KÍXNUU 22
Xú káʼnii gándoo marataráʼa ikháán ajngáa rí májánʼ rá.
Índo̱ ikháán nidxuʼnú nikrua̱ʼa̱a̱ rí gajkhun dí naʼsngáa Biblia, mbáa ikháán nitatsaʼwáminaʼ: “¡Xúgíinʼ xa̱bu̱ ndayóoʼ majmañún rígi̱!”. Gajkhun má xúgíinʼ xa̱bu̱ ndayóoʼ mbuyáá. Mú, mbáa namíñaaʼ índo̱ natatsaʼwáminaʼ marathu̱u̱n eʼwíinʼ dí xtaa rajmañaaʼ. Guʼyáá ndiéjunʼ gámbáyaaʼ mu xámiñaaʼ ga̱jma̱a̱ rí asndu maʼdxuu a̱jkia̱a̱nʼ marathu̱u̱n eʼwíinʼ ajngáa rí májánʼ dí naʼsngáa Biblia.
1. Xú káʼnii gándoo marathu̱u̱n bi̱ natatsiniúnʼ rí xtaa rajmañaaʼ rá.
Xa̱bi̱i̱ Jesús nithi: “Xándoo muniʼñááʼ rutha̱ rí ndi̱ya̱a̱xu̱ ga̱jma̱a̱ dí nidxáwinxu” (Hechos 4:20). Numuu dí ra̱ʼkhá tháán ninigu̱u̱nʼ rí gajkhun, ikha jngóo nindúún muthúún xúgíinʼ bi̱ gáʼngo̱o̱. Lá naku̱ma̱a̱ʼ xúʼko̱ mangáánʼ ráʼ. Á mu xúʼko̱, ma̱ndoo ma̱ta̱ya̱a̱ xóo gátani mu marathu̱u̱n jma̱a̱ gamajkhu bi̱ xtañún ma̱ngaa mígiaaʼ rí xtaa rajmañaaʼ (atraxnuu Colosenses 4:6).
Tikhu rí xóo ma̱ndoo matagíʼdi̱i̱ marata
Índo̱ garatamíjna ga̱jma̱a̱ʼ mbáa bi̱ xtayáá, ma̱ndoo matagíʼdi̱i̱ maratha̱a̱n ga̱jma̱a̱ numuu Biblia, xóo xígi̱ “Xmáná rígi̱ nijmañuʼ mbá rí gíʼdoo wéñuuʼ numuu”.
Índo̱ mígiaaʼ nandoo kháñuun o naxmiéjuunʼ, atasngájmáá mbá texto ndrígóo Biblia rí maxnúu tsiakii.
Índo̱ bi̱ natiajunʼ gajmiáanʼ gúrajxa̱a̱ʼ ndiéjunʼ nitani̱ sábado ga̱jma̱a̱ domingo, arathún dí nijmañaaʼ índo̱ nitanigajma̱a̱ Biblia o rí nijmañaaʼ náa reunión.
Atasngájmún mígiaaʼ ináa ndrígóo internet jw.org.
Arathún eʼwíinʼ makuwi̱i̱n índo̱ gátanigajmaa Biblia o arathún xóo gúni mu munda̱ʼa̱ miʼsngúún náa ináa jw.org.
2. Ndíjkha rí gíʼdoo numuu mataʼgímináʼ marataráʼa gajmiáanʼ bi̱ kúwá náa nagimbáánʼ rá.
Xa̱bi̱i̱ Jesús raʼkháa i̱ndó nithúún ajngáa rí májánʼ bi̱ niniʼniún. Jesús “nikuʼmiin magún ginuu majmi̱i̱n majmi̱i̱n náa xúgíʼ xuajen” mu mutaraʼa ikhí ma̱ngaa (Lucas 10:1). Awan rí nigájnuu mu miʼtáraʼa xúʼko̱, niyambáá rí miʼthúún mbaʼin xa̱bu̱ ajngáa rí májánʼ. Ma̱ngaa xa̱bi̱i̱ Jesús nidxún wéñuuʼ dí nitaraʼa mbá kambáxu̱u̱n (Lucas 10:17). Xú káʼnii tayáá á mu ikháán mangáán mataʼgímináʼ marataráʼa gajmiáanʼ bi̱ kúwá náa nagimbáanʼ rá.
GAJMAÑAAʼ ITHÁAN
Guʼyáá ndiéjunʼ gándoo gámbáyaaʼ mu xámiñaʼ ga̱jma̱a̱ maʼdxuu a̱jkia̱a̱nʼ marataráʼa ajngáa rí májánʼ.
3. Jeobá maxtáa ga̱jma̱á nindxa̱a̱ʼ
Tikhun xa̱bu̱ bi̱ nandún mutaraʼa, naxmiéjúnʼ ga̱jma̱a̱ numuu rí tséyáá ndiéjunʼ gúthi xa̱bu̱ o rí gundxaʼwamíjna̱ ga̱jma̱a̱ ni̱ndxu̱ún.
Índo̱ ikháán natatsaʼwáminaʼ marathu̱u̱n eʼwíinʼ rí ejkha̱ rajmañaaʼ, lá namíñaʼ ráʼ. O na̱nguá dxe̱ʼ. Náá numuu rá.
Gu̱ya̱a̱ VIDEO ga̱jma̱a̱ gutamíjnála rígi̱:
Xú káʼnii nini jiáma ga̱jma̱a̱ wa̱ʼxa̱ʼ bi̱ nigájnún náa video dí xámiñún rá.
Guraxnuu Isaías 41:10 ga̱jma̱a̱ gutamíjnála rígi̱:
Ndíjkha gíʼmaa maratajkáan á mu namíñaʼ marataráʼa rá.
Lá natayáá má ráʼ.
Mbaʼin bi̱ nindxúu̱n testigos de Jeobá xúgi̱, mangiin nikumu̱ún rí nditháan xájmiin gútaraʼa. Mbá xkri̱da mbáa xa̱bu̱ bi̱ mbiʼyuu Sergey nikumu̱u̱ rí nda̱a̱ numuu nditháan, ikha jngóo niʼniuu mingíjyúuʼ maʼtamijna gajmíi̱n eʼwíinʼ xa̱bu̱. Mboʼ mbiʼi ikhaa nigíʼdu̱u̱ niʼnigajmaa Biblia. Ikhaa naʼthí: “Maski ajndu nimíñúʼ, ni̱ni̱ mbá tsiakii mathu̱u̱n eʼwíinʼ rí xtáá rajmañuʼ. Asndu niʼniuʼ tsiánguá índo̱ ndi̱yo̱o̱ dí rúʼko̱ nimbáyuʼ maku̱mu̱ʼ rí gúʼdoʼ numuʼ ga̱jma̱a̱ niʼni rí maʼga̱nú asndu náa a̱jkiu̱nʼ kiʼsngáa ndrígóo Biblia”.
4. Arathá ga̱jma̱a̱ gamajkhu
Nákha xóó tserataraʼáá mbáa, raʼkháa i̱ndó ndayóoʼ ma̱ta̱ya̱a̱ ndiéjunʼ gáratha̱a̱n ma̱ngaa gíʼmaa ma̱ta̱ya̱a̱ xú káʼnii gíʼmaa maratha̱a̱n. Guraxnuu 2 Timoteo 2:24 ma̱ngaa 1 Pedro 3:15 ga̱jma̱a̱ gutamíjnála rígi̱:
Xú káʼnii gándoo mataʼgíʼ matanimbánii ikháán dí naʼthí náa versículo rígi̱ índo̱ garatamíjna gajmiáanʼ eʼwíinʼ xa̱bu̱ ga̱jma̱a̱ numuu Biblia rá.
Mbáa tikhun bi̱ xtañún o mígiaaʼ xánigu̱u̱nʼ dí gárata. Ndiéjunʼ gándoo matani rá. Ga̱jma̱a̱ ndiéjunʼ ragíʼmaa matani rá.
Ndíjkha rí gíʼmaa muʼtamíjná gajmiúlú ga̱jma̱a̱ gamajkhu ki xóo muʼthúún ndiéjunʼ gíʼmaa munimbu̱ún kuyáá rá.
5. Dí muʼtáraʼa ajngáa rí májánʼ naʼni makuwáánʼ gagi
Jeobá nixnúu ñajunʼ Jesús dí maʼtáraʼa ajngáa rí májánʼ. Xú káʼnii ndiʼyoo ñajunʼ rúʼko̱ Jesús rá. Guraxnuu Juan 4:34 ga̱jma̱a̱ gutamíjnála rígi̱:
Rí mu̱ʼphu̱ ganitsu dí gíʼdoo itháan rí mambáyulúʼ naʼni mbuʼya ga̱jma̱a̱ maʼdxuu a̱jkiu̱lú. Ndíjkha niʼthí Jesús rí maʼni ñajuunʼ Dios ga̱jma̱a̱ dí maʼtáraʼa ajngáa rí májánʼ nindxu̱u̱ xóo ganitsu ndrígóo xá.
Xú káʼnii ratá ikháán, ndiéjunʼ dí májánʼ gárígá á mu naratáraʼa ajngáa rí májánʼ rá.
Tikhu rí ma̱ndoo matani
Índo̱ narígá reunión dí ta̱pha̱ xmáná, ma̱ndoo ma̱ta̱ya̱a̱ xóo matagíʼdi̱i̱ marataraʼáá mbáa.
Aratháán bi̱ naʼsngáa ndiéjunʼ gíʼmaa matani mu ma̱ndoo manújngáaʼ náa reunión dí narígá ta̱pha̱ xmáná. Rí marata̱ índo̱ ganújngáaʼ mambáyaaʼ maraxtaa xawii maratamíjná gajmiáanʼ eʼwíinʼ dí xtaa rajmañaaʼ.
Gajmaaʼ náa naʼthí: “Rí nuthi tikhun” ga̱jma̱a̱ “Rí nurajxi̱ tikhun” dí na̱ʼkha̱ náa libro rígi̱ mu matani rataminaʼ, ndiéjunʼ gátriʼña̱a̱ ga̱jma̱a̱ xú káʼnii gárata índo̱ gúrajxaaʼ.
RÍ NURAJXI̱ TIKHUN: “Ndiéjunʼ nitani̱ xmáná dí nijngoo rá.”
Xóo gándoo gátagíʼdi̱i̱ marata dí nijmañaʼ náa Biblia índo̱ gúrajxa̱a̱ʼ xúʼko̱ xá.
RÍ NAGÁJNURIYO̱O̱ʼ
Dí muʼthá ajngáa rí májánʼ naʼni makuwáánʼ gagi, ga̱jma̱a̱ rí matagíʼdi̱i̱ marata na̱nguá má mingíjyúuʼ wéñuuʼ.
Rí nijmañaaʼ
Ndiéjuunʼ gándoo gaxkajxi̱i̱n mu marataráʼa ajngáa dí májánʼ rá.
Xú káʼnii gándoo gárataráʼa ga̱jma̱a̱ gamajkhu rá.
Xú káʼnii gándoo matani mu xámiñaʼ rá.
ATAYÁÁ ITHÁAN
Atayáá a̱jkhu̱ enii xóo maraxnaxí tarjeta dí mataʼaaʼ náa jw.org mu marataráʼa.
Xkrida̱ xóo ma̱ndoo maraxnaxí tarjeta rí mataʼaaʼ náa jw.org (1:43)
Atatsinuuʼ a̱jkhu̱ enii rí xóo xa̱bu̱ gíʼmaa ma̱nindxa̱a̱ʼ mu mambáyaʼ marataráʼa ajngáa rí májánʼ.
“Lá xtaa xawii ikháán mataʼñíinʼ xa̱bu̱ ráʼ.” (Bi̱ Nayejngoo, septiembre tsiguʼ 2020)
Atayáá mbá dí na̱ʼkha̱ raʼthí náa Biblia rí nambáyulúʼ mu xámiñulu muʼtáraʼa maski ajndu kaʼnííʼ xóó jiámáa o waʼxáaʼ ñajunlú.
Atraxnuu xú káʼnii gándoo marathu̱u̱n ga̱jma̱a̱ numuu Biblia bi̱ xtañún bi̱ xóó tséniʼniiʼ Jeobá.