KÍXNUU 24

I̱yi̱i̱ʼ rí nakuʼma Pablo náa mámbá congregación

Pablo nakuʼma i̱yi̱i̱ʼ náa cristiano mu maxnún sie̱khi̱i̱

CONGREGACIÓN rí níkhúu nigi̱ʼi̱ mañambá mba̱a̱ wéñuʼ dí mambanúu dí wi̱ji̱ maʼni Jeobá. Mu bi̱ nagimbíín náa congregación cristiana gíʼdo dí maʼngu̱u̱n magumagíníin ma̱ngaa muraʼní xúgíʼ xkujndu dí garígá ikhí. Xú káʼnii niʼngu̱u̱n niguajun káxi̱ a̱jkiu̱ún xá. Mbá skiñúʼ i̱mba̱ i̱yi̱i̱ʼ ndrígóo Escrituras Griegas Cristianas nixnún sie̱khi̱i̱ ga̱jma̱a̱ ajngáma̱ʼa̱ rí ndiñúunʼ wéñuʼ.

Pablo ni̱ndxu̱u̱ bi̱ niʼni gu̱wa̱ʼ i̱jkhu̱ i̱yi̱i̱ʼ ginii, rí nagi̱ʼdu̱u̱ ga̱jma̱a̱ Romanos asndu nambáa ga̱jma̱a̱ Hebreos. Xúgíʼ i̱yi̱i̱ʼ rúʼko̱ tima mbiʼñún xa̱bu̱ náa minaa e̱jkha̱ o náa má congregación. Guʼyáá tikhu edxu̱u̱ rí niʼthí apóstol.

Xú káʼnii gándoo maraxtaa májánʼ ga̱jma̱a̱ xú káʼnii gambaxáʼ gajmiáanʼ eʼwíínʼ. Bi̱ xóó tsenújngun náa inuu i̱yi̱i̱ʼ nubuúnʼ gajmiún mbáa, ga̱jma̱a̱ bi̱ ninigu̱nʼ nubuúnʼ gajmiún i̱mba̱a̱ kaníí o iʼwááʼ aʼkhá mitsaʼkháan wéñuʼ á mu tseta̱nga̱a̱ a̱jkiu̱ún rí ni̱ni̱ «niŋguana xataʼjanli ri naʼ naʼtañajunʼ Dios» (Gálatas 5:19-21; 1 Corintios 6:9-11). Xa̱bi̱i̱ ndrígóo Jeobá gíʼmiin makuwíín mbá kambáxu̱u̱n gajmiún iʼwááʼ xuajin (Romanos 2:11; Efesios 4:1-6). Muxna rí guaʼda mu mumbañún angiuún bi̱ guaʼda ikháá fe gajmiún (2 Corintios 9:7). Apóstol naxkaxi̱i̱n rí mumbaʼtáa a̱jkiu̱ún náa Jeobá ma̱ngoo naxnun ajngáma̱ʼa̱: «Camba nutun uni sacun» (Tesalonicenses 5:17; 2 Tesalonicenses 3:1; Filipenses 4:6, 7). Mu rí Diúu̱ maʼdxawún, gíʼdoo rí mutajkháanʼ ga̱jma̱a̱ fe (Hebreos 11:6).

Xú káʼnii ajngáma̱ʼa̱ nixná Pablo náa mbá guʼwíin rá. Xa̱bekha gíʼmaa rí maʼndúún kuñún guʼñuún xó má eñun kuyamijná ikhíínʼ. Gu̱ʼu̱ gíʼmaa dí mbuyamajkhún ga̱jma̱a̱ káxi̱ a̱jkiu̱ún ajmbiún. Ikhaa ma, Diúu̱ gíʼthu̱u̱n dí e̱ji̱n munimbu̱ún rí guti anuún, ma̱ngoo ikhíínʼ gíʼmaa dí musngún ga̱jma̱a̱ ngajua e̱jñún ma̱ngaa xó má e̱nda̱ʼa̱ ajngáa rawunʼ Diúu̱ (Efesios 5:22–6:4; Colosenses 3:18-21).

