Najuiʼtaraʼa ajngáa rí májánʼ

ÍNDO̱ Pablo nini̱ndxu̱u̱ cristiano, nixmiéjunʼ wéñuʼ rí maʼtáraʼa ga̱jma̱a̱ numuu Reino ndrígóo Diúu̱. Mu ikhaa ndiʼyóóʼ dí ma̱ʼngo̱o̱ maraʼnu dí eʼwíínʼ mbuyááʼ murugua̱a̱. Apóstol bugi tágaaʼ kayuu dí ma̱ʼga mbá xojin ga̱jma̱a̱ i̱mba̱ raʼtáraʼa ga̱jma̱a̱ numuu Xa̱bu̱ Ñajunʼ bi̱ maʼnimbánuu rí nikudaminaʼ maʼni Diúu̱ nákha ginii ga̱jma̱a̱ numún xa̱bu̱ numbaaʼ.

Tímbá aʼphu̱ rí Pablo nigájnuu nijkha̱ náa Listra niʼnitanuu mbáa xa̱bu̱ bi̱ nigumaa gúʼxuʼ. Mbaʼin xa̱bu̱ bi̱ ndiyáá nigi̱ʼdi̱i̱ nindxaʼwa rí Pablo ga̱jma̱a̱ Bernabé, ni̱ndxu̱ún Diúu̱. Ikhíínʼ nini asndu xó má ni̱ʼngu̱u̱n rí xuxna tsigijñaʼ xa̱bu̱ náa inún. Mú, nda̱wa̱á ikhíínʼ ninimbu̱ún kuñún xa̱bu̱ bi̱ guaʼdá sia̱nʼ gajmiún Pablo niguanu nixnáá ga̱jma̱a̱ itsí. Ikhíínʼ nikumuún rí nikháñu, mu apóstol bugi ni̱ʼngo̱o̱ takháñuu, nguáta mbiʼi nda̱wa̱á niguta̱nga̱a̱ náa xuajen mu maxnúnla sie̱khi̱i̱ discípulos ndrígóo.

Itháan nda̱wa̱á, tikhun cristianos bi̱ ñajúúnʼ judío nithi ma xúʼko̱ rí bi̱ rañajúnʼ judíos munimbu̱ún tikhu Xtángoo dí nikánaa Moisés. Mú mambanúu xkujndu, Pablo nijkha̱ gaʼthúún apóstol gajmíi̱n bi̱ kuya edxu̱u̱ bi̱ kúwi̱i̱n náa Jerusalén. Índo̱ niguaʼnu nikru̱ʼu̱n májánʼ rí eʼthí Ajngáa rawunʼ Diúu̱ ga̱jma̱a̱ munda̱ʼa̱ rí mambañun espíritu santo, ikhíínʼ bugi nini i̱yi̱i̱ʼ mu ma̱ʼga náa mámbá congregación ma̱ngoo niʼthá ñajúnʼ rí xúyamajkhun xándú, rí xaphu eʼdi asndu má xujkhúʼ bi̱ nikháñu bi̱ tagadíí eʼdiu ga̱jma̱a̱ rí xubúnʼ gajmiún mbáa a̱ʼgu̱ o mbáa xa̱biya̱ bi̱ xóó tsekrujngun náa inu i̱yi̱i̱ʼ. Mbaʼa xtángoo rígi̱ «ndaʼyo», mu maski ajndu májánʼ munimbu̱ún xtángoo rígi̱, nangua eyoo gáʼthi munimbu̱ún xúgíʼ Xtángoo rí nikánaa Moisés (Hechos 15:28, 29, AMM).

Rí maʼni raga̱jma̱ aʼphu̱ rí Pablo nigájnu nijkha̱ náa Berea, náa rí xúgi̱ mbiʼyuu Grecia. Judíos bi̱ nikuwa ikhí májánʼ niriʼña Ajngáa rawun Diúu̱, tsejtsi eniga̱jma̱a̱ Ajngáa rawun Diúu̱ mu mbuyáá á mu gajkhun rí ejmañún. Nguata mba̱yu̱u̱ʼ nda̱wa̱á, Pablo ndiyóóʼ rí magayúu mbu̱júu̱ mú makríaʼ náa inún xa̱bu̱ bi̱ sia̱nʼ gajmíi̱n. Nigájnu nijkha̱ asndu náa Atenas, nijkha̱nú náa inún nguéjmi̱i̱n xa̱bu̱ bi̱ najmañún, Pablo ninújngoo niʼthí májánʼ wéñuʼ ga̱jma̱a̱ gamajkhu.

Nda̱wa̱á rí maʼni ragajtsú aʼphu̱ rí nigájnuu maʼtáraʼa, Pablo nijkha̱ náa Jerusalén. Índo̱ nijkha̱ náa guʼwóo Jeobá, mbaʼin xa̱bu̱ nigíiʼ muxiyáa. Mú soldados bi̱ kuwa náa Roma nimbayíí Pablo ma̱ngaa nigun kuya̱a̱ mu muni̱i̱ graxe̱. Mu dí xa̱bu̱ romano ni̱ndxu̱u̱, niniñanʼ maʼthí náa inuu Xa̱bu̱ Ñajunʼ bi̱ mbiʼyuu Félix. Bi̱ judíos táʼngu̱u̱n gusngajma nditháan dí Pablo gíʼdo aʼkhúun. Mú, Festo —bi̱ na̱ʼkha̱ kidxuuʼ Félix— nixtáa maxnáxi̱i̱ náa ñawúunʼ. Mu xárígá xúʼko̱ kaʼnii, apóstol ninda̱ʼa̱a̱ César, ikhí Xa̱bu̱ Ñajunʼ niriʼña̱a̱: «Naʼ inu César guidxuʼ» (Hechos 25:11, 12, AMM).

Roma gáʼni náa muturigúún ajngáa. Ikha jngó Pablo nitsimuu náa barco nijkha̱ náa Italia, mu barco rúʼko̱ nirmáʼá náa iyaʼ, ikhú Pablo niguanúu náa rí gíwanʼ chímba̱a̱ ku̱ba̱ʼ rí mbiʼyuu Malta mbiʼi rúʼko̱ naʼni miguwan wéñuʼ. Índo̱ nijkha̱nú Roma, a̱jma̱ tsiguʼ nixtáa náa guʼwá kitiʼña. Maski ajndu tuniñaʼ magajnúu ikhaa nangua nixtáa gina, niʼtáraʼa má xúʼko̱ ga̱jma̱a̱ numuu Reino xúgínʼ bi̱ niguwaʼ guya.

(Na̱ʼkha̱ náa Hechos 11:22–28:31.)