Kíxnuu 15

Gumbáñuun eʼwíínʼ xa̱bu̱ muni rí nandoo Dió

Ndíjkha giʼmáánʼ marata rí xtaa rajmañaʼ. (1)

Tsíín gandoo maratu̱u̱n ajngáa rí májánʼ rá. (2)

Káʼnii guni eʼwíínʼ índo̱ guyaa rí tani ikháánʼ ráʼ. (2)

Nguanaa gandoo ikháánʼ marataraʼa gajmiánʼ bí kúwi̱i̱n náa nawi̱i̱n rá. (3)

1. Ikháánʼ nijmañaʼ mbaʼa rí májánʼ dí eʼsngáá náa Biblia. Ku̱ma̱ rígi̱ giʼmaa mambayaaʼ manindxa̱ʼ xóo Kristo (Efesios 4:22-24). Ikhaa má mangoo, ku̱ma̱ rígi̱ giʼdo numuu mú mandoo matrigú rí maraxtaa kámuu mbiʼi (Juan 17:3). Mú mangoo, imba̱a̱ xa̱bu̱ giʼdo maʼdxaun ajngáa rí májánʼ mú mandoo gakriaʼ. Xúgínʼ kristiano gajkhun giʼdo rí mutaraʼa. Rígi̱ nindxu̱u̱ xtángoo ndrigóó Dió (Romanos 10:10; 1 Corintios 9:16; 1 Timoteo 4:16).

2. Mandoo matagiʼdi̱i̱ maratu̱u̱n rí májánʼ rí xtaa rajmañaʼ xa̱bu̱ bí kúwi̱i̱n mijngii náa xtaa. Aratun angianʼ, bí nambáxa̱ʼ gajmiánʼ bí nathatsiga̱jma̱a̱ gajmiánʼ bí natiajunʼ gajmiánʼ. Aratun jma̱a̱ májánʼ jamí gaʼni maʼngo̱o̱ a̱jkia̱nʼ (2 Timoteo 2:24, 25). Gakumaʼ rí xa̱bu̱ nduyaa rí tani gú tseyáa dí xú rata. Ikha jngó, ámu natani rí májánʼ ikhaa ríʼkhín maʼga kagu̱u̱n eʼwíínʼ mudxawín rí garatu̱u̱n (Mateo 5:16; 1 Pedro 3:1, 2, 16).

3. Mbáá nda̱wa̱á maʼngaʼ, matanimagáaʼ rí guaxtanda̱ʼa̱ʼ mú matagiʼdi̱i̱ marataraʼa gajmiánʼ bí nutaraʼa numuu Jeobá náa nawaanʼla. Giʼdo numuu rí matani rígi̱ mu mi̱dxu̱ʼ ragaja̱a̱n náa kambo̱o̱ Dió (Mateo 24:14). ¡Ra̱ʼkhá tháán gagi gaʼni ámu natambayii mbáá maʼni ñajunʼ Jeobá jamí makanúu rí maxtáa kámuu mbiʼi! (1 Tesalonicenses 2:19, 20.)