Mapa dí nasngájma náa niʼnirámáʼ i̱yi̱i̱ʼ Pablo

Rí naʼthí maʼni Diúu̱. Xtángoo ndrígóo Moisés niñawu̱u̱n ma̱ngoo nixnún ikha bi̱ israelitas asndu índo̱ ni̱ʼkha̱nú Mesías bi̱ nijuiʼtá ma̱ʼkha̱, mu nánguá má kaʼñun cristianos munimbu̱ún xtángoo rígi̱ (Gálatas 3:24). Náa i̱yi̱i̱ʼ ndrígóo Hebreos —cristianos bi̱ nindxuún judío—, Pablo niʼthí kaʼwu kaʼnii eyoo gáʼthi xtángoo ma̱ngoo káʼni eyoo gáʼthi ñajunʼ rí ni̱ʼkha̱ gáʼni Cristo mu mambanúu̱ rí niʼkudaminaʼ maʼni Diúu̱. Niʼthí rí mbaʼa enii rí na̱ʼkha̱ náa Xtángoo nijuiʼtáriyaaʼ nákha ginii. Mbá xkrida, xujkhúʼ bi̱ nikarámiinʼ nákha ginii nandoo gaʼthu̱u̱n dí xóo má makhañúu Jesús nda̱wa̱á, ga̱jma̱a̱ numuu rúʼko̱ mbájkhu má gáʼni mba̱a̱ a̱jkiu̱u̱n Diúu̱ kaʼyuluʼ numuu aʼkhá ndriguluʼ (Hebreos 10:1-4). Dí nikháñu Cristo, Diúu̱ niʼni rí Xtángoo rúʼko̱ ni xagiʼdo numuu (Colosenses 2:13-17; Hebreos 8:13).

Mbá congregación Cristiana naʼdxuun náa gixnuu i̱yi̱i̱ʼ rí niʼnirámáʼ Pablo

Ikhoo dí xóo naguma mámbá congregación. Xa̱bekha bi̱ nakanun ñajunʼ náa congregación gíʼmaa muni o makuwíín xóo dí naʼthí náa Biblia xúʼko̱ má musngáa májánʼ ajngá rawunʼ Diúu̱ (1 Timoteo 3:1-10, 12, 13; Tito 1:5-9). Xúʼko̱ má ma̱ngoo, i̱mba̱ dí gíʼdo wéñuʼ numuu rí xa̱bi̱i̱ Diúu̱ xuniñaʼ ragimbíin, ikhaa rúʼko̱ ñajunʼ ikhoo dí gíʼdo wéñuʼ numuu dí na̱ʼkha náa Diúu̱ ga̱jma̱a̱ rí muxnamijna sie̱khi̱i̱ (1 Corintios 14:26, 31; Hebreos 10:24, 25).

Índo̱ Pablo niʼnirámáʼ i̱mbó i̱yi̱i̱ʼ ikhaa ma ñajunʼ —dí raga̱jma̱ i̱yi̱i̱ʼ ndrígóo Timoteo— guʼwáejua̱nʼ ma kraʼaa mbu̱júu̱ náa Roma ma̱ngoo gíʼthu̱u̱n ndiéjunʼ guturigun ga̱jma̱a̱ numuu. I̱ndó nguathi̱i̱n cristiano bi̱ gakhi̱i̱ a̱jkiu̱ún nigun guyaa. Numuu dí apóstol ndiʼyoo ma dí na̱ʼkha̱nú mijngii dí makhañúu, niʼthí: «Huamboʼ-má netaraʼja ajŋgo Dios jma ajndo xoguiʼ siaquiyuʼ, ski jndo aqui nigiʼnuginuʼ, ajndu naca mbiʼji ri Ica nendxaʼjueʼ ri ica huamboʼ xugui-rá, ga inu-ma taniŋu ri siaquiyu aʼtiunʼ [o fe] naʼ ica» (2 Timoteo 4:7). Mbáa nikháñu nda̱wa̱á, índo̱ niʼthí ajngáa rígi̱. Mu mbaʼa i̱yi̱i̱ʼ rí niʼniráʼmáʼ nimbañun ma xúʼko̱ cristiano bi̱ gajkhun mu muni má xúʼko̱ ñajunʼ Diúu̱, asndu má xúgi̱ nañamba.

(Na̱ʼkha̱ náa Romanos; 1 Corintios ma̱ngaa 2 Corintios; Gálatas; Efesios; Filipenses; Colosenses; 1 Tesalonicenses ga̱jma̱a̱ 2 Tesalonicenses; 1 Timoteo ga̱jma̱a̱ 2 Timoteo; Tito; Filemón; ga̱jma̱a̱ Hebreos.)

TSÁA LÁ ÑAJUNʼ TSÍGAʼ BI̱ NIJUIʼTÁ MA̱ʼKHA̱ RÁ.

Nda̱wa̱á rí nikieʼkhúu̱n Adán ga̱jma̱a̱ Eva, Diúu̱ niʼthúu̱n a̱bu̱nʼ: «Mani rí ikháánʼ ga̱jma̱ʼ a̱ʼgu̱ muguaʼdála sia̱nʼ, bi̱ gaguwáʼ náa ikháánʼ ga̱jma̱a̱ bi̱ gaguwáʼ náa ikhaa muguaʼdá sia̱nʼ. Ikhaa makujmbi̱i̱ náa edxa̱a̱ʼ ma̱ngoo ikháánʼ matanigawíínʼ náa nixtuun rajkhúu» (Génesis 3:15). Náa i̱yi̱i̱ʼ Rí huasjŋgajma Juan 12:9, naʼthí rí «abunʼ huayu» ni̱ndxu̱u̱ Gixa̱a̱. Ma̱ngoo nangua nijuiʼyáá tsáa gáni̱ndxu̱u̱ Tsígaʼ bi̱ makujmbi̱i̱ edxu̱u̱ a̱bu̱nʼ, xóo nijkha̱ ranújngoo tsiguʼ xúʼko̱ má nijkha̱ rasngájma Biblia tsáa ñajunʼ.

A̱jma̱ míí tsiguʼ nda̱wa̱á rí Adán ga̱jma̱a̱ Eva nixudamijna aʼkhá, Jeobá niʼthí rí bi̱ nijuiʼtá ma̱ʼkha̱ Gáʼnikáwáánʼ ma̱ʼkha̱ náa tsígoʼ Abrahán (Génesis 22:17, 18). Tsiguʼ nda̱wa̱á, apóstol Pablo niʼthí rí bi̱ tsígaʼ bi̱ nijuiʼtá ma̱ʼkha̱ ikhaa má ni̱ndxu̱u̱ Mesías o Jesús (Gálatas 3:16). Rí nikháñu Cristo nisngájma rí nigawunʼ «nixtuun rajkhúu» rí nijuiʼtáriyaaʼ náa Génesis 3:15. Mú, Diúu̱ nikuxi̱i̱ Jesús «nigabi̱i̱ niʼni̱i̱ espíritu» (1 Pedro 3:18, NM).

Xúʼko̱ má Diúu̱ niʼthí rí tsígaʼ magiʼdiin eʼwíínʼ bi̱ magida̱ʼ maʼtáñajunʼ gajmíi̱n, ikhíínʼ má bi̱ 144,000 xa̱bu̱ numbaaʼ bi̱ mutañajunʼ mangiin náa Reino bi̱ nijuiʼtá (Gálatas 3:29; Rí huasjŋgajma Juan 14:1). Índo̱ gakháñun, magabi̱i̱n mu magúun makuwa mekhuíí mani̱ndxu̱ún espíritu, ma̱ngaa mutañajunʼ gajmiún Cristo (Romanos 8:16, 17).

Xóo Rey mekhuíí, Jesús gíiʼ mijngii dí maʼnigámbáa Gixa̱a̱ gajmíi̱n bi̱ naguwáʼ kidxuuʼ, ikhíínʼ ni̱ndxu̱ún xa̱bu̱ wéñiʼ ga̱jma̱a̱ xa̱bu̱ xkawiinʼ bi̱ numbayíí Satanás (Juan 8:44; Efesios 6:12). Xa̱bu̱ Ñajunʼ ndrígóo ma̱ʼkha̱ kayóo rí tsímáá ga̱jma̱a̱ rí gagi náa xa̱bu̱ bi̱ gakuwá jmbu náa inuu Diúu̱. Nda̱wa̱á kayuu, xúʼko̱ Jesús gakhujmbi̱i̱ «náa edx[u̱u̱]» a̱bu̱nʼ, maʼnigámbáa (Hebreos 2:14).