Bi̱ nikháwíín náa ruʼwambiiʼ

XÓO e̱jkha̱ raʼni mbiʼin wéñuʼ xa̱bu̱ náa tsu̱du̱u̱ ku̱ba̱ʼ, xúʼko̱ má aʼkhá ga̱jma̱a̱ dí ra̱májánʼ nijkha̱ ramidxu̱u̱ xúgíʼ numbaaʼ. Mbáa i̱ndó Enoc, nini̱ndxu̱u̱ xa̱bi̱i̱ Diúu̱ náa tsu̱du̱u̱ Ku̱ba̱ʼ, niʼthí rí Jeobá maʼni gámbíin xúgínʼ xa̱bu̱ bi̱ nuni dí ra̱májánʼ. Mú dí ra̱májánʼ ni̱jkha̱ rajoo itháan. Asndu nikúwi̱i̱n ángeles bi̱ túnimbu̱ún rí niʼthí Jeobá, niniñanʼ ñajunʼ ndrígu̱ún mekhuíí, nini̱ndxu̱ún xóo xa̱bu̱, ma̱ngoo nidiin mbiʼin gu̱ʼu̱ asndu xú káʼnii má bi̱ ninigiunʼ. Diúu̱ taʼniin rí maʼndun munigunʼ gajmiún gu̱ʼu̱. Rí nibúu̱nʼ gajmiún gu̱ʼu̱ niwaʼdiin e̱ji̱n mbi̱jui̱i̱n wéñuʼ, ma̱ngaa mixkujiinʼ bi̱ nigumbiʼñún nefilim tsú ni̱ni̱ mamidxu̱u̱ dí ra̱májánʼ náa tsu̱du̱u̱ Ku̱ba̱ʼ. Lá nundxaʼwa̱mi̱jna̱ xú káʼnii niku̱mu̱u̱ Diúu̱ índo̱ rí ndiʼyoo dí xúgíʼ dí niʼni tséjma kayuu rígá ráʼ.

Índo̱ nikháñuu Enoc nixtáa i̱mba̱a̱ xa̱bu̱ májánʼ: Noé. Xóo má ikhaa gajmíi̱n xúgínʼ bi̱ nikúwi̱i̱n náa guʼwóo nini sie̱ki̱mi̱jna̱ dí muni dí naniguʼ Diúu̱. Mbá mbiʼi, Jeobá niʼthí rí ma̱ʼkha̱ kayóo ruʼwambiiʼ mú maʼni gámbíin xa̱bu̱ bi̱ nuni rí tséjma. Mú, tandoo makhañúu Noé bi̱ jmbii asndu má xujkhúʼ. Ikha jngó niʼthúu̱n ma̱ʼni mbó arca, nandoo, gáʼthi mbó e̱jna̱ mba̱a̱ wéñuʼ. Ikhaa gajmíi̱n bi̱ kúwi̱i̱n náa guʼwóo gíʼdo rí matu̱ʼu̱u̱n awúu̱n ikhí, mu muñambámi̱jna̱ ma̱ngaa makudiinʼ mbaʼa enii xujkhúʼ ikhí. Noé niʼnimbo̱o̱ rí niʼthí Diúu̱ ma̱ngoo ndijyúuʼ mbá a̱jma̱ skíñuʼ tsiguʼ o a̱jma̱ skiñúʼ gu̱wa̱ʼ mu tsiguʼ rí nijkha̱ ragi̱ʼi̱ raʼni arca. Mbiʼi má rúʼko̱ ikhaa «neʼtaraʼja ri jmbu» (2 Pedro 2:5). Niʼtáruʼun xa̱bu̱ rí na̱ʼkha̱ mijngii Ruʼwambiiʼ, mú nimbáa nanguá niʼdxawun. Índo̱ nijkha̱nú mbiʼi, Noé gajmíi̱n bi̱ kúwi̱i̱n náa guʼwóo nitu̱ʼu̱u̱n náa arca gajmiún xujkhúʼ. Diúu̱ má nirugua̱a̱ xkrugua, ikhú nigi̱ʼdu̱u̱ nixnúu ruʼwa.

Ruʼwambiiʼ, ndijyúuʼ a̱jma̱ skiñunʼ mbiʼi a̱jma̱ skiñúʼ mbruʼun, ni̱jníʼ iyaʼ xúgíʼ Ku̱ba̱ʼ. Táguanúu nimbáa xa̱bu̱ bi̱ naʼni dí ra̱májánʼ. Índo̱ ninújngoo mba̱yu̱u̱ʼ mbiʼi, iyaʼ nijkha̱ raguuʼ, ikhú arca nigrigu náa inuu kúbá. Ninújngoo má mbá tsiguʼ índo̱ Noé gajmíi̱n bi̱ kúwi̱i̱n náa guʼwóo mangiin xujkhúʼ nigájnaán. Noé nixnáxi tsigijñaʼ náa inuu Jeobá mú maxnáa núma̱aʼ. Diúu̱ niʼthí rí naxakunguanʼ nímba̱ miʼtsú ruʼwambiiʼ mu maʼnigámbíin xúgínʼ bi̱ niʼnii náa tsu̱du̱u̱ Ku̱ba̱ʼ. Jeobá nitsijii xtukua̱ya̱ʼ mu majmaku̱ma̱a̱ rí niʼthí.

Índo̱ nijngoo nixnúu Ruʼwambiiʼ, Diúu̱ nixná nuxi̱ʼ xtángoo. Niʼthúún rí ma̱ndoo muphu̱ xuñúunʼ xujkhúʼ, mú eʼdi xándoo muphu̱. Ma̱ngoo niʼthúún rí mamidxu̱u̱n náa xúgíʼ tsu̱du̱u̱ Ku̱ba̱ʼ. Mú tikhun túnimbu̱ún, niwi̱i̱n gajmiún xa̱bu̱ bi̱ nimbiʼyuu Nemrod mu muni mbá torre mitsídaan wéñuʼ. Mú Diúu̱ ma niʼni gachúu awan dí niriyaa. Xú káʼnii rá. Niʼni rí xa̱bu̱ bi̱ kúwi̱i̱n náa xuajin rúʼko̱ —rí nigumbiʼyuu Babel, nda̱wa̱á nigumbiʼyuu Babilonia— nithi mbaʼa enii ajngáa. Índo̱ nánguá nikru̱ʼu̱u̱n rí ethi, ikhú niniñáanʼ rí kúwi̱i̱n runi ma̱ngoo mambáa nijkha̱.

(Na̱ʼkha̱ raʼthí náa Génesis tsinaʼ mba̱ʼu̱ 6 asndu 11 ga̱jma̱a̱ Judas 14, 15.)