KÍXNUU 2
Ku̱ba̱ʼ mitsaan rí nindáti̱ga̱
Mbáa ángel bi̱ táʼnimbo̱o̱ niʼnirájaʼ Adán ga̱jma̱a̱ Eva mu xúnimbu̱ún rí naʼthí Diúu̱.Ikhú nigi̱ʼdu̱u̱ aʼkhá ga̱jma̱a̱ rí nakháñulu
MBA̱YU̱U̱ʼ mbiʼi ginii nákha xóó tsekúwi̱i̱n xa̱bu̱ numbaaʼ, Diúu̱ niʼnii ángeles, espíritu bi̱ tsekujmin. Mbáa dí ikhíínʼ —dí nda̱wa̱á nigumbiʼyuu Satanás o Gixa̱a̱— bi̱ táʼnimbo̱o̱, niʼnindu̱wa̱ʼ Eva, mú mikhu̱ xndúu ixi̱ rí Diúu̱ niʼthúún rí xuphu̱.
Satanás nijmiuu mbáa a̱bu̱nʼ mú maʼthúu̱n Eva rí Diúu̱ narugomu̱ʼu̱n mbá rí májánʼ rí makanun ikhíínʼ. Ma̱ngoo niʼthúu̱n rí á mu naʼphu̱ xndúu ixi̱ rí kiʼthúún rí xúphu̱ maxákháñun; índo̱ niʼthí rígi̱ nindoo gáʼthúún rí Diúu̱ niʼni xtujtaa. Gixa̱a̱ niʼni rí mbuyáá dí mitsaan rí xúnimbu̱ún rí gáʼthí Diúu̱ rí makánun ku̱ma̱ kiejunʼ ma̱ngaa muni asndu ndiéjunʼ ma dí eñun. Mú xúgíʼ rígi̱ ñajunʼ xtujtaa: Rígi̱ ñajunʼ timbá xtujtaa. Bi̱ mixtujtaa wéñuʼ niʼni graxe̱ rígi̱: Lá kaʼyoo Diúu̱ maʼtáñajuunʼ numbaaʼ ráʼ. Lá jmbu ni̱ndxu̱u̱ xtángoo ndrígóo xáʼ. Lá mambáyuluʼ rí muʼnimbuluʼ rá.
Eva niʼnimbo̱o̱ xtujtaa ndrígóo Satanás. Ikhú nigíʼdu̱u̱ nigua̱ʼa̱ mikhu̱ xndúu ixi̱ asndu náa nijkha̱kayáa mikhu̱. Nda̱wa̱á nixnúu ajmbio̱o̱ mikhu̱. Asndu xóo ragíʼdo wéñuʼ numuu rí ni̱ni̱, mú rúʼko̱ nini̱ndxu̱u̱ aʼkhá. Ikhíínʼ ndiyáá májánʼ ndiéjunʼ ni̱ni̱: Ninigaʼduun dí maʼtáñajúúnʼ bi̱ Niʼnii, bi̱ nixnún xúgíʼ, ga̱jma̱a̱ rí makuwíín xaguaʼdáá aʼkhá.
«Ikhaa makujmbi̱i̱ náa edxa̱a̱ ma̱ngoo ikháánʼ matanigawíínʼ náa nixtuun rajkhúu.» (Génesis 3:15)
Diúu̱ nindu̱ʼu̱u̱n dí mbuyáá ndiéjunʼ ni̱ni̱ xa̱bu̱ bi̱ túnimbu̱ún. Ginii niʼthí rí nda̱wa̱á makunguanʼ —mbáa Ada̱ o Tsígaʼ bi̱ maxtáa nda̱wa̱á— bi̱ maʼnigámbáa a̱bu̱nʼ bi̱ niʼninduwaʼ Eva bi̱ nagumbiʼyuu Satanás. Jeobá niʼni dí Adán ga̱jma̱a̱ Eva xákhañun nacha̱, xúʼko̱ káʼnii nisngájma rí niʼni mba̱a̱ a̱jkiu̱u̱n kaʼñun e̱ji̱i̱n bi̱ gágumiin nda̱wa̱á. Ndiéjunʼ lá guguaʼti̱i̱n bugi rá. Jeobá niʼthí rí bi̱ gákunguanʼ maʼningudi̱i̱ dí raʼkhí dí nirígá ga̱jma̱a̱ numuu rí ikhíínʼ túnimbu̱ún náa Edén. Mú, tsáa lá gánindxu̱u̱ bi̱ Ma̱ʼnikáwáánʼ, ma̱ngoo xú káʼnii gáʼnimbánuu ga̱jma̱a̱ numuu rí Diúu̱ makunguanʼ xá. Rígi̱ nijkha̱ raxti̱ʼña̱a̱ mañuu, índo̱ nijkha̱ raguma Biblia.
Nda̱wa̱á kayuu, Diúu̱ nixkriyaaʼ Adán ga̱jma̱a̱ Eva náa Ku̱ba̱ʼ Mitsaan. Índo̱ nikuwa rexa̱a̱ ndiyóóʼ rí muñajunʼ ga̱khi̱i̱ wéñuʼ mu ma̱ndoo muxkamaa ganitsu. Ikhú Eva nigiʼdaa ti̱mbáa aʼdióo, Caín. Nda̱wa̱á, Adán ga̱jma̱a̱ Eva niguaʼdiin eʼwíínʼ e̱ji̱n jiama ga̱jma̱a̱ wa̱ʼxa̱ʼ, mbáa dí ikhaa nimbiʼyuu Abel, ma̱ngaa Set, náa ni̱ʼkha̱ Noé.
(Na̱ʼkha̱ raʼthí náa Génesis tsinaʼ mba̱ʼu̱ 3 ga̱jma̱a̱ 5; ma̱ngaa Rí huasjŋgajma Juan 12:9.)