgi̱ xú káʼnii nigi̱ʼdi̱i̱ nikuwa bi̱ nutaraʼa numuu Jeobá rá.

Bi̱ nutaraʼa numuu Jeobá rí mbiʼi xúgi̱ nigi̱ʼdi̱i̱ nikuwa nda̱wa̱á rí ninújngoo tsiguʼ 1870. Mbá chímbaʼin xa̱bu̱ bi̱ ninigajmaa Biblia nigi̱ʼdi̱i̱ nixkamaa mbu̱júu̱ rí phú xtáa raʼsngáa gajkhun Biblia. Ikhiin nijmañún rí Jesús niʼthún xa̱bi̱i̱ rí mutaraʼa, ikha jngó ikhiin nigi̱ʼdi̱i̱ nitaraʼa ga̱jma̱a̱ numuu Reino náa xúgíʼ tsu̱du̱u̱ numbaaʼ. Nákha̱ tsiguʼ 1931 nithi rí magumbiʼñún ḇi nutaraʼa numuu Jeobá. Atraxnuu Hechos 1:8; 2:1, 4, 11, ga̱jma̱a̱ 5:42.

4. Xú káʼnii ene ñajunʼ bi̱ nutaraʼa numuu Jeobá rá.

Mbiʼi rí nikuwa apóstoles, congregación cristiana bi̱ kuwa náa mbaʼa xuajen nindrigú ikha rí nuxna mbá nguáthi̱i̱n bi̱ guáʼdáá mbá ñajunʼ ga̱jma̱a̱ ninimbu̱ún rí niʼthí Jesús bi̱ Kayá edxu̱u̱ náa congregación cristiana (Hechos 16:4, 5). Xúʼko̱ má xúgi̱, bi̱ nutaraʼa numuu Jeobá náa xúgíʼ numbaaʼ nundrigú ikha rí nuxna bi̱ kuya̱ edxu̱u̱ bi̱ niʼni ma tsiguʼ kuwa runi ñajunʼ Jeobá. Ikhiin ñajúnʼ Mbá nguáthi̱i̱n bi̱ Guáʼdáá mbá ñajunʼ náa mbaʼa sucursal ndrígu̱ún bi̱ nutaraʼa numuu Jeobá. Ikhí nurawíi ajngáa, nuni i̱yi̱i̱ʼ mu miʼnigajmaa rí eʼkha̱ raʼthí náa Biblia itháan rí 600 ajngáa ga̱jma̱a̱ nuni magadráʼa náa inún mbaʼin wéñuʼ xa̱bu̱. Ikha jngó Mbá nguáthi̱i̱n bi̱ Guáʼdáá mbá ñajunʼ nandoo nuxna tsiakii ga̱jma̱a̱ Biblia ga̱jma̱a̱ nuxna ikha itháan rí 100,000 congregación dí rígá náa xúgíʼ numbaaʼ. Náa mámbá congregación kúwi̱i̱n xa̱bekha bi̱ nunimbaníí xóo má eʼthí Dios bi̱ nindxu̱ún xóo bi̱ kuya̱ edxu̱u̱ o superintendentes. Xa̱bekha bugi̱ nuñewu̱u̱n ga̱jma̱a̱ májánʼ xa̱bi̱i̱ Dios. Atraxnuu 1 Pedro 5:2, 3.

Bi̱ nutaraʼa numuu Jeobá kuwa organizado mu mutaraʼa ajngáa rí májánʼ ga̱jma̱a̱ xúʼko̱ mbuñíinʼ xa̱bu̱ mbo manindxu̱ún discípulos. Xó má nigún apóstoles xúʼko̱ má ejkua̱ mangáanʼ mámbá guʼwá (Hechos 20:20). Ma̱ngaa nuʼthúún xa̱bu̱ bi̱ nandún majmañún dí gajkhun ga̱jma̱a̱ numuu Biblia. Mú bi̱ nutaraʼa numuu Jeobá na̱nguá ñajúnʼ i̱ndó mbá organización. Ikháanʼ nindxuxuʼ xóo bi̱ kuwa náa mbá guʼwíín ga̱jma̱a̱ kuaʼdaa mbáa anu̱xuʼ bi̱ nandoo kaʼyuxuʼ. Nuñawumíjna̱xu kaníkháanʼ xóo mbáa xa̱bu̱ bi̱ nandoo kaʼyoo ndxáju (2 Tesalonicenses 1:3). Xuajñu Jeobá nindxu̱ún bi̱ kuwa itháan gagi náa tsu̱du̱u̱ Ku̱ba̱ʼ, numuu rí kuwa organizado mu muni rí naniguʼ Dios ga̱jma̱a̱ mumbañún iʼwíínʼ xa̱bu̱. Atraxnuu Salmo 33:12 ga̱jma̱a̱ Hechos 20:35